Jack ọrhẹ Marie-Line i ha owian ọkobaro avwẹ ẹgbukpe 1988. Aye e kiki wene lele erhirhiẹ ọkpokpọ, aye i ji rhiabọ dede ewian ekpokpọ buebun uvuẹn Guadeloupe ọrhẹ French Guiana ne. Oghọn Ukoko i France yọ hẹrote ẹkwotọre enana. Jene rhonmie i Jack ọrhẹ Marie-Line.

Me yọ lẹrherẹ are tuẹn owian ọkobaro rhọ?

Marie-Line: Ọke mia dua uvuẹn Guadeloupe, mie lele izu mẹ ro rhiẹ Oseri Jehova ro vwo oruru omamọ riẹ aghwoghwo. Mi vwo ẹguọlọ kpahen ihworho, omarana ọke mia ruotọre nẹ isukuru uvuẹn ẹgbukpe 1985, ni mi tuẹn owian ọkobaro rhọ.

Jack: Ọke mia ha uphuphẹn, ekobaro yi mai rhiẹ igbehian mẹ. Ame i rhe vwo omeronmo obẹ isukuru, ni mie fiobọrhọ ọkobaro ibiọke. Uvuẹn ehion ọkprughwre ezẹko, ame na ruẹ ibọsu ye kwomakugbe ekobaro na uvuẹn ekete aye e ghwoghwo. Ame e ghwoghwo ọsoso ẹdẹ na, orho ru ame ne romonma. Ọ merhoma omamọ!

O jiri-i, ọke mia rọnmọ Marie-Line hin uvuẹn ẹgbukpe 1988, ni mi ta rẹn oma mẹ, ‘Ame e vwo oborẹ ọ da ame obọ jẹ-ẹ, o fori nẹ ame i ru bunrhọ uvuẹn owian Uvie na.’ Ni mi homaba Marie-Line uvuẹn owian ọkobaro na. Ọke ẹgbukpe owu ọ vrẹn nẹ ọke ame e riẹ isukuru ekobaro, na ha use rẹn ame nẹ ame i rhiẹ ekobaro oghẹnrensan. Ame i riamerhen ewian sansan uvuẹn Guadeloupe, bọmọke a ki ha use rẹn ame ya ga uvuẹn French Guiana.

E wene owian are ọgbọ buebun ne uvwre ẹgbukpe buebun rhe na. Me yọ ha userhumu rẹn are kiki rienrioma rhẹ erhirhiẹ ekpokpọ enana?

Marie-Line: Imizu ri ha Oghọn Ukoko rọ ha uvuẹn French Guiana i rheri taghene ekete i Baibol rọ mai je ame yẹ Isaiah 6:8. Omarana, aye i rhe se ame, aye na ta ọrẹ iruẹn, “Are i karorhọ ekete i Baibol rọ mai je are?” Ame i rheri taghene a samọ wene owian ame phẹrẹkpẹ. Ame ni na ta, “Ame na! Dje Ame!”

Ame i vwa ha ewian ame i ru vrẹn ne vwanvwọn ọrẹ ame a wian vwana-a, fọkime  ọnọ lẹrhẹ ame je vwo ọdaremẹro kpahen owian ọkpokpọ na. Ame a ji damoma rhe imizu ame i vware na.

Jack: Ọke owu, igbehian ame ezẹko ni ta rẹn ame taghene ame i vwa kwa-a, fọkime aye i guọlọre nẹ ame i rhirhiẹ kẹrẹ aye. Ọrẹn ọke ame a kwa hin, omizu owu nọ karorhọ ame ẹmro i Jesu rọ ha uvuẹn Matthew 13:38, rọ tare: “Ikebi na yẹ akpọ na.” Omarana, owian ame orho wene, ame na karorhọ oma ame taghene ikebi owu ọvo yẹ ame i havwọ, o toro ekete ame i havwọ uvuie-en. Habaye, ihworho na ọrhẹ ekogho ame e ghwoghwo na yi mai ghanren!

Ame i rhe riẹ okogho ọkpokpọ, ame na mẹriẹn taghene oma ọ merhen ihworho ri ha avwaye. Omarana, ame na damoma nyerẹn akpọ ame jerẹ ihworho re rhirhiẹ avwaye. Emaren na ọnọ sabu vẹnẹ, ọrẹn ame a riẹ oborẹ aye a ria, ji da oborẹ aye a da, orhianẹ o serhọ rẹn ugboma ame. Ame a damoma ta omamọ ẹmro kpahen kowian kowian ra yẹrẹ ame.

Marie-Line: Ame i ji yono ekwakwa buebun mie imizu ri ha avwaye. Mi karorhọ oborẹ ọ phiare ọke ame e tu te French Guiana. Oso ọduado nọ rhọ, ame ne roro taghene ame ina hẹrhẹ nẹ oso na ọ ka vwẹre ame ine ki riẹ aghwoghwo. Ọrẹn, omizu ọmase owu nọ nọren mẹ, “Ana sabu riẹ aghwoghwo?” Ni mi nọ riẹn, “Marhẹ ene ru nyarhẹn?” Nọ ta mẹ, “Kpare achichan, ana ghwa idjighere.” Omarana, ni mi yono oborẹ a mọren achichan ji ghwa idjighere ukwọgbọ. Mi vwe yono ọrana bi, manẹ mi vwa sabu ghwoghwo uvuẹn ọke oso-o!

Ọgbọ 15 yẹ are i kwa ne. Are i vwo oborẹ are ina sabu ta rọ nọ ha userhumu rẹn awọrọ ra ji kwa?

Marie-Line: Ọ bẹn ra na kwa. Ọrẹn, ọ ghanranren ne wu guọlọ ekete ro fuoma ọke wu rhe nẹ aghwoghwo rhe ne.

Jack: Mia rharhumu darẹ uvuẹn oghwa ọkpokpọ ame ine rhirhiẹ. Ọkezẹko, nime imizu ri ha oghọn ukoko i rheri taghene ame i rhirhiẹ avwaye ọke jijiri-i, aye i vwa ta mẹ, “Jack, wu vwe kpokpoma darẹ oghwa na-a!”

Marie-Line o rhe oborẹ a kwa omamọ! Ọ ya edẹ rhẹ kemru kemru ji fi aye rhẹ ekpeti, usuẹn edẹ na yẹ, “era ha wọ,” “erẹ obuvun,” “erẹ ukoli,” ọrhẹ edẹ erọrọ. Omarana, ame i rhe te oghwa ọkpokpọ ame, nọ lọhọ rẹ ame ina kwaphiẹ ekete ephian rhọ. Nọ ya kemru kemru  ri ha ekpeti owuowu rhẹ ọbe, neneyo ọ phẹrẹ rẹ ame ina mẹrẹn ekwakwa ame i guọlọre.

Marie-Line: Fọkime ame i yono oborẹ e mwuegbe ekwakwa, ame ne kiki tuẹn aghwoghwo rhọ.

Marhẹ are a kwaphiẹ ọke are rhọ lele neneyo are i sabu “wian owian aghwoghwo na vuọnvuọn”?—2 Tim. 4:5.

Marie-Line: Ki Mọnde ki Mọnde, ame e ronmoma ji mwuegbe uyono. Nẹ Tiusde nyarhẹn, ame ne riẹ aghwoghwo.

Jack: Dedevwo o vwo uchunu ọke ro fori nẹ ame i nyamwu kibiamo kibiamo, ame i vwa tẹnrovi ọrana-a. Owian aghwoghwo na yọ mai ghanren rẹn ame. Nẹ ọke ame e nẹ oghwa ye te ọke ame ina ghwẹrioma rhe, ame a damoma ghwoghwo rẹn ihworho ephian ame i vware.

Marie-Line: Ame i rhe riẹ ibiẹ akpẹriọ, mia ha itrati lele oma. Ihworho ezẹko e bru ame sa ji nekpẹn ẹbe ukoko na, dedevwo ame a ta rẹn aye taghene ame Iseri Jehova-a. Fọkiẹ ọnana, ame na damoma sẹ osẹme izede ro serhọ. Fọkime ihworho a djokarhọ ye.

Jack: Ame e ji se oseri nyoma ame e dje uruemru esiri rẹn ere rhirhiẹ kẹrẹ ame. Mia rhọro itele, tuẹ itele fughwẹ ji kwerhe ẹbe ri se rhẹ egodo na. Ere rhirhiẹ kẹrẹ ame a djokarhọ ọnana, ọkezẹko aye i vwa nọ mẹ, “Biko, wu na sabu yẹ mẹ i Baibol?”

Are i ghwoghwori uvuẹn ekogho ri ha ekete iseseri. Are i karorhọ emru oghẹnrensan wu guọlọ ta kpahen uvuẹn ugbo onya na?

Jack: Ekogho ezẹko uvuẹn Guiana a bẹn ete. Ọgbọ buebun uvuẹn ọkprughwre na, ame a ghwa imoto uvuẹn izede ibiobiomu ri seri te iroko 370 (600 km). Oborẹ ọ phiare ọke ame e riẹ amwa owu re se St. Élie ọ sẹre mẹ ẹro dẹ-ẹ. Ọ hare ame inọke buebun ame i ki ghwa imoto, ji ruẹ owọ te avwaye. Ihworho buebun re rhirhiẹ avwaye a guọlọ oro. Fọkiẹ ọdaremẹro aye i vwo kpahen ẹbe ukoko na, ezẹko ne toro oro harẹn ame! Owuọwọn orho te, ame ne dje ividio ukoko na owu rẹn aye. Ihworho buebun uvuẹn amwa na ya sa.

Marie-Line: Ro vwo jijiri na, na ta rẹn Jack nọ ha ẹmro Ẹkarorhọ Uhwu i Jesu phia uvuẹn amwa re se Camopi. Nẹ ame i sabu te avwaye, ame ni ha inọke buebun ghwa owọ ro vwo ẹjini uvuẹn Urhie re se Oyapock. Onya na ọ merhoma omamọ.

Jack: Urhie na orho mwuo ne, ekete ra zẹ gbangbanhon ina sabu rhe mwuofẹn. Mi na sabu ta wẹn taghene ọ merhoma ra mẹrẹn ekete ra zẹ gbangbanhon na. Nẹ ohworho rọ ghwa owọ ọ ki sabu ghwa avwaye vrẹn, ono vi tẹn ona omamọ. Ọrẹn, ugbo onya na ọ merhoma. Dedevwo Iseri Jehova awan 6 ọvo yi rhere, ọrẹn ihworho ri te 50 yi rhiẹ Ẹkarorhọ Uhwu i Jesu na, tobọ te ihworho Amerindian ezẹko.

Marie-Line: Omamọ iyẹnrẹn enana a hẹrhẹ iphuphẹn ri guọlọ ha akpenyerẹn aye ga i Jehova. O fori ne wu hẹroso i Jehova uvuẹn aruẹ erhirhiẹ erana, esegburhomẹmro ọnọ nọ nọ gbanhonrhọ. Ọgbọ buebun, ame a mẹrẹn oborẹ i Jehova ọ ha userhumu rẹn ame lele.

Are i yono edjadjẹ buebun ne. Ọ lọhọre are i ki yono edjadjẹ enana?

Jack: Ẹjo. Mi yono edjadjẹ na fọkime a guọlọ userhumu mẹ uvuẹn edjadjẹ enana. Mi tobọ ha uyono Oghwa Odẹrẹ na phia mi ki tobọ ruẹ isese i Baibol! Ne mi nọ omizu ọhworhare owu sẹ aye i vwẹruọ oborẹ mi tare. Nọ kpahenrhọ mẹ, “Ọkezẹko ame e vwẹruọ ẹmro ezẹko wu tare-e, ọrẹn wu damoma.” Emọvwerhe na ghini ọkpẹ userhumu mẹ. Mi rha djẹ edjadjẹ na sọ, aye na ta mẹ, ọrẹn imirẹghwa na i vwe kwe ta mẹ-ẹ. Mi yono ekwakwa buebun mie emọvwerhe na.

Marie-Line: Uvuẹn okogho owu, ihworho ezẹko mia ha i Baibol yono a djẹ edjadjẹ i French, Portuguese, ọrhẹ Sranantongo. * Omizu ọmase owu nọ ta mẹ taghene mi kiki ye yono ihworho ra djẹ edjadjẹ ri mai bẹn ha mẹ, orho ru mi gbe ye yono era djẹ edjadjẹ ri lọhọ mẹ. Ọke oru ni mi mẹrẹn oborẹ ọsoriẹ omizu na ọ ta omaran.

Ẹdukwẹdẹ, ni mi ha uyono i Baibol phia uvuẹn edjadjẹ i Sranantongo, ji ha edjadjẹ  i Portuguese yono ọwọrọ. Ọke mia tuẹn uyono ọreva rhọ, omizu ọmase na nọ ta mẹ, “Marie-Line, ọ họhọre taghene o vwo ibiẹ okpetu!” Ni mi mẹrẹnvwrurhe taghene mia ha edjadjẹ i Sranantongo yono ọmase onyẹ Brazil ukperẹ ono rhiẹ edjadjẹ i Portuguese!

Ihworho are i gare uvuẹn okogho aye, i vwo ẹguọlọ kpahen are omamọ. Marhẹ are i ru sabu tikẹrẹ imizu na?

Jack: Proverbs 11:25 ọ tare: “Kohworho kohworho rọ ha userhumu rẹn awọrọ ono fikparobọ.” Ame i vwe tiẹ rierhumu ame ina ha userhumu rẹn awọrọ-ọ. Sekpahen ẹruete Aghwẹlẹ Uvie na, ihworho ezẹko ni ta mẹ: “Nyajevwo nẹ ighwoghwẹmro na i ruie.” Ọrẹn, ni mia kpahanrhọ: “Mẹmẹ jẹ oghwoghwẹmro. Orho vwo owian ra guọlọ wian, are i ta mẹ.” Dedevwo ọwan ephian i guọlọ ọke rẹn oma ọwan ọkezẹko, ọrẹn ame a karorhọ owuowọnwan taghene o fo nẹ ọnana ọ lẹrhẹ ame ja ha userhumu rẹn awọrọ-ọ.

Marie-Line: Ame a damoma dje ọdamẹ omobọ rẹn imizu ukoko na. Nyoma izede ọnana, ame ne rhe ọke aye a guọlọ na ha userhumu rẹn aye ni emọ aye, yanghene lele aye kpare emọ na nẹ isukuru. Ame a kwaphiẹ ọke rhọ neneyo ame i sabu ha userhumu rẹn aye. Ọnana nọ lẹrherẹ ame tikẹrẹ aye rhọ, fọkime ame i vwo omwemẹ ame ina ha userhumu phia.

Ebrurhọ ego are i mẹrẹn ne fọkime are a ga uvuẹn ekete ra mai guọlọ userhumu?

Jack: Owian Uvie na vuọnvuọn ọ ha ebrurhọ vwe ame ne. Ọ lẹrherẹ ame sabu mẹrẹn emama igbevwunu i Jehova buebun ne. Dedevwo o vwo ebẹnbẹn sansan, ọrẹn ame i vwo ẹhẹn ro te otọre fọkime ame i rheri taghene ihworho i Jehova, ina hobọtua ame.

Ọke mia ha idama, e mwurun me rhẹ ekanron obẹ French Guiana fọkiẹ atamwu mẹ. Mie roro taghene mi na rharhumu ya wian owian imishọnari obora-an, ji vwo uphẹn mi na kọn bru ihworho ri ha uvuẹn ekanro-on. Jehova o ghini tiobọnẹ ebrurhọ ye ghwologhwolo!

Marie-Line: Aghọghọ rọ maido mi vwori yẹ, ọrẹ mia ha userhumu rẹn awọrọ. Oma ọ merhen ame taghene ame a wian rẹn Jehova. Ọ ji lẹrhẹ ame tikẹrẹ owuowọnwan rhọ ne jerẹ esa ọrhẹ ane. Ọkezẹko, Jack nọ nọ mẹ sẹ ame ina sabu ha use rẹn esa ọrhẹ ane rẹ ẹhẹn aye o seriotọre nẹ aye i lele ame riẹ emaren kugbe. Ọgbọ buebun ni mia kpahanrhọ, “Ọrana ghwai oborẹ mie roro!” Omaran ọ phia lele.

Jack: Ro vwo jijiri na, na ta mẹ taghene mi vwo emiamo ikansa ọgbogbanhon. Dedevwo Marie-Line ọ vwọ guọlọ rhon yi-i, ọrẹn mia ta riẹn: “Ane mẹ, mi rhe hwu odẹrọsa na, mi rheri taghene ‘mia ho te-e.’ Ọrẹn mi rhe hwu, mi rheri taghene mi ha arhọ mẹ ruẹ ekwakwa ri ghanranren ji ga i Jehova.”—Gen. 25:8.

Marie-Line: Jehova ọ yẹrẹ ame owian ame i vwe fiẹrorhọ, ọ ji ha uphẹn rẹn ame sabu ruẹ ekwakwa buebun ame i vwe fiẹrorhọ. Akpenyerẹn ame ọ ghini vuọn rhẹ ekwakwa irhorhomu buebun. Ame ine riẹ ekete ephian rẹ ukoko i Jehova o djerẹ ame nya, fọkime ame i rheri taghene Jehova ọnọ ha userhumu rẹn ame!