Жак ӕмӕ Мари-Лин иумӕ ӕххӕстрӕстӕг лӕггад кӕнынц 1988 азӕй. Уыдон алкӕддӕр фӕархайынц, цӕмӕй ног уавӕртыл тагъд сахуыр уой, ӕмӕ уый фӕрцы Гваделупӕйы ӕмӕ Францийы Гвианӕйы бирӕ рӕтты лӕггад кодтой. Ацы бӕстӕтӕн ныр дзуапп дӕтты Францийы филиал. Цӕй ӕмӕ Жак ӕмӕ Мари-Линмӕ цалдӕр фарстайы раттӕм.

Цӕмӕн райдыдтат ӕххӕстрӕстӕг лӕггад кӕнын?

Мари-Лин: Гыццылӕй-иу Гваделупӕйы арӕх мӕ мадимӕ ӕнӕхъӕн бон уацамынды уыдтӕн. Мӕ мад алкӕддӕр уыди зынгзӕрдӕ хъусынгӕнӕг. Ӕз адӕмы тынг уарзын, ӕмӕ скъола куы фӕдӕн, уӕд 1985 азы пионерӕй лӕггад кӕнын райдыдтон.

Жак: Ӕрыгонӕй-иу ӕдзух уыдтӕн ӕххӕстрӕстӕг лӕггадгӕнджытимӕ. Уыдон хъусын кӕнын тынг уарзтой. Ӕз-иу каникулты лӕггад кодтон ӕххуысгӕнӕг пионерӕй. Хатт-иу сабат ӕмӕ хуыцаубоны мӕ мадимӕ кӕнӕ иу ӕфсымӕримӕ автобусыл ацыдыстӕм, пионертӕ-иу кӕм лӕггад кодтой, уыцы территоримӕ. Ӕмӕ-иу семӕ ӕнӕхъӕн бон хъусын кодтам. Уый фӕстӕ та-иу денджызы былмӕ ацыдыстӕм. Уый диссаджы рӕстӕг уыд!

1988 азы Мари-Линимӕ нӕ цард баиу кодтам. Гъемӕ уый фӕстӕ мӕхицӕн загътон: «Сывӕллӕттӕ нын нӕй, кӕсинаг нын ничи ис, ӕмӕ нӕ цы хъыгдары фылдӕр лӕггад кӕнын?» Мари-Лин уӕдмӕ дӕр пионерӕй лӕггад кодта. Ӕмӕ ӕз дӕр пионерӕй лӕггад кӕнын райдыдтон. Иу азы фӕстӕ нӕ фӕхуыдтой пионерты скъоламӕ, ӕмӕ нӕ уый фӕстӕ сӕрмагонд пионертӕй снысан кодтой. Цалынмӕ нӕ Францийы Гвианӕмӕ фӕхуыдтой, уӕдмӕ Гваделупӕйы балӕггад кодтам цалдӕр раны, ӕмӕ нӕ лӕггадӕй тынг райгонд уыдыстӕм.

Сымах бирӕ рӕтты лӕггад кодтат. Цы уын баххуыс кӕны, цӕмӕй ног уавӕртыл сахуыр уат?

Мари-Лин: Францийы Гвианӕйы Вефилы ӕфсымӕртӕ зыдтой, нӕ зӕрдӕмӕ ӕппӕты тынгдӕр кӕй цӕуы Исай 6:8 стих. Ӕмӕ-иу нӕм телефонӕй куы ’рбадзырдтой, уӕд-иу нын арӕх хынджылӕггӕнгӕ афтӕ бакодтой: «Уӕ зӕрдӕмӕ ӕппӕты тынгдӕр чи цӕуы, уыцы стих ма хъуыды кӕнут?» Мах-иу уайтагъд бамбӕрстам, ӕндӕр ранмӕ нӕ кӕй ӕрвитынц. Ӕмӕ-иу загътам: «Мӕнӕ мах! Мах арвитут!»

Ӕндӕр ранмӕ куы ’рцӕуӕм, уӕд иу бынат иннӕимӕ нӕ фӕбарӕм. Афтӕ куы кӕнӕм, уӕд нын нӕ  лӕггад ног бынаты циндзинад нӕ хӕсдзӕн. Уымӕй уӕлдай ма фӕархайӕм, цӕмӕй уымы хотӕ ӕмӕ ’фсымӕртимӕ базонгӕ уӕм.

Жак: Раздӕр-иу ӕндӕр ранмӕ куы цыдыстӕм, уӕд-иу не ’мбӕлттӕй иуӕй-иуты нӕ фӕндыд, цӕмӕй ацыдаиккам, ӕмӕ-иу нын уый зӕгъгӕ дӕр кодтой. Фӕлӕ Гваделупӕйӕ куы цыдыстӕм, уӕд нын иу ӕфсымӕр нӕ зӕрдыл ӕрлӕууын кодта Йесойы ныхӕстӕ, Матфейы 13:38 стихы фыст чи сты, уыдон, хуым у дуне, зӕгъгӕ. Гъемӕ нӕ ӕндӕр ранмӕ куы снысан кӕнынц, уӕд нӕхицӕн нӕ зӕрдыл ӕрлӕууын кӕнӕм, кӕмфӕнды ма лӕггад кӕнӕм, уӕддӕр уый уыцы иу «хуым» кӕй у. Ӕппӕты ахсджиагдӕр сты, дӕ территорийы чи цӕры, уыцы адӕм!

Ног бынатмӕ куы ’рцӕуӕм, уӕд ӕй фенӕм, адӕм дзы сӕ уавӕрты дӕр царды кӕйттӕ кӕй кӕнынц. Ӕмӕ мах дӕр уыдонау цӕрыныл фӕархайӕм. Сӕ хӕринӕгтыл ахуыр нӕ вӕййӕм, фӕлӕ, уыдон цы фӕхӕрынц ӕмӕ цы фӕнуазынц, мах дӕр уыдӕттӕ фӕхӕрӕм ӕмӕ фӕнуазӕм, ӕрмӕст нӕ хъус фӕдарӕм сыгъдӕгдзинадмӕ. Кӕм фӕлӕггад кӕнӕм, уыцы бынаты тыххӕй искӕмӕн куы фӕдзурӕм, уӕд ницӕмӕй фӕхъаст кӕнӕм ӕмӕ дзы хорзӕй цы ис, уый кой фӕкӕнӕм.

Мари-Лин: Стӕй бынӕттон хотӕ ӕмӕ ’фсымӕртӕй бирӕ цӕуылдӕрты сахуыр вӕййӕм. Хъуыды йӕ кӕнын, Францийы Гвианӕмӕ куы ’рцыдыстӕм, уӕд мыл цы хабар ӕрцыд, уый. Фӕнд кодтам хъусын кӕнынмӕ ацӕуын, фӕлӕ тынг уарыд, ӕмӕ ’нхъӕлдтам, къӕвда куы банцайа, уӕд ацӕудзыстӕм. Фӕлӕ мӕ иу хо афарста: «Цӕй цы, цӕуӕм?» Ӕз ын дисгӕнгӕ афтӕ бакодтон, зӕгъын, куыд. Уӕд мын уый афтӕ: «Дӕ зонтик райс ӕмӕ ацӕудзыстӕм велосипедтыл». Афтӕ сахуыр дӕн зонтикыл хӕцгӕ велосипедыл цӕуын. Куы нӕ сахуыр уыдаин, уӕд-иу, ӕвӕццӕгӕн, къӕвдаты афон хъусын кӕнынмӕ ӕппындӕр нӕ цыдаин.

Уӕ бынат иу-15 хатты аивтат. Цавӕр уынаффӕтӕ раттиккат, ӕндӕр ранмӕ ацӕуын кӕй фӕнды, уыдонӕн?

Мари-Лин: Цӕрӕнбынат ивын алы хатт ӕнцон нӕ вӕййы. Фӕлӕ тынг ахсджиаг вӕййы, хӕдзары ад дын чи кӕндзӕн ӕмӕ уацамынды фӕстӕ дӕ бон дӕ фӕллад суадзын кӕм уыдзӕн, ахӕм цӕрӕнбынат ссарын.

Жак: Кӕм ӕрцӕрӕм, уыцы хӕдзар мидӕгӕй чъырӕй сцӕгъдын. Филиалы чи лӕггад кӕны, уыцы ӕфсымӕртӕ куы фӕзонынц, кӕцыдӕр бынаты бирӕ кӕй нӕ бафӕстиат уыдзыстӕм, уӕд мӕ хатт бафӕдзӕхсынц: «Жак, ацы хӕдзармӕ ма бавнал!»

Мари-Лин дзауматӕ ӕмбырд кӕнынмӕ тынг дӕсны у. Алцыдӕр къоппыты нывӕры ӕмӕ сыл ныффыссы, зӕгъӕм, «ваннӕ», «уат», «къухни». Ӕмӕ нӕ ног  бынатмӕ куы ’рцӕуӕм, уӕд ӕй фӕзонӕм, къоппытӕ кӕдӕм хъӕуы хӕссын, уый. Стӕй ма ныффыссы, алы къоппы дӕр цы ис, уый, ӕмӕ нӕ цы фӕхъӕуы, уый уайтагъд ссарӕм.

Мари-Лин: Алцыдӕр пълан кӕнын кӕй сахуыр стӕм, уый фӕрцы нӕ бон вӕййы уайтагъд нӕ лӕггадмӕ бавналын.

Уӕ рӕстӕг куыд пълан кӕнут, цӕмӕй уӕ лӕггады рохуаты мацы уадзат? (2 Тим. 4:5).

Мари-Лин: Къуырисӕры улӕфгӕ фӕкӕнӕм, стӕй ӕмбырдтӕм фӕцӕттӕ кӕнӕм. Дыццӕгӕй фӕстӕмӕ та фӕцӕуӕм хъусын кӕнынмӕ.

Жак: Кӕд нӕ сахӕтты нормӕ ӕххӕст кӕнын хъӕуы, уӕддӕр ууыл ӕгӕр нӕ фӕхъуыды кӕнӕм. Кӕй лӕггад кӕнӕм, уый нын у ӕппӕты сӕйраг. Хӕдзарӕй куы рахизӕм, уӕдӕй, хӕдзармӕ куы ’рбаздӕхӕм, уӕдмӕ фӕархайӕм, цӕмӕй-иу, кӕуыл фембӕлӕм, уыцы адӕмимӕ аныхас кӕнӕм.

Мари-Лин: Иуӕй-иу хатт Жакимӕ хӕринӕгтӕ райсӕм, цӕмӕй ӕддейӕ искуы абадӕм. Ӕмӕ мемӕ алы хатт дӕр буклеттӕ дӕр рахӕссын. Иуӕй-иутӕ нӕм ӕрбацӕуынц ӕмӕ нӕ публикацитӕ ракурынц, афтӕмӕй та сын зӕгъгӕ дӕр нӕ фӕкӕнӕм, Йегъовӕйы Ӕвдисӕнтӕ кӕй стӕм, уый. Уымӕ гӕсгӕ фӕхъуыды кӕнӕм, нӕ уӕлӕ цы скӕнӕм ӕмӕ нӕхи куыд дарӕм, ууыл. Адӕм уыдӕттӕм тынг кӕсынц.

Жак: Фӕархайӕм ма, цӕмӕй хорз сыхӕгтӕ уӕм, ӕмӕ уымӕй дӕр ӕвдисӕм, чи стӕм, уый. Нӕ хӕдзары раз гӕххӕттытӕ ӕппӕрст куы вӕййы, уӕд сӕ сисын ӕмӕ сӕ бырӕттӕм аппарын. Стӕй хӕдзары алыварс сыфтӕр ӕрӕмбырд кӕнын. Нӕ сыхӕгтӕ уынынц уыцы хъуыддӕгтӕ, ӕмӕ нӕ хатт Библи дӕр ракурынц.

Арӕх фӕхъусын кӕнут дард рӕтты. Уӕ бон у исты цымыдисаг хабар радзурын?

Жак: Гвианӕйы иуӕй-иу рӕттӕм адӕймаг зынтӕй бахӕццӕ вӕййы. Арӕх нӕ къуыримӕ бахъӕуы 600 километры ӕвзӕр фӕндӕгтыл цӕуын. Уӕлдай тынгдӕр бахъуыды кодтон нӕ балц Сент-Елимӕ (ис Амазонийы хъӕдты). Уырдӕм нӕ цӕуын бахъуыд цалдӕр сахаты, ӕвзӕр фӕндӕгтыл цӕуынӕн чи у, ахӕм машинӕйыл, стӕй лодкӕйыл. Уым цӕрӕг адӕмӕн сӕ фылдӕр уыдысты сызгъӕринагурджытӕ. Уыдон нӕ нӕ публикациты тыххӕй афтӕ бузныг уыдысты, ӕмӕ нын мысайнагӕн радтой гыццыл сызгъӕрины къӕрттытӕ! Изӕрӕй сын равдыстам нӕ видеотӕй иу. Бирӕ адӕм ӕрбацыд.

Мари-Лин: Цалдӕр азы размӕ Жакы раныхасимӕ фӕхуыдтой Ӕрымысӕн изӕрмӕ Камопимӕ. Уырдӕм цыдыстӕм лодкӕйыл цӕугӕдон Ояпокыл. Фӕцыдыстӕм цыппар сахаты. Ахӕм балцӕн ферох кӕнӕн нӕй.

Жак: Дон арф кӕм нӕу, уым цӕугӕдоны гуылфӕнтӕ тынг тӕссаг вӕййынц. Фӕлӕ сӕ хӕстӕгмӕ куы фенай, уӕд сӕм кӕсгӕйӕ баззайдзынӕ. Лодкӕ чи тӕры, уый хъуамӕ ахӕм рӕтты цӕуын хорз зона. Фӕлӕ уый диссаджы балц уыд! Ӕрымысӕн изӕрмӕ чи ’рбацыд, уыдонӕй Йегъовӕйы Ӕвдисӕнтӕ ӕрмӕстдӕр 6 уыдысты. Ӕдӕппӕтӕй та ’рбацыд 50 адӕймаджы бӕрц, ӕмӕ се ’хсӕн уыд америкаг индейӕгтӕ дӕр!

Мари-Лин: Ӕрыгӕтты Йегъовӕйы хъуыддаджы фылдӕр аразын куы фӕнда, уӕд уыдоныл дӕр ахӕм цымыдисаг хабӕрттӕ цӕудзӕн. Ахӕм уавӕрты хъуамӕ дӕ зӕрдӕ Йегъовӕйыл дарай, ӕмӕ-иу дӕ уырнындзинад бафидар уыдзӕн. Мах арӕх фенӕм, Йегъовӕ нӕ царды куыд архайы, уый.

Сымах цалдӕр ӕвзаджы сахуыр кодтат. Ӕвӕццӕгӕн, ӕвзӕгтӕм хорз арӕхсут.

Жак: Бынтон афтӕ нӕу. Уыцы ’взӕгтӕ сахуыр кодтон, цӕмӕй мӕ бон уыдаид хъусын кӕнын ӕмӕ ӕмбырдӕн ӕххуыс кӕнын. Иухатт мӕ бахъуыд «Хъахъхъӕнӕн мӕсыджы» ахуыр сранан-тонгойыл * ауадзын, нырма мын Библийӕ скъуыддзаг бакӕсыны хӕслӕвӕрд дӕр нӕ радтой, афтӕмӕй! Уый фӕстӕ иу ӕфсымӕры афарстон, зӕгъын мын куыд рауад. Уый мын афтӕ: «Иуӕй-иу хатт дӕ не ’мбӕрстам, фӕлӕ алцыдӕр тынг хорз уыд». Сывӕллӕттӕ мын тынг ӕххуыс кодтой. Исты-иу раст куы нӕ загътон, уӕд-иу мӕ бараст кодтой, стыртӕ та-иу мын ницы дзырдтой. Сывӕллӕтты фӕрцы бирӕ цыдӕртӕ базыдтон.

Мари-Лин: Иу ран мӕ Библийы ахуыртӕ уадзын хъуыди французаг ӕмӕ португайлаг ӕвзӕгтыл, стӕй сранан-тонгойыл. Иу хо мын ахӕм уынаффӕ радта, зӕгъгӕ, дам, боны мидӕг Библийы ахуыртӕ алыхуызон ӕвзӕгтыл куы уадзай, уӕд, дам-иу райдай, ӕвзӕрдӕр кӕй зоныс, уыцы ӕвзагӕй ӕмӕ фӕу, ӕппӕты хуыздӕр кӕй зоныс, уыцы ӕвзагӕй. Ӕмӕ йӕ тагъд бамбӕрстон, афтӕ мын цӕмӕн загъта, уый.

 Иу бон хъуамӕ Библийы ахуыртӕ ауагътаин сранан-тонгойыл ӕмӕ португайлаг ӕвзагыл. Фыццаг уал ауагътон сранан-тонгойыл. Уый фӕстӕ та ацыдтӕн, португайлаг ӕвзагыл кӕимӕ ахуыр кодтон, уыцы сылгоймагмӕ. Нӕ ахуыр куы райдыдтам, уӕд, мемӕ чи уыд, уыцы хо мын афтӕ бакодта: «Мари-Лин, ӕнхъӕлдӕн дӕ не ’мбары». Уӕд ӕй бамбӕрстон, бразилиаг сылгоймагимӕ португайлаг ӕвзаджы бӕсты сранан-тонгойыл кӕй дзырдтон!

Кӕимӕ фӕлӕггад кӕнут, уыцы хотӕ ӕмӕ ’фсымӕртӕ уӕ тынг бауарзынц. Цы уын баххуыс кӕны, цӕмӕй-иу семӕ балымӕн уат?

Жак: Ӕмбисӕндты 11:25 стихы фыст ис: «Рӕдау адӕймаг бафсӕддзӕн хорздзинӕдтӕй». Мах нӕ рӕстӕг ӕмӕ нӕ хъарутӕ иннӕтӕн не ’вгъау кӕнӕм. Паддзахады залы исты саразын куы фӕхъӕуы, уӕд мын иуӕй-иу ӕфсымӕртӕ фӕзӕгъынц: «Хъусынгӕнджытӕ йӕ бакӕндзысты». Фӕлӕ сын ӕз фӕзӕгъын: «Омӕ ӕз дӕр хъусынгӕнӕг дӕн. Ӕмӕ кӕд исты саразын хъӕуы, уӕд мӕн дӕр фӕнды баххуыс кӕнын». Кӕй зӕгъын ӕй хъӕуы, алы адӕймаджы дӕр фӕхъӕуы йӕхицӕн дӕр рӕстӕг ссарын. Фӕлӕ арӕх нӕхицӕн фӕзӕгъӕм, уый нӕ кӕй хъуамӕ ма хъыгдара иннӕтӕн хорздзинад аразын.

Мари-Лин: Мах фӕархайӕм, нӕ хотӕ ӕмӕ не ’фсымӕртӕ куыд сты, уый базоныныл. Ӕмӕ уый фӕрцы фӕзонӕм, ӕххуыс кӕй хъӕуы, уый. Ӕмӕ кӕмӕндӕр йӕ сывӕллӕттӕм фӕкӕсын кӕнӕ сӕ скъолайӕ ӕрбакӕнын куы фӕхъӕуы, уӕд мах нӕ пълӕнттӕ фӕивӕм, цӕмӕй сын баххуыс кӕнӕм. Бахъуаджы сахат сӕ фарсмӕ балӕууӕм. Гъемӕ афтӕмӕй тынг балымӕн вӕййӕм.

Хъусынгӕнджыты ӕххуыс кӕм хъӕуы, уым кӕй лӕггад кодтат, уый фӕрцы цавӕр арфӕдзинӕдтӕй схайджын стут?

Жак: Ӕххӕстрӕстӕг лӕггад нын нӕ цард схъӕздыг кодта. Арӕх нӕ бон вӕййы фенын, Йегъовӕ цытӕ сфӕлдыста, уыдон, ӕмӕ нӕ дисы бафтауынц. Зындзинӕдтыл дӕр куыннӕ ӕмбӕлӕм. Фӕлӕ мах ӕгӕр нӕ фӕтыхсӕм, уымӕн ӕмӕ йӕ зонӕм, кӕмфӕнды ма уӕм, уӕддӕр Хуыцауы адӕм нӕ фарсмӕ кӕй уыдзысты.

Ӕрыгонӕй ӕфсадмӕ кӕй нӕ ацыдтӕн, уый тыххӕй Францийы Гвианӕйы бадтӕн ахӕстоны. Мӕ хъуыдыйы кӕрон дӕр нӕ уыд, иу бон ардӕм миссионерӕй кӕй ӕрыздӕхдзынӕн ӕмӕ ахӕстӕтты хорз хабар кӕй хъусын кӕндзынӕн. Йегъовӕ нӕ йӕ арфӕдзинӕдты бын фӕкодта!

Мари-Лин: Мӕ рӕстӕг ӕмӕ мӕ хъарутӕ иннӕтӕн кӕй не ’вгъау кӕнын, уый мын цас циндзинад хӕссы, уыйбӕрц ницы. Йегъовӕйӕн зӕрдӕрайгӕйӕ лӕггад кӕнӕм. Нӕ лӕггады фӕрцы кӕрӕдзимӕ дӕр тынгдӕр баввахс стӕм. Иуӕй-иу хатт Жак искӕцы къайӕ фӕзӕгъы, цыдӕр ныфссаст сты, ӕмӕ сӕ уазӕгуаты фӕхониккам, зӕгъгӕ. Ӕмӕ арӕх афтӕ рауайы, ӕмӕ йын ӕз дзуапп раттын: «Ӕз дӕр ууыл куы хъуыды кодтон!»

Жак: Цалдӕр азы размӕ мӕм ссардтой простатӕйы рак. Мари-Лин нӕ уарзы, мӕлӕты кой йын куы фӕкӕнын, фӕлӕ йын афтӕ фӕзӕгъын: «Мӕ уды хай, райсом куы амӕлон, уӕд „зӕрондӕй“ нӕ амӕлдзынӕн. Фӕлӕ амӕлдзынӕн „цардӕфсӕстӕй“, уымӕн ӕмӕ лӕггад кодтон Йегъовӕйӕн ӕмӕ мӕ цард ӕнӕпайда хъуыддӕгтыл нӕ ацыд» (Райд. 25:8).

Мари-Лин: Йегъовӕ нын нӕ бар бакодта, ӕнхъӕл дӕр кӕмӕн нӕ уыдыстӕм, ахӕм хъуыддӕгтӕ. Нӕ царды хорзӕй уыйбӕрц цыдӕртӕ уыд, ӕмӕ йын зӕгъӕн дӕр нӕй. Мах ӕй зонӕм, Йегъовӕ нын алкӕддӕр кӕй ӕххуыс кӕндзӕн, ӕмӕ нӕ йӕ организаци кӕдӕмфӕнды ма ’рвита, уӕддӕр ацӕудзыстӕм!