Жак ӕма Мари-Лин еумӕ ӕнхӕстрӕстӕг лӕггадӕ кӕнунцӕ 1988 анзӕй нурмӕ. Етӕ алкӕддӕр фӕййархайунцӕ, цӕмӕй нӕуӕг уавӕртӕбӕл тагъддӕр исахур уонцӕ, ӕма уой фӕрци Гваделупи ӕма Франций Гвиани берӕ рауӕнти лӕггадӕ кодтонцӕ. Аци бӕститӕбӕл нур дзуапп дӕттуй Франций филиал. Гъӕйдӕ мадта Жак ӕма Мари-Линмӕ цалдӕр фарстай раттӕн.

Ӕнхӕстрӕстӕг лӕггадӕ кӕнун цӕмӕн райдӕдтайтӕ?

Мари-Лин: Минкъий ма ку адтӕн, уӕд Гваделупи мӕ мади хӕццӕ арӕх игъосун кӕнианӕ ӕгас бони дӕргъи. Мӕ мадӕ алкӕддӕр зингзӕрдӕ игъосунгӕнӕг адтӕй. Ӕз дӕр адӕни берӕ уарзун, ӕма скъола ку фӕдтӕн, уӕд 1985 анзи пионерӕй лӕггадӕ кӕнун райдӕдтон.

Жак: Ӕригонӕй ӕнхӕстрӕстӕг лӕггадгӕнгути хӕццӕ рӕстӕг арӕх ӕрветинӕ. Етӕ игъосун кӕнун берӕ уарзтонцӕ. Ӕз дӕр каникулти ӕнхусгӕнӕг пионерӕй ралӕггадӕ кӕнинӕ. Еуӕй-еухатт сабати ӕма хуцаубони ма мади хӕццӕ кенӕ ӕнсувӕртӕй еске хӕццӕ автобусбӕл рандӕ уайанӕ, пионертӕ кӕми лӕггадӕ кодтонцӕ, еци территоримӕ. Ӕма сӕ хӕццӕ ӕгас бон игъосун кӕнианӕ. Уой фӕсте ба денгизи билӕмӕ рацӕуианӕ. Е дессаги рӕстӕг адтӕй!

1988 анзи Мари-Лини хӕццӕ нӕ цард байеу кодтан. Гъема уой фӕсте мӕхецӕн расагъӕс кодтон: «Сувӕллӕнттӕ нин нӕййес, кӕсун нӕ некӕмӕ гъӕуй, ӕма нӕ ци хъор кӕнуй фулдӕр лӕггадӕ кӕнун?» Мари-Лин уӕдмӕ дӕр пионерӕй лӕггадӕ кодта. Ӕма ӕз дӕр пионерӕй лӕггадӕ кӕнун райдӕдтон. Еу анзи фӕсте нӕ пионерти скъоламӕ фӕххудтонцӕ, ӕма нӕ уой фӕсте сӕрмагонд пионертӕй иснисан кодтонцӕ. Цалинмӕ нӕ Франций Гвианӕмӕ фӕххудтонцӕ, уӕдмӕ Гваделупи цалдӕр рауӕнеми балӕггадӕ кодтан ӕма си нӕ зӕрдӕмӕ хъӕбӕр цудӕй.

Сумах берӕ рауӕнти лӕггадӕ кодтайтӕ. Ци уин ӕнхус кодта, цӕмӕй нӕуӕг уавӕртӕбӕл исахур адтайайтӕ?

Мари-Лин: Франций Гвиани Вефили ӕнсувӕртӕ ’й зудтонцӕ, нӕ зӕрдӕмӕ ӕгасемӕй хъӕбӕрдӕр ке цӕуй Исаййи 6:8 стих. Ӕма нӕмӕ телефонӕй ку ӕрбадзориуонцӕ, уӕд нӕ арӕх гиризгӕнгӕй рафӕрсиуонцӕ: «Уӕ зӕрдӕмӕ ӕгасемӕй хъӕбӕрдӕр ка цӕуй, еци стих ма гъуди кӕнтӕ?» Е уобӕл дзорӕг адтӕй, ӕма бабӕй нӕ нӕуӕг рауӕнмӕ ӕрветунцӕ.  Ӕма син фӕззӕгъианӕ: «Мӕнӕ мах! Мах рарвететӕ!»

Ӕндӕр рауӕнмӕ ку ӕрцӕуӕн, уӕд еу бунат инней хӕццӕ некӕд фӕббарӕн. Уотӕ ку кӕнӕн, уӕд нин нӕ лӕггадӕ нӕуӕг бунати цийнӕ нӕбал хӕсдзӕй. Уомӕй уӕлдай ма фӕййархайӕн, цӕмӕй уоми дӕр хуӕртӕ ӕма ӕнсувӕрти хӕццӕ базонгӕ уӕн.

Жак: Еу рауӕнӕй иннӕ рауӕнмӕ ку цӕуианӕ, уӕд не ’мбӕлттӕй еуӕй-еуети нӕ фӕндӕуидӕ, цӕмӕй рандӕ адтайанӕ, ӕма нин ӕй зӕгъгӕ дӕр фӕккӕниуонцӕ. Фал Гваделупӕй ку цудан, уӕд нин еу ӕнсувӕр нӕ зӕрдӕбӕл ӕрлӕуун кодта Йесой дзурдтӕ, Матфеййи 13:38 финст ка ’нцӕ, уони, хумӕ ӕй дуйне, зӕгъгӕ. Гъема нӕ ӕндӕр рауӕнмӕ ку иснисан кӕнунцӕ, уӕд нӕ зӕрдӕбӕл ӕрлӕуун кӕнӕн, кӕмифӕнди ма лӕггадӕ кӕнӕн, уӕддӕр еци еу «хумӕ» ке ӕй. Ӕхсидзгӕдӕр ӕнцӕ, дӕ территорий ка цӕруй, еци адӕн!

Нӕуӕг бунатмӕ ку ’рцӕуӕн, уӕд ӕй фӕууинӕн, адӕн си сӕ царди хабӕрттӕ хӕсгӕй амондгун ке фӕуунцӕ. Ӕма мах дӕр уони хузӕн цӕрунбӕл фӕййархайӕн. Сӕ хуӕруйнӕгтӕбӕл син ахур нӕ фӕууӕн, фал, етӕ ци фӕххуӕрунцӕ ӕма ци фӕнниуазунцӕ, мах дӕр уой фӕххуӕрӕн ӕма фӕнниуазӕн, ӕрмӕст лӕмбунӕг фӕккӕсӕн, цӕмӕй не ’нӕнездзийнадӕн зиан маци ’рхӕсса. Кумӕ нӕ рарветунцӕ, еци территорийӕй гъаст некӕд фӕккӕнӕн, хуарзӕй си ци ес, ӕрмӕстдӕр уой кой фӕккӕнӕн.

Мари-Лин: Бунӕттон хуӕртӕ ӕма ӕнсувӕртӕй берӕ цӕбӕлдӕрти ахур кӕнӕн. Гъуди ма ’й кӕнун, еухатт Франций Гвианӕмӕ ку ’рцудан, уӕд мӕбӕл ци хабар ӕрцудӕй, уой. Гъӕуама игъосун кӕнунмӕ рацудайанӕ, фал ӕндегӕй сӕх-сӕхӕй уардта ӕма нӕ зӕрдтӕй, ку ’рсабур уа, уӕд рацӕунмӕ гъавтан. Фал нӕ еу хуӕрӕ ба рафарста: «Гъӕйдӕ ци зӕгъетӕ, цӕуӕн?» Ӕз дӕр ӕй десгӕнгӕ рафарстон: «Кутемӕй? Уарун ку нӕ сабур кӕнуй?» Фал мин хуӕрӕ ба уотӕ: «Зонтиктӕ райсдзиан ӕма велосипедтӕбӕл цӕудзиан». Гъе уӕд исахур дӕн зонтикбӕл хуӕцгӕй велосипедбӕл цӕун. Ку не ’сахур адтайнӕ, уӕд уарунти афони игъосун кӕнун мӕ бон н’ адтайдӕ.

Уӕ цӕрӕнбунат еу 15 хатти раййивтайтӕ. Уӕ бон н’ адтайдӕ, ӕндӕр рауӕнмӕ рацӕун ке фӕндуй, уонӕн ести унаффитӕ раттун?

Мари-Лин: Ӕндӕр рауӕнмӕ раледзун алкӕд ӕнцон нӕ фӕууй. Уомӕ гӕсгӕ хъӕбӕр ӕхсидзгӕ ’й дӕ нӕуӕг цӕрӕнбунатмӕ дзӕбӕх базелун, цӕмӕй си игъосун кӕнуни фӕсте дӕ бон уа бауолӕфун, раст цума дӕхе хӕдзари дӕ, уотӕ.

Жак: Нӕуӕг хӕдзарӕмӕ ку баледзӕн, уӕд бал си фиццаг фӕрстӕ исцӕгъдун. Филиали ӕнсувӕртӕ ’й ку фӕззонунцӕ, кӕцидӕр бунати берӕ ке нӕ басабур уодзиан, уӕд мӕбӕл рагириз кӕнунцӕ: «Жак, аци хатт уӕддӕр фӕрстӕмӕ ма бавналӕ!»

 Мари-Лин дзаумӕуттӕ ӕмбурд кӕнунмӕ хъӕбӕр исдӕсни ӕй. Къаробкити сӕ ниццурхуй ӕма кӕми ци ес, уомӕ гӕсгӕ сӕбӕл ниффинсуй, зӕгъӕн, «ваннӕ» «уат» кенӕ «къухни». Уой фӕрци, нӕуӕг бунатмӕ ку ’рбацӕуӕн, уӕд ӕй фӕззонӕн, кумӕ нин ци хӕсгӕ ’й, уой. Удта ма ниффинсуй, алли къаробки дӕр ци ес, уой, ӕма нӕ ести ку багъӕуй, уӕд ӕй тагъддӕр райерӕн.

Мари-Лин: Алцидӕр пълан кӕнун ке исахур ан, уой фӕрци нӕ бон фӕууй нӕ лӕггадӕмӕ тагъддӕр бавналун.

Уӕ рӕстӕг куд пълан кӕнтӕ, цӕмӕй уӕ лӕггади иронхуати маци уадзайтӕ? (2 Тим. 4:5).

Мари-Лин: Авдисӕри бауолӕфӕн, удта ӕмбурдтӕмӕ дӕр нӕхе бацӕттӕ кӕнӕн. Геуӕргибонӕй фӕстӕмӕ ба фӕццӕуӕн игъосун кӕнунмӕ.

Жак: Кӕд нӕ сахӕтти нормӕ ӕнхӕст кӕнун фӕгъгъӕуй, уӕддӕр уобӕл ӕгӕр нӕ фӕссагъӕс кӕнӕн. Алцидӕр нин нӕ лӕггади хӕццӕ баст ӕй. Хӕдзари къӕсӕрӕй куддӕр рахезӕн, уотӕ фӕййархайӕн, цӕмӕй, кӕбӕл рамбӕлӕн, уони хӕццӕ радзорӕн. Уотӕ фӕййархайӕн, цалинмӕ нӕ хӕдзарӕмӕ не ’рбацӕуӕн, уӕдмӕ.

Мари-Лин: Зӕгъӕн, ескумӕ рабадунмӕ ку фӕццӕуӕн, уӕд алкӕддӕр мӕ хӕццӕ буклеттӕ райсун. Кадӕртӕ нӕмӕ сӕхуӕдтӕ ӕрбацӕунцӕ ӕма ни бакӕсунмӕ ести ракорунцӕ, уотемӕй ба син ӕй зӕгъгӕ дӕр нӕ фӕккӕнӕн, Йегови Ӕвдесӕнтӕ ке ан, уой. Уомӕ гӕсгӕ лӕмбунӕг фӕккӕсӕн, цӕхуӕн кондӕй рацудан ӕма нӕхе куд фӕддарӕн, уомӕ. Уӕхӕн цӕмӕдӕрти адӕн хъӕбӕр фӕккӕсунцӕ.

Жак: Уомӕй уӕлдай ма архайӕн, цӕмӕй хуарз синхонтӕ уӕн ӕма уомӕй дӕр ӕвдесӕн, ка ан, уой. Нӕ хӕдзари рази гӕгъӕдитӕ гӕлст ку фӕууй, уӕд сӕ исесун ӕма сӕ ракалун. Удта хӕдзари алливарс сифтӕ ӕрӕмбурд кӕнун. Нӕ синхонтӕ уинунцӕ еци гъуддӕгтӕ, ӕма ни хатгай Библи дӕр ракорунцӕ.

Идард рауӕнти арӕх фегъосун кӕнтӕ. Уӕ бон ӕй ести хабар радзорун?

Жак: Гвиани еуӕй-еу рауӕнтӕмӕ зин бахъӕртӕн ӕй. Арӕх нӕ къуӕремӕ багъӕуй 600 километри лӕгъуз нӕдтӕбӕл цӕун. Уӕлдай хъӕбӕрдӕр нигъгъуди кодтон нӕ балци Сент-Елимӕ (ӕй Амазоний гъӕдти). Уордӕмӕ цалдӕр сахатти фӕццудан, лӕгъуз нӕдтӕбӕл цӕунмӕ ка ӕй, уӕхӕн машинӕбӕл, удта лодкабӕл. Ка си цӕруй, еци адӕнӕй сӕ фулдӕрӕн сӕ куст ӕй сугъзӕрийнӕ агорун. Ӕма син нӕ публикацитӕ ку равардтан, уӕд уотӕ боз адтӕнцӕ, ӕма нин нисайнагӕн равардтонцӕ минкъий сугъзӕрийни къӕрттитӕ. Изӕрӕй ма син нӕ видеотӕй еу бавдистан, ӕма бакӕсунмӕ берӕ адӕн ӕрбацудӕй.

Мари-Лин: Цалдӕр анзей размӕ Жаки радзубандий хӕццӕ фӕххудтонцӕ Имисӕн изӕрмӕ Камопимӕ. Уордӕмӕ лодкабӕл цуппар сахатти фӕццудан Ояпок цӕугӕдонбӕл. Уӕхӕн балцийӕн иронхгӕнӕн нӕййес.

Жак: Дон арф кӕми н’ адтӕй, уоми цӕугӕдони гулфӕнтӕ хъӕбӕр тӕссаг адтӕнцӕ. Фал сӕ хӕстӕгмӕ ку фӕууинай, уӕд сӕмӕ кӕсгӕ байзайдзӕнӕ. Лодка ка тӕруй, е гъӕуама уӕхӕн рауӕнти цӕун хуарз зона. Фал уӕддӕр е дессаги балци адтӕй! Имисӕн изӕрмӕ ка ’рбацудӕй, уонӕй Йегови Ӕвдесӕнтӕ ӕрмӕстдӕр 6 адтӕнцӕ. Ӕдеугурӕй ба еу 50 адӕймаги ӕрбацудӕй, ӕма сӕ астӕу америкаг индейӕгтӕ дӕр адтӕй!

Мари-Лин: Ӕригӕнтти Йегови гъуддаги фулдӕр кӕнун ку фӕндӕуа, уӕд уонӕбӕл дӕр уӕхӕн дессаги хабӕрттӕ цӕудзӕй. Уӕхӕн уавӕрти гъӕуама дӕ зӕрдӕ Йеговӕбӕл дарай, ӕма де ’ууӕндундзийнадӕ федар кӕндзӕй. Мах Йегови къох нӕ царди арӕх фӕууинӕн.

Цалдӕр ӕвзаги исахур кӕнун ба уин куд бантӕстӕй? Ӕвӕдзи, ӕвзӕгтӕмӕ хуарз арӕхсетӕ.

Жак: Хуарз сӕмӕ кӕцӕй арӕхсӕн. Еци ӕвзӕгтӕ уой туххӕй ахур кодтон, цӕмӕй мӕ бон адтайдӕ игъосун кӕнун ӕма ӕмбурдтӕн ӕнхус кӕнун. Еухатт мӕ багъудӕй «Гъӕуайгӕнӕн мӕсуги» ахур сранан-тонгобӕл * рауадзун, уотемӕй ба мин еци ӕвзагбӕл, Библийӕй скъуддзаг бакӕсун кӕми гъудӕй, уӕхӕн ихӕслӕвӕрд дӕр некӕд адтӕй! Уӕд еу ӕнсувӕри бафарстон, куд мин рауадӕй, зӕгъгӕ? Е дӕр мин уотӕ бакодта: «Хъӕбӕр дзӕбӕх дин рауадӕй, фал дӕ, раст зӕгъгӕй, кӕмидӕрти нӕ лӕдӕрдтан». Сувӕллӕнттӕ мин хъӕбӕр ӕнхус кодтонцӕ. Кӕми фӕррӕдуйинӕ, уоми мӕ етӕ бараст кӕниуонцӕ, хестӕртӕ ба мин некӕд неци дзурдтонцӕ. Сувӕллӕнтти фӕрци берӕ цидӕртӕ базудтон.

Мари-Лин: Еу рӕстӕг, кӕми лӕггадӕ кодтан, уоми адӕни хӕццӕ Библи ахур кодтон португайлаг, французаг ӕма сранан-тонго ӕвзагбӕл. Еу хуӕрӕ мин  загъта, Библий ахур, дан, ку уадзай, уӕд бал фиццаг минкъийдӕр ке лӕдӕрис, еци ӕвзагӕй райдайисӕ ӕма хуӕздӕр ке лӕдӕрис, еци ӕвзагӕй ба фӕууо. Фӕстӕдӕр ӕй балӕдӕрдтӕн, куд хуарз унаффӕ мин равардта, уой.

Еу бон мӕ гъудӕй дууӕ адӕймагей хӕццӕ Библий ахуртӕ рауадзун: фиццаг сранан-тонго, дуккаг ба португайлаг ӕвзагбӕл. Гъема дуккаг ахур ку райдӕдтон, уӕд мин, ке хӕццӕ адтӕн, еци хурӕ уотӕ бакодта: «Мари-Лин, ӕнгъӕлдӕн дӕ нӕ лӕдӕруй». Уӕд ӕй ралӕдӕрдтӕн, бразилаг силгоймаги хӕццӕ сранан-тонгобӕл ке дзорун, португайлагау нӕ, фал.

Ци хуӕртӕ ӕма ӕнсувӕрти хӕццӕ лӕггадӕ кӕнтӕ, етӕ уӕ берӕ уарзунцӕ. Куд уин рауайуй сӕ хӕццӕ уотӕ балимӕн ун?

Жак: Ӕмбесӕндти 11:25 финст ӕй: «Рӕдау адӕймаг бафсӕддзӕй хуарздзийнӕдтӕй». Мах нӕ рӕстӕг ӕма нӕ хъауритӕ иннетӕн не ’вгъау кӕнӕн. Не ’мбурдтӕ кӕми фӕууадзӕн, еци зали еститӕ барӕвдзӕ кӕнун ку фӕгъгъӕуй, уӕд мин ӕнсувӕртӕ еуӕй-еухатт фӕззӕгъунцӕ: «Игъосунгӕнгутӕ ’й бакӕндзӕнцӕ». Фал син ӕз фӕззӕгъун: «Ӕма ӕз дӕр игъосунгӕнӕг дӕн. Кӕд си ести барӕвдзӕ кӕнун гъӕуй, уӕд мӕнӕн дӕр ӕхцӕуӕн уодзӕй фӕккӕсун». Алкедӕр ни ӕхе гъуддӕгтӕн рӕстӕг фӕгъгъӕуй, фал нӕ нӕ фӕндуй, цӕмӕй нӕ е иннетӕн хуарздзийнадӕ кӕнунмӕ хъор кӕна.

Мари-Лин: Мах фӕййархайӕн, нӕ хуӕртӕ ӕма ӕнсувӕртӕ куд ӕнцӕ, уой базонунбӕл. Ӕма уой фӕрци фӕззонӕн, ӕнхус ке гъӕуй, уой. Зӕгъӕн, кӕмӕндӕр ӕ сувӕллӕнттӕмӕ фӕккӕсун кенӕ сӕ скъолайӕй ӕрбахонун ку фӕгъгъӕуй, уӕд нӕ пълӕнттӕ феййевӕн, цӕмӕй син банхус кӕнӕн. Багъӕуаги сӕ фарсмӕ ке балӕууӕн, уой фӕрци хъӕбӕр балимӕн уӕн.

Игъосунгӕнгути ӕнхус кӕми гъӕуй, уоми ке лӕггадӕ кодтайтӕ, уой фӕрци цӕхуӕн арфӕдзийнӕдтӕй исхайгин айтӕ?

Жак: Ӕнхӕстрӕстӕг лӕггадӕ нин нӕ цард исгъӕздуг кодта. Арӕх фӕккӕсӕн, Йеговӕ цитӕ сфӕлдиста, уомӕ, ӕма нӕ деси бафтаунцӕ. Зиндзийнӕдтӕбӕл дӕр куд не ’мбӕлӕн. Фал мах ӕгӕр нӕ фӕттухсӕн, уомӕн ӕма ’й зонӕн, кӕмифӕнди ма уӕн, уӕддӕр Хуцауи адӕн нӕ фарсмӕ ке уодзӕнцӕ.

Ӕригонӕй ӕфсадмӕ ке нӕ рандӕ дӕн, уой туххӕй Франций Гвиани ахӕстдони фӕббадтӕн. Мӕ сӕри къуми дӕр н’ адтӕй, еу бон ардӕмӕ миссионерӕй ке ӕрӕздӕхдзӕн ӕма ахӕститӕн хуарз хабар ке игъосун кӕндзӕн. Йеговӕ нӕ ӕ арфӕдзийнӕдти буни фӕккодта!

Мари-Лин: Мӕ рӕстӕг ӕма мӕ хъауритӕ иннетӕн ке не ’вгъау кӕнун, е мин цӕйбӕрцӕ цийнӕдзийнадӕ хӕссуй, уойбӕрцӕ неци. Йеговӕн лӕггадӕ кӕнгӕй хъӕбӕр амондгун ан. Нӕ лӕггади фӕрци кӕрӕдземӕ дӕр хъӕбӕрдӕр бахӕстӕг ан. Еуӕй-еухатт Жак ескӕци бийнонтӕй ку фӕззӕгъуй, цидӕр нифссаст ӕнцӕ ӕма сӕ гъӕйдӕ баиуазӕг кӕнӕн, зӕгъгӕ, уӕд ин фӕззӕгъун: «Ӕз дӕр гъе уобӕл ку сагъӕс кодтон!» Хъӕбӕр арӕх ӕмхузӕн фӕссагъӕс кӕнӕн.

Жак: Цалдӕр анзей размӕ мӕмӕ простати рак иссирдтонцӕ. Мари-Лин нӕ уарзуй, мӕлӕти кой ку фӕккӕнун, фал ин уотӕ фӕззӕгъун: «Мӕ зӕрдӕ, исон ку рамӕлон, уӕд „зӕрондӕй“ нӕ рамӕлдзӕн. Фал рамӕлдзӕн „цардӕфсесӕй“, уомӕн ӕма лӕггадӕ кодтон Йеговӕн ӕма мӕ цард ӕнӕпайда гъуддӕгтӕбӕл нӕ райевгъудӕй (Райд. 25:8).

Мари-Лин: Йеговӕ нин нӕ барӕ бакодта, ӕнгъӕл дӕр ке н’ адтан, уӕхӕн гъуддӕгтӕ. Нӕ царди хуарзӕй уойбӕрцӕ цидӕртӕ адтӕй, ӕма ин зӕгъӕн дӕр нӕййес. Мах ӕй зонӕн, Йеговӕ нин алкӕддӕр ке ӕнхус кӕндзӕй, ӕма нӕ ӕ организаци кумӕфӕнди ма ’рвета, уӕддӕр рандӕ уодзиан!