Manlapu nen 1988 et saniba la ed full-time a panaglingkor si Jack tan Marie-Line. Marunong iran mibagay tan man-adjust kanian dakdakel so asali dan asainmin diad Guadeloupe tan French Guiana. Saratan ya bansa et aasikasoen la natan na sangan opisina ed France. Tepetan tayoy Jack tan Marie-Line.

Akin et nampayunir kayo?

Marie-Line: Legan na impanugaw ko ed Guadeloupe, lanang kamin saniba ya manpulong nen nanay ko, ya maseseg a Tasi. Kanian nen asumpal ak ya naneskuela nen 1985, nampayunir ak la.

Jack: Nen tinedyer ak ni, payunir iray lanang kon kaiba tan makulikuli ra ed ministeryo. Kada bakasyon et mano-auxiliary payunir ak. No maminsan, kasabi Sabado-Simba et man-bus kami pian naibaan mi ray payunir ya manpulong ed teritorya da. Sanagew kamin manpulong insan kami onlad gilig na dayat. Malikeliket iraman ya panaon!

Kayari na impankasal mi nen Marie-Line nen 1988, kuan ko, ‘Anggapoy obligasyon mi, kanian maong seguro no palaknaben mi ministeryo mi.’ Nampayunir ak met la, tan kalabas na sakey taon, kayari min nanaral ed PSS, niyasain kamin espisyal payunir. Malikeliket kami ed nanduruman asainmin diad Guadeloupe antis kamin niyasain ed French Guiana.

Nandurumay asainmin yo diad apalabas iran taon. Antoy akatulong ed sikayon man-adjust kada onalis kayo ed balon asainmin yo?

Marie-Line: Amta na saray brother ed French Guiana Bethel ya say paborito min teksto et Isaias 6:8. Kanian no tawagan da kami, mabetbet ya say unonan ibabaga ra et, “Nanonotan yo ni may paborito yon teksto?” Nalikas mi ya walay balon asainmin mi, kanian ibaga mi, “Wadia kami! Ibaki yo kami!”

Agmi ikokompara so balon asainmin mi ed saray datin asainmin mi ta ompan agkami naliketan ed balon asainmin mi. Sikami met lay unonan mikakaaro ed saray agagi kasabi mi ed balon lugar.

 Jack: Nensaman, aglabay na arum ya agagi ya onalis kami kanian kinombinse da kami ya mansiansia ed kongregasyon mi. Balet nen paalis kami lad Guadeloupe, impanonot na sakey a brother imay imbaga nen Jesus ed Mateo 13:38: “Say uma et say mundo.” Kanian kada no manguman so asainmin mi, iisipen mi ya manlilingkor kami nin siansia ed parehon teritorya anggan iner so kawalaan mi. Ta diad tua, say importante et saray totoo ya napulongan tayo!

Kada no onsabi kami ed balon teritorya, nanengneng mi ya kontento tan maliket iray totoo. Kanian mibabagay kami ed kabibilay da. Anggano duma so panangan, kakanen mi no antoy kakanen da tan iinumen mi no antoy iinumen da, balet ta aalwaran mi bunigas mi. Diad kada asainmin mi, say iimanoen mi et saray positibo.

Marie-Line: Dakel met so nanaaralan mi ed saray agagi. Nen agano kami nid French Guiana, inmuran na makmaksil kanian say amtak et alagaren mi nin ontunda so uran antis kamin manpulong. Balet say kuan na sakey ya sister, “Anto ey, onla ti la?” Abigla ak tan say ebat ko, “Panon to ey, uran balet?” Say kuan to, “Manpayong ki la, ta manbisikleta tayo met.” Kanian naaralan koy akapayong ya manbisikleta. No agko man naaralan, agak makapanpulong no mamauran!

Manga 15 beses kayo lan inmalis na asainmin. Mangibaga kayo pa na saray gagawaen yo ya nayarin makatulong met ed saray manplaplanon onalis.

Marie-Line: Aliwan mainomay so onalis-alis. Balet, maabig no makaanap kay panayaman ya relaks tan komportable ka no onsempet ka manlapud ministeryo.

Jack: Kaslakan et pipintoraan koy loob na balon panayaman mi. No amta na saray brother ed sangan opisina ya agkami met lanlamang manbayag diman, say ibabaga ra, “Jack, agka la manpipintora ah!”

Si Marie-Line et eksperto lan man-impake! Wala ray kahon ya pangikakargaan toy amin ya gamit mi tan mamarkaan to iratan na “CR,” “kuarto,” “kusina,” tan arum ni. Kanian no kasabi mi ed balon panayaman mi, nipuesto min tampol iray gamit mi ed dugan pasen. Ililista to met iray karga  na kada kahon kanian naalmo min tampol iray kaukolan mi.

Marie-Line: Lapud naaralan mi lay magmaliw ya organisado, makagapo kami lan tampol ed ministeryo.

Antoy eskedyul yo pian ‘sigpot yon nasumpal so ministeryo yo’?​—2 Tim. 4:5.

Marie-Line: Lunes so painawa tan panagparaan mi parad saray aral. Manlapud Martes, ompaway kami lad ministeryo.

Jack: Anggano walay aaboten min oras, aliwan satan so sankanonot mi. Say panagpulong so sankaimportantian ed bilay mi. Manlapud isipot mid panaayaman mi anggad isempet mi, mitotongtong kami ed totoo.

Marie-Line: Singa bilang, no onla kamin man-picnic, walan-walay awit kon tracts. Wala ray onasingger tan onkerew na publikasyon anggano agmi ni imbaga ya Tasi kami. Kanian maalwar kamid panangawes tan ugali mi. Naiimano iratan na totoo.

Jack: Ipapanengneng mi maong ya ugali ed saray kakaabay mi. Dodokdoken mi ray atakatak ya papel, ibabantak mi basura, tan lilinisan min lanang so sular mi. Naiimano itan na saray kakaabay mi tan no maminsan et ibaga ra, “Nayarin ikdan yo ak na Biblia?”

Lanang kayon iyaasain ed ararawin teritorya. Kasin walay agyo nalinglingwanan ed saratan?

Jack: Diad Guiana, wala ray teritoryan mairap ya sabien. Pitoran agew kamin manbiahe ed 600 kilometro ya matagtag tan abot-abot ya dalan. Agmi nalingwanan imay imbisita mid St. Élie, diad Amazon forest. Pigaran oras kamin nambiahe ya say niluganan mi et luluganan ya parad kapalandeyan tan baloto. Minero so dakel ya totoo diman. Lapud misalsalamat ira ed saray publikasyon tayo, wala ray angiter na balitok bilang kontribusyon da! Diad saman ya labi, angipabantay kami na saray video tayo. Dakdakel so linma.

Marie-Line: Diad agano ni, inimbitaan day Jack ya manpaliwawa ed Memoryal diad Camopi. Pian makasabi kami diman, apatiran oras kamin nan-baloto diad Oyapock River. Agmi man nalingwanan ya eksperiensya mi.

Jack: No atapew so ilog, mas delikado ta mapmaples so palusor ya agus na danum ya ombabangga ed kabatoan. Makapanerbiyos no asingger kami lad saraman ya parte na ilog. Dapat kabisado na managsakay na baloto no panon so ondalan ed saraman. Balet agmi iman nalingwanan ya eksperiensya mi. Anggano anemira labat so Tasi, manga 50 so inmatendi ed Memoryal, tan wala ray linma ya Amerindian!

Marie-Line: Ontan iran makapaliket ya eksperiensya so manatalaran ed saray kabataan no palaknaben day ministeryo da. Kaukolan ya manmatalek kad si Jehova diad onia ran situasyon, tan seguradon ombiskeg so pananisiam. Alikna min talaga ya tutulongan kami nen Jehova.

Dakel lay amta yon lenguahe. Agkayo met nairapan ya aralen iratan?

Jack: Mairap. Balet inaral ko iratan ya lenguahe ta kaukolan. Angikondukta ak la na Panagaral na Panag-bantayan ed Sranantongo * antis ak nin naikdan na parte ya manbasa na Biblia! Tinepetan koy sakey a brother no atalosan da so impankonduktak. Say ebat to, “Agmi atalosan so arum ya imbaga yo, balet balibali.” Baleg ya tulong iray ugugaw, ta no walay lingok, ibaga dan alingo ak, aliwan singa saray adulto ya ag-ira onesel. Amayamay so naaralan kod saray ugugaw.

Marie-Line: Diad sakey ya lugar, wala ray iyaaralan ko na Biblia ya say salita da et French, Portuguese, tan Sranantongo. Imbaga na sakey ya sister ya iyunak ya iyaralan imay sankairapan so lenguahe to tan sampot ko lan iyaralan imay kabisadok so lenguahe to. Epektibo iman ya imbaga to.

Sakey agew, angiyaral ak ed Sranantongo insan diad Portuguese. Nen igapok la imay komadua, kuan na kaibak ya sister, “Marie-Line, agto ka natatalosan!”  Sranantongo manaya so uusaren kon mitongtong ed iyaaralan kon Brazilian anta say salita to et Portuguese!

Inar-aro kayo na agagi diad saray nanlingkoran yo. Antoy ginawa yo pian nakaaro yo ray agagi?

Jack: Ibabaga na Proverbio 11:25: “Say mabunlok a too et onaligwas.” Mabulos min iiter so panaon mi ed saray agagi tan tutulongan mi ra. No panaglinis tan panagmintina na Kingdom Hall, wala ray mangibabaga: “Saray publisher la so manggawa ed satan.” Balet say iyeebat ko: “Publisher ak met. Kanian no walay kimey, mangiba ak.” Siempre importante met ya walay panaon mi parad sarili mi, balet agmi aabuloyan ya lapud satan et agkami makapanggawa na kaabigan ed arum.

Marie-Line: Pansasagpotan min ipanengneng so personal ya interes ed saray agagi. Kanian naaamtaan mi no kaukolan day manbantay o mangabet ed saray ananak da diad eskuelaan. Uumanen mi eskedyul mi no naamtaan mi ya kaukolan day tulong. Bilang resulta, nagmaliw kamin sankakaaro, tan akaparaan kamin ontulong ed sikara.

Anto ran bendisyon so naawat yo diad panlilingkor yod lugar ya mas baleg so pankaukolan?

Jack: Nen nanlingkor kamin full-time, nagmaliw ya mas maliket so bilay mi. Mabetbet kamin manbiabiahe kanian naoobserbaan mi ray dakdakel ya pinalsa nen Jehova. Anggano wala ray kairapan, mareen so nonot mi lapud amta mi ya wadtan iray agagi ya ontulong ed sikami anggan iner so kawalaan mi.

Nen kabataan ak, apriso ak ed French Guiana lapud agko labay so mansundalo. Agkon balot naisip ya makapawil ak dia bilang misionero tan naikdan ak na pribilehyon onla ed saray prisoan bilang ministro. Talagan dakdakel ya bendisyon so inter nen Jehova ed sikami!

Marie-Line: Say panliliketan kon maong et say panguusar koy bilay ko pian tulongan so arum. Makapaliket so manlingkor ed si Jehova. Mas inmelet so relasyon min sanasawa. No maminsan, tepetan ak nen Jack no sarag min imbitaan ya mangan ed abung mi iray sanasawa ya mankaukolan na panamaseseg. Kaslakan ya say ebat ko, “Ontan met so iisipen ko!” Mabetbet ya pareho so iisipen mi.

Jack: Diad agano ni, naamtaan mi ya walay prostate cancer ko. Anggano aglabay nen Marie-Line ya narengel, say ibabagak ed sikato: “Darling, no ompatey ak nabuas, aliwa nin ‘andukey so impanbilay ko.’ Balet anggapoy pagbabawian ko ta amtak ya inusar koy bilay ko pian manlingkor ed Dios, tan satan so panliliketan ko.”​—Gen. 25:8.

Marie-Line: Inikdan kami nen Jehova na saray asainmin ya agmi inilaloan, tan inabuloyan to kamin gawaen iray iisipen min agmi sarag. Amayamay so makapaliket ya agawa ed bilay mi. Talagan manmamatalek kami ed Dios ya anggan iner so pangibakian ed sikami na organisasyon to, akaparaan kamin onla!