Jack un Marie-Line sent aul vonne 1988 toop em Voltietdeenst un sent doafäa bekaunt, daut see sikj leicht wua hanwanen kjennen. Dee worden no väl veschiedne Städen opp de Inslen von Guadelup un en Fraunzeesisch-Guiana jeschekjt, wua nu daut Betel en Frankreich äwa aunjestalt es. Well wie Jack un Marie-Line mol een poa Froagen stalen.

Wuarom wull jie met dän Voltietdeenst aunfangen?

Marie-Line: Aus ekj opp Guadelup oppwoss, jinkj ekj foaken dän gaunzen Dach met miene Mame toop prädjen. See wia emma flietich em Deenst. Ekj jleicht de Menschen, un doawäajen wort ekj aune 1985 Pionia, soofroo aus ekj met de School derch wia.

Jack: Aus junga Mensch wia ekj väl met Voltietdeena toop, waut dän Deenst sea jleichten. En dee Tiet, wan doa nich School wia, wia ekj jeweenlich Pioniahelpa. Un eenjemol fua wie utgangs Wäakj met de Boss met un deeden dän gaunzen Dach met de Pionieren toop prädjen. Tolatst jinkj wie noch no de Kaunt Mäa. Daut jinkj emma sea scheen!

Aune 1988 befried wie ons un meist fuaz nodäm docht ekj soo: “Wudd wie nich mea em Deenst doonen kjennen? Wie sent je aun nuscht jebungen.” Dan wort ekj uk Pionia, soo aus Marie-Line. Een Joa lota jinj wie no de Pioniadeenst-School un dan word wie Sondapionia. Wie worden no miere Städen opp Guadelup jeschekjt, wua wie Freid em Deenst hauden. Un dan word wie enjelot no Fraunzeesisch-Guiana to trakjen.

Jie worden en de latste Joaren no väl veschiedne Städen jeschekjt. Waut haft junt jeholpen, junt to de niee Omstend doa to wanen? 

Marie-Line: De Breeda em Betel en Fraunzeesisch-Guiana wisten, daut Jesaja 6:8 ons basta Varsch wia. Wan dee ons fonden, fruagen dee foaken fa Spos: “Waut sajcht jun basta Bibelvarsch noch mol?” Dan wist wie, daut wie wudden aundatwäajen hanjeschekjt woaren. Wie säden dan: “Hia sent wie! Schekjt ons!”

Wie proowen de Städen kjeenmol to vejlikjen, wua wie deenen. Sest wudd ons daut doa, wua  wie nu sent, nich scheen gonen. Un wie strenjen ons aun, daut wie met de Breeda doa kjennen Frind woaren.

Jack: Eenje Frind wullen ons beräden, daut wie nich sullen wajchtrakjen, daut wie nich soo wiet uteneen wieren. Oba aus wie von Guadelup veleeten, räd een Brooda to ons von Matäus 13:38. Jesus säd doa, daut oppe gaunze Welt wudd jeprädicht woaren. Wan wie eene niee Oppgow kjrieen, denkj wie emma doaraun, daut wie noch emma doa prädjen, wua dis Varsch von rät. Daut wichtichste sent de Menschen un nich, wua daut krakjt es.

Wan wie opp de niee Städ seenen, daut de Menschen doa läwen kjennen un haulwäaj tofräd sent, dan vesieekj wie uk soo to läwen aus dee. Veleicht es daut Äten doa aundasch. Oba wie äten un drinkjen daut, waut dee doonen, un paussen doabie no onse Jesuntheit opp. Wie strenjen ons aun, von jieda Städ goot to räden, wua wie hanjeschekjt woaren.

Marie-Line: Wie lieren uk väl von de Breeda, waut doa aul lenja wonen. Mie denkjt daut noch goot, aus wie no Fraunzeesisch-Guiana kjeemen. Daut räajend sea. Wie dochten, daut wie nich wudden kjennen prädjen, ea daut opphieed. Oba eene Sesta fruach mie: “Sell wie bloos mol aunfangen?” Gaunz vewundat säd ekj: “Woo dan?” See säd bloos: “Nemm dienen Räajenschorm, un dan foa wie met onse Beisikjels.” Aulsoo lieed ekj mie, woo eena aun biem Beisikjel foaren kunn eenen Räajenschorm hoolen. Aus wan nich, haud ekj en de Räajentiet kjeenmol kunt prädjen!

Jie sent aul soo bie 15 Mol omjetrocken. Waut wudd jie aundre tooroden, wan dee omtrakjen wellen?

Marie-Line: Omtrakjen kaun Schwierichkjeiten met sikj brinjen. Daut es wichtich, daut eena een Hus finjt, wua eena sikj maklich feelt, wan eena vom Deenst trigjkjemt.

Jack: Jeweenlich doo ekj daut Hus, wua wie nentrakjen, fresch utfoawen. Eenjemol wisten de Breeda em Betel aul, daut wie doa veleicht nich lang bliewen wudden, un säden dan: “Jack, ditmol brukst du nich mol aunfangen to foawen!”

Marie-Line haft sikj daut fein jelieet, aules entopaken. See deit aules en Doosen nenn un schrift doa nopp, aus daut biejlikj to de Bodstow, Schlopstow ooda Kjäakjstow jehieet. Wan wie dan en daut fresche Hus aunkomen, weet wie aul en  woone Stowen de Doosen nenjehieren. See moakt uk fa jieda Doos eene List, waut doa bennen es, daut wie fuaz daut finjen, waut ons fält.

Marie-Line: Wiels wie jelieet haben goot to plonen, kjenn wie met onsen Deenst fuaz wada aunfangen, soo aus wie daut jewant sent.

Woo recht jie junt daut met de Tiet en, daut jie junen “Deenst volstendich” derchfieren kjennen? (2. Tim. 4:5, NW).

Marie-Line: Aum Mondach vereiw wie un moaken ons fa de Toopkomes reed. Von Dinjsdach aun go wie dan em Prädichtdeenst.

Jack: Wie motten jieda Moonat jewesse Stunden prädjen, oba daut es nich daut wichtichste fa ons. De Hauptsach es, daut wie de Menschen prädjen. Von dan, aus wie ons oppem Wajch jäwen, bat wie trigjkomen, sieekj wie no Jeläajenheiten aulem Zeichnis to jäwen.

Marie-Line: Wan wie biejlikj mol wua hangonen toom eene scheene Tiet haben, dan hab ekj emma waut Zeichnisbläda met. Daut jeft Menschen, waut no Bieekja froagen, wan wie dee uk nich jesajcht haben, daut wie Jehova siene Zeijen sent. Daut es, wäajen wie oppaussen, woo wie ons auntrakjen un benämen.

Jack: Wie jäwen uk doaderch een Zeichnis, daut wie fein to onse Nobasch sent. Ekj läs daut Mell toop un schmiet daut en de Melldoos nenn un hoakj em Goaden de Bläda toop. Dee seenen daut, un bieaun frajcht eena von dee: “Hast du met eenst eene Bibel fa mie?”

Jie haben foaken wiet jereist toom prädjen. Hab jie eent von june Reisen besonda em Denkj jehoolen?

Jack: En Guiana es daut nich soo eefach no eenje Städen to komen. Foaken foa wie 600 Kilomeeta (370 Miel) en eene Wäakj opp proste Wäaj. Onse Reis no Saint-Élie wia besonda. Dit Stautje es medden em Woolt en de Amazonas-Jäajent. Daut wie bat doa kjeemen, must wie miere Stund met een Foatich, waut väaren un hinjen drift, un met eene Lomm foaren. De mieeschte Menschen doa sochten no Golt. Eenje jeewen ons kjliene Bieta Golt, wäajen dee soo dankboa fa de Bieekja wieren, waut wie an jeewen! Zeowes kjeemen väle doahan, wua wie eent von onse Videos weesen.

Marie-Line: Een poa Joa trigj sull Jack en Camopi de Räd fa daut Owentmol hoolen. Toom doa hankomen fua wie vea Stund met eene Lomm delenjd dän Oyapock-Riefa. Daut wia mol waut gaunz aundret!

Jack: Wua de Riefa weinich Wota haud, kunn daut noch jefäadlich sennen, wiels doa eenjemol groote Steena bennen wieren. Ekj saj die, dan woat eenem doch owwool. De Foara mott dan goot weeten, aun waut hee es. Oba em gaunzen wia daut eene wundascheene Reis. Bie daut Owentmol wieren bloos sas von Jehova siene Zeijen, oba aules toop wia wie rom 50. Un mau rajcht eenje Indiauna kjeemen!

Marie-Line: Junge Menschen kjennen uk soowaut scheenet beläwen, wan dee mea fa Jehova doonen. Eena mott sikj en soone Loagen opp Jehova veloten un daut stoakjt dän Gloowen. Wie seenen foaken, woo Jehova ons halpt.

Jie kjennen veschiedne Sproaken räden. Es junt daut leicht?

Jack: Oba nä! Ekj must mie miere Sproaken lieren, daut ekj wudd prädjen kjennen un en de Vesaumlunk halpen. Biejlikj haud ekj opp Sranantongo * noch nich mol de Bibelläsunk jehaut un sull aul daut Woaktorm-Studium leiden. Lota fruach ekj, aus daut to vestonen wia. Een Brooda säd: “Bieaun kunn wie nuscht vestonen. Oba daut wia sea fein.” Wan ekj waut orrajcht säd, bätaden de Kjinja mie ut, oba de Groote säden mie nuscht. De Kjinja wieren eene groote Help, un ekj lieed väl von dee.

Marie-Line: En een Jebiet haud ekj Bibelstudiums opp Fraunzeesisch, Portugiesisch un opp Sranantongo. Eene Sesta rod mie too, met dee Bibelstudiums auntofangen, waut mie met de Sproak daut schwanste wieren, un dan de aundre. Boolt wort ekj en, daut daut een gooda Rot wia.

 Eenen Dach haud ekj ieescht een Bibelstudium opp Sranantongo un dan eent opp Portugiesisch. Aus ekj un noch eene Sesta daut tweede Bibelstudium aunfungen, säd see: “Marie-Line, ekj jleew, doa es waut orrajcht!” Ekj wort en, daut ekj to eene Fru von Brasilien opp Sranantongo räd enne Städ opp Portugiesisch.

De Breeda, waut met junt toop jedeent haben, räakjnen junt väl. Woo kunn jie goode Frind woaren?

Jack: En Spricha 11:25 sajcht daut: “Eene mildjäwaje Seel woat rikj woaren”. Wie sent jieren met aundre toop un halpen dee wellich. Aus daut mol doarom jinkj, bie daut Vesaumlungshus to schaufen, säden waut Breeda to mie: “Daut kjennen de Vekjindja doonen.” Oba ekj säd dan: “Na jo, ekj sie krakjt soo goot een Vekjindja aus dee. Wan doa Oabeit es, dan well ekj doa methalpen.” Secha, jieda eena brukt een bät Tiet fa sikj. Un doch see wie emma wada doano, daut wie aundre goots doonen.

Marie-Line: Wie wiesen onse Breeda un Sestren, daut wie ons fa an intressieren. Wan wie biejlikj enwoaren, daut dee äare Kjinja fält von de School to holen ooda no dee opptopaussen, dan enda wie onse Plons. Wie sent emma reed to halpen un soo kjenn wie met aundre goode Frind woaren.

Waut fa goodet haft junt daut jebrocht, daut jie doa deenen, wua mea Help fält?

Jack: Wie beläwen väl goodet, wiels wie onse gaunze Tiet fa Jehova brucken. Wie sent väl en de Natua un haben Freid aun daut, waut Jehova aules jemoakt haft. Daut es nich emma leicht, oba wie weeten, daut Gott sien Volkj ons emma biesteit. Un daut jeft ons ennalich Fräd.

Aus junga Maun wia ekj en Fraunzeesisch-Guiana enjestopt, wiels ekj nich wull Soldot sennen. Ekj haud kjeenmol jedocht, daut se mie noch mol wudden aus Missionoa no dit Launt schekjen. Un nu kaun ekj hia uk en de Jefenkjnisen prädjen. Jehova haft ons sea jesäajent!

Marie-Line: Fa mie jeft daut nich waut bätret aus aundre halpen. De Deenst fa Jehova moakt ons schaftich un haft ons aus Ehelied dolla vebungen. Eenjemol frajcht Jack mie, aus wie nich wudden kjennen een Poa Lied enloden fa eene Moltiet, waut et aun Moot fält. Dan saj ekj: “Krakjt daut docht ekj uk!” Soo jeit ons daut foaken.

Jack: Een poa Joa trigj fungen de Doktasch rut, daut ekj Kjräft haud. Ekj säd to Marie-Line, wan see daut uk nich hieren wull: “Miene Leefste, wan ekj nu stoawen wudd, dan wudd ekj nich sea ‘oolt jeworden’ sennen. Oba ekj wudd doawäajen noch tofräd stoawen, wiels ekj weet, daut ekj mien gaunzet Läwen fa Jehova jebrukt hab” (1. Mo. 25:8).

Marie-Line: Jehova jeef ons soone Oppgowen, wua wie kjeenmol met jeräakjent hauden. Un hee leet ons uk soont beläwen, wua wie nich mol aun jedocht hauden. Wie haben werkjlich väl scheenet beläft! Wie sent reed doa hantogonen, wua de Organisazion daut haben well, wiels wie gaunz opp Jehova vetruen!