Jack nu mukaji’enji Marie-Line asendesele mudimo wa tangua diagasue mu 1988. Akhalele mujidila muabonga nu athu, nu ayile mu mafundo avula mu gifutshi gia Guadeloupe nu gu Guyane Française. Ifutshi yene mbadi yana tuamezewa gu Betele ya gu France. Henyaha, maganenu tuhule ndambo ya mihu gudi Jack nu Marie-Line.

Itshi yamihanele nzala ya gutshita mudimo wa tangua diagasue?

Marie-Line: Tangua ngakhalele mona wazonda gu gifutshi gia Guadeloupe, ngakhalele muya mu mudimo wa gulongesa lusugu nu lusugu nu mama. Maman wakhalele mulongeshi wa gikhesa. Ngakhalele muzumba athu muavula, tangua ngamanesele khalasa mu 1985, ngasendesele mudimo wa muvundji wa muhola.

Jack: Tangua ngakhalele muvuala, ngakhalele mubalegesa tangua diavula nu aphangi akhalele muzumba mudimo wa tangua diagasue. Mu tangua dia congé, ngakhalele mukalagala mudimo wa muvundji wa muhola wa tangua diazonda. Mu suga ya phoso, tuakhalele muzula bus ha guya musanga avundji a muhola mu terituare jiawo. Tuakhalele mulongesa lusugu lua mudidi, gungima tuakhalele muya gu khulo ya muta ha gudikenesa. Akhalele diago masugu a gusuanguluga!

Matangua azonda gungima dia gudizula mu ulo nu Marie-Line mu 1988, ngadihudile egi, ‛Tushigo nu ginemo giavula, itshi idi gungukanga njila ha gutshita muavula mudimo wa gulongesa?’ Hene ngabuile muvundji wa muhola gifua Marie-Line. Gungima dia givo, tuanginyile khalasa dia avundji a muhola, nu tuabuile ba pionye spesiale. Tuatumiwe mu mafundo avula a mu gifutshi gia Guadeloupe, gutuama egi atutume gu Guyane Française.

Muasombegesele mafundo avula mu ivo eyi yabalega. Na itshi yamikuatesele ha gujidila nu mafundo agasue ahe-ahe muakhalele muheta?

Marie-Line: Aphangi a gu Betele ya gu Guyane Française akhalele mujiya egi verse ya Biblia tuana zumba muavula idi Yeshaya 6:8. Hene, gula atutamega, akhalele gutuwambela nu gulelesa guagasue egi: “Mudi mujiya luko verse yenu muana zumba muavula ba?” Gula tuavua ngenyi tuakhalele mujiya egi adi mutshigina gutusombegesa fundo. Hene tuakhalele muzuelele egi, “Esue Owu! Tutume!”

Tuakhalele mutshita ngolo ha gutuna gufuanesa mafundo akulu nu mafundo ahe-ahe, handaga gutshita  ngenyi guakhalelego naye gutukuatesa ha gusuanguluga nu mafundo ahe-ahe. Tuakambele nji luholo lua gukuata mafuta a mala nu a akhetu.

Jack: Thomo, aphangi akhalelego musuanguluga egi tuye fundo diko, akhalele mutshigina egi tukhale nawo. Uvi tangua tuakatugile gu Guadeloupe, phangi mumoshi watuwunguluishile mbimbi jia Yesu jidi mu Matayo 13:38 egi: “Dihia didi athu a ha mavu.” Hene, gula atusombegesa fundo, tuakhalele mujiya egi, ngatshima tuatumiwa fundo ditshi, tudi mukalagala mudimo mu dihia dimoshi diene. Ndaga ya gubalega ndando idi athu nu terituare!

Tangua tuakhalele muheta mu terituare ihe-ihe, tuakhalele mumona egi athu ako ana jinga muene mu guhuima nu gusuanguluga. Hene, esue nji tuakhalele mujinga gifua afumi’a dimbo. Ima ya gudia yakhalele ya gudisha, uvi tuakhalele mudia nu gunua ima akhalele ene mudia, nu gulandula muabonga ndaga jia hygiène. Tuakhalele mutshita ngolo hagula tuzuedigo ndaga jiabola mukunda nu mafundo akhalele gututuma.

Marie-Line: Tualongugile ndaga jiavula gudi aphangi tuakhalele musanga. Ame muwunguluga ndaga imoshi yabuile tangua tuahetele gu Guyane Française. Mvula yakhalele munoga muavula, esue tuakhalele mutangiza egi mvula ibatuge hagula tuye mu mudimo wa gulongesa. Uvi phangi mumoshi wa mukhetu wanguhudile egi, “Tuajiya guya mulongesa ba?” Ngamuhudile egi, “tuya gikuatshi?” Wanguwambelele egi, “Zangula mumvudi waye, tumuya ha velo.” Hene, ngalongugile luholo lua gukuata mumvudi gu koko diko, uvi gu khanda iko nu guwendesa velo. Gulonguga gukuata mumvudi mu luholo elu, guangukuatesele ha gulongesa nga mvula idi mu noga!

Muasombegesele mafundo mbala 15. Mudi nu ndaga idi muhana gikhesa muajiya guwambela athu ako ba?

Marie-Line: Gusombegesa mafundo guakhala lamba. Gima gia gubalega ndando giakhalele guheta fundo dia gukhala, gula tuavutuga mu mudimo wa gulongesa.

Jack: Ngakhalele mumba mukubu mu inzo yagasue ihe-ihe akhalele gutuhana. Gula aphangi a gu Betele ajiya egi mbatushigo muzula matangua avula fundo tudi muya, akhalele gunguwambela mu ilelesa egi “Jack, mu mbala eyi, umbigo mukubu mu inzo!”

Marie-Line wana kanga makuba (ibuta) muabonga! Wakhalele mukanga ima yagasue mu makuba, nu gasonega majina holu dia makuba ene gifua: Ima ya gu “gabine” ima gu “sugu,” nga ya ima gu “gikhukhu”. Gula tuaheta gu inzo yetu ihe-ihe, tuakhalele muhaga gima nu gima ha fundo dienji. Wakhalele musonega majina a ima yagasue yakhalele mu makuba ene gu  yiji dia mukanda, tuakhalelego mulambagana ha guheta gima tudi mukamba.

Marie-Line: Luholo tuakhalele gudilondega muabonga, yakhalele gutukuatesa ha gusendesa mudimo wetu wa gulongesa.

Luholo lutshi muakhalele mulondega programe yenu ha ‘gutagenesa muabonga mudimo wenu’?—2 Tim. 4:5.

Marie-Line: Mu lusugu luagasue lua thomo, tuakhalele muhuluguga nu gudilondega mukunda nu gudibungisa gua mu hungu. Mu lusugu lua mbadi, Tuakhalele muya mu mudimo wa gulongesa.

Jack: Ngatshima tuakhalele nu mutango wa makumbi tudi naye guhana mu mudimo wa gulongesa, uvi tuakhalelego gudisagesa mukunda nu uvudilo wene. Mudimo wa gulongesa wakhalele ndaga ya gubalega ndando mu lujingu luetu. Gula tuazoga mu gimenegena uu nu tangua tuakhalele muvutuga (mutshitshila) mu ngueze, tuakhalele mulongesa athu agasue tuakhalele mutagana nawo mu njila.

Marie-Line: Gula tuaya mudikenesa, ngakhalele muya nu trakte. Athu ako akhalele muza hehi nu esue ha gututoga mikanda, ngatshima tuawambelelego egi tudi Matemue a Yehowa. Gishina giene tuana tala muabonga luholo luetu lua gusudiga nu makalegelo etu. Athu ana mona ndaga eji jiagasue.

Jack: Makalegelo etu abonga akhalele mulongesa athu tuakhalele mujinga nawo hehi. Ngakhalele mukatula mayiji hembo, ngukombi luphango, ngukatula mayiji agasue. Athu tuakhalele mujinga nawo hehi akhalele mumona, matangua ako akhalele gunguhula egi, “Ngajiya guheta Biblia gudi aye ba?”

Mualongesele mu ba terituare a gudikhalela. Gudi nu ndaga imoshi yana gumisuanguluisa mu vuayaje muatshitshile ba?

Jack: Gu Guyane, terituare jiko jiakhalele lamba ha guya guene. Tuakhalele mutshita vuayaje jia ba kilometre 600 mu phoso imoshi mu njila jiabola. Mbatushigo mujimbila vuayaje tuakalegele mu gishitu gia Amazone tangua tuayile mutala hungu dia gu St. Élie. Yatuzudile matangua avula, ha guheta guene tuayile mu gamiyo (mashinyi) nu mu Hors-bord (wato wa moteur). Athu avula ana khala guene ana tshita wolo. Gula tuaahana mikanda, akhalele gutuhana wolo ha fundo dia musomonyi! Mu ngueze, tuakhalele mudijiga video jia ulondegi wetu. Athu avula akhalele muza mutala.

Marie-Line: Atogele Jack ha gutshita diskure dia guwunguluga gufua gua Yesu mu dimbo dia Camopi. Ha guheta guene, tuatshitshile makumbi nguana mu wato wa moteur mu muta wa Oyapock. Akhalele diago matangua awaha.

Jack: Mafundo anyi akhalele nu maseso avula, akhalele nji nu mushiya wakola. Ngudi gumidijiga egi tuakhalele muvua woma gula tuasuena hehi nu mushiya. Muthu wakhalele muwendesa wato wene wakhalele mujiya muabonga ndaga ya gutshita. Uvi yakhalele diago vuayaje yawaha. Ngatshima tuakhalele Matemue phamba 6, uvi athu 50 ajile mu guwunguluga gufua gua Yesu, mukatshi diawo muakhalele nji nu ba indien a gu Amérique du Nord!

Marie-Line: Ndaga eji jiagasue jiawaha jidi munenga mavuala anyi adi mutshigina gukalegela Yehowa muavula. Mudi naye gusha mutshima gudi Yehowa mu ndaga jia luholo elu, ngenyi gutshigina guenu mbagukola. Yehowa watukuatesele diago muavula.

Mualongugile mazuelelo avula diago. Yakhalelego lamba gudi enue ha gujiya mazuelelo ene ba?

Jack: Ndo, diago ndo. Ngalongugile mazuelelo awa mukunda nu gulongesa lukuma nu ha gukuatesa hungu. Ngatuamezele ulongogi wa Inzo Yaleha ya Mutaledi mu zuelelo dia Sranantongo * gutuama egi ngutange Biblia! Ngahudile phangi mumoshi wa yala gula akhalele gungukotelesa. Wanguwambelele egi, “Matangua ako tuakhalelego mukotelesa muabonga mbimbi jiko, uvi watshitshi muabonga.” Ana a zonda angukuatesele muavula. Gula ngajimbila gima gimoshi, ene akhalele gunguwambela uvi mambuta ndo. Ana ene angulongele ndaga jiavula.

Marie-Line: Mu terituare imoshi, ngakhalele mulongesa Biblia mu Français, mu Portugais, nu mu Sranantongo. Phangi mumoshi wa mukhetu wanguwambelele egi ngajiya gusendesa gulongesa mu mazuelelo akola, gungima ngusugisa nu anyi ngana jiya. Ngamonele diago egi longo dienji diakhalele diabonga.

Lusugu lumoshi, ngakhalele mulongesa Biblia mu zuelelo dia Sranantongo uvi gudi muthu wa mbadi  mu Portugais. Tangua ngasendesele gulonguga nu muthu wa mbadi, phangi wa mukhetu tuakhalele n’enji wanguhudile egi: “Marie-Line, Ngudi mumona egi gudi nu ndaga imoshi ishigo muyila muabonga!” Ngakotelesele egi ngakhalele mulongesa mukhetu mumoshi wa gu Brésil mu zuelelo dia Sranantongo ha fundo dia gumulongesa mu Portugais!

Athu akhalele gumizumba muavula mafundo muakhalele mutshita mudimo. Luholo lutshi muakhalele mukuata mafuta abonga?

Jack: Ishima 11:25 idi muzuela egi: ‘Muthu wa hana mbawuzela muila.’ Tuakhalele muhana athu ako ima yetu nu tangua dietu. Mu tangua dia gulondega Inzo ya Ufumu, aphangi ako akhalele gunguwambela egi: “Tubembele alongeshi akalagale.” Uvi ngakhalele guavutudila egi: “Ayi, ame nji ngudi mulongeshi. Gula gudi nu mudimo wa gutshita, ame nji ngudi naye gutshita.” Mukut’etu agasue tuana khala nu funu ya gudikhalela hakhetu mu tangua dimoshi ngenyi, uvi esue tuakhalele mujiya egi tuajiyilego gudikhalela hagula tutshitshile athu ako gubonga.

Marie-Line: Tuatshitshile ngolo ha gudisha ha fundo dia aphangi ako. Ngenyi, tuakhalele mujiya muabonga tangua akhalele nu funu ya giledi gia an’awo nu ha guya guazula gu mavula. Tualondele luko programe yetu hagula tukhale hehi ha gukuatesa aphangi. Tuakolesele ufuta nu aphangi, gula adi nu funu ya ukuateshi, tuakhalele hehi ha guakuatesa.

Gubonga tshi muahetele luholo muakalegele mudimo mu mafundo akhalele nu funu ya alongeshi?

Jack: Mudimo wa tangua diagasue watuhanele ishimbigo yavula. Tuakhalele nu luendu lua gumona ima yavula yafugile Yehowa. Nga yakhalele lamba, uvi tuakhalele nu guhuima gua matangi, handaga tuakhalele mujiya egi tudi nu ukuateshi wa akombeledi a Yehowa fundo diagasue tudi.

Tangua ngakhalele muvuala, angumbile mu bologo gu Guyane Française, handaga ngatunyile mudimo wa gisuta. Ngakhalelego mujiya egi lusugu luko mbanguvutuga guene gifua misionere, nu mbanguhanewa njila ha gulongesa enya bologo. Yehowa wana shimbiga diago athu enji nu mutshima umoshi!

Marie-Line: Ngana suanguluga muavula luholo ngadihanele ha gukuatesa athu ako. Tuana suanguluga muavula luholo tuakhala mu mudimo wa Yehowa. Watukuatesele ha gukolesa ulo wetu. Matangua ako, Jack wakhalele munguhula gula tuajiya gutamega phangi mungoshi nu mukaji’enji adi nu funu ya gikhesa ha guza mudia hamoshi nu esue. Ngakhalele muzuela egi, “Ame nji yene ngumutangiza!” Tuakhalele mutshita ngenyi mbala jiavula.

Jack: Masugu abalega, minganga yanguwambelele egi ngudi nu ukhashi wa prostate. Nga Marie-Line gana tshigina ndo guvua ndaga yene, ngana gumuwambela egi: “Mukaji’ami, gula hamene ngafua gami, mbangushigo mufua ‘nu ivo yavula.’ Uvi mbangufua nu gusuanguluga, handaga ngumujiya egi lujingu luami luagasue ngaluhanele ha gukalegelela Yehowa mudimo.”—Gis. 25:8.

Marie-Line: Yehowa watuhanele midimo inyi tuakhalelego mutangiza nu watukuatesele ha gutshita ndaga tuakhalelego mutangiza gutshita. Monyo wetu wakhalele wa guzala nu ndaga jiabonga. Tuana hagela diago Nzambi mutshima egi, guagasue ulondegi wenji watutuma, mbatudimuya!