Jack oh Marie-Line doadoahngkihier pali laud en ara ahnsou ong papah Siohwa sangete pahr 1988. Pwehki ara kin mwadang ahnla wekideklahn ara irair kan, ira alehdier pwukoa tohto nan Guadeloupe oh French Guiana. Met sahpw riau pwukat mi pahn epwelpen ohpis en Sounkadehdehn Siohwa kan nan France. Kitail pahn idek rehn Jack and Marie-Line ekei peidek.

Dahme kamwakid kumwa en doadoahngki pali laud en amwa ahnsou ong papah Siohwa?

Marie-Line: Sangete ei seri nan Guadeloupe, I kin kalapw iang ei nohno, me wia Sounkadehde ngoang men, kalohk rahn ehu pwon. I poakohng aramas akan, eri ni ahnsou me I neksang sukuhl nan pahr 1985, I tepida iang doadoahk en pioneer.

Jack: Ni ahnsou me I pwulopwul, I kin kalapw mi rehn irail kan me kin doadoahngki pali laud en arail ahnsou ong papah Koht oh perenki kalohk. I kin iang sawaspen pioneer erein ahnsoun kommoal en sukuhl kan. Ni imwin wihk kan, ekei pak se kin iang pioneer kan dake bus kohla ni arail wasahn kalohk. Se kin kalohk rahn ehu pwon oh mwuhr kohla mwemweit ni oaroahr pihk kan. Ahnsou ko uhdahn kaperen!

Mwurinte ei pwoudikihda Marie-Line nan pahr 1988, I ndaiong pein ngehi, ‘Ahnsouwet sohte mehkot me ireikitdi, eri se anahne kalaudehla at doadoahk en kalohk.’ I tepida iang Marie-Line pioneer. Sounpar ehu mwuri, mwurin at iang sukuhl en pioneer, se idihdida nin duwen pioneer tohrohr kei. Se alehdi pwukoa kei nan Guadeloupe mwohn at ale luhk en kohla French Guiana.

Kumwa alehdier pwukoa tohto me kalapw wekila nan pahr kan me kohdo. Dahme sewesei kumwa en ahnla wekidekla kan ong irair kapw kan?

Marie-Line: Riat Kristian kan nan Pedel en French Guiana ese me iren Paipel me se kin keieu perenki iei Aiseia 6:8. Eri ni arail kin eker kiht nan delepwohn, re kin tepte kamwan oh nda: “Ke tamatamante iren Paipel me ke keieu perenkio?” Se ese me met wehwehki me se pahn alehdi pwukoa kapw ehu, eri se pahn nda, “Iet kiht! Poaroneikitla!”

 Se sohte kin kapahrekiong at pwukoa kapwo ong at pwukoahn mahs kan pwehki met kak kahrehiong sen sohte perenki at pwukoa kapwo. Se pil kin tiengla mwowe pwehn esehla riat Kristian kan.

Jack: Ekei riat Kristian kan sohte men sen kohkohsang irail eri re kin song kangoange kiht en mihmihte. Ahpw ni ahnsou me se kohkohsang Guadeloupe, emen brother katamankihong kiht sapwellimen Sises mahsen ko nan Madiu 13:38 me mahsanih: “Mwahto iei sampah.” Eri ni at pwukoa kan kin wekila, se kin katamankihong kiht me sohte lipilipil wasa se mi ie, se kin papah nan mwahtohte. Ni mehlel, aramas akan oh wasahn kalohk iei me keieu kesempwal!

Ni at lella nan ehu wasahn kalohk kapw, se kin kilang me meteikan kak nsenamwahu ni arail kousoan wasao. Eri, se kin song en mour duwehte tohn wasao. Ele mwenge kan weksang dahme se ahn, ahpw se kin kang dahme irail kang oh nim dahme irail nim, ahpw se kin kanahieng at roson. Se kin nantihong en nda soahng mwahu kan duwen pwukoa koaros me se ahneki.

Marie-Line: Se pil sukuhlki soahng tohto sang riat Kristian kan wasao. I taman ni at tepin lella French Guiana. E uhdahn keteu laud, eri se medewe me se pahn awih keteuo pwehn uhdi mwohn at kak kohla kalohk. Ahpw emen sister idek rehi, ke onopadahr en kohla kalohk? I pwuriamweila, oh nda, “Ia mwomwe?” E sapengki, “Ale ahmw amperen, oh kita pahn dakehda warata pwaisikel ko.” Eri I sukuhlki ia duwen ei pahn kol amper oh dake pwaisikel ni ahnsowohte. Ma I sohte sukuhlki met, I sohte pahn kak kohla kalohk ni ahnsoun keteu!

Kumwa keseuseliher tohtohsang pak 15. Mie iren sawas me pahn kak sewese meteikan duwen keseula ehu wasa?

Marie-Line: Keseuseli kin kak apwal. Ahpw, e kesempwal en rapahkihda wasa ehu me ke kak nsenamwahuki ni omw pahn pwurasang kalohk.

Jack: I kin kalapw litopwihala nan ihmw me se keseula loale. Brother kan ni ohpis en Sounkadehdehn Siohwa kan kin ese me ele se sohte pahn mihmi werei, eri ekei pak irail pahn nda, “Jack, dehr pwunodki en litopw!”

Marie-Line kin maiengala en kihpene at kepwe kan! E kin kihpene soahng koaros nan koakon kan oh ntingihedi powe “wasahn duhdu,” “wasahn meir,” “wasahn mwenge,” de soahng teikan. Eri ni at lella ni ihmw me se pahn keseula, e kak mengei  en kihpeseng koakon kan nan pere ko me ren mi ie. E kin ntingihedi dahme mi nan ehuehu koakon ko pwe sen kak mwadang diarada dahme se anahne.

Marie-Line: Pwehki se esehla mwomwen en soandi mwahu, se kak mwadang en tapiada at doadoahk en kalohk.

Ia duwen amwa kin koasoanehdi amwa ahnsou pwe kumwa en ‘kapwaiada amwa doadoahk ni unsek’?—2 Tim. 4:5.

Marie-Line: Niehd kan se kin kommoal oh kaunopada ong mihting kan. Sang Niare kohla, se kin kalohk.

Jack: Mendahki mie uwen awa me se anahne lel nan ehuehu sounpwong, se sohte kin medemedewehte duwen met. Doadoahk en kalohk me keieu kesempwal nan at mour. Sang ahnsou me se kohkohsang ni imwato lao se pwurala, se kin nantihong koasoiong koaros me se tuhwong.

Marie-Line: Karasepe, ni at kin kohla pikinik, I kin ahnsou koaros wahda kisin doaropwe kan. Ekei aramas kin kohdo reht oh peki sawasepen Paipel kan, mendahki se saik ndaiong irail me kiht Sounkadehdehn Siohwa kan. Eri, se kin kanahieng mwomwen at likou oh wiewia. Aramas akan kin tehk soahng pwukat.

Jack: Se pil kin wia mehn kadehde mwahu sang ni at kin wia mehn mpe mwahu kei. I kin rikada doaropwe kan likin ihmw, kesehla kihd, oh reik likin imwato. Mehn mpat kan kin kilang met oh ekei pak idek, “Mie Paipel rehmw me I kak naineki?”

Kumwa kin kalapw kalohk nan wasahn kalohk doh kan. Mie mehkot tohrohr me kumwa kin tamataman duwen wasa pwukat?

Jack: Nan Guiana, e kin apwal en lella ni ekei wasahn kalohk kan. Se kin kalapw seiloangki mwail 370 nan wihk ehu nan ahl kan me sakanakan. I taman at mwemweitla St. Élie, me mi nan wel en Amazon. Pwehn lella mwo, se tangki awa kei doadoahngki pwoht oh sidohsa me kin tang nan ahl sakanakan. Doadoahk me pali laud en aramas en wasao kin wia iei rapahki kohl. Pwehki ar kalahnganki neitail sawasepen Paipel kan, ekei kin toukihda kisin takai kohl kan! Ni soutik kan, se kin kasalehda ehu kisin kasdo duwen atail pwihno. Me tohto sang wasao iang kilang.

Marie-Line: Me keren, brother kan peki rehn Jack en wia padahk en Katamano nan Camopi. Pwe sen lella mwo, se anahne tangki awa pahieu doadoahngki pwoht pohn Pillap Oyapock. Dahme wiawi uhdahn kaperen.

Jack: Wasa me pihlo kin pedepedala nan Pillap Oyapock, ekei pak ahdo kak uhdahn keper, ahpw mehlel ma ahdo kin tang pohn takai kan. E uhdahn kasaloh ni at kin kilangada wasa pwukat. Sountangahki pwoht men anahne koahiek pwehn tang wasa pwukat. Ahpw, dahme wiawio uhdahn kaperen. Mendahki Sounkadehde wenemente, mpen aramas 50 iang towehda Katamano, iangahki ekei mehn Amerindian!

Marie-Line: Me pwulopwul kan kak lelohng soangen ahnsou kaperen pwukat ma re pahn kalaudehla arail papah Siohwa. Ke anahne likih Siohwa nan soangen irair pwukat, oh omw pwoson pahn kehlailla. Se kin kalapw kilang duwen Siohwa eh kin ketin sewesei kiht.

Kumwa sukuhlkiher ekei lokaia. Ia duwe, e mengei ong kumwa en esehla?

Jack: Uhdahn soh. I sukuhlki lokaia pwukat pwe I en kak kalohk oh sewese mwomwohdiso. I alehdi pwukoahn wia Onop en Kahn Iroir ni lokaiahn Sranantongo * mwohn ei wia wadawad en Paipel! I idek rehn emen brother ma re wehwehki dahme I nda. E sapengki, “Ekei pak se sohte wehwehki dahme ke nda, ahpw e uhdahn mwahu.” Seri kan kin sawas laud. Ni ei kin sapwungala, re pahn nda mehkot, ahpw me laud kan sohte kin. I sukuhlki soahng tohto sang rehn me pwulopwul kan.

Marie-Line: Nan ehu wasahn kalohk, I kin wia onop en Paipel ni lokaiahn France, Portugal, oh Sranantongo. Emen sister nda me I en tepikihda lokaia me keieu apwal oh imwisekihla lokaia me I ese. Mwuhr I wehwehkihda erpit en kaweid wet.

Ehu rahno, mie ei onop en Paipel ni lokaiahn Sranantongo oh keriaun onopo ni lokaiahn Portugal.  Ni ei tepida keriaun onopo, sistero me iangih ieo nda, “Marie-Line, I leme mie mehkot sapwung!” I tehkada me I lokolokaiahki lokaiahn Sranantongo ong lihen Brazil men me kin lokaiahki lokaiahn Portugal!

Irail kan me kumwa kin papah kin uhdahn poakohng kumwa. Ia duwen amwa wiahla kompoakparail uhdahn mwahu kei?

Jack: Lepin Padahk 11:25 mahsanih: “Kadek, ke ahpw pahn paiamwahula.” Se sohte kin peikasalki at kihong at ahnsou ong meteikan oh wia soahng kan ong irail. Me pid kamwakele oh kamwahwihala wasa kan nan Wasahn Kaudok, ekei kin ndaiong ie: “Mweidohng sounkalohk kan en wia met.” Ahpw I sapengki: “Ngehi pil emen sounkalohk. Eri ma mie doadoahk me anahne wiawi, I men iang wia doadoahko.” Mendahki kitail koaros anahne ahnsou ong pein kitail, se kin kalapw katamankihong kiht me se sohte men pein at ahnsou en kerempwahla at en wia me mwahu ong meteikan.

Marie-Line: Se kin nantihong en kasalehda me se nsenohki riat Kristian kan. Ni ahl wet, se kin esehda ma irail anahne emen en apwalih neirail seri kan de pwekada seri ko sang wasahn sukuhl. Eri se pahn kak pwurehng koasoanehdi at koasoandi kan pwehn kak sawas. Ni ahl wet, se wiahla kompoakepah mwahu kei ong meteikan, kaunopada en sewese irail ni ahnsou me re anahne.

Kapai dah kan me kumwa alehdi sang ni amwa papah nan wasa me anahn laud mie?

Jack: Pwehki se kin doadoahngki pali laud en at ahnsou ong papah Siohwa, se kin alehdi kapai tohto. Se kin kalapw kilang soangsoangen kepikipik kan me Siohwa ketin wiahda. Mendahki mie kahpwal kan, se ahneki meleilei pwehki se ese me sapwellimen Koht aramas akan pahn sewesei kiht sohte lipilipil wasa se mi ie.

Ni ahnsou me I wia mwahnakapw men, I selidi nan French Guiana pwehki ei soupoupali en Kristian. Uhdahn I sohte leme me ehu rahn I pahn pwurala wasao nin duwen misineri men, oh kak mwemweitla ni imweteng kan nin duwen sounkalohk men. Ni mehlel, Siohwa kin ketin kadek ni eh ketikihda kapai kan!

Marie-Line: Dahme I keieu perenki iei en sewese meteikan. Se perenki at kin papah Siohwa. Se karanihala emenemen nin duwen pwopwoud ehu. Ekei pak, Jack kin idek ma se kak lukehdo pwopwoud ehu me mworusala en iang kiht mwenge. I kalapw sapengki, “Ih men me I pil medemedewe!” At madamadau kin kalapw duwepenehte.

Jack: Me keren, I ahnekihda kanser en werennehu. Mendahki Marie-Line sohte perenki rong duwen met, I ndaiong ih: “Nahn, I saik mahla, ahpw mehnda ma I mehla ahnsou keren, I ese me I doadoahngki ei mour pwehn wia dahme keieu kesempwal pwehn papah Siohwa, oh met kahrehiong ie peren.”​—Sen. 25:8.

Marie-Line: Siohwa ketikihongehr kiht pwukoa kan me se sohte kasik, oh ketin mweidohng kiht soahng kan me se medewe me se sohte kak wia. At mour uhdahn direkihla soahng mwahu tohto. Se pahn kohla wasa sohte lipilipil me sapwellimen Siohwa pwihn peki sen kohla ie pwehki se uhdahn kamehlele me Siohwa pahn ketin ahnsou koaros ieiang kiht!