Hermano Jackwan señoran Marie-Linewanqa, 1988 watamantapacha Jehová Diospaj tiempo juntʼasqata llankʼashanku. Paykunaqa Guadalupe nisqa churuspi, Guayana Francesa nisqa lugarpiwan precursores karqanku. Chay lugarestaqa Franciapi kaj sucursal kunan atienden. Hermano Jackta, señorantawan tapurisunchej, imaynatachus mayman kachasqa kaspapis, Jehová Diosta tukuy sonqo sirvisqankuta.

¿Imaraykutaj Jehová Diospaj astawan llankʼayta munarqankichej?

Marie-Line: Noqaqa Guadalupe nisqa churuspi wiñakorqani. Diantinta mamaywan predicaj kayku. Mamayqa tukuy sonqo predicaj. Runasta mayta munakusqayrayku, 1985 watapi precursorta orqhorqani, uj institutopi estudiayta tukuytawan.

Jack: Jovencitollaraj kashajtiy, Jehová Diospaj astawan llankʼaj hermanoswan masichakoj kani. Paykunamanqa predicay mayta gustaj. Colegioypi vacaciones kajtin, precursor auxiliarta orqhoj kani. Semana tukukuytataj, chay precursoreswan waj lugaresman predicaj rej kani. Chaymantaj micropi rej kayku. Diantinta predicaytawan, mar kantuman samarikoj rej kayku. Chayqa mayta gustawaj.

Señoraywanqa 1988 watapi casarakorqayku. Chaymanta pisi tiemponman, sonqoypi nikorqani: “Jehová Diospaj astawan llankʼayta atiykuman, ni ima jarkʼashawaykuchu”, nispa. Señorayqa precursoraña karqa. Chayrayku noqapis precursor regularta orqhorqani. Watanmantaj precursorespaj escuelaman rerqayku. Chaymanta precursores especialesta sutichawarqayku. Guadalupemanta ashkha lugarespi Diosta sirverqayku, maytataj kusikorqayku. Chaymantaqa Guayana Francesa nisqaman kachawarqayku.

Qankunaqa ashkha lugarespi sirverqankichej. ¿Ima yanapasorqachej yachaykukunaykichejpaj?

Marie-Line: Guayana Francesapi kaj Betelmanta hermanosqa, Isaías 6:8 mayta gustawasqaykuta yacharqanku. Chayrayku telefonopi wajyamuspa chay textota yuyarichiwajtiyku, waj lugarman kachanawaykuta yachaj kayku. Noqaykutaj nej kayku: “¡Kaypi kashayku! Noqaykuta kachawayku”, nispa.

Yachayku sapa lugar uj jina kasqanta. Chayrayku maypichus sirverqayku chay lugaresta mana kikinchaykuchu. Chayqa yanapawayku Jehová  Diosta mayllapipis kusisqa sirvinaykupaj. Uj mosoj lugarman chayaspataj, chay lugarmanta hermanosta sumajta rejsinaykupaj kallpachakuyku.

Jack: Wakin amigosniykoqa, mana ripunaykuta munasqankurayku tukuy imata niwaj kayku. Jinapis uj hermano niwasqaykuta yuyarikuykupuni. Payqa Guadalupemanta ripushaytiyku, Mateo 13:38 versiculota leepuwarqayku. Chaypi Jesús nerqa: “Jallpʼaqa kay mundo”, nispa. Mayman ripuspapis, yuyarikuyku kay jallpʼallapipuni sirvishasqaykuta. Chantapis runasman yachachiy aswan sumaj.

Sapa lugarpi runasqa kusisqalla kausakunku. Chayrayku mayman chayaspapis, chay lugarmanta runas jina kausakuyku. Mikhunasninku waj jina kajtinpis, imatachá paykuna mikhunku, chayllatataj mikhuyku. Imastachá tomanku, chayllatataj tomayku. Mana onqonaykupajpis sumajta cuidakuyku. Chantá maypichus sirverqayku chay lugaresmanta, allinta parlanaykupaj kallpachakuyku.

Marie-Line: Sapa lugarpi hermanosmanta mayta yachakuyku. Guayana Francesaman chayasqaykutawan, uj pacha manchayta paramusharqa. Noqaykoqa predicaj rinaykupaj, para pasananta suyakusharqayku. Jinallapi uj hermana, “¿jakuchu?” niwarqa. Noqataj nerqani: “¿Imaynatá kay jina parapi risunri?”, nispa. Paytaj niwarqa: “Uj makiykiwan paraguata japʼinki, ujnin makiykiwantaj bicicletaykita apanki”, nispa. Ajinapi yachakorqani, paragua japʼirisqa, uj makillawan bicicletata apayta. Manachus chay hermana yachachiwanman karqa chayqa, nichá paray tiempopi ujllatapis predicaymanchu karqa.

Qankunaqa 15 kutista jina waj lugaresman tiyakoj rerqankichej. ¿Imatataj wajkunaman niwajchej?

Marie-Line: Waj lugarman astakoyqa mana atikullanchu. Jinapis mayllapipis kaspaqa, uj wasisituta samarikunapaj necesitanchejpuni.

Jack: Mosoj wasiman astakuspaqa, wasi ukhuta pintaytapuni yachani. Wakin kutis, sucursalmanta hermanosqa mana unaytachu uj lugarpi kanaykuta yachaj kanku. Chayrayku niwaj kanku: “Jack, kunan kutipeqa ama wasita pintankichu”, nispa.

Señorayqa cosasniykuta sumajtaña qʼepichayta yachan. Payqa tukuy imasniykuta cajasman churan. Sapa cajapi imachus kasqanmantataj, uj listata ruwan. Chantá sapa cajaman sutista churan, “bañopaj”, “cocinapaj”, “puñuna cuartopaj” nispa. Ajinamanta waj wasiman chayaspaqa, yachaykuña maymanchus chay cajasta churanaykuta.

Marie-Line: Chayta ruwasqaykurayku, mayman ripuspapis chay rato predicaj llojsiyta atiyku.

 ¿Imatá ruwankichej ‘Diospaj llankʼayniykichejta allinta juntʼanaykichejpaj’? (2 Tim. 4:5).

Marie-Line: Lunes diasnenqa samarikuyku, reunionespajwan wakichikuyku. Chantá semanantinta predicaj llojsiyku.

Jack: Precursores especiales jina horasniykuta juntʼanayku kajtinpis, mana chayllapichu yuyayku. Astawanqa predicayta munayku. Chayrayku wasimanta llojsiytawanpacha predicayta qallariyku, chamunaykukamataj predicallaykupuni.

Marie-Line: Mayman puriykachaj rispapis, tratadosta apakuytapuni yachani. Wakin runasqa Jehovaj testigosnin kasqaykuta mana willajtiykupis, publicacionesta mañakuwayku. Chayrayku mayllapipis cristianos jina vistikuyku, Diosta jatunchanapaj jinataj kausayku. Runasqa chayta qhawanku.

Jack: Wakin runasqa, kausayninchejta rikuspa Diosmanta yachakuyta munanku. Chayrayku choqasqa papelesta oqhariyta yachani, qʼopatapis wijchʼunipuni. Wasiy chaypi callemanta laqhestapis pichani. Vecinosneyqa chayta rikunku. Wakintaj tapuwayta yachanku: “¿Nichu uj Biblia tiyapusunkiman?”, nispa.

Ashkha kutispi karu lugaresman predicaj rerqankichej. Chaymanta, ¿uj experienciata willariwaykumanchu?

Jack: Ya. Guayana Francesapeqa, mana wakin lugaresman chayayta atikullanchu. Ashkha kutista semanatapuni viajarqayku 600 kilometrosta jina, mana allin ñankunasnintataj. Uj pacha, Saint-Élie nisqa comunidadman rerqayku. Chayqa Amazonas nisqa montespi kashan. Chayman chayanaykupajqa, tukuynejta purej autopi, botepiwan ashkha horasta viajarqayku. Chay lugarmanta casi tukuy runas, qorita maskʼaspa trabajanku. Wakenqa publicacionesta jaywajtiyku, tʼuna qorisitusta qowarqayku. Chʼisinpitaj Bibliamanta uj videota rikucherqayku. Ashkha runas qhawaj jamorqanku.

Marie-Line: Niraj unaychu, qosaywan khuska Camopi nisqa comunidadman rerqayku. Payqa Señorpa Cenanpaj discursota qonan karqa. Chayman chayanaykupajqa, Oyapock nisqa mayunta tawa horata botepi rerqayku. Chay viajemantaqa manapuni qonqakunichu.

Jack: Oyapock mayumanta wakin cheqasqa manchay ukhu. Chaypitaj yakoqa manchayta qhollchoqeyaspa apurayta rin. Botepi chay cheqasman qayllaykoyqa, mancharinapaj jina karqa. Boteta apaj runaqa, chayninta pasanapaj sumajta apaykachanan tiyan. Chay viajeqa manchay sumajpuni karqa. Jesuspa Wañuyninta Yuyarinapaj tantakuyman 50 runas jina jamorqanku, testigostaj sojtalla karqayku. Chay tantakuyman jamojkunamanta wakenqa, monte runas karqanku.

Marie-Line: Chay jina viajesqa, creeyniykuta mayta kallpacharqa. Jehová Diosta astawan sirviyta munaj jovenesqa, paykunapuni chayta rikunkuman. Chay kutispeqa Jehovapi astawan atienekuna, creeyninchejpis astawan sinchʼiyan. Ashkha kutispi rikorqayku Jehová Dios yanapawasqaykuta.

Qankunaqa ashkha parlaykunata yachankichej. Mosoj parlaykunata yachakunaykichejpaj, sumaj umayojchá kankichej.

Jack: Mana. Manachus Diosmanta yachachinay kanman karqa chayqa, nichá chay parlaykunata yachakuymanchu karqa. Uj kuti, tantakuypi Torremanta Qhawaj revistamanta sranangtongo * parlaypi yachachinayta niwarqanku. Chaypachaqa niraj Bibliatapis chay parlaypi leerqanichu. Plataformamanta uraykuytawan, uj hermanota tapurerqani parlasqay entiendekusqantachus manachus. Paytaj niwarqa: “Sumajta ruwarqanki, wakin palabrasllata mana entienderqaykuchu”, nispa. Jinapis wawasqa imaspichus pantasqayta sutʼita nipuwaj kanku. Paykunaqa maytapuni yanapawarqanku.

Marie-Line: Uj lugarpi, francespi, portuguespi, sranangtongopiwan Bibliamanta yachachej kani. Uj hermanataj yuyaychariwarqa: “Allin kanman niraj allinta yachankichu, chay parlayniyoj estudiosniykimanraj yachachinayki. Chaymantataj sumajta yachanki chay parlaykunapi estudiosniykita yachachiwaj”, nispa. Chaypachaqa mana entienderqanichu imaraykuchus chayta niwasqanta.

 Uj pacha, iskay estudiosniyman rerqani. Ñaupajtaqa sranangtongota parlajman rerqani, chaymantataj portuguesta parlajman. Chay estudioyta yachachishajtiy, compañeray niwarqa: “Marie-Line, waj parlaypi yachachishanki”, nispa. Jinapi reparakorqani, portuguesta parlaj estudioyman sranangtongopi yachachishasqayta. Recién entienderqani yuyaychawaj hermanata.

Maykunapichus sirverqankichej chay lugaresmanta hermanosqa, mayta munakusunkichej. ¿Imatá chaypaj ruwarqankichejri?

Jack: Proverbios 11:25 nin: “Pichus mana michʼakuspa wajman jaywarejqa tukuy imayojman tukun”. Noqaykutaj chayta ruwanaykupaj kallpachakuyku. Tantakuna Wasita llimphuchaypi, allinchaypiwan yanapakushajtiy, wakin hermanos niyta yachawanku: “Hermanosta kamachiy chayta ruwanankuta”, nispa. Noqataj niyta yachani: “Noqapis congregacionmanta kani. Ima ruwanapis kajtenqa yanapakuyta munani”, nispa. Señoraywan samarikunayku kajtinpis, wajkunata yanapanaykupaj tiempochakuykupuni.

Marie-Line: Imapichus hermanos yanaparinata necesitasqankuta qhawayku. Ajinapi yachayku, wakin hermanos wawasninkuta qhawapunata necesitasqankuta. Wakintaj wawasninkuta escuelamanta pusakanpunata necesitasqankuta. Chantá chay hermanosta yanaparinaykupaj tiempochakuyku. Ajinamanta sumaj amigosta ruwakuyku. Imata necesitajtinkutaj, chay rato yanapariyku.

Pisi willajkuna tiyan chay lugaresman yanapakoj rispa, ¿ima bendicionestataj japʼerqankichej?

Jack: Jehová Diospaj astawan llankʼaspa, mayta kusikuyku. Mayllamanpis predicaj rispaqa, Jehová Diospa ruwasqasninta rikuyku. Llakiykuna kajtinpis, mana anchata phutikuykuchu. Imaraykuchus maypi kajtiykupis, yachayku Jehová Diospa llajtan yanapanawaykuta.

Joven kashajtiy, mana cuartelman risqayrayku Guayana Francesapi carcelpi karqani. Ni jaykʼaj yuyarqanichu chay lugarman kutinayta. Nillataj yuyarqanichu preso karqani chay carcelpi predicaytapis. Jehová Diosqa mayta bendeciwayku.

Marie-Line: Wajkunata yanapaspa mayta kusikuni. Jehová Diosta sirvispaqa anchatapuni kusikuyku. Paypaj khuska llankʼasqaykurayku, qosaywan aswan ujchasqas kayku. Wakin kutisqa niwan: “Chay qhariwarmita kallpacharinapaj mikhoj invitasunman”, nispa. Noqataj niyta yachani: “Noqapis chaytapuni niyta munasharqayki”, nispa. Ashkha kutispi kikinta yuyayku.

Jack: Niraj unaychu, doctoresqa prostatamanta cancerniyoj kasqayta niwanku. Chayrayku señoray mana munajtinpis, payman niyta yachani: “Munasqetáy, mana viejitomantachu wañupusaj chaypis, kusisqa wañupusaj. Imaraykuchus Jehová Diosta tukuy atisqayta sirverqani. Mana qhasipajchu kausani” (Gén. 25:8).

Marie-Line: Jehová Diosqa payta sirvinaykupaj uj jatun punkuta kicharipuwarqayku. Wakin imastaqa ni jaykʼaj ruwanaykuta yuyarqaykuchu. Ashkha bendicionesta japʼerqayku. Yachayku Jehová Dios mayllapipis yanapanawaykuta. Chayrayku maymanchá kachawasqayku, chayman risqayku.