Jackwan Marilinqa 1988 watamantam tukuy tiemponkuwan Jehova Diosmanta willakuchkanku. Paykunaqa maymi kachasqankumanmi rinku, chaymantapas tukuy imapim yanapakurqaku Guadalupe llaqtapi hinaspa Guayana Francesapi, chay llaqtakunamantaqa Francia nacionpi Betel wasin nanachikun. Chaynaqa tapurisunyá willariwananchikpaq.

¿Imaynanpitaq tantiakururqankichik tukuy tiempoykichikwan Jehova Diosmanta willakunaykichikpaq?

Marilin: Guadalupe llaqtapim wiñarqani, mamaywanmi chisyaq punchaw Diosmanta willakuq kani, kunanpas payqa sumaqllatañam Diosmanta willakun. Runakuna yanapayta munasqayraykum estudiayta tukuruspallay tukuy tiempoywan Diosmanta willakuyta qallaykurqani.

Jack: Warmaymantam hukllawakuq kani tukuy tiemponkuwan Diosmanta willakuq iñiqmasinchikkunawan. Chaymantapas sapa watam escuelaman kutiykunaykama 50 horata Diosmanta willakuq kani. Wakinpiñataqmi sabadonkunapi domingonkunapi huk lawkunaman willakuq riq kaniku. Chaymantañataqmi puririkuq riq kaniku. Sumaqmi karqa.

1988 watapim casarakurqaniku. Chaymanta qipallamanmi nikurqani: “Mana imapas harkawachkaptinqa Diosmantayá astawan willakusaq”, nispa. Chaynata nispaymi warmichay hinaña precursor kayta qallaykurqani. Chaymanta watallanmanmi niykuwarqaku precursor especial kanaykupaq. Achka llaqtachakunamanmi willakuq rirqaniku, kusikuypaqmi karqa, chayna kachkaptiykum niykuwarqaku Guayana Francesaman rinaykupaq.

¿Imataq yanapasurqankichik maymanpas rispa chaylla amañanaykichikpaq?

Marilin: Guayana betel wasipi kaq iñiqmasinchikkunaqa yacharqakum Isaias 6:8 nisqanman hina ruwasqaykuta. Chaymi asispa niwaqku: “¿Yuyachkankichikchu Isaias 6:8 nisqanta?”, nispa. Chaynata niwaptinkuqa yachasqañam karqa huk lawman rinayku. Chaynata niwaptinkum niq kaniku: “¡Kayqaya kaypi kachkaniku! ¡Ñuqaykuyá risaqku!”, nispa.

Maymanpas rispaykuqa manam ninikuchu:  “Wakpim allinqa karqanchik”, nispaqa. Chaynata nispaqa manach allinchu kaymanku. Chayna ninaykumantaqa kallpanchakunikum chayasqayku lawpi iñiqmasinchikkunawan riqsinakunaykupaq.

Jack: Wakin iñiqmasinchikkunaqa niwaqkum: “Ama huk lawmanqa astakuychikchu”, nispa. Chaynataqa niwaqku paykunawan kuska kanaykuta munasqankuraykum. Ichaqa huk iñiqmasinchikmi qawaykachiwarqaku Mateo 13:38 nisqanta. Chaypim nin: “Chakraqa llapa runakunam”, nispa. Chaymantapacham maymanpas rispaykuqa chayta yuyariniku. Maypiña-chaypiña kaspapas maymi kasqanchikpi llapallan runakunaman willakuymi allinqa.

Astakusqayku lawpi runakunaqa imapas kapuqllankuwanmi hawka kawsakuqku. Ñuqaykupas paykuna hinam imapas kaqta mikuq kaniku, ichaqa sumaqtam tantiakuq kaniku imata mikunaykupaq, chaynapi mana unqurunaykupaq. Maymi risqayku llaqtachakunapi sasachakusqaykumantaqa manam willakuqchu kaniku, aswanqa allin kaqkunallamantam willakuq kaniku.

Marilin: Chayasqayku lawpi iñiqmasinchikkunamantapas tukuy imatam yacharqaniku. Yuyachkaniraqmi Guayanaman chayaruptiyku matiwan maqchisqa hina paramusqanta, chaynata paramusqanraykum qusaywan ninakurqaniku: “Usyaramuchunraq willakuq rinapaq”, nispa. Ichaqa huk kaqnin iñiqmasinchikmi niykuwarqa: “Haku willakuq”, nispa. Chaymi nirqani: “¿Kayna parapi?”, nispay. Payñataqmi niwarqa: “Paraguayuqmi risunchikqa bicicletaykiman sillakuy”, nispa. Chaynapim yacharurqani huknin makillaywan bicicleta apayta hukninwanñataq paraguay apayta. Iñiqmasinchikta mana kasukuspayqa manachusmi atiymanchu karqa puquy tiempopi Diosmanta willakuytaqa.

Qamkunaqa kayman chaymanmi astakurqankichik, willaykuwaykuyá imayna astakusqaykichikmanta.

Marilin: Astakuyqa sasam, ichaqa maypiña kaspapas wasikipi hina kaymi aswan allinqa.

Jack: Sapa astakuspaykum, yachasqayku wasita suma-sumaqta allichaq kaniku. Chayraykum betel wasipi iñiqmasinchikkunapas mana unay kanaykumanta yachaspankuqa niwaqku: “Jack, manam unaychu chaypiqa kankichik, amaña suma-sumaqtaqa allichaychikchu”, nispa.

Maymanpas astakuptiykuqa Marilinmi imaykutapas suma-sumaqchata qipichan, hinaspan qawanpi qillqarun imakuna sapa qipipi kasqanta. Chaynapim astakusqayku lawman chayaspaykuqa manaña sasachakunikuñachu mayman churanaykupaqqa nitaq mayqin qipipi imapas kasqanta yachanaykupaqqa.

Marilin: Sapa astakusqaykupi chaynata ruwasqaykum  yanapawanku chayasqayku lawpi chaylla Diosmanta willakunaykupaq.

¿Imaynatam tukuy imapaq haypakurqankichik? (2 Tim. 4:5).

Marilin: Lunesninpim samaniku, hina chay punchawtaqmi huñunakuypaq qillqanchikkunata qawaniku. Martesmanta domingokamam ichaqa willakuniku.

Jack: Yachanikum hayka hora willakunaykutaqa, ichaqa manam chayraykuchu willakunikuqa, aswanqa Diosninchikmanta runakunaman yachachiyta munasqaykuraykum. Chaymi pimanñapas willakuniku wasimanta lluqsisqaykumantapacha wasiman kutiykunaykukama.

Marilin: Puririkuq rispaykupas qillqachanchikkunatam apaniku. Runakunaman Jehova Diospa testigon kasqaykuta mana nichkaptiykupas asuykamuwankum qillqanchikkunata mañakuwanankupaq. Chayraykum sumaqta pachakuniku hinaspa Diosta yupaychaq runakuna hina kanaykupaq kallpanchakuniku, runakunaqa imayna kasqanchiktam qawawanchik.

Jack: Yachasqayku lawpipas wanukunatawan qupakunata huñunaypaqmi kallpanchakuni. Chaynapi yachasqay lawpi runakunapas Dios yupaychaq kasqayta qawanankupaq, chayta ruwasqayraykum wakinqa niwan: “¿Manachu kapusunki huk biblia?”, nispa.

Yaqa sapa kutillam Diosmanta manaraq willakusqanku llaqtachakunaman rirqankichik, willaykuwaykuyá imayna kasqanmanta

Jack: Guayanapiqa sasam llaqtachakunaman chayayqa. Wakinpiqa yaqa semanapim chayaq kaniku. Ñankunapas manam allinchu karqa. Yuyachkaniraqmi yunka lawman risqaykuta. Chay lawman chayanaykupaqqa carropim rirqaniku, chaymantañataqmi botewan. Chay lawpi yachaqkunaqa quri maskaypim sapa punchaw kanku. Paykunaman qillqanchikkunata quykuptinkum, qurita quykuwarqaku qillqanchikkuna hinalla ruwakunanpaq. Tutaykuqtañataqmi huk kaqnin videonchikta qawachirqaniku, achkam hamurqaku.

Marilin: Watakuna ñawpaqtam, qusayta niykurqaku Camopi llaqtaman rispa Jesuspa wañukusqanta yuyarinapaq huñunakuypi yachachinanpaq. Chay llaqtaman chayanaykupaqqa tawa hora nisqam botepi rirqaniku. Suma-sumaqmi karqa.

Jack:Chay mayuqa llumpay manchakuypaqmi kakusqa, chaymi manchakuyllawanña rirqaniku. Botewan apawaqniyku runam ichaqa hichu kasqa chaymi allinlla chayarurqaniku. Chay risqaykuqa suma-sumaqmi karqa. Jesuspa wañukusqanta yuyarisqayku huñunakuypiqa suqta testigokunallam karqaniku, ichaqa wakin llaqtachakunamantapas achkam hamurqaku.

Marilin: Musu-sipaskunapas Jehova Diospaq kaqkunata astawan ruwaspankuqa kusisqam tarikunqaku. Ichaqa Jehova Diospim hapipakunanku, paymantaqa manam iskayrayanankuchu, Chayna kaspankuqa allin iñiyniyuqmi kanqaku, Jehova Diospas yanapanqam.

Qamkunaqa achka rimaykunatam rimankichik ¿imaynatam yacharurqankichik?

Jack: Kikillaykumantaqa manam yachaymankuchu karqa. Diosmanta yachachinaykuraykum chay rimaykunataqa yacharqaniku. Huk kutipim niykuwarqaku sranangtongo * rimaypi Willakuq qillqanchikmanta yachachinaypaq. Chay rimaytaqa manam haykapipas rimarqanichu. Yachachiyta tukuruspaymi huk kaqnin iñiqmasinchikta nirqani: “¿Allintachu rimamurqani?”, nispay. Payñataqmi niwarqa: “Allintam rimamurqanki wakichallanpim manaqa”, nispa. Yuyayniyuq iñiqmasinchikkunamantaqa warmachakunam anchata yanapawarqaku chay rimayta yachanaykupaqqa, warmachakunaqa niwaqkum imapi pantasqayta yuyayniyuq iñiqmasinchikkunam ichaqa mana.

Marilin: Chay rimaykunataqa ñuqapas yacharurqani frances rimayniyuq runakunaman, portugues rimayniyuq runakunaman hinaspa sranangtongo rimayniyuq runakunaman bibliamanta yachachisqayraykum. Huk kutipim huk kaqnin iñiqmasinchik niykuwarqa sasan kaq rimaypi yachachiyta qallarinaypaq, chaynapi mana sasan kaqwan tukunaypaq, Chay niwasqanqa allinmi karqa.

Huk punchawmi iskay warmikunaman bibliamanta yachachiq rirqani, hukninmi rimarqa sranangtongo  rimayta hukninñataqmi portugues rimayta. Sranangtongo rimaypi yachachiyta tukuruspaymi, portugues rimayniyuq warmimanña yachachichkarqani, hinachkaptinmi riysiwaqniy iñiqmasinchik niykuwarqa: “Marilin payqa manam sranangtongo rimayniyuqchu”, nispa. Chaynata niykuwaptinñam chayllaraq musyakururqani portugues rimayniyuq warmita huk rimaypi rimapayasqayta.

Qamkunaqa iñiqmasinchikkunapa ancha kuyasqanmi kankichik. ¿Imaynanpitaq anchata kuyasunkichik?

Jack: Proverbios 11:25 nin: ‘Qukuykuq runaqa tukuy imayuqmi kanqa’, nispa. Chayraykum pitapas yanapana kaptinqa yanapaykuniku. Huñunakuna wasi allichana kaptinpas allichaysinikum, chayraykum wakin iñiqmasinchikkunaqa niwanku: “Wakinkunayá allichachunku”, nispa. Ñuqañataqmi nini: “Imataq ñuqaqa kani paykunalla allichanankuta saqiykunaypaqqa, ñuqapas yanapakunaymi”, nispa. Chaymantapas llapallanchikmi ayllunchikwan kuska kayta munanchik, ñuqaykupas chaynam huk punchawta sapaqchaniku iskayllayku imatapas ruwanaykupaq. Ichaqa chay punchaw pitapas yanapana kaptinqa yanapaykuqmi riniku.

Marilin: Sapakama iñiqmasinchikkunatam tapuniku imapi yanapaykunaykupaq, chaymi wakinkuqa niwanku warmachankuwan yanapaykunaykupaq. Paykunata yanapaykunaykupaqqa tiempochakunikum. Chayna yanapaykusqaykuraykum anchata kuyawanku, chaymantapas yanapaykunaykuta munaspankuqa niyllam niykuwananku.

¿Imaynam tarikunkichik Diosmanta mana willakusqanku llaqtachakunapi willakuspaykichik?

Jack: Tukuy tiempoykuwan Jehova Diosmanta willakusqaykuqa anchatam kusichiwanku. Kusichiwankutaqmi Jehova Diospa tukuy ima unanchasqankunapas. Sasachakuypiña tarikuspaykupas manam llumpaytaqa hukmanyanikuchu, maymanña-chaymanña riptiykupas iñiqmasinchikkunaqa yanapawanqakum.

Musu kaspay militar kayta mana munasqayraykum Guayana carcelman aparuwarqaku. Manam yuyaymanayllapas yuyaymanarqanichu kaqmanta kutispay, kasqay carcelpi chaynataq wakin carcelkunapi Diosmanta willakuytaqa. Jehova Diosninchikqa llapallanchiktam yanapawanchik.

Marilin: Anchatam kusikuni hukkunata yanapasqaywan. Kusichiwankum Jehova Diosta yupaychayqa. Kuskayku Jehova Diosta yupaychasqaykuraykum qusaywanpas anchata kuyanakuniku. Wakinpiqa qusaymi niwan hukmanyasqa iñiqmasinchikkunata wasiykuman qayaykunaykupaq, chaytaqa ñuqapas tantiaqmi kani, ichaqa chayta niykunaypaq kachkaptiymi qusay sapa kuti llalliwaq.

Jack: Kay watakunallam doctorkuna niykuwarqa cancer unquyniyuq kasqayta. Warmichay chaywan hukmanyanan kaptinpas nirqanim: “Paqarin wañuruspayqa ñakaristinchá wañukullayman. Ichaqa warmaymanta Jehova Diosta yupaychasqayraykum kusisqa wañullasaq”, nispa (Gen. 25:8).

Marilin: Jehova Dios yanapawasqankuraykum tukuypi yanapakurqaniku, manam kikillaykumantaqa atiymankuchu karqa. Ancha-anchatam kusikuniku tukuy imapi yanapakusqaykumanta. Maymanpas rinaykupaq niwaptinkuqa risaqkupunim, manam iskayrayanikuchu maypipas Jehova Dios yanapawanankumantaqa.