1988 watamantapachan Jackqa esposanwan kuska Diosta servishanku tukuy tiemponkuwan. Paykunaqa ratollan may llaqtamanpas yachakuranku, Guadalupe, Guayana Francesa llaqtakunapitaq Diosta serviranku. Chaypi kaq iñiqmasikunamantaqa Franciapi sucursalmi encargakun. Jacktawan esposantawan tapurisunchis.

¿Imaraykun yuyaykurankichis tukuy tiempowan Diosta servinaykichispaq?

Marie-Line nin: Guadalupe llaqtapin wiñarani, mamaywan kuskan ch’isiyaqta Diosmanta willaq kayku, payqa chhaynatapunin ruwaq. Runakunata munakusqanraykun colegioyta tukuspay jina 1985 watapi tukuy tiempoywan Diosmanta willayta qallarirani.

Jackmi nin: Wayna kashaspayqa tukuy tiemponkuwan Diosta serviq iñiqmasikunawanmi juñukuq kani. Colegioymanta vacacionpi lloqsispan Diosmanta askha horakunata willaq kani. Mayninpiqa semana tukuytan wakin iñiqmasikunawan ch’isiyaqta Diosmanta willaq kayku. Chay qhepamantaq lamar-qochaq patanpi samariq kayku.

1988 watapin casarakurayku jinaspa esposayta nirani: “Astawanchus jina Diosta servisunman, manan imapas jark’awanchischu”, nispa. Jinan esposaywan kuska tukuy tiempoywan Diosta serviyta qallarirani. Juj wata qhepamanmi precursorkunapaq escuelaman rirayku, jinan niwaranku precursor especial kanaykupaq. Guadalupe llaqtapin Diosta servirayku, chaymantataq Guayana Francesa llaqtapi.

Askha llaqtakunapin Diosta servirankichis, ¿iman yanaparasunkichis yachakunaykichispaq?

Marie-Line nin: Guayana Francesa llaqtapi Betelpi llank’aq hermanokunaqa yacharankun Isaías 6:8 textopi nisqan gustawasqankuta. Chaymi wajamuwaspanku asikuspa niwaqku: “¿Yuyashankichischu gustasqasuykichis textota?”, nispa. Chayta uyarispan yacharayku waj llaqtaman astakunayku kasqanta. Jinan niq kayku: “¡Kaypin kashayku! ¡Kachawayku!”, nispa.

Manan comparaykuchu ñaupaqpi Diosta servisqaykuta kunan servisqaykuwanqa, sichus  comparaykuman chayqa manan kusisqachu Diosta serviykuman. Kallpachakuykutaqmi may servisqayku llaqtapi iñiqmasikunata reqsinaykupaq.

Jackmi nin: Wakin iñiqmasikunan paykunawan kanaykurayku rimapayawaqku amaña waj llaqtakunaman astakunaykupaq. Guadalupe llaqtamanta ripuqtiykun ichaqa juj hermano Mateo 13:38 textota qhawachiwaranku, chaypin nin: ‘Chajraqa kay pachan’, nispa. Chaymi may llaqtamanpas astakuspaqa yuyariyku kaq chajrallapi llank’ashasqaykuta. Chaymi maypiña kashaspapas runakunata maskhanchis Diosmanta willananchispaq.

Waj llaqtaman astakuspaqa qhawariykun chaypi tiyaq runakuna allin kausasqankuta. Chaymi paykuna jina kausayku mijusqanku mijunakunata mijuspa. Ichaqa cuidakuykun ama onqonaykupaq. Maypiña Diosta servishaspapas allinkuna ruwasqaykupin mastaqa piensayku.

Marie-Line nin: Imaymanatan yacharayku risqayku llaqtapi tiyaq iñiqmasikunamanta. Guayana Francesa llaqtapi pisi tiempollaraq kashaqtiykun sinchita pararan, jinan noqaqa nirani: “Para pasaqtinñachá Diosmanta willaqqa risaqku”, nispa. Juj hermanan ichaqa “jakuchis” nispa niwaran. Chaymi nirani: “Khayna parapi”, nispa. Paytaq niwaran: “Paraguaykita jujnin makiykiwan jap’inki, jujnin makiykiwantaq bicicletata manejanki”, nispa. Jinan chayta ruwarani, mana chayqa manan paray tiempopi Diosmanta willaq lloqsiymanchu karan.

Qankunaqa 15 kutita jinan astakurankichis, willawayku imatas ruwarankichis mana sasachakuspalla astakunaykichispaq chayta.

Marie-Line nin: Astakuyqa sasan, chaywanpas alquilakusqayku cuartotan allichaq kayku sumaq rikukunanpaq.

Jackmi nin: Maymanña astakuspaykupas pintaqmi kani cuartoykuta. Sucursalpi llank’aqkunaqa yacharankun mayninpi pisi tiempolla juj llaqtapi qhepakunaykuta, chaymi sut’inta niwaqku: “Jack kunanqa amaña cuartoykita pintaychu”, nispa.

Esposayqa allintan cosasniykuta cajakunaman churaq. Sapanka cajamantaq sutita churaq kay jinata “bañopaq”, “cocinapaq”, “puñunapaq”, nispa. Chaymi mosoq wasiman astakuspaqa ratolla cajakunata sitioman apaq kayku. Cajakunaman  imakunatachus churasqaykutan esposayqa anotaq, chhaynapin ratolla imachus necesitasqaykuta tariq kayku.

Marie-Line nin: Allinta kamachinakuspa ruwasqaykuraykun ratolla imatapas ruwaq kayku, chhaynapin pisi tiempollamanta Diosmanta willaq kayku.

¿Imatan ruwankichis Dios serviyniykichista allinta junt’anaykichispaq? (2 Tim. 4:5.)

Marie-Line nin: Lunes p’unchaypin samayku jinaspa juñunakuykunapaq preparakuyku, martesmantataq Diosmanta willaq lloqsiyku.

Jackmi nin: Sapa killanña askha horakunata Diosmanta willanayku chaypas, astawanqa runakuna yachachiypin piensayku. Wasiykumanta lloqsisqaykumantapacha kutimunaykukaman tukuy atisqaykuta ruwayku llapa runakunaman Diosmanta willanaykupaq.

Marie-Line nin: Paseaq rispapas juch’uy qelqakunatan aparikuni. Runakunaqa reparankun Jehová Diospa testigonkuna kasqaykuta. Chaymi wakinqa achhuykamuwaspanku qelqakunata mañakuwanku. Chaymi maypiña kaspapas allinta p’achakuyku allintataq portakuykupas.

Jackmi nin: Diosmantan willallanchistaq vecinonchiskunapaq imallatapas ruwapuspa. Noqaqa sapa kutillanmi parquepi kaq wasiykuq qayllanpi kaq q’opakunata pichaq kani. Chay ruwasqayta rikuspan runakuna niwaqku: “Bibliayki kashanchu qowanaykipaq”, nispa.

Sapa kutillanmi Diosmanta willaq rirankichis juch’uy llaqtachakunaman, ¿imallatapas willawankikumanchu pasasqasuykichismanta?

Jackmi nin: Guayana Francesaq llaqtachankunaman chayayqa sasan. Askha kutipin semanantin viajaq kayku millay carreteranta. Yuyashanin Élie wiraqochaman visitanaykupaq yunkaman viajasqaykuta. Wasinman chayanaykupaqqa askha horakunatan carropi viajarayku chaymantataq canoapi. Chaypi tiyaqkunaqa qorita maskhaspan llank’anku. Kusisqan kasharanku qelqakunata qosqaykumanta, jinan qori gramokunata qowaranku. Tutataq videokunata qhawachirayku chaymantaq askha runakuna jamuranku.

Marie-Line nin: Qayna watakunallan qosayta niranku Camopi llaqtapi Jesuspa wañupusqanta yuyarinapaq juñunakuyta aparinanpaq. Tawa horatan canoapi viajarayku mayunta, chayqa yuyarinapaq jinan karan.

Jackmi nin: Maynin partepin unuqa astawan phawarin chayninta canoa pasastinqa canoata manejaqqa yachananmi imayna manejayta. Chay viajeqa munaypunin karan. Chay juñunakuypiqa soqta Testigollan karayku, ichaqa 50 jinan juñukurayku wakinqa chay llaqtayoq runakunan karanku.

Marie-Line nin: Noqayku jinan pasankuman Jehová Diosta astawan serviyta munaq wayna-sipaskuna. Chaykunapi tarikuspaqa Jehová Diospin confiananchis jinan iñiyninchis astawan yapakunqa Jehová Diospa yanapaynintataq rikusunchis.

Qankunaqa askha rimaykunatan rimayta yacharankichis, ¿ratollachu yacharurankichis?

Jackmi nin: Manan, chay simikuna rimaytaqa yachanay karan runakunaman Diosmanta willanaypaq, iñiq t’aqapi yachachinaypaq iman. Manaraq sranangtongo * simipi Bibliata ñaupaqmanta leemushaspan Qhawaq juñunakuyta aparisharaniña. Juj hermanotan tapurani: “¿Entiendewarankichu?”, nispa. Jinan payqa niwaran: “Wakin rimasqaykitan mana entienderaykichu, ichaqa allintan ruwaranki”, nispa. Wawakunan ichaqa allinta yanapawaranku, paykunaqa mana manchakuspan imapi pantasqayta niwaqku.

Marie-Line nin: Juj llaqtapin Bibliamanta yachachirani francés, portugués, sranangtongo simikunapi. Juj hermanan niwaran sasata rimasqay simipi yachachiyta qallarinaypaq, jinaspa allinta rimasqay simipi yachachiyta tukunaypaq. Manan entiendesharanichu niwasqanta.

Ichaqa juj p’unchaymi Bibliamanta yachachiyta  qallarirani sranangtongo simipi chaymantataq portugués simipi. Portugués simipi yachachishaqtiymi hermananchis niwaran: “Manan allintachu rimashanki”, nispa. Jinan reparakurani yachachisqay warmiman sranangtongo simipi rimapayashasqayta. Chayraqmi entienderani hermananchispa niwasqanta.

Qankunataqa anchatan munakusunkichis servisqaykichis llaqtapi iñiqmasikuna. ¿Imatan ruwarankichis allin amigontin kanaykichispaq?

Jackmi nin: Proverbios 11:25 textopin nin: “Qoykukuq runaqa t’ikarinqan”, nispa. Chaymi mana iskayaspa iñiqmasikunata yanapayku. Juñunakuna wasita allichaypi yanapakushaqtiymi wakinqa niwaranku: “Juj iñiqmasikuna ruwashachunku”, nispa. Jinan nirani: “Noqapas paykuna jinan yanapakunay”, nispa. Orqonaymi tiempota esposaywan kanaypaq, chhaynaña kaqtinpas tiempoykutan orqoyku jujkunata yanapanaykupaq.

Marie-Line nin: Hermanokunatan tapuriyku: “Imaynan kashanki”, nispa. Jinan wakinqa willawanku wawanku cuidaypi yanapana necesitasqankuta otaq escuelanmanta apanpunata. Chayta yachaspan tiempoykuta t’aqayku paykunata yanapanaykupaq. Chhaynapin paykunawan amigontin kapuyku listotaq kashayku imachus necesitasqankupi yanapanaykupaq.

¿Imakunatan chaskirankichis Diosmanta willaqkunata necesitakusqan llaqtakunapi yanapakusqaykichismanta?

Jackmi nin: Tukuy tiempoykuwan Diosta servispan kusisqa kausayku. Jehová Diospa imaymana kamasqankunata qhawarispan kusikurayku. Sasachakuykunapi tarikuspapas thajmi sientekuyku, yachaykun maypiña kaqtiykupas Diospa llaqtan yanapawanankuta.

Wayna kashaspaymi Guayana Francesa llaqtapi carcelpi wisq’awaranku mana soldado kay munasqaymanta. Manan piensaranichu chay llaqtaman kutispay Diospa siminta willamunaypaqqa, jinaspapas atiranin carcelpi kaqkunaman willayta. Diosninchisqa askha bendicionkunatan qowanchis.

Marie-Line nin: Jujkunata yanapaspa Diosta servispa iman kusisqa kani. Chaymi yanapawaranku qosaywan astawan munanakunaykupaq. Mayninpin qosayqa niwaq: “Kay warmi-qhari iñiqmasinchista invitasun kallpachananchispaq”, nispa. Jinan niq kani: “Noqapas chaytan piensasharani”, nispa. Sapa kutillanmi igualta piensaq kayku.

Jackmi nin: Qayna watakunallan niwaranku prostatamanta cáncer onqoywan kasqayta. Esposay manaña uyariyta munanchu chaypas, paytan nillanipuni: “Paqarinña wañupuyman chaypas Jehová Diosta servinaypaqmi kausarani, chaywanmi kusisqa kashani”, nispa (Gén. 25:8).

Marie-Line nin: Jehová Diosqa mana piensasqayku llank’aykunatan qowaranku. Imaymanapin Diosqa bendeciwaranku. Chaymi listo kashayku maymanña kachawaqtinkupas rinaykupaq.