O Žak hem i Mari-Lin tane zaedno ki polnovremeno služba taro 1988 berš. Ola tane pendžarde palo adava so šaj te prilagodinen pe ko neve okolnostija, hem dži akana prifatingje te služinen ko razna thana ko Gvadelup hem ki Francusko Gvajana. O solduj phuvja akana nadgledinela i podružnica ki Francija. Te puča len nekobor pučiba.

So pottikningja tumen te počminen e polnovremeno službaja?

Mari-Lin: Panda sar tikni, džikote živinava sine ko Gvadelup, but puti propovedinava sine po celo dive zaedno me dajaja, koja so revno služinela sine e Jehovaske. Adaleske so mangava e manušen, samo so završingjum e školaja ko 1985 berš, odma počmingjum e pionersko službaja.

Žak: Sar terno, sium sine uzo polnovremena objavitelija kola so but mangena sine i služba. Džikote sium sine ko raspust, obično sium sine pomošno pioneri. Ko vikendija, ponekogaš džaja sine avtobusea ko podračje kote so služinena sine pionerija. Celo dive propovedinaja sine, hem ko krajo džaja sine ki plaža. Adala dive čače sine but šuže!

Kratko otkeda me hem i Mari-Lin lelem amen ko 1988 berš, vakergjum mange: „Akana nane amen nisave obvrske. Soske te na služina ki pobari mera?“ Adaleske me da uljum pioneri. Jekh berš palo adava, otkeda završingja i pionersko škola, siem sine imenujme sar specijalna pionerija. Otkeda služingjem ko nekobor thana ko Gvadelup, siem sine zamolime te selina amen ki Francusko Gvajana.

Ko sa akala berša sien sine bičhalde te služinen ko but thana. So pomožingja tumenge te prilagodinen tumen ko neve okolnostija? 

Mari-Lin: O phralja taro Betel ki Francusko Gvajana džanena sine kaj o stiho taro Isaija 6:8 tano amenge omileno. Adaleske, keda javinena pe sine amenge, but puti ki šala ka pučen amen sine: „Kova sine tumaro omileno stiho?“ Adaleske so sine amenge jasno kaj adžikerela amen nevi zadača, odma odgovorinaja sine: „Ake siem amen! Bičhalen amen!“

 Nikogaš na manglem te sporedina o zadače so sine amen angleder e neve zadačencar soske adava šaj te čhinavel amen te uživina ki nevi zadača. Isto agjaar, samo so ka resa sine ko nevo sobranie, trudinaja amen sine pošukar te pendžara e phralen hem e phenjen.

Žak: Angleder, nesave phralja hem phenja so mangena amen probinena sine te ubedinen amen te na selina amen soske mangle te ova paše uzi lende. Ama, keda gelem amenge taro Gvadelup, jekh phral setinkergja amen ko e Isuseskere lafija soj pišime ko Matej 13:38: „I niva tani o sveto“. Adaleske, keda džaja ki javer zadača, na bistraja kaj, bilo kaj te ova, služinaja ki isto niva. Hem keda ka dikha, o podračje hem o manuša tane najvažna taro sa!

Keda resaja ko nevo podračje, šaj te dikha kaj o manuša adari da živinena normalno životo. Adaleske, trudinaja amen te prilagodina amen ko lengoro način sar živinena. Ponekogaš o hajbe tano pojaver. Iako pazinaja ki higiena, haja adava so hana ola hem pijaja adava so ola piena. Trudinaja amen te kera pozitivno lafi baši sekoja zadača.

Mari-Lin: Isto agjaar, sikljovaja but taro phralja adathar. Setinava man so slučingja pe kratko otkeda reslem ki Francusko Gvajana. Dela peske sine but, hem adaleske mislingjem kaj mora te adžikera te ačhol o bršim pa te dža ki služba. Ama, tegani jekh phen vakergja mange: „Ajde, džaja?“ A me sium sine iznenadimi hem pučljum: „Sar?“ Oj odgovoringja mange: „Le to čadori hem ka dža točakoncar“. Hem agjaar, sikliljum sar te ikerav čadori džikote vozinava točako. Te na sikljovav sine adava, našti te propovedinav sine ki sezona keda dela sine bršim.

Dži akana selingjen tumen okolu 15 puti. Isi li tumen nesave predlogija e phralenge so razmislinena te selinen pe?

Mari-Lin: O selibe nane lokhi buti. Sepak, but tano važno te arakhe than kote so ka osetine tut udobno keda ka irane tut tari služba.

Žak: Obično makhava o sobe keda ka selina amen ko nevo kher. Ako džanena kaj nane but vreme te ačhova, o phralja tari podružnica ponekogaš vakerena: „Žak, ma mučin tut te makhe akava puti!“

I Mari-Lin tani eksperti bašo pakujbe. Oj pakujnela sa ko kutie hem čhivela lenge lepenke, sar na primer „kupatilo“, „spalna“ ili „kujna“. Agjaar, keda selinaja amen ko javer kher, odma  šaj te čhiva o kutie kote so valjani. I Mari-Lin kerela spisako taro bukja so isi ki sekoja kutija te šaj posigate te arakha adava so valjani amenge.

Mari-Lin: Adaleske so siklilem šukar te organizirina amen, šaj odma te počmina e službaja.

Sar organizirinena tumaro vreme te šaj celosno te keren tumari služba? (2. Tim. 4:5).

Mari-Lin: Ponedelnik odmorinaja hem spreminaja amen bašo sostanok. Taro vtornik počminaja e službaja.

Žak: Iako sekova masek valjani te nakhava odredena saatija ki služba, na koncentririnaja amen ko adava. I služba amenge ko prvo than ko životo. Otkeda ka ikljova kheral pa sa džikote na iranaja amen, trudinaja amen te kera lafi sekole jekhea so ka arakha le.

Mari-Lin: Na primer, keda džaja ko izlet, sekogaš lava mancar traktatija. Nesave manuša avena hem rodena publikacie iako na vakergjem lenge kaj siem e Jehovaskere svedokija. Adaleske sekogaš pazinaja sar ka urava amen hem sar ka ponašina amen. O manuša primetinena adava.

Žak: Svedočinaja isto adalea so siem šukar komšie. Frdava lengoro gjubre, khedava o frdimo gjubre taro hodniko hem čistinava o listija ko dvoro. O komšie dikhena adava hem ponekogaš pučena: „Isi li tumen jekh Biblija mange?“

But puti propovedingjen ko thana kote so phare resela pe. Setinena li tumen ko nešto posebno taro adala patujba?

Žak: Ki Gvajana, ko nesave thana tano phare te resel pe. Ponekogaš mora te nakhava po 600 kilometre ko kurko taro drumija soj but lošna. Nikogaš nane te bistra i poseta ko gav Sent Eli, ki amazonsko prašuma. Valjani sine amenge nekobor saatija te resa dži adari hem koristinaja sine džipi hem kanu. Poviše džene taro adala so živinena sine adari randena sine te arakhen zlato. Nesave džene sine doborom blagodarna bašo publikacie so dengjem len so čak dengje amen tikne grutke zlato sar dobrovolno prilog! I rat mukhlem lenge jekh filmi tari amari organizacija. But džene ale te dikhen le.

Mari-Lin: Palo nekobor berša, o Žak sine zamolimo te ikerel o govor baši Spomen-svečenost ko gav Kamopi. Te šaj resaja dži adari, mora sine te patujna štar saatija ko kanu ki reka Ojapok. Adava sine interesno iskustvo.

Žak: Ko thana kote so sine poplitko, o pani džala sine but sigate hem sine opasno. Keda ka dikhe adava čače ačhovea bizo lafija. Okova so upravinela o kanu mora šukar te džanel pli buti. Sepak, adava so doživingjem našti bistrela pe. Iako ko gav sine samo šov phralja hem phenja, okolu 50 manuša sine prisutna ki Spomen-svečenost, maškar kola sine hem nesave plemija taro adava than.

Mari-Lin: Asavke skapocena iskustvija šaj te oven sa e ternen kola so mangena panda poviše te den pe e Jehovaske. Keda ka arakhljove ko asavke okolnostija, mora te sikave doverba ki leste, hem tli vera ka ovel pozorali. But često dikhaja sar o Jehova vodinela o bukja.

Siklilen nekobor čhibja. Dali tumenge lokho te sikljoven neve čhibja?

Žak: Ni hari na. Sikliljum adala čhibja te šaj te propovedinav hem te pomožinav ko sobranie. Mora sine te vodinav o Proučibe i Stražarsko kula ki sranantongo * panda angleder te ovel man čitibe e Biblijakoro! Pučljum jekhe phrale dali sine šukar. A ov vakergja mange: „Na halilem baš sa so vakergjan, ama na sine lošno“. O čhave but pomožingje mange. Ola na sine sar o vozrasna, ola na ladžana sine te vakeren mange keda ka kerav sine greška. Sikliljum but lendar.

Mari-Lin: Ko jekh podračje, sine man bibliska kursija ki francusko, portugalsko hem sranantongo čhib. Keda valjani sine ko jekh dive te vodinav nekobor bibliska kursija, jekh phen dengja man predlog prvo te počminav e čhibjaja so sine mange najphari, hem te završinav e čhibjaja so sine mange najlokhi. Bašo kratko vreme haliljum kobor mudro sine lakoro sovet.

Jekh dive vodingjum biblisko kursi ko sranantongo, a palo adava ko portugalsko. Keda gelem ko  dujto biblisko kursi, i phen so sine mancar vakergja mange: „Mari-Lin, mislinava kaj ka ovel amen problemi!“ Haliljum kaj akale džuvljaja, koja so sine Brazilka, počmingjum te kerav lafi ki sranantongo namesto ki portugalsko čhib!

O phralja hem o phenja taro thana kote so služingjen but mangena tumen. So pomožingja tumenge te oven lencar paše?

Žak: Ko Izreki 11:25 pišinela kaj okova so darežlivo dela ka ovel uspešno. Amen spremno mangaja te nakhava vreme e javerencar hem te kera šukar bukja bašo javera. Keda valjani te kerel pe nešto ki dvorana, nesave vakerena mange: „Mukh, adava valjani te keren o objavitelija“. Tegani vakerava lenge: „Me da sium objaviteli. Adaleske, ako nešto valjani te kerel pe, mangava me da te pomožinav“. Iako sekaske amendar ponekogaš valjani amenge vreme baši amende, trudinaja amen adava te na čhinavel amen te kera šukaripe e javerenge.

Mari-Lin: Trudinaja amen te sikava iskreno interes sprema o phralja hem o phenja. Agjaar džanaja keda ka valjani nekoj te pomožinel lenge te arakhel e čhaven ili te lel len tari škola. Tegani šaj keraja promene ko amaro plani te šaj te pomožina lenge. Agjaar ovaja popaše e javerencar, hem ola džanena kaj šaj te roden amendar pomoš ko sekova vreme.

Save bereketija dobingjen bašo adava so služinena adari kote so isi pobari potreba taro objavitelija?

Žak: I polnovremeno služba kergja pošužo amaro životo. Adaleske so često propovedinaja ki priroda, isi amen prilika te uživina ko bukja so stvoringja o Jehova. Iako nane sekogaš lokho, isi amen andruno mir adaleske so džanaja kaj, kote bilo te ova, e Devleskoro narodo ka pomožinel amenge.

Keda sium sine terno, sium sine ko zatvor ki Francusko Gvajana adaleske so odbingjum te služinav vojska. Nikogaš na mislingjum kaj jekh dive ka iranav man adari sar misioneri hem kaj ka posetinav adalen soj phanle ko zatvor te šaj te propovedinav lenge. O Jehova čače spremno dela amen bereketija!

Mari-Lin: Najbahtali sium keda šaj te kerav nešto e javerenge. But siem bahtale so služinaja e Jehovaske. Adava pomožinela amenge da te ova popaše sar rom hem romni. Ponekogaš, keda o Žak ka pučel man dali šaj te vikina ko gosti nesave bračno pare so nakhela taro pharo periodi, vakerava leske: „Samo so mislingjum o isto!“ But često slučinela pe te mislina ko ista bukja.

Žak: Angleder nekobor berša, arakhle mange rako ki prostata. Iako i Mari-Lin na mangela te šunel akava, vakergjum lake: „Dušo, me na sium panda phuro, ama ako bašo kratko vreme merava, džanava kaj koristingjum mlo životo te kerav nešto so čače isi le vrednost — te služinav e Jehovaske“ (1. Moj. 25:8).

Mari-Lin: O Jehova phravgja amenge but udara hem dozvolingja amenge te služina ko načinija so našti sine ni te zamislina len amenge. Amaro životo sine pherdo šuže bukjencar. Bare doverbaja ko Devel, ka dža segde kote so ka bičhalel amen leskiri organizacija!