O Džek hem i Meri Lajn zajedno tane ki punovremeno služba kotar 1988. berš. On tane pendžarde sar manuša kola but sigate prilagodinena pe ko neve okolnostija. But putija prihvatindže različita zaduženja ko Gvadelup hem ki Francusko Gvajana. I Francusko podružnica avdije nadgledini amaro delo ko solduj phuvja. Akana mangaja te puča len nekobor pučiba.

So podstaknindža tumen te služinen punovremeno?

Meri Lajn: Bariljum ko Gvadelup hem sar čhavoro često propovedindžum me dajaja po celo dive. Mi daj hine but revno ki služba. But mangava e manušen hem odolese čim završindžum i škola, 1985. berš, uljum pionir.

Džek: Dži hijum le terno uzo mande uvek hine o punovremena sluge kola but manglje i služba. Ked god hine man raspust, hijum le pomoćno pioniri. Mi daj ja dijekh phral kotar i skupština hem me, koristindžam amare vikendija te bi propovedinaja e pionirencar ko olengo područje, ko kova dželjam autobuseja. Celo dive bi propovedinaja hem ko krajo bi džaja ki plaža. Odola dive čače uživindžam!

I Meri Lajn hem me, ljeljam amen ko 1988. berš. Hari palo odova, pučljum man: „Nane amen disave obaveze, sose na bi čeraja diso pobuter ki služba?“ I Meri Lajn već hine pionir, a me tek uljum pioniri. Jekh berš palo odova, dželjam ki Škola aso pionirija, hem sig hijam le naimenujime sar specijalna pionirija. Angleder so hijam le vičime te služina ki Francusko Gvajana, hine amen nekobor zaduženja ko Gvadelup kola but mangljam.

Sar nakhlje o berša, but putija tumare zaduženja menindže pe. So pomožindža tumendže te prilagodinen tumen ko neve okolnostija?

Meri Lajn: O phralja ko Betel ki Francusko Gvajana, džandže so Isaija 6:8 tano amaro omiljeno stih. Odolese, ked vičindže amen, but putija asandoj bi pučena amen: „Da li setinena tumen kova tano tumaro omiljeno stih?“ Odmah džandžam so ka dobina nevo zadatko. Amen bi phenaja: „Ače amen, bičhalen amen“!

 Niked na uporedinaja amare neve zaduženja odoleja so čerdžam angleder, sose džanaja so odova šaj te sprečini amen te cenina odova so isi amen akana. Amen daja sa amendar te pendžara e phraljen hem e phenjen ki nevi skupština hem te ova amala olencar.

Džek: Angleder, disave amare amala hine len šukar namera hem odolese ked valjandžam te dža, but putija phendže amendže te ačhova koro lende. Ama, ked dželjam kotar Gvadelup, jekh phral podsetindža amen ko e Isusese lafija ando Matej 13:38: „I njiva tani o sveto“. Odolese, ked god džaja te služina ko aver than, odola mislija podsetinena amen so kaj god te ova amen hem ponodri služinaja ki isto „njiva“. Ko krajo, odova soj tano najvažno tane o manuša.

Ked avaja ko nevo than, dikhaja so o manuša odothe živinena šukar hem soj tane zadovoljna. Amen trudisaljam te živina sar o manuša odothe. Iako i hrana hine averčhane, amen haljam so on halje hem piljam odova so on pilje. Ama, pazindžam hem ko amaro sastipe. Trudisaljam te vačera samo pozitivna buča.

Meri Lajn: But sikljiljam kotar o phralja hem phenja kola živindže odothe. Niked na ka bistrav diso so ulo ked resljam ki Francusko Gvajana. Avri hine baro boršim hem mislindžam so valjani te adžičera te ačhol o boršim te šaj te dža te propovedina. Ama, jekh phen pučlja man: „Ka dža li ki služba?“ Hijum le iznenadimi hem pučljum la: „Sar te dža ked avri tano baro boršim?“ Oj phendža maje: „Le to kišobran hem ka dža amare biciklencar.“ Adžahar sikljiljum te ičerav o kišobran hem te vozinav i bicikla ko isto vreme. Ked na bi sikljovava odova, niked na bi propovedinava ked avela i kišno sezona.

Tumen selindžen tumen barem 15 putija. Da li isi tumen disave šukar savetija okolendže so selinenena pe?

Meri Lajn: Nane lokho ked valjani te seline tut. Ked rodeja than kaj ka živine, važno tano te ovel asavko so šaj te osetine tut sar da hijan čhere ked irineja tut andi služba.

Džek: Hine man običaj te krečinav svako čher kuri bešljam. Podijekh puti, o phralja andi podružnica, sebepi so džandže so na ka ačhova but vreme ko odova than, bi phenena maje: „Džek, ma mučin tut te krečine akava puti!“

I Meri Lajn but šukar džanela te pakujini o buča. Oj pakujini sa ko kutije hem upro lende pisini „kupatilo“, „kuhinja“ hem „spavaća soba.“ Odolese  ked resaja ko amaro nevo čher, odmah čhivaja o kutije ko than kuri valjani. Ki svako kutija oj pisini sa so isi andre hem odolese amendže hine lokho posig te arakha odova so valjani.

Meri Lajn: Odolese so sikljiljam te ova organizujime, šajindžam posigate te počmina te čera amari služba hem sa so valjani ki skupština.

Savo raspored čerdžen te šaj „potpuno te čeren tumari služba?“ (2. Tim. 4:5).

Meri Lajn: Svako ponedeljak koristindžam te odmorina amen hem te pripremina amen aso sastankija. Kotar utorak dži ki nedelja dželjam ki služba.

Džek: Iako amendže tano odredimo kobor satija valjani te propovedina, amen na dželjam ki služba samo te ispunina o satija. I služba tani najvažno ko amaro dživdipe. Čim ikljovaja kotar čher, pa sa dži na irinaja amen, koristinaja odova vreme te vačera so pobuter manušencar.

Meri Lajn: Ked god džaja negde ki priroda, me lava o traktatija mancar, sose niked na džaneja kas ka rese. Podijekh puti, o manuša bi avena koro amende hem bi rodena amendar amare publikacije, iako pana ni na phendžam lendže so hijam e Jehovase svedokija. Odolese, uvek pazindžam sar hijam uravde hem sar ponašinaja amen, sose o manuša obratinena pažnja ko asavke buča.

Džek: Isto adžahar, baro svedočanstvo dindžam adžahar so hijam le šukar premalo amare komšije. Čedindžum o lila kola hine fordime, fordindžum o đubre hem čedindžum o lišće avrijal. Amare komšije dikhlje odova hem disavo puti pučlje: „Da li slučajno isi tut jekh Biblija maje?“

But putija propovedindžen ko dur thana. Da li isi tumen disave posebna uspomene kotar odola putovanja?

Džek: Ki Gvajana, disave područja tane but dur. But putija morandiljam te nakha oko 600 km ko jekh kurko, a o drumija na hine uvek šukar. Niked na ka bistra ked dželjam ko Sent Eli, ki Amazonsko šuma. Valjandža amendže nekobor satija te resa dži odothe. Koristindžam terensko vozilo hem motorno čamco. But manuša kola živindže odothe čerdže buti ko rudnik kuri hine zlato. Sebepi so hine but zahvalna aso amare publikacije, but putija bi dena amendže tikne komadija ando zlato sar dobrovoljno prilog. Račate bi mukhaja disave filmija kotar amari organizacija. But manuša bi avena te dikhen len.

Meri Lajn: Akana sigende, o Džek hine vičimo te ičeri govor asi Spomen-svečanost ko Kamopi. Te šaj te resa dži uduri, koristindžam o motorno čamco. Valjandža amendže štar satija te putujina ki reka Ojapok. Odova hine posebno iskustvo.

Džek: Hine but opasno ked bi perela o nivo andi reka, sose tegani o čamco šaj hine te khuvel ko bara. Sebepi odova, o manuš kova vozindža odova čamco, morandilo but šukar te džanel so čerela. Ipak, odova putovanje e čamcoja hine zadivljujuće iskustvo. Iako ko odova than hine samo šov Svedokija, oko 50 manuša alje ki Spomen-svečanost. Maškaro olende hine hem o Indijancija.

Meri Lajn: O terne manuša avdije šaj te ovel len asavke but šuže iskustvija ako posvetinena po dživdipe e Jehovase. Ko bilo save okolnostija te arakhe tut, ako isi tut poverenje upro Jehova, ti vera ka ovel zorjačerdi. But putija dikhljam e Jehovaso vas ko amaro dživdipe.

Tumen sikljiljen nekobor čhibja. Da li mislinena so isi tumen disavo posebno dar te sikljon različita čhibja?

Džek: Na. Me sikljiljum odola čhibja te šaj te propovedinav hem te pomožinav e skupštinendže. Jekh puti, morandiljum te vodinav i Stražarsko kula ki čhib sranantongo *, čak angleder so hine man zadatko te čitinav i Biblija. Palo odova, pučljum jekhe phralje sar hine. Ov phendža maje: „Podijekh puti na haljiljam disave lafija, ama hine but šukar.“ O čhave but pomožindže man. Ked diso pogrešno vačerdžum, o bare manuša ništa na bi phenena maje, ama o čhave bi phenena maje kaj pogrešindžum. Uzo lende but posig sikljiljum i čhib.

Meri Lajn: Ko jekh područje hine man e biblijake kursija ki francuski, portugalski hem ki sranantongo čhib. Jekh phen dindža maje predlog najangleder te džav ko kursija kola vodinava ki čhib koja najhari džanava, a palo odova te džav ko kursija kola vodinava ki čhib koja pošukar džanava. Sigate haljiljum kobor tano mudro odova savet.

 Jekh dive, hine man e biblijako kurs najangleder ko sranantongo, a palo odova ko portugalski. Ked počmindžum te vodinav o dujto kurs, i phen koja hine mancar, phendža maje: „Meri Lajn, mislinava so akija romni ništa na haljola tut.“ Tegani haljiljum so vačerdžum jekha romnjaja ando Brazil ko sranantongo umesto ko portugalski.

O phralja hem o phenja kotar o skupštine kuri služindžen, but mangena tumen. Sar uspindžen te oven odobor paše amala olencar?

Džek: O Poslovice 11:25 phenena: „O manuš kova velikodušno dela ka ovel uspešno.“ Amendže na hine pharo te provodina amaro vreme e phraljencar hem e phenjencar hem te čera sa so valjandža olendže. Ked valjandža diso te čerel pe ki dvorana, disave phralja phendže maje: „Mukh e objaviteljen te čeren odova.“ Ama, me phendžum: „Hem me hijum objavitelj. Odolese, ako isi buti te čerel pe hem me mangava te ovav odothe.“ Iako svakonese valjani hari vreme pese hem pe porodicače, but putija mi romni hem me phendžam so na mangaja odova te ovel razlog te na ova odothe aso avera.

Meri Lajn: But trudisaljam te mothova so iskreno brininaja amen amare phraljendže hem e phenjendže. Džandžam ked valjandža neko te džal palo čhave ki škola ja te pazini len. Te šaj te pomožina e phraljendže, but putija hijam le spremna te menjina amare planija. Odolese so hijam le spremna te pomožina lendže ked odova hine potrebno, uljam but šukar amala olencar.

Kola blagoslovija dobindžen sebepi so služindžen odothe kaj hine pobari potreba?

Džek: I punovremeno služba andža amendže but bare blagoslovija. But putija, ki priroda uživindžam ko sa so o Jehova stvorindža. Iako hine amen disave pharipa, hine amen mir ko vilo, sebepi so džandžam so isi amen podrška kotar e Devleso narodo kuri god te ova.

Sar terno, hijum le phanlo ki Francusko Gvajana, sebepi so na mangljum te džav ki vojska. Tegani, na alo maje ki godi so jekh dive ka služinav odothe sar misionari hem so ko phanlipe ka džav te propovedinav. Čače, ked o Jehova blagoslovini, ov tano but velikodušno.

Meri Lajn: Najviše hijum bahtali ked čerava diso aso avera. Odova so služinaja e Jehovase andža amendže baro bahtalipe. Sar bračni par uljam pana popaše. Podijekh puti, ked bi o Džek dikhela so disavo bračni par tano obeshrabrimo, ov bi pučela man da li šaj te vičina len ko ručko. But putija, me bi phenava so baš odova hem me mislindžum. Često desini pe isto te mislina.

Džek: Akana sigende phendže maje so isi man rak ki prostata. Iako, i Meri Lajn na mangela ked vačerava odolestar, me phendžum olače: „Mi mangli romni, iako pana na purandiljum, čak hem te merav tajsa, džanava so koristindžum mo dživdipe te čerav diso soj tano vredno, te služinav e Jehovase hem odova but radujini man“ (Post. 25:8).

Meri Lajn: O Jehova dindža amendže zadatkija kola niked na mislindžam so amen ka čera len. Ko amaro dživdipe doživindžam but šukar buča. Amen ka dža kuri god e Jehovasi organizacija bičhali amen, odolese so sigurna hijam so o Jehova ka pomožini amendže kuri god te ova!