Ο Τζακ ντα η Μαρί-Λιν ισί γιεκ κι ολοχρόνια υπηρεσία κατά 1988. Συνηθίνενα εύκολα κάι-ντα τι τζαν ντα λιντέ μπουτ διορισμοί κι Γουαδελούπη ντα κι Γαλλική Γουιάνα. Ι ευθύνη ανταλέ ντουέ τθεμένγκι τθερέλα-λα ακανά ο γραφείος τμήματος κι Γαλλία. Για τι πουτσάς χάνικ πράγματα ι πφραλές ντα ι πφενιά Μπεργκάμ.

Σόσκε λιντέν ι ολοχρόνια υπηρεσία;

Μαρί-Λιν: Μπαριλόμ κι Γουαδελούπη, ντα μπουτ φαρ νικιάβας σαρό ο ντιβές κο έργος μι νταγιάσαρ, σο κερέλας ο έργος αντράλ πι γκίσταρ. Μανγκάβα ι τζενέν, οτθάρ μόλις τελειωντόμ ο σχολείος κο 1985 λιντόμ ο σκαπανικός.

Τζακ: Κάνα ισινόμας χουρντό, ισινόμας πφραλέντζαρ σο μανγκένας ο έργος ντα ισινέ κι ολοχρόνια υπηρεσία. Κάνα πφαντιόνας ο σχολεία, κεράβας βοηθητικός σκαπανικός. Κο σαββατοκύριακα, μπάζιμα λάας ο λεωφορείος ι σκαπανίντζαρ ντα κεράας σαρό ο ντιβές έργος. Σοράν τζάας κι ντεριάβ. Νακχάας μπουτ σουκάρ!

Κάνα παντρισάλομ με την Μαρί-Λιν κο 1988, σκεφτιντόμ: “Αφού να τθεράσα ευθύνες, σόσκε μα τι κεράς πιο μπουτ πράγματα κο έργος;” Αντικάς, λιντόμ με-ντα ο σκαπανικός. Εκ μπρες πιο σοράν, νακχλάμ ι σχολή σκαπανέων ντα αβιλάμ ειδικοί σκαπανείς. Τθεράας μπερεκέτι σουκάρ διορισμούς κι Γουαδελούπη ντα σοράν βακερντέ αμένγκε τι τζας κι Γαλλική Γουιάνα.

Σαρέ ανταλά μπρεσά, αλλαντέν μπουτ διορισμούς. Σο βοηθίνελα-τουμέν τι συνηθίνεν ο αλλαγές;

Μαρί-Λιν: Ο πφραλά κο Μπέθελ κι Γαλλική Γουιάνα τζανένας ότι μπεϊντίνασα μπουτ ο εδάφιος Ησαΐας 6:8. Οτθάρ, κάνα λένας-αμέν τηλέφωνος, ο πιο μπουτ φαρ βακερένας αμένγκε ασαμάσαρ: «Ντένα-τουμέν γκοντί ο εδάφιος σο μπεϊντίνενα;» Τζανάας σο μανγκέλας τι βακερέλ ανταβά​—κα μπουτσσαβένας-αμέν γιαβερτθέ. Οτθάρ βακεράας λένγκε: «Ακατέ Ισινάμ! Μπουτσσαβέν-αμέν!»

Να μπεσάσα τι σκεφτίνας κατέ ισινέ πιο λατσσές σόσκε ανταβά μπορεί μα τι μουκχέλας-αμέν τι εκτιμίνας οντουβά σο τθεράσα. Επίσης, προσπαθίνασα τι αβάς αμαλά ι πφραλέντζαρ ντα ι πφενίντζαρ.

 Τζακ: Ανγκλέ, μερικά πφραλά σο μανγκένας αμαρό λατσσιπέ βακερένας αμένγκε μα τι νασάς σόσκε μανγκένας-αμέν πασέ πουμέντε. Κάνα όμως νασλάμ κατά Γουαδελούπη, εκ πφραλ αντάς αμαρέ γκοντιάτε ο λάφια ι Ιησούσκε σο ισί κο εδάφιος Ματθαίος 13:​38: «Ο χωράφι ισί ο ντουνιάς». Οτθάρ κάθε φαρ σο αλλάνασα διορισμός, ανάσα αμαρέ γκοντιάτε ότι ισινάμ κο ίδιος «χωράφι» κάι-ντα τι αβάς. Οντουβά σο τθερέλα σημασία ισί ο τζενέ σο αρακχάσα κο έργος!

Κάνα ερεσάσα εκχέ νεβέ τθεμέστε, ντικχάσα ότι γιαβερά τζενέ τζουβντιόνα ευτυχισμέ οτθέ. Οντουλέσκε προσπαθίνασα τι τζουβντιάς αμέν-ντα σαρ ο τζενέ οντουλέ τθεμέσκε. Ο χαμπίματα μπορεί τι αβέν διαφορετικά, αλλά χάσα σο χάνα βον ντα πιάσα σο πίνα βον, αρακχαβάσα-αμέν όμως για μα τι νασφάλιβας. Προσπαθίνασα τι βακεράς ο λατσσέ πράγματα ι κάθε τθεμέσκε σο τζάσα.

Μαρί-Λιν: Επίσης, σικλιάσα μπουτ πράγματα κατά πφραλά σο ισί οντουλέ τθεμέσταρ. Ντάβα-μαν γκοντί σο αβιλό-πες κάνα αβιλάμ κι Γαλλική Γουιάνα. Ντέλας μπουτ μπρισίμ, ντα αμντίναας ότι έπρεπε τι μπεσάς τι τσσινάντιβελ ο μπρισίμ για τι νικιάς κο έργος. Αλλά εκ πφεν βακερντάς μάνγκε: «Νασάσα;» Μπαριαρντόμ μο γιακχά ντα βακερντόμ: «Σαρ;» Βόι βακερντάς: «Λε τι ομπρέλα, ντα κα τζας ι ποδηλατέντζαρ». Αντικάς σικλιλόμ τι ασταράβ ι ομπρέλα καζόμ κεράβας ποδήλατος. Ευτυχώς σο σικλιλόμ, σόσκε ναστί κα νικιάβας ιτς κο έργος κο μασεκά σο ντένας μπρισιμά!

Ακχαρντέν-τουμέν γιαβερέ κχερέντε περίπου 15 φορές. Μπορίνενα τι ντεν-αμέν μερικές συμβουλές;

Μαρί-Λιν: Νανέ εύκολος τι ακχαρές-τουτ γιαβερέ κχερέστε. Ο πιο σημαντικός ισί τι αρακχές εκ κχερ σο κα νιωθίνες άνετα κάνα κα βουρτίνες κχερέ.

Τζακ: Ο πιο μπουτ φαρ ντάβα μπόγια ο κχερ. Μπάζιμα, κάνα ο πφραλά κο γραφείος τμήματος τζανένας ότι να κα μπεσάας κάπου για μπουτ καιρός, βακερένας μάνγκε: «Τζακ, μα μπες τι ντες μπόγια ανταγιά φαρ ο κχερ!»

Η Μαρί-Λιν σικλιλί μπουτ λατσσές τι γκίντελ ο πράγματα! Τσσουβέλα-λεν σαρέ κο κούτες ντα γραφίνελα αβριάλ «μπάνιος», «δωμάτιος», «κουζίνα» ντα γιαβερά ασακέ πράγματα. Οτθάρ, κάνα ερεσάας αμαρέ νεβέ κχερέστε, τζανάας κατέ κα τζαλ η κάθε κούτα. Επίσης, η Μαρί-Λιν γραφίνελα σο πράγματα τθερέλα  αντρέ η κάθε κούτα για τι αρακχάς σουγκό σο χρειαζίντιβασα.

Μαρί-Λιν: Επειδή σικλιλάμ τι τσσουβάς σε εκ σειράς αμαρέ πράγματα, αρχίνασα αμέσως αμαρό έργος.

Σο πρόγραμμας τσσουβένα για τι “υπηρετίνεν λατσσές ι Ντεβλές”;​—2 Τιμ. 4:5.

Μαρί-Λιν: Δευτέρα ξεκουράντιβασα ντα ετοιμάντιβασα ι συναθροισιένγκε. Ντα κατά Τρίτη αρχίνασα αμαρό έργος.

Τζακ: Παρόλο σο κάθε μάσεκ τθεράσα τι νικαβάς ο σαάτια σο πρέπει, να τθεράσα σάντε ανταβά αμαρέ γκοντιάτε. Ο έργος ισί ο πιο σημαντικός αμαρέ ζωγιάτε. Από αζομάν σο νασάσα αμαρέ κχερέσταρ μέχρι σο βουρτίνασα, προσπαθίνασα τι κεράς λάφι σαρέ οντουλέντζαρ σο αρακχάσα.

Μαρί-Λιν: Για παράδειγμας, κάνα τζάσα για πικνίκ, πάντα λάβα παλά-μάντε φυλλάδια. Μερικοί αβένα ντα μανγκένα αμένταρ έντυπα, παρόλο σο να βακερντάμ λένγκε ότι ισινάμ Μάρτυρες ι Ιεχωβάσκε. Οτθάρ, προσοχίνασα σαρ ιριαβάσα-αμέν ντα οντουλά σο κεράσα. Ο τζενέ ντικχένα ανταλά πράγματα.

Τζακ: Ντάσα επίσης μαρτυρία κάνα ισινάμ λατσσέ γείτονες. Γκίνταβα ο χαρτιά σο ισί τελέ ντα τσσουβάβα-λεν κο σκουπίδια. Σουλαβάβα ο φύλλα ντονταλάι αμαρέ κχερέσταρ. Αμαρέ γείτονες ντικχένα-λεν ανταλά ντα μπάζιμα πουτσένα: «Μήπως τθερένα καέκ Αγία Γραφή μάνγκε-ντα;»

Μπουτ φαρ γκιλέν τι κερέν έργος τθανέντε σο ισί ντουρ. Καλά ταξίδια ατσσιλέ τουμαρέ γκοντιάτε;

Τζακ: Κι Γουιάνα, ισί μπουτ δύσκολος τι τζας μερικέ τθανέντε. Μπουτ φαρ, πρέπει τι κεράς 600 χιλιόμετρα μπέτι ντρομέντε αντρέ σε εκ εβδομάδα. Εκ ταξίδι σο να κα μπιστράβ-λες ποτές ισινέ κάνα γκιλάμ κο Σεντ-Ελί, κο δάσος του Αμαζονίου. Να τζανάβα με-ντα καζόμ σαάτια κερντάμ για τι ερεσάς οτθέ αμαξίσαρ ντα βαρκάσαρ. Η μπουτί ι πιο μπουτ τζενένγκι οντουλέ τθεμέστε ισινέ τι αρακχέν χρυσός. Για τι σικαβέν πουμαρί εκτίμηση για το έντυπα, μερικά τζενέ ντινέ-αμέν χάνικ χρυσός σαρ συνεισφορά! Ιράτ τσσουντάμ εκ βίντεος κατά οργάνωση, ντα αβιλέ μπουτ τζενέ.

Μαρί-Λιν: Ακανά τελευταία, μανγκλέ κατά Τζακ τι κερέλ ι ομιλία της Ανάμνησης κο Καμοπί. Για τι ερεσάς οτθέ, κεράας ταξίδι σταρ σαάτια κι λεν Ογιαπόκ βαρκάσαρ. Νακχλάμ μπουτ σουκάρ.

Τζακ: Κο βράχια, ο πανί τθερέλα μπαρί ζορ. Άμα ο πανί ισί μπουτ τελέ, ισί μπουτ επικίνδυνα οτθέ. Μπαγιά βακεράβα, κάνα ερεσέσα πασέ, τσσιντιόλα τι ανάσα. Ο τζενό σο οδηγίνελα ι βάρκα πρέπει τι αβέλ μπουτ λατσσό πι μπουτιάτε. Αμέν όμως νακχλάμ μπουτ σουκάρ. Κι Ανάμνηση, παρόλο σο ο Μάρτυρες ισινέ σάντε 6, αβιλέ περίπου 50 τζενέ, αντρέ ανταλέντε κάποιοι Αμερινδοί!

Μαρί-Λιν: Ασακέ πράγματα κερένα πιο σουκάρ αμαρί ζωή, ντα ο τερνέ σο μανγκένα τι κερέν πιο μπουτ ι Ιεχωβάσκε τθερένα ι ευκαιρία τι κερέν-λεν βον-ντα ανταλά. Ασακέ περιπτωσιέντε, πρέπει τι τθερές εμπιστοσύνη κο Ιεχωβά ντα αντικάς τι πίστη αβέλα πιο ζουρανί. Ντικχάσα μπουτ φαρ ο βας ι Ιεχωβάσκο.

Κερένα λάφι μπερεκέτι τσσιμπά. Ισί τουμένγκε εύκολος τι σικλιόν τσσιμπά;

Νανέ αμένγκε ιτς εύκολος. Σικλιλόμ ανταλά τσσιμπά επειδή ισινέ ανάγκη. Για παράδειγμας, κι τσσιπ σράναν, * ούτε ο διάβασμας ι Γραφιάκο να κερντόμας κι συνάθροιση ντα τσσουντέ-μαν τι κεράβ ι Σκοπιά! Εκ φαρ πουτσλόμ εκχέ πφραλές σαρ γκιλόμ-λεν. Βοβ βακερντάς: «Μερικά λάφια ναστί αγαβάας-λεν, αλλά γκιλάν-λεν μπουτ λατσσές». Ο χουρντέ βοηθίνενας-μαν μπουτ. Κάνα κεράβας λάθη, βον διορθώνενας-μαν, ενώ ο μπαρέ όχι. Σικλιλόμ μπουτ πράγματα κατά χουρντέ.

Μαρί-Λιν: Εκχέ τθανέστε, κεράβας μελέτες κο γαλλικά, κο πορτογαλικά ντα κι τσσιπ σράναν. Εκ πφεν βακερντάς μάνγκε τι αρχίναβ ι τσσιμπάσαρ σο ισινέ μάνγκε πιο δύσκολη ντα τι τελειώναβ οντουλάσαρ σο τζανάβα πιο λατσσές κάνα τθεράβα μπουτ μελέτες εκχέ ντιβεσέστε. Αγαντόμ καζόμ δίκιος τθερέλας.

Εκ ντιβές, τθεράβας τι κεράβ εκ μελέτη κι τσσιπ σράναν ντα εκ τανί κι πορτογαλική. Κάνα αρχισάλομ τι κεράβ ι δεύτερη μελέτη, η πφεν σο  ισινέ μάντζαρ βακερντάς μάνγκε: «Μαρί-Λιν, μάλλον τθεράσα πρόβλημας!» Αγαντόμ ότι κεράβας λάφι κι Βραζιλιάνα κι τσσιπ σράναν αντίς τι κεράβ λάκε λάφι πορτογαλικά!

Ο πφραλά σο κερένας τουμέντζαρ έργος μανγκένα-τουμέν μπουτ. Σαρ αβιλέν αζόμ λατσσέ αμαλά λέντζαρ;

Τζακ: Ο εδάφιος Παροιμίες 11:​25 βακερέλα: «Η ζωή οντουλέ τζενέσκι σο ντέλα αντράλ πι γκίσταρ κα αβέλ μπουτ λατσσί». Να σακιντίνασα τι ντας αμαρέ νεαυτόσταρ κο γιαβερά. Κάνα τθεράσα εκ μπουτί κι Αίθουσα Βασιλείας, μερικοί βακερένα μάνγκε: «Μουκχ κο γιαβερά πφραλά τι κερέν-λες ανταβά». Αλλά με βακεράβα λένγκε: «Με-ντα ισινόμ σαρ ο γιαβερά πφραλά. Οτθάρ, άμα πρέπει τι αβέλ-πες εκ μπουτί, μανγκάβα τι βοηθίναβ με-ντα». Παρόλο σο χρειαζίντιβασα σαρέ χάνικ χρόνος αμένγκε, ανάσα μπουτ φαρ αμαρέ γκοντιάτε ότι ανταβά δεν πρέπει τι τσσιναβέλ-αμέν τι κεράς ο λατσσιπέ κο γιαβερά.

Μαρί-Λιν: Προσπαθίνασα τι σικαβάς ενδιαφέρον αμαρέ πφραλένγκε ντα αμαρέ πφενίνγκε. Αντικάς, τζανάσα κάνα χρειαζίντιβενα εκχέ τζενές τι ατσσικιαρέλ λένγκε χουρντέν ή τι λελ-λεν κατά σχολείος. Αλλάνασα αμαρό πρόγραμμας για τι μπορίνας πάντα τι βοηθίνας-λεν. Αντικάς αβάσα λατσσέ αμαλά λέντζαρ, σόσκε ισινάμ πασέ λέντε κάνα-ντα τι χρειαζίντιβελα.

Καλά ευλογίες τθερένα καζόμ υπηρετίνενα οτθέ σο η ανάγκη ισί πιο μπαρί;

Τζακ: Η ολοχρόνια υπηρεσία πφερέλα αμαρί ζωή. Μπουτ φαρ τθεράσα ι ευκαιρία τι απολαμβάνας ο πράγματα σο κερντάς ο Ιεχωβά. Παρόλο σο νακχάσα δυσκολίες-ντα, τθεράσα ειρήνη αμαρέ γκοντιάτε σόσκε τζανάσα ότι ο λαός ι Ντεβλέσκο ισί πασέ αμέντε κάι-ντα τι αβάς.

Κάνα ισινόμας τερνό, τσσουντέας-μαν φυλακή κι Γαλλική Γουιάνα σόσκε να μανγκάβας τι τζαβ κο στρατός. Κάι τι νακχέλας μι γκοντιάταρ ότι κα αβέλας ο ντιβές τι βουρτίναβ ατθέ σαρ ιεραπόστολος ντα ότι κα κεράβας έργος κο φυλακές σαρ θρησκευτικός λειτουργός! Μπαγιά, ο Ιεχωβά πφερέλα-τουτ ευλογίες!

Μαρί-Λιν: Η πιο μπαρί χαρά μάνγκε ισί τι νταβ μι νεαυτόσταρ κο γιαβερά. Ισινάμ ευτυχισμέ κι υπηρεσία κι Ιεχωβάσκι. Ανταβά αντάς-αμέν πιο πασέ-ντα σαρ ζευγάρι. Μπάζιμα, ο Τζακ πουτσέλα άμα αβέλα-πες τι καλίνας για χαμπέ εκχέ ζευγαρίς σο χασαρντάς πι ζορ. Βακεράβα λέσκε μπουτ φαρ: «Ακριβώς ανταβά σκεφτίναβας με-ντα!» Μπουτ φαρ αβέλα-πες ανταβά.

Τζακ: Ακανά τελευταία σικλιλόμ ότι τθεράβα καρκίνος κο προστάτης. Παρόλο σο η Μαρί-Λιν να μανγκέλα τι ασουνέλ-λες, βακεράβα λάκε: «Τσσε μου, άμα κα μεράβ γιαβίν, να κα μεράβ πφουρό. Αλλά τζανάβα ότι κερντόμ μι ζωγιάτε οντουβά σο τθερέλα μπαγιά αξία, υπηρετιντόμ ι Ιεχωβάς, ντα ανταβά κερέλα-μαν ευτυχισμέ».​—Γέν. 25:8.

Μαρί-Λιν: Ο Ιεχωβά πουταρντάς ντρομά σο να μπεκλεντίναας ντα μουκχλάς-αμέν τι κεράς πράγματα σο να νακχένας ποτές αμαρέ γκοντιάταρ. Τθεράσα μπαγιά εκ ζωή πφερντί σουκάρ πραγματέντζαρ. Επειδή ισινάμ σίγουροι ότι ο Ντεβέλ κα αβέλ αμέντζαρ, κα τζας κάι-ντα τι μπουτσσαβέλ-αμέν λέσκι οργάνωση!