О Джеко и и Мари-Лина служын пианеронэнца лэ 1988 бэршэстар. Вонэ йто присытёнас каринг кода, кала варисо парудёлас андэ лэнди жызня. Када поможыяс лэнди тэ терэн бут разно дила важ о Дэл андэ Гваделупа и Француско Гвиана, пала савэ диқэл француско филиало. Андэ кадэя интервью амэ манглям лэн тэ росԥэнэн набут пала пэстэ.

Васо тумэ закамлэ тэ служын пианеронэнца?

И Мари-Лина росԥэнэн. Мэ вибарелэм андэ Гваделупа. Сэрав, сар амэ ла даса десэнца росԥэнасас важ о Дэл. Мэрня дати чалёлас тэ служый. Андо 1985 бэрш, сар досытелэм андэ школа. Мэ лэм тэ служысарав пианероса, важ кода кай мэ любисаравас лэ манушэн.

О Джеко росԥэнэн. Андэ тэрнэ бэрша мэ бут время проандяравас лэ пианеронэнца, савэ фартэ любинас тэ служын. И пэ каникулы андэ школа, мэ служысаравас подсобнонэ пианероса. Дэкала пэ выходни, амэ лэ пианеронэнца ладасас по автобусо кордэ, кай вонэ служынас. Амэ служысарасас десэнца, ай потом жасас по пляжо тэ отцыювас. Када сас роздраго!

Андэ 1988 бэрш мэ жэнисайлэм пэ Мари-Лина. И тоди мэ ԥэндэм пэсти: «Амэн нисо на ритярэл. Амэ можэм май бут тэ росԥэнас важ о Дэл». Мэ кадя жэ, сар и Мари-Лина, лэм тэ служысарав сар общё пианеро. Через бэршэстэ амэ прожылям и Школа важ и пианероря и амэн бишалдэ тэ служысарас сар спецыальни пианероря. Амэ лям тэ служысарас андэ разни собрании андэ Гваделупа, ай потом амэн манглэ тэ пэрэладас андэ Француско Гвиана.

Тумэ бут бэрша служынас и тумэн най еқвар мангэнас тэ пэрэладэн андэ авэр ҭана. Со тумэнди поможысардя тэ присытён каринг кода, кала бут со парудёлас андэ тумари жызня?

И Мари-Лина росԥэнэн. И ԥрала андо Вефилё, андэ Француско Гвиана ӷанэнас, кай амаро любимо стихо када Исаия 6:8. Важ када, кала вонэ амэнди звонинас, вонэ ԥэрясэнца пушэнас: «Ну со, тумэ сэрэн пэско любимо стихо?» Када сыкавэлас, кай амэнди упалэ трэбуй тэ пэрэладас и амэ ԥэнасас: «Акэталэ амэ! Бишалэн амэн!»

Амэ на сыстосарасас о нэво ҭан кодэлэса, пэ саво жувасас май англал. Тоди амэнди авелоп фартэ ԥарэс тэ цэнисарас кода, со амэндэ исин. И инке  амэ на аштярасас, кай ԥрала и ԥэя тэ пашон каринг амэндэ. Амэ пэрви поджасас, кай тэ уӷанас лэн.

О Джеко росԥэнэн. Дэсавэ ԥрала и ԥэя камэнас важ амэндэ лашимос и мангэнас тэ на пэрэладас. Вонэ камэнас, кай амэ тэ ашаспэ паша лэндэ. Но кала амэ уладасас анда Гваделупа, ек ԥрал ԥэндя амэнди лэ Иисусостирэ алава, савэ запистромэ андэ Матфея 13:38: «Мал, када и мануша». Важ када каринг амэ тэ на лаглоп, амэ сэрасас, кай амэ тэ на служысарас, амари дила ек. Май ӷлавно най кода, кай амэ служысарас, ай ӷлавно о миро, савэсти камас тэ поможысарас.

Кала амэ пэрэладасас по нэво ҭан, амэ диқасас, кай о миро котэ на диқэл по ԥаримос и лошавэл, и старысавасас тэ жувас кадя жэ, сар катутнэ мануша. Амэ хасас кодэва жэ хамос, саво ханас вонэ, хоть май англал амэ лэс на хасас. Но кадяжэ амэ на бистрасас пала амаро зор. Каринг амэн тэ на бишалдоп, амэ старысавасас драго тэ дас дума пала всаворэ ҭана, кай жувасас.

И Мари-Лина росԥэнэн. Амэ бут сости сытювасас лэ ԥралэндар, савэ котэ жувэнас. Мэ сэрав ек случаё, саво сас, кала амэ кати пэрэлаглям андэ Француско Гвиана. Амэнди сас трэбуй тэ жас тэ росԥэнас важ о Дэл, но сас фартэ баро брышын. Амэ гиндосарасас, кай фэдэр тэ пэрэаштярас. Ай ек ԥэй пушля: «Ну со, жам?» Мэ удивисайлэм и пушлэм: «Сар? Котэ брышын сар анда вадратэ!» Ай вой манди ԥэнэн: «Лам зонтикоря и ладаса пэ лисапедоря». Кадя мэ сытелэм тэ ездисарав по лисапедо лэ зонтикоса андэ вас. Ай сар мэ на сытелоп, мандэ на вижылоп тэ росԥэнав важ о Дэл андэ кодэя время, кала жанас и брышында!

Тумэ пэрэладэнас варикай 15 разоря. Можэте тэ росԥэнэн, со трэбуй кодэлэнди, ко гиндой тэ пэрэладэл?

И Мари-Лина росԥэнэн. Дэкала фартэ ԥарэс тэ пэрэладэс. Важ када трэбуй, кай по нэво ҭан тэ авэл драго и тэ чалёл, кай посли кода, сар послужысардян, тэ зажас цэрэ и тэ отцыёс.

О Джеко росԥэнэн. Кала амэ зажас андо нэво цэр, мэ красысарав и стины андэ авэр цвето. Дэкала и ԥрала андо филиало полэн, кай амэ нэ ашасапэ котэ по долӷонэстэ, и ԥэрясэнца ԥэнэн манди: «Джеко, ту хоть када разо на красысар о цэр!»

И Мари-Лина роздраго стидэл и кирпы! Вой стидэл вся андэ коробки и пистрой пэр лэндэ: «Важ и ванна», «Важ и спальня», «Важ и кухня». Важ када, сар кати амэ зажас андо нэво цэр, амэ ӷанас, со, каринг тэ стас. Инке вой пистрой, со исин андэ кажно коробка. Када поможый амэнди йто тэ виарақас кода, со трэбуй.

 И Мари-Лина росԥэнэн. Важ кода кай амэ драго сытелям тэ стидас и кирпы, кала пэрэладас, амэ на хасарас бут время по нэво ҭан и можэм май йто тэ лас тэ служысарас.

Саво тумэндэ ӷрафико, кай тумэндэ вижал кадя бут тэ служын? (2 Тимофею 4:5).

И Мари-Лина росԥэнэн. Андо понедельнико амэ отцыювас и ӷотовимся каринг и собрании, ай авэр деса служысарас.

О Джеко росԥэнэн. Амэнди трэбуй тэ служысарас бут часоря, но важ амэндэ када най ӷлавно. Вся амари жызня прожал андэ служэния. Сар кати вижас анда цэр, и жы каринг кода, сар тэ рисавас цэрэ, амэ старысавас тэ росԥэнас важ о Дэл всаворэнди, кас диқас.

И Мари-Лина росԥэнэн. Кала амэ жас тэ побэшас андэ варисаво шукарно ҭан пэ природа, мэ вся и время лав пэса и буклеторя. Дэсавэ мануша поджан амэндэ и мангэн, кай амэ лэнди варисо тэ дас тэ адинон, хоть амэ и на ԥэнасас лэнди, кай амэ лэ Иеговастирэ свидетеля. Важ када амэ вся и время диқас пала кода, сар амэ утидэ и сар пэс андярас. О миро шол сама пэ вся.

О Джеко росԥэнэн. Инке амэ сыкавас амарэ сосидонэнди, кай амэ служысарас лэ Дэвлэсти, кала терас лашимос аврэнди. Мэ прилав о мусоро пэ амари вулица и листоря, савэ пэрэн пэ града. Сосидоря шон сама пэ када и дэкала пушэн: «Ай исин тумэ Библия важ мандэ?»

Тумэ часто ездин, кай тэ росԥэнэн важ о Дэл кодэлэнди, ко жувэл дур. Росԥэнэн, со тумэнди май фартэ чалеля котэ?

О Джеко росԥэнэн. Андэ Гвиана исин кацавэ ҭана, каринг ԥарэс тэ доладэс. Важ ек курко амэ можэм тэ проладас 600 километроря па розмардо дром. Мэ драго сэрав, сар амэ лаглям андо гав Сент-Эли, саво сас андэ амазонско вэш. Амэнди трэбуй сас най ек часо, кай тэ доладас кордэ. Спэрва амэ лаглям пэ моторно лодка, ай потом пэ машына, сави можэт тэ ладэл па любо дром. Бут мануша, савэ котэ жувэн, затерэн ловэ кодэлэса, кай родэн о сомнак андэ ԥув. Вонэ сас кадя блаӷодарни важ амари литература, кай динэ сомнаконэ котора! Вэчэроса амэ сыкадям котэ ек кино, саво излинэ и ԥрала анда амари арӷанизацыя. Тай поавэн розбут миро, тэ диқэн кадэва кино.

И Мари-Лина росԥэнэн. Дэсавэ бэрша палпалэ лэ Джекос манглэ тэ росԥэнэн и речь по Вэчэро, кай сэрэн лэ Иисусостири смэрть андо гав Камопи. Амэ штар часоря лаглям кордэ пэ лодка па лэн Ояпок. Када сас страшно, но фартэ интересно!

О Джеко росԥэнэн. Да, котэ кай о паи андэ лэн сас мало, можно сас тэ додиқэс и бара. Фартэ опасно тэ авэс пэ лодка и тэ попэрэс пэ кацавэ бара. Чаче ԥэнав, тэ диқлоп тумэ пэ кодэла розбарэ бара, оди тердёл! Важ када сас трэбуй мануш, саво драго ӷанэн тэ андярэл и лодка па кацавэ ҭана. Но всаек амэнди чалеля. Хоть котэ сас кати шов лэ Иеговастирэ свидетеля, по Вэчэро авелэ варикай 50 мануша и лэнца сас и индейцоря!

И Мари-Лина росԥэнэн. Если амарэ ԥрала и ԥэя камэн тэ терэн май бут важ о Иегова, лэндэ кадяжэ авэла бут со интересно андэ жызня. Андэ кацави время трэбуй тэ патян, кай о Иегова поможыя, и тоди тумэ май фартэ лэна тэ патян лэсти. Амэ часто диқас, сар о Иегова сыкавэл пэско вас андэ амари жызня.

Тумэ висытелэ бут авэр шыба. Вушэро када сас тумэнди?

О Джеко росԥэнэн. Канешно, най! Мэ висытелэм кодэла шыба, важ кода кай када сас трэбуй. Еқвар манди трэбуй сас тэ проандярав и собрания па журнало «Сторожэво башня» пэ шыб сранан-то́нго *. Пэ кодэя шыб мэ ни еқвар дажэ на адиносаравас и Библия пэ собрания! Мэ пушлэм кай ек ԥрал, сар мандэ вижыля. Во ԥэндя: «Тутэ драго вижыля. Но дэкала амэ дэсо на дополасас». Манди фартэ поможынас и бэяцэ. Кала мэ ԥэнавас варисо най кадя, вонэ манди вся и время подԥэнэнас, ай и взросли никала. Мэ бут сости сытелэм кай и бэяцэ.

И Мари-Лина росԥэнэн. Еқвар амэ служысарасас котэ, кай мэ сытяравас манушэн пэ португальско, пэ француско шыб и пэ шыб сранан-тонго. Ек ԥэй ԥэндя манди, кай мэ спэрва тэ проандярав изучения пэ кодэя шыб, сави сас важ мандэ май ԥари, ай потом ужэ пэ кодэя, пэ сави манди май вушэро тэ  дав дума. Йто мэ полэм, кай кода, со вой ԥэндя, сас годявэрнэс.

Еқвар манди сас трэбуй тэ проандярав дуй изучения, пэрво пэ шыб сранан-тонго, ай дуйто пэ португальско. Кала мэ лэм тэ проандярав дуйто изучения и ԥэй, сави сас манца, ԥэндя манди: «Мари-Лина, здэлпэ, кай варисо най кадя!» Кати тоди манди дожыля, кай мэ давас дума ла манушняса анда Бразилия, най пэ латири шыб, пэ партугальско, ай пэ авэр шыб, пэ сранан-тонго.

Тумэн фартэ любин и ԥрала и ԥэя, каса тумэ служынас. Сар тумэндэ вижал, кадя драго тэ дружын лэнца?

О Джеко росԥэнэн. Андэ Притчи 11:25 ԥэнэнпэ, кай о мануш, саво дэл анда вся оди, авэла бахтало. Амэ на жалуисарасас пэс важ авэр. Кала трэбуй варисо тэ стерас важ о Зало Царства, кай амэ стидаспэ, дэкала ԥрала ԥэнэн манди: «Мэк када стерэн и вазвещятеля». Мэ пэ када ԥэнав: «И мэ сым вазвещятелё. Если исин варисави бути, мэ стерава ла анда вся оди». Хоть дэкала амэнди всаворэнди трэбуй время важ пэстэ, амэ на камас через када тэ на терас лашимос важ авэр.

И Мари-Лина росԥэнэн. Амэ старысавас анда оди тэ шас сама лэ ԥралэн и лэ ԥэян. Амэ уӷанас, кала лэнди трэбуй тэ подиқас пала лэндирэ бэяцэ чи тэ залас лэ бэятонэн анда школа. Важ када амэ отстас и дила, сави амэнди трэбуй сас тэ терас. Кала поможысарас лэ ԥралэнди и лэ ԥэянди, тоди амэ лас лэнца драго тэ дружысарас.

Саво лашимос тумэнди андя, кай тумэ служынас котэ, кай трэбуй сас май бут мануша, кай тэ росԥэнэн важ о Дэл?

О Джеко росԥэнэн. Важ кода кай амэ вся и время бут служысарасас, амари жызня ашэля май бахтали. Амэнди фартэ чалёл тэ диқас пэ вся, со стердя о Иегова. Хоть амэндэ андэ жызня и исин ԥаримос, по ди амэнди драго. Амэ ӷанас, кай лэ Дэвлэско народо вся и время амэн подритярэла, кай бы амэ тэ на авас.

Кала мэ сымас тэрно, ман бэшардэсас андо баруно андэ Француско Гвиана, кай отԥэнделэм тэ жав андэ халавдэ. Тоди мэ и на гиндосаравас, кай варикала мэ рисавава тэ служысарав кордэ, сар мисианеро и лава тэ росԥэнав важ о Дэл лэ манушэнди, савэ бэшэнас андо баруно. Чаче, о Иегова дя амэнди бут лашимос!

И Мари-Лина росԥэнэн. Мэ любисарав тэ поможысарав лэ манушэнди. Кадэлэстар мэрно ди лошавэл. Амэ сам бахталэ, кай служысарас лэ Дэвлэсти. Через када амэ лэ Джекоса ашэлям май пашэ ек еқэса. Дэкала о Джеко камэл тэ ақарэл амэндэ варисавэ ерес, кай вмести тэ хас и тэ подритярас лэн. Ай мэ ԥэнав, кай кати погиндосардэм пала када! Амэндэ часто лэса ек гиндо.

О Джеко росԥэнэн. Найдэлмут манди ԥэндэ, кай мандэ найлащи дук (рако). Хоть мэрня хулаяти када и на чалёл, мэ ԥэнав лати: «Мэрни кучутни, если мэ йто мэрава, хоть мэ и найԥуро, мэ ӷанав, кай па чачимастэ мэ бахтало мануш. Важ кода кай мэ теравас со май ӷлавно, мэ служысаравас лэ Иеговасти» (Бытие 25:8).

И Мари-Лина росԥэнэн. О Иегова дя амэнди тэ терас и дила, сави амэ и на аштярасас. Андэ амари жызня кадя бут лашимос! Амэ андэ вся патяс лэ Иеговасти, важ када амэ ӷотови каринг и любо дила андэ лэстири арӷанизацыя и можэм тэ пэрэладас хоть акана!