Jack na Marie-Line asatumikira pabodzi kutomera mu caka 1988. Iwo nee akhanentseka kudzolowera makhaliro apacisa, pontho akhatawira kucinjwa toera kucita mabasa akusiyanasiyana ku Guadeloupe na ku French Guiana. Cincino mbuto zenezi ziwiri zisayang’anirwa na Bheteli ya Fransa. Tendeni ticite mibvundzo mingasi Jack na Marie-Line.

Ninji cidakucitisani kupita m’basa ya dzidzi onsene?

Marie-Line: Ndakula ku Guadeloupe, pontho kazinji kene ndikhamwaza mphangwa ntsiku yamumphu pabodzi na mama, wakuti akhali waphinga kakamwe m’basa ya kumwaza mphangwa. Ndisafuna kakamwe anthu, natenepa pidamalisa ine xikola mu caka 1985, ndatoma kutumikira ninga mpainiya.

Jack: Pikhali ine m’phale, ndzidzi onsene ndikhali pabodzi na abale na alongo akuti akhali m’basa ya ndzidzi onsene, pontho iwo akhakomerwa kakamwe na kumwaza mphangwa. Mu ndzidzi wa maferya akuxikola ndikhatumikira ninga mpainiya wakuphedza. Ntsiku zonsene zakumala kwa sumana, tikhakwira motokala toera kuenda kamwaza mphangwa pabodzi na apainiya m’pisa pyawo. Ife tikhamwaza mphangwa ntsiku yamumphu, buluka penepo ndikhaenda ku paraya. Ntsiku zenezi zikhali zakutsandzayisa kakamwe.

Pidamala ine kumanga banja na Marie-Line mu caka 1988, ndabvundzika, ‘Nakuti nee tisatsalakana pinthu pizinji, ndiye tani kuthimizira utumiki wathu? Natenepa, ine na Marie-Line tatoma kutumikira ninga apainiya. Pidapita caka cibodzi pakumala kupfundza xikola ya apainiya, ine na nkazanga takhazikiswa ninga apainiya akupambulika. Tikhaphata mabasa mazinji akutsandzayisa ku Guadeloupe mbatidzati kuphembwa toera katumikira ku French Guiana.

Imwe mwacinjwa toera kucita mabasa akusiyana-siyana mu pyaka pizinji. Ninji pidakuphedzani toera kudzolowera makhaliro mapswa?

Marie-Line: Abale a ku Bheteli ya French Guiana akhadziwa kuti lemba inakomerwa na ife ndi Izaiya 6:8. Iwo angatimenyera ntokodzi, kazinji kene akhatibvundza mwakuseka kuti: “Musakumbuka lemba inakomerwa na imwe?” Natenepa ife tikhadziwa kuti tisafuna kucinjwa. Na thangwi ineyi ife tikhatawira, “Tiri pano! Titumeni!”

Ife nee tisalandanisa basa ikhacita ife kale na inacita ife cincino, thangwi pyenepi panango pinatipingiza  toera kukomerwa na basa yathu ipswa. Pontho tisawangisira toera kucita uxamwali na abale na alongo ku mbuto ipswa inatumizwa ife.

Jack: Pakutoma, abale na alongo anango nee akhafuna kuti ife tibuluke, natenepa akhatinyengerera toera tipitirize kukhala na iwo. Mbwenye pidabuluka ife ku Guadeloupe, m’bale m’bodzi atikumbusa mafala a Yezu anagumanika pa Mateu 13:38 analonga kuti: “Munda ndi dziko yapantsi.” Natenepa tingacinjwa, ife tisakumbuka kuti tikupitiriza kutumikira m’munda ubodzi ene mwakukhonda tsalakana mbuto inatumikira ife. Kusiyapo pyenepi, anthu na cisa ndi pyakufunika kakamwe.

Tingafika mucisa cipswa, tisaona kuti anango asakwanisa kukhala mucisa ceneci mwakutsandzaya kakamwe. Natenepa tisayeserambo kukhala ninga iwo. Maseze cakudya ndi cakusiyana, ife tisadya pire pinadya iwo, pontho tisamwa pire pinamwa iwo, mbwenye tisacita mphole-mphole na ungumi. Ife tisawangisira kakamwe toera kukhala na maonero akulinganira thangwi ya mabasa onsene anacita ife.

Marie-Line: Ife tapfundzambo pinthu pizinji na abale na alongo apacisa. Ndisakumbuka pinthu pidacitika mu ndzidzi udafika ine kwene ku French Guiana. Madzi akhabvumba kakamwe, natenepa tikhafunika kudikhira toera ace mbatidzati kuenda kamwaza mphangwa. Mbwenye mulongo unango andibvundza: “Muli dzololo toera kuenda kamwaza mphangwa?” Ine ndantawira: “Tinaenda tani?” Iye andipanga: “Kwata sumbulero yako, pontho tinaenda na njinga zathu.” Natenepa ine ndapfundza kuphatira sumbulero, mu ndzidzi ubodzi ene mbanditcova njinga. Mbidakhonda kucita pyenepi, nee mbidakwanisa kumwaza mphangwa mu ndzidzi wa madzi.

Imwe mwacita macinjo maulendo 15. Ndi maonero api ali na imwe thangwi ya macinjo anewa?

Marie-Line: Macinjo ndi akunentsa. Mbwenye ndisakwanisa kukhala na mbuto yakupuma ndingakotoka m’basa yakumwaza mphangwa.

Jack: Kazinji kene tingacinja mbitienda kakhala nyumba inango ndisaipintari n’kati. Mbwenye abale a ku Bheteli angaona kuti nee tinakhala ndzidzi uzinji ku mbuto idatumwa ife, iwo asandipanga: “Jack, leka kupintari nyumba ineyi.”

Marie-Line asadziwa mwadidi kupaka pinthu pa mbuto yace. Iye asaikha pinthu pyonsene m’makaxa, buluka penepo asaikha cidzindikiro pa makaxa anewa toera kupangiza pinthu piri mwenemo ninga pinthu pya mu “casa de banho,” pya “n’kwartu” na “n’kuzinya.” Natenepa tingafika pa nyumba inango, nee pisanentsa kwa ife kuikha kaxa ibodzi na ibodzi pa mbuto yace. Iye asalemba pinthu piri n’kaxa ibodzi na ibodzi,  natenepa tisakwanisa kugumana mwakucimbiza cinthu cinafuna ife.

Marie-Line: Nakuti tapfundza kukhala akhunganyika ndzidzi onsene, natenepa nee tikhadembuka toera kuenda m’basa yakumwaza mphangwa.

Kodi musaphatisira tani ndzidzi wanu toera “kucita mwakukwana utumiki wanu?”​—2 Tim. 4:5.

Marie-Line: Ntsiku zonsene za n’Ciposi, ife tisapuma na kukhunganyika misonkhano. Mbwenye kutomera n’Cipiri tisaenda mu utumiki.

Jack: Maseze tisaphembwa toera kukwanirisa maora a miyezi yonsene, mbwenye nee tisadzudzumika na pyenepi. Kumwaza mphangwa ndi kwakufunika kakamwe kwa ife. Kutomera ndzidzi unabuluka ife panyumba mpaka kubwerera, ife tisawangisira kakamwe toera kulonga na anthu onsene anagumanikana na ife.

Marie-Line: Mwacitsandzo, tingacemerwa toera kacedza pabodzi na abale na alongo, kazinji kene ndisakwata matratadho. Anthu anango asatifendedzera mbatiphemba mabukhu, maseze ife nee taapanga kuti ndife Mboni za Yahova. Na thangwi ineyi, ife tisacita mphole-mphole na mabvaliro athu, pontho na macitiro athu. Anthu asaona pinthu pyenepi.

Jack: Ife tisaperekambo umboni kuna anyakuendekana athu mukupangiza kukoma ntima kuna iwo. Ine ndisapswaira pa kintalo pathu, buluka penepo ndisaenda kataya pirombo. Anyakuendekana asaona pyenepi, pontho midzidzi inango asatibvundza: “Kodi muli na Bhibhlya toera kundipasambo?”

Nakuti kazinji kene mukhamwaza mphangwa mu pisa pyakutali. Kodi musakumbuka cinthu cakupambulika cidacitika kuna imwe m’maulendo anewa?

Jack: Pisa pinango pya ku Guiana piri kutali kakamwe. Kazinji kene pasumana ife tikhafamba nsindzo wa makilometru 600 m’miseu yakuti ikhali na madjenje kakamwe. Ndisakumbuka pyenepi mu ndzidzi ukhaenda ife kucisa ca St. Élie mu nsitu wa Amazona. Tamala midzidzi mizinji toera kufika kweneko mukuphatisira motokala wakuti usakwanisa kufamba m’miseu ya madjenje na bote yakuti isathamanga kakamwe. Anthu azinji a kweneko akhali anyakukumba ouro. Toera kupereka takhuta thangwi ya mabukhu akhagawira ife, anthu anango akhatipasa miyala ming’ono ya ouro ninga pyakupereka. Namaulo, ife tikhaapangiza mavidhyu anabuluswa na gulu yathu. Anthu azinji akhabwera toera kuaona.

Marie-Line: Pa ndzidzi unoyu, Jack aphembwa toera kacita nkhani ya Cikumbuso ku cisa ca Camopi. Toera kufika kweneko, tamala midzidzi minai mbatikaenda na bote mu Nkulo wa Oyapock. Pyenepi pikhali pyakutsandzayisa kakamwe.

Jack: Nkulo unoyu ungadzala, ukhagopswa thangwi madzi akhathamanga kakamwe. Pikhali pyakudzumatirisa kakamwe kuona kuthamanga kwa madzi anewa mu ndzidzi ukhali ife m’bote. Nyakutekenya bote akhafunika kuphatisira maluso kakamwe mu ndzidzi unoyu. Mwandimomwene pikhali pyakudzumatirisa kakamwe. Maseze kucisa ceneci kukhali na Mboni za Yahova zitanthatu, mbwenye anthu akukwana 50 agumanika pa Cikumbuso, kuphatanizambo Ameríndios anango.

Marie-Line: Pinthu pyenepi pidaticitikira pinakwanisa kuphedza aphale na atsikana khala asafuna kucita pizinji m’basa ya Yahova. Ife tikhafunika kunyindira Yahova m’makhaliro anewa, pontho pyawangisa cikhulupiro cathu. Ife tikhaona kuti Yahova akhatiphedza kakamwe.

Imwe mwapfundza pilongero pizinji. Pikhali pyakunentsa kwa imwe kupfundza pilongero pyenepi?

Jack: Inde. Mbwenye ndapfundza pilongero pyenepi toera ndikwanise kumwaza mphangwa na kuphedza anango mu mpingo. Ine ndikhafunika kutsogolera Pfundziro ya Ncenjezi mu cilongero ca Sranantongo *, cilongero cakuti ndikhadzati kuciphatisira pakuleri Bhibhlya. Ine ndabvundza m’bale toera kudziwa khala pikhalonga ine pikhabveka. Iye atawira: “Mafala anango nee akhabveka mwadidi, mbwenye mwacita mwadidi kakamwe.” Anang’ono akhandiphedza kakamwe. Ndingadodomeka, iwo akhakwanisa kundipanga, mbwenye akulu nee akhakwanisa kucita pyenepi. Ana anewa andipfundzisa pinthu pizinji kakamwe.

Marie-Line: Mucisa cinango, ine ndikhacitisa mapfundziro a Bhibhlya mu Cifransa, Cizungu na Sranantongo. Mulongo unango andipanga kuti ndikhafunika nditome kucitisa mapfundziro a Bhibhlya mu pilongero pyakunentsa, mbandimalisira na pilongero pyakukhonda nentsa. Mwakukhonda dembuka, ine ndaphatisira maonero ace.

 Ntsiku inango, ndatoma kucitisa pfundziro ya Bhibhlya mu cilongero ca Sranantongo mbandimalisira na Cizungu. Pidatoma ine kucitisa pfundziro yaciwiri, mulongo akhali na ine andipanga: “Marie-Line, ndisaona kuti waphonyeka!” Natenepa ndadzindikira kuti ndikhalonga cilongero ca Sranantongo na nkazi wa ku Brazil m’mbuto mwakulonga naye Cizungu.

Imwe musafuniwa kakamwe na anthu a mbuto zikhatumikira imwe. Kodi mwakwanisa tani kucita uxamwali na anthu anewa?

Jack: Lemba ya Misangani 11:25 isalonga: “Anapasa mwakudzala manja anadzapaswa nkhombo.” Ife tikhacita pyonsene pikhakwanisa ife toera kuphata basa pabodzi na abale. Mu ndzidzi ukhasasanyirwa papswa Nyumba ya Umambo, abale anango alonga: “Siyani, amwazi mphangwa anacita basa ineyi.” Mbwenye ine ndatawira: “Ine ndinembo m’mwazi mphangwa. Khala basa ineyi inacitwa, ine ndinacitambo.” Maseze ife tonsene tisafuna ndzidzi toera kucita pinthu pyathu, mbwenye pyenepi nee pisafunika kutipingiza toera kucita pinthu pyadidi kuna anango.

Marie-Line: Ife tikhawangisira toera kupangiza citsalakano kuna abale na alongo athu. Munjira ineyi, takwanisa kudziwa ndzidzi ukhafuna iwo munthu toera kutsalakana anawo peno kuakwata angakotoka kuxikola. Natenepa tacita masasanyiro toera kuaphedza. Pyenepi pyatiphedza toera kuwangisa uxamwali wathu na anango, pontho tikhali dzololo toera kuaphedza.

Ndi nkhombo zipi ziri na imwe thangwi yakutumikira ku cisa cakuti ciri na amwazi mphangwa akucepa?

Jack: Ife tiri na nkhombo zizinji thangwi yakutumikira m’basa ya ndzidzi onsene. Kazinji kene ife tisatsandzaya kakamwe na pinthu pidacita Yahova. Maseze tisathimbana na pinentso, ife tiri na ntendere wa m’manyerezero mukudziwa kuti tisaphedzwa na atumiki a Mulungu m’mbuto zonsene zinatumikira ife.

Pikhali ine m’phale ndafungirwa nkaidi ku French Guiana thangwi yakukhonda cita khundu mu pinthu pyandale. Ine nee ndikhadikhira kuti mbandidabwerera pontho kweneko toera katumikira ninga misionaryo na kutawiriswa kumwazira mphangwa anthu ali nkaidi. Mwandimomwene, Yahova asapasa mwakudzala manja.

Marie-Line: Cinanditsandzayisa kakamwe ndi kuperekeka toera kuphedza anango. Tiri akutsandzaya kakamwe thangwi yakutumikira Yahova. Pyenepi pyaphedzambo banja yathu toera kukhala yakuwanga. Midzidzi inango, Jack akhandibvundza khala pinakwanisika kucemera banja yakuti isafuna kuwangiswa toera kudzadya pabodzi na ife. Kazinji kene ndikhatawira: “Ndikhanyerezerambo pibodzi pyene.” Pyenepi pikhapangiza kuti kazinji kene ife tikhanyerezera pinthu munjira ibodzi ene.

Jack: Ndzidzi ungasi nduli, dotoro andipanga kuti ndiri na utenda wa câncer de próstata. Maseze Marie-Line nee asakomerwa na kubva pyenepi, ine ndampanga: “Nkazanga wakufunika, ine nee ndakalamba, mbwenye khala ndinafa cincino, ndisadziwa kuti ndaphatisira umaso wanga toera kutumikira Yahova, pontho pyenepi pisanditsandzayisa kakamwe.”​—Gen. 25:8.

Marie-Line: Yahova atipasa mabasa akuti nee tikhaadikhira, pontho atitawirisa toera kucita pinthu pyakuti nee tikhapinyerezera. Mwandimomwene ife tacita pinthu pizinji pyadidi. Ife tinaenda konsene kunatumwa ife na gulu ya Yahova, thangwi tisanyindira kakamwe Yahova kuti ndzidzi onsene iye anatiphedza.