Jaakinna Maarliini 1988nni hanafe woˈma yanna soqqansho soqqamanni no. Insa haaro qooxeessa rahe rosate dandoo noonsareeti; qoleno, Firenchi Giyaanahonna Guwadeloppe yinanniwa addi addi qooxeessa sonkoonninsa. Kuni lamunku qooxeessi xaa yannara Faransayete sinu biiro hunda no. Hanni, Jaakinna Maarliini mite xaˈmo xaˈmino.

Woˈma yanna soqqansho hanaffinanni gede kakkayisinoˈneri maati?

Maarliini: Lophoommahu Guwadeloppi yinanniwaati; anje noomma yannara duucha woyite amaˈya ledo barra woˈma sabbakeemma; ise diinaggaabbe soqqantannote. Manna baxeemma daafira 1985 roso gudanni heeˈrenni suwisaancho ikke soqqama hanafumma.

Jaaki: Anje noommo yannara soqqansho baxxannori woˈma yanna soqqamaano ledo hoseemmo. Rosu cufamanno woyite kaaˈlaancho suwisaancho ikke soqqameemmo. Qoleno, mito woyite Qidaamenna Sambatu barra otobisetenni haˈne suwisaano noowa marre ledonsa soqqammeemmo. Barra woˈma sabbankanni honseemmo; hakkiinni hawarro baaru qacce haˈneemmo. Hatti lowo geeshsha hagiirsiissanno yannaati!

Maarliini ledo 1988nni adhammummohunni shiima yanna gedensaanni ‘xa ninke qarrisinonkeri dino, hakko daafira mayira albinni roore disoqqammeemmo’ yee hedummo. Hakkiinni anino Maarliini ledo suwisaancho ikke soqqama hanafummo. Mittu diri gedensaanni suwisaanote rosi mine ronsummo; hakkiinni baxxitino suwisaano assine shoomminke. Guwadeloppe addi addi qooxeessira soqqammummohu gedensaanni Firenchi Giyaana sonkinke.

Lowo diro addi addi qooxeessira soqqantinara sonkoonniˈne. Ikkina, haaro qooxeessa rossinanni gede kaaˈlinoˈneri maati?

Maarliini: Firenchi Giyaanu Beeteelera soqqantanno roduuwi Isayaasi 6:8 banxeemmo qummeeshsha ikkinota affino. Insa duucha woyite silke bilbiltannonke woyite haarintinohu gede assite “Baxxinanni qummeeshsha qaagginanni?” yitannonke. Insa hatto yitannonke woyite wolewa sonkankera hendoonnita anfeemmo. Hakko daafira “Haˈneemmona sokkenke!” yineemmo.

 Albi soqqanshonke xaate ledo diheewisiinseemmo; hatto assinummoro, xa soqqammeemmo soqqansho naandeemmokki gede assitankera dandiitanno. Qoleno, roduuwunniwa shinqe insa ledo egennamate sharrammeemmo.

Jaaki: Alba soqqammeemmowa heeˈrannohu mitu roduuwi insawa keeshshinammora hasidhino daafira haˈneemmota hoolate woˈnaaltino. Kayinni Guwadeloppe yinanniwiinni haˈnanni heeˈneenna mittu rodii Yesuusi Maatewoosi 13:38te “Gatu tenne alameeti” yee coyiˈrino qaale qaagiissinonke. Hakko daafira wolewa sonkeenanke haˈneemmo woyite heeˈnummowanno heeˈnummoro soqqammeemmohu mitto gate ikkinota qaangeemmo. Qoleno, ninke injonni roore qoqqowonkenna hakko heeˈranno manna illachinsheemmo.

Haaro qoqqowonke marreemmo woyite hakko heeˈranno manni hagiirraamma ikke heeˈra dandiinota laˈneemmo. Ninkeno, hakko heeˈranno manni gede ikkine heeˈrate woˈnaalleemmo. Intanni sagale baxxitara dandiitanno; ikkirono, fayyimmankera qorophinanni insa itture inteemmo, aggure angeemmo. Baalante soqqammeemmo soqqansho daafira danchare coyiˈrate sharrammeemmo.

Maarliini: Hakko heedhanno roduuwiwiinnino lowore ronsoommo. Firenchi Giyaanaho soqqammanna ikkinore horo dihaweemma. Mitto barra biite xeena gananni noo daafira birreenna fulle soqqammeemmo yine hendoommo. Kayinni mitte rodoo “Haˈnummoro woyya ikka?” yitue. Hakkiinni dhagge assiˈre, “Xeenu dishaannonke” yuumma. Ise “xilakki adhi biskilliitetenni haˈneemmona” yitue. Xila amaxxine biskilliite kandanni gara rosoommahu hakka woyiteeti. Hatti rodoo kula hooggoommero xeeni yannara sabbaka dandiinanni gara horo diroseemma.

Mite 15 hinge addi addi qooxeessa sonkoonniˈne. Ikkina, wolewa haˈrate daafira wolootaho kaaˈlitanno yitinanni amaale nooˈne?

Maarliini: Wolewa haˈnanni woyite qarra ikkannori dihooganno. Soqqanshonniwiinni hinganni woyite fooliishshiˈnanni mine afiˈra hasiissanno.

Jaaki: Duucha woyite mine soorriˈneemmo yannara mininkera giddooyidira qalame buureemmo. Sinu biirora soqqantanno roduuwi mittu qooxeessira lowo yanna keeshshineemmokkita affuro “Jaaki tenne yannara mineho qalame buudhitooti” yitannoe.

Maarliini haˈnanni woyite uduunne biddi biddi assinanni gara rossinote. Baalanka uduunne kaartoonete giddo worte aanaho “biso hayishshiˈnani  mine” “gonxanni minenna” “sagale qishiˈnanni mine” yite borreessitanno. Hakko daafira haaro minenke iillineemmo woyite kaartoonna wodhineemmoha injiino bayicho afiˈneemmo. Ise kaartoonete giddo mayi mayi nooro borreessite aanaho gantanno daafira hasiˈnoommore qarrammummokkinni afiˈneemmo.

Maarliini: Baalankare balanxe biddi biddi assiˈra ronsoommo daafira, maarranni heeˈnenni soqqansho hananfeemmo.

‘Soqqanshoˈne baala wonshate’ pirogiraameˈne biddi assidhinannihu hiittoonniiti?— 2 Xim. 4:5.

Maarliini: Sanyo sanyo fooliishshiˈneemmo; hattono, gambooshshuwate qixxaambeemmo. Maakisanyotenni kayise soqqansho fulleemmo.

Jaaki: Aganu giddo qola hasiissannonke saate nooha ikkirono, saate wonshiˈrate diyaandeemmo. Heeshshonke giddo soqqansho balaxisiinseemmo. Soqqanshote mininni fullummo yannanni kayinse wirro minira hingammo geeshsha xaandeemmo manna baala hasaawisate woˈnaalleemmo.

Maarliini: Boohaarrammora haˈneemmo yannara duucha woyite tiraaktuwa adhe haˈreemma. Mitu manni Yihowa Farciˈraasine ikkinoommota kullummonsakki nafa ninkewa daye borro xaˈmiˈranno. Korkaatuno, uddiˈneemmo garino ikko akatinke kawajjaamoho. Mannu tenne wodanchanno.

Jaaki: Qoleno mannaho dancha olliicho ikkine insa Yihowa daafira rossanno gede kaaˈlineemmo. Lawishshaho, mininke qooxeessira uulla tuttungoonni woraqqatanna ishine xinqe gamba asse huneemmo. Tenne huwatinohu qooxeessinke manni mito woyite “Qullaawa Maxaafa diaattonke?” yee xaˈmiˈranno.

Duucha yannara xeertote qooxeessira soqqantinoonni. Ikkina, hadhinoonnihu baalunku qooxeessi giddo baxxino garinni qaagginannihu no?

Jaaki: Giyaanaho mitu qooxeessi noohu lowo geeshsha xeertoteeti. Duucha woyite lamalate giddo injiitannokki doogo 600 k.m. haˈneemmo. Amazooni dubbi giddo noohuwa Senti Eeli yinanniwa soqqammummo yanna horo dihambeemmo. Hakkira iillate injiitannokki doogo makeenunninna yowolotenni lowo saate haˈnoommo. Hakko heeˈrannohu rooru manni culka uˈmannoho. Mitu manni isinni borronke naadino daafira shiima culka uyinonke! Hawarro dirijjitenke viidiyubba giddonni mitte leellinsheemmonsa. Hakko qoqqowira heeˈrannohu batinyu manni daye laino.

Maarliini: Muli yannara, Jaaki Kamopi yinanniwa Qaagooshshu Ayyaanira lallawo shiqishara xaˈminoonnisi. Hakkira iillate yowolotenni Oyapoki yinanni lagi aana shoole saate haˈnoommo. Hattee yannara lowo geeshsha hagiidhinoommo.

Jaaki: Lagu giddo kinna noo bayicho dambalu batiˈranno; hakko daafira wayi haˈranno gari lowo geeshsha waajjishannoho. Wayi haˈranno gari dhagge ikkanno. Yowolo laaqanno manchi worba ikka hasiissannosi. Ikkirono hagiirsiissanno yannaati. Hakko qooxeessira nooti Yihowa Farciˈraasine lee calla ikkiturono Qaagooshshu Ayyaana ayirrisate 50 meddi yaanno manni dayino; kuri giddo mitu Ameeriku hindeeti.

Maarliini: Yihowara albinni roore soqqama hasidhanno wedelli togoo atoote afidhanno. Hatto assineemmoha ikkiro, Yihowa addaxxineemmo hattono ammananke kaajjitanno. Qoleno, duucha woyite Yihowa kaaˈlannonke gara laˈneemmo.

Addi addi qaale rossinoonni. Ikkina wole qaale rosate baxxitino dandoo nooˈneni?

Jaaki: Dinonke. Addi addi qaale rosoommohu sabbakatenna songo kaaˈlate yeeti. Qullaawu Maxaafi niwaawe shiqishammora albaanni Siranantongo * afiinni Agarooshshu Shae xiinxallo massaga hasiissinoe. Hakkiinni mitto rodoo massagoommo gari hiittooti yee xaˈmummo. Isi “mitu yoottori leellinonkekkiha ikkirono massagootto gari danchaho” yiie. Qaaqquullu lowo geeshsha kaaˈlitinoe. Soˈreemmo woyite jajjabu kultannokkire kultannoe. Insawiinni lowore rosoommo.

Maarliini: Mittu qoqqowira Faransayete, Porchugaaletenna Siranantongo Afiinni Qullaawa Maxaafa xiinxalliseemma manni no. Mitte rodoo xiinxallisa gari geeshsha dandeemmakki afiinni hanafe lowo geeshsha dandeemma afiinni jeefisammara amaaltinoe. Rodoo amaaltinoe amaale kaaˈlitinoe.

 Mitto barra balaxe mitte Qullaawu Maxaafi rosaancho Siranantongo Afiinni xiinxallise, wole kayinni gedensoonni Porchugaalete Afiinni xiinxallisoomma. Layinki rosaancho xiinxallisanna rodoo “Maarliini manchote yaattari dileellinose!”yitue. Hakkiinni ani Biraazilete mancho Porchugaalete Afiinni xiinxallisa agure Siranantongo afiinni xiinxallisanni noommata huwatoomma.

Soqqantinoonni qooxeessira noo roduuwi lubbora baxxannoˈne. Roduuwu ledo togo lubbora jaalooˈmitinani gede kaaˈlinoˈneri maati?

Jaaki: Lawishsha 11:25 “Elannohu durooˈmanno” yitanno. Woloota kaaˈlate badhera dihingeemmo. Gambooshshu Addaraashe gatamarranni woyite mitu roduuwi, “Konne looso halashshaano loossona aguri” yitannoe. Hakkiinni “Anino halashshaanchoho. Loonsanniri heeˈriro anino loosa hasiissannoe” yeemmonsa. Mito woyite ninke baalunkura uminke dilgo assiˈneemmo yanna hasiissannonkeha ikkirono, tini wolootaho danchare assineemmota hooltankera diwodhineemmo.

Maarliini: Mitto mittonka roduuwa kaaˈlate sharrammeemmo. Konnira mitu roduuwira qaaqquullensa towaatannohunna rosu mininni mare abbannohu hasiisannonsa yanna mamooteetiro anfeemmo. Hakkiinni insa kaaˈlate pirogiraamenke biddi assiˈneemmo. Roduuwinkera kaaˈlo hasiissannonsa woyite donde marre kaaˈlineemmonsa daafira insa ledo lubbora jaalooˈminoommo.

Sabbakkannori roore hasiissannowa soqqamaˈnenni mayi atoote afidhinoonni?

Jaaki: Woˈma yanna soqqansho heeshshonke hagiirru woˈminota assitino. Duucha woyite Yihowa kalaqinoha addi addi kalaqama laˈˈate tunceenyi noonke. Qarra ikkanno coyi heeˈrirono, ayewano heeˈnummoro Maganu manni kaaˈlannonketa anfoommo daafira giddooyidi keere afiˈnoommo.

Wedellichu noommo yannara poletiku hajora anga wodha giwoommo daafira Firenchi Giyaanaho usuramoommo. Misiyoone ikke hakkira higeemmotanna usuru mine noore mare Qullaawa Maxaafa xiinxallisate qoosso afiˈreemmo yee horo hede diegennoommo. Addaho, Yihowa lowo geeshsha maassiˈrinonke!

Maarliini: Woloota kaaˈlaˈyanni lowo hagiirre afiˈroomma. Yihowara soqqamankenni lowo atoote afiˈnoommo. Qoleno, tini minaanniˈya ledo lubbora baxammeemmo gede assitinonke. Mito woyite Jaaki jawaante hasiissannonsa minaannanna minaama sagale koyinso yaannoe. Duucha woyite “anino hedanni noomma” yeemma. Roore woyite hedonke mittu garite.

Jaaki: Muli yannara hakimootu kaanserete dhibbi amadinoeta kultue. Maarliini tenne macciishsha baxxannokkiha ikkirono, mitte hige togo yoommose: “Bullaˈya mulenni reyummoro ‘geedhe’ reyanni noommoha ikka hoogiro nafa, heeshshoˈya danchare assatenna Yihowara soqqamate horoonsiˈroommo daafira hagiirraamoho.”—Kal. 25:8.

Maarliini: Yihowa hendoommokkita soqqanshote qoosso oyeenke loonseemmo yine hende egenninoommokki looso loonsammora fajjinonke. Heeshshonke hagiirru woˈminote. Woˈmunni woˈma Magano addaxxineemmo daafira dirijjitesi sokkunkewa baalawa haˈneemmo.