Niaraky nanompo amy fotoa iaby Jack noho Marie-Line liany tamy 1988. Tena mahay mampifanaraky ty fiainany amy ze raha misy rozy, ka nanatanteraky fanendrea sankarazany ta Goadelopy noho Guyane any. Ty sampani-Fransy ro miandraikitsy ty asa amy pilasy reo henanizao. Ndao tsika hanontany ani-Jack noho Marie-Line.

Ino ty nanosiky anareo hanao fanompoa amy fotoa iaby?

Marie-Line: Nibe ta Goadelopy any aho. Matetiky aho niaraky nitory amy mamako manomboky maraindray zisiky hariva. Nazoto nitory ie. Tea olo aho, ka lafa nivita ty fianarako tamy 1985, le nanomboky nanao mpisava lala aho.

Jack: Tamy zaho mbo nimpamaraky, le olo tea fanompoa rey avao ro niarahako, zany hoe mpanompo amy fotoa iaby. Nanao mpisava lala mpanampy aho saky vakansy. Lafa farani-herinandro zahay mandeha bisy, le manompo miaraky amy mpisava lala rezay amy faritanin-drozy eny. Manompo maraindray zisiky hariva zahay, le mamanta mitofatofa amoron-driaky eny. Tena niteateanay fotoa rey!

Nanambaly ani-Marie-Line aho tamy 1988. Tafara kelikelini-zay, le hoy ty asako: ‘Malalaky zahay henanizao, ka tsy aleo ampitomboanay ty fanompoanay?’ Nanao mpisava lala niaraky amy Marie-Line amy zay aho. Tao raiky tafarani-zay, le nivoatendry ho mpisava lala manoka zahay lafa baka nanatriky sekolini-mpisava lala. Nahazo fanendrea vitsivitsy tena soa ta Goadelopy tse zahay talohani-nifindranay ta Guyane etoa.

Maro ty fanendrea fa niazonareo bakany zay. Ino ty nanampy anareo hampifanaraky ty fiainanareo amy ze fanovà vaovao?

Marie-Line: Haini-ranadahy amy Betelani-Guyane ao reo hoe ty Isaia 6:8 ro andinin-teny teanay marè. Ka lafa mikaiky anay rozy, le matetiky misomonga anay hoe: “Ino moa andinin-teny tena teanareo iny?” Fa hainay amy zay hoe hisy fanendrea vaovao ho avy koa zay. Le mamaly zahay hoe: “Toa zahay iraho!”

Lafa mahazo fanendrea vaovao zahay, le miezaky mba tsy hampitovy azy amy ty fanendrea taloha satria mety tsy ho falifaly zahay laha manao  ani-zay. Miezaky koa zahay mba hifankahay soa amy rahalahy noho anabavy any rey.

Jack: Tsy nahafoy anay ty namanay sisany, ka nandresy lahatsy anay tsy hifindra fa hijano amin-drozy any avao. Fe lafa niala baka a Goadelopy any zahay, le nampitiarovini-rahalahy zay anay ty safàni-Jesosy amy Matio 13:38 ao hoe: “Ty tanimbary le zao tontolo zao.” Ka lafa miova fanendrea zahay, le tiarovinay avao hoe mbo miasa amy tonda raiky avao zahay ndre aia ndre aia ty misy anay. Ka lafa mahita olo amy faritany raiky zahay, le zay ro vatan-draha!

Lafa avy amy faritany vaovao zahay, le hitanay hoe afaky mifalifaly amy fiainany ty olo. Farany, miezaky hanahaky ty fomba fiainan-drozy zahay. Mety ho hafa ty sakafo amin-drozy any, fe ze raha hanin-drozy ro haninay, le ze inomin-drozy inominay. Fe miamby soa zahay mba ho salama avao. Miezaky koa zahay mba hiresaky raha soa mikasiky ty fanendrea hafa.

Marie-Line: Maro koa ty raha nianaranay baka amy mpiara-manompo rey. Tiaroko zahay vo niavy ta Guyane etoa iny. Nisy oram-be tamy zay, ka nieritseritsy aho hoe handiny ani-ora iny hijano zahay vo handeha hanompo. Fe hoy rahavavy raiky zay tamiko: “Tsy handeha amy zay tsika?” Nitampoky ahy raha iny, ka hoy ty asako: “Amy ora tia?” Namaly ie hoe: “Alao elonao iny fa samby handay bisikilety tsika.” Tamy zay ty nianarako hoe manao akory sady manday bisikilety noho mitanjaky elo zao. Laha tsy nianatsy ani-zay aho, le vasa tsy ho nitory mihintsy saky avy ty fotoani-ora.

Fa nifindra in-15 eo zay nareo. Mba misy hevitsy azonareo atoro va amy resaky fifindrà?

Marie-Line: Mety tsy ho mora aloha ty mifindra. Fa tena soa laha misy pilasy raiky hitanao hoe azo itofatofà saky baka manompo.

Jack: Matetiky aho mandoko ty anatini-tranonay ao. Haini-rahalahy amy sampana ao reo hoe mety tsy haharitsy any zahay. Farany mikizaky ahy rozy kindraiky hoe: “Jack e, ka misahira mandoko tse iha amy toy!”

Raha haini-Marie-Line aloha mangoron’enta io! Ataony anaty karton iaby enta rey le asiany soratsy hoe “ladosy”, “trano firoroa”, “lakozỳ” na manahaky ani-zay. Ka lafa avy amy tranonay vaovao ao zahay, le tsy sarotsy aminay ty mametraky ani-karton rey amy efitsy tokony hisy azy.  Ataony lista ze enta anatini-karton kiraidraiky, ka mora avao ty mahita ani-ze raha ilànao.

Marie-Line: Nianatsy nandamin-draha soa zahay, ka tonga de afaky manompo manahaky ty mahazatsy anay ndraiky.

Akory ty andaminanareo ty fotoanareo mba hahafahanareo ‘manatanteraky soa ty fanompoanareo’?—2 Tim. 4:5.

Marie-Line: Saky Tinainy zahay mitofatofa noho manoma ty fivoria iaby. Manomboky Talata amy zay, manompo.

Jack: Marina fa misy lera takỳ aminay, fe tsy zay ty ifantohanay. Ty fanompoa ro vatan-draha marè aminay. Miezaky hiresaky amy ze olo hitanay zahay laha vo miala baka an-trano eo zisiky impolianay bakany.

Marie-Line: Manday taratasy mivalo avao, ohatsy, aho lafa mandeha mitsangatsanga zahay. Mangataky boky aminay eny ty olo sisany, kanefa mbo tsy nivola tamin-drozy zahay hoe Vavolombeloni-Jehovah. Farany, ambenanay soa avao ty fihetsikinay noho ty siky handesinay. Voamarikin’olo raha reo.

Jack: Lafa soa fanahy amin’olo koa zahay, le fa fitoria amin-drozy zay. Mitimpo taratasy aho, manary fako, noho mandraoky akata amy zariday manodidy anay eny. Hitan’olo marìny anay eny raha zay, ka hoy ty asan-drozy kindraiky: “Tsy no misy Baiboly azonao amea ahy ty any?”

Nitory tamy faritany lavitsy any nareo matetiky. Misy tantara tsy halinonareo mihintsy va amy lia rey?

Jack: Sarotsy andehana ty faritany sisany a Guyane atoy. Matetiky zahay, tsy maintsy mandeha amy lala raty 600 km, anatini-herinandro. Nisy fahatiarova maro ty fandalovanay ta St. Élie, amy alani-Amazonỳ any. Nila nandeha tobily matanjaky noho laka motera tanatini-lera maromaro zahay vo niavy any. Mpihaly volamena ty ankamaroan’olo mipetraky any. Volamena malinidiniky ro nataon’olo sisany fanomeza, satria nitean-drozy bokintsika rey! Nandefa videoni-fandamina raiky zahay lafa harivan’iny. Maro ty olo nanenty.

Marie-Line: Nampanaovy lahateny Fahatiarova ta Camopi any Jack vo tsiela. Nila nandeha laka motera tanatini-efatsy lera tamy Vavaranoni-Oyapock iny zahay vo niavy any. Nisoasoa biby tamy zay.

Jack: Mety hikai-doza ty mandalo amy rano marivo eny lafa manday vavarano iny. Mahatofotofotsy ty mahita ani-rano iny avy baka any. Tokony hahay soa ty mpanday laka lafa mbeo. Fotoa tena nahafalifaly aloha iny. Ndre 6 avao aza ty Vavolombeloni-Jehovah teo, le olo 50 ro nanatriky Fahatiarova. Nisy baka amy foko Indiein Amerikein mihintsy aza!

Marie-Line: Fotoa mahafalifaly manahaky ani-zay ro mandiny ani-ze tanora ta hampitombo ty fanompoany ani-Jehovah. Laha miantehitsy amy Jehovah iha amy fotoa manahaky ani-rey, le hihamatanjaky ty finoanao. Fa matetiky zahay ro nahita hoe nanampy anay ty tanani-Jehovah.

Nianatsy fivolana maro koa nareo. Fa talentanareo zany raha io?

Jack: Aia koa. Tsy maintsy nianatsy ani-fivolana rey aho satria nilà raha zay. Mbo tsy nahazo famakia Baiboly aza aho, le voatery nitariky Fianara Tilikambo amy safà sranantongo. * Nanontany ani-rahalahy raiky zay aho vasa mba misy raha niazony avao. Hoy ty asany: “Tsy niazonay aloha ty safà sisany kindraiky, fe nisoa biby iny.” Tena nanampy ahy ty ajà. Lafa diso ty raha volaniko, le rozy ro mivola ahy fa tsy olobe rey. Maro biby ty raha nianarako baka amin-drozy.

Marie-Line: Tamy faritany raiky zay, le nana mpianatsy Baiboly manao safà fransè, portigè noho sranantongo aho. Nisy rahavavy zay nanoro hevitsy ahy hoe ty safà sarotsy marè ro tokony hatao aloha lafa mampianatsy Baiboly, le ty safà mahazatsy anao ro atao farany. Tsiela tafarani-zay, le nihitako hoe tena soa torohevitsy iny.

Nandeha nampianatsy Baiboly aho ndraiky andro. Ty raiky voalohany amy safà sranantongo, le ty faharoe amy safà portigè. Lafa natomboky  fampianara faharoe iny, le nivola rahavavy niaraky amiko iny hoe: “Marie-Line e, atao raha misy tsy milamy ie zao!” Zay vo nihaiko hoe kay hondy safà sranantongo ro ivolanako amy ampela breziliein iny, fa tsy portigè!

Tena tsy mahafoy anareo ze mpiara-manompo niaraky taminareo. Ino ty nataonareo mba tena ho naman-drozy?

Jack: Mivola ty Ohabolana 11:25 hoe: “Hovalean-tsoa ty olo matariky.” Tsy misalasala manome ty fotoanay noho manao raha ho ahi-ty hafa zahay. Zao ty niresahini-rahalahy sisany lafa nisy fikojakojà Efitrano: “Engao fa hataoni-mpitory reo io.” Fe hoy ty asako: “Ka zaho koa anè mpitory. Ka lafa misy asa tokony atao, le teako laha eo aho.” Mila manoka fotoa ho antsika kiraidraiky tsika, fe tsy teanay laha zay ro manaka anay tsy hanao raha soa ho ahi-ty hafa.

Marie-Line: Miezaky zahay mba hidary ani-ranadahy noho rahavavinay reo. Mora aminay amy zay ty mahay hoe mila olo hikarakara na hangalaky ani-anakin-drozy rey an-dakilasy any rozy. Bakeo alaminay ty fandaharanay mba hanampea an-drozy. Zay ro nahavy anay ho mpinama marìny, satria parè hanampy an-drozy zahay lafa ilà.

Ino iaby ty fitahia niazonareo lafa nareo nanompo amy pilasy nila mpitory maro?

Jack: Maro biby ty fitahia niazonay lafa nanompo amy fotoa iaby. Nahita soa ty zavaboary marìny anay eny zahay matetiky, ka afaky nahazo tavy ty raha sankarazany namboarini-Jehovah. Ndre eo ty raha sarotsy nandalovanay, le milamin-tsay avao zahay satria hainay hoe manoha anay avao ty vahoaki-Ndranahary ndre aia ndre aia ty misy anay.

Nigadrà ta Guyane atoy aho tamy zaho mbo nimpamaraky, satria tsy naneky hanao maramila. Tsy nieritseritsy mihintsy aho tamy zay hoe mbo ho misionera atoy aho ndraiky andro any, sady ho afaky mitsidiky amy prizon any mba hitory. Tsy matity vatany Jehovah, fa tena mandrotsaky fitahia!

Marie-Line: Ty raha mampanitranitra ahy marè le hoe afaky manome ze ananako ho ahi-ty hafa aho. Soa avao fa manompo ani-Jehovah zahay. Nahavy anay morovaly hifankatea marè raha zay. Misy fotoa manontany ahy Jack laha afaky manasa mpivaly raiky mila fampahereza zahay mba hisakafo an-trano ao. Le hoy ty asako: “Vo nieritseritsy ani-zay mihintsy aho io!” Ho zay avao ty ataonay matetiky.

Jack: Tao vitsivitsy lasa zay ty nahaizanay hoe voani-kanserani-prostaty aho. Tsy niteani-Marie-Line lafa nivola taminy aho ndraiky zay hoe: “Zaho aloha valiko, mbo tsy tena ‘antitsy noho ela niaina’ laha sanatria maty. Fe fa afa-po aho, satria haiko hoe ty vatan-draha marè, zany hoe ty raha ara-panahy ro nameno ty fiainako.”—Gen. 25:8.

Marie-Line: Maro ty fanendrea tsy nampoizinay fe nisokafini-Jehovah ho anay. Nameany fahafaha hanao raha tsy nieritseretinay mihintsy zahay. Maro vatany ty raha soa nihitanay tamy fiainanay. Matoky tanteraky a Ndranahary zahay, ka ndre aia ndre aia ty andefasani-fandaminany anay, le ho any zahay!