Jack na Marie-Line mbabangye mudimo wa nsaa yoso mu kipwa kya 1988. Mbaukiibwe mwanda abaadi abaubiila nshalelo mupya na kukumiina kushintuluka kwa midimo mu Guadeloupe na Guyane Française. Ano ma mbalo e ku bukunkushi bwa filiale a France. Tubandeyi kwipusha Jack na Marie-Line ndambo ya nkonko.

Nkinyi kibaadi kinutakule bwa kubanga mudimo wa nsaa yooso?

Marie-Line: Ne mukudile mu Guadeloupe, nadi nende mu bulungudi misusa yoso na mama, baadi Temwe sha kisumi. Ne mufule bantu, nyi bwakinyi, nk’ami kyapu kalasa mu 1985, nabangile bu mbala-mashinda.

Jack: Pa naadi mukinga, naadi nakamba kwikala na bafubi ba nsaa yoso abaadi bafule mudimo wa bulungudi. Mu mafuku a congé nadi naata mudimo wa bu mbala-mashinda mukwashi. Kunfudiilo kwa mbingo yoso, ami na mama sunga na ungi mulungudi a mu kakongye, tubaadi atwata motoka bwa kwenda mu kukwatshishena ba mbala-mashinda mu ma teritware aabo. Tubaadi atulungula mukandu wibuwa efuku dishima​—kukyolwa tubaadi atwende mu kwasha ku meema. Aa mafuku abaadi buwa ngofu!

Mafuku apeela kunyima kwa’mi kwibakila Marie-Line mu 1988, nakwile’shi: ‘Binobino tatwi na bushito, bwakinyi tatwibalombene kukita bibungi mu mudimo wa bulungudi? Nka bu Marie-Line, na bangile nami namu bu mbala-mashinda. Kunyima kwa kipwa, atwe abatuku mu kalasa ka ba mbala-mashinda, abetutumine bu ba mbala-mashinda ba myeshi yoso. Tubaadi bafube mu ma mbalo ebungi mu Guadeloupe, kumpala kwa’shi betutume mu Guyane Française.

Nwibapete kushintuluka kwibungi munda mwa bipwa mu mudimo wenu. Nkinyi kibaadi kinukwashe bwa kwiubidisheena na nshaleelo mupya?

Marie-Line: Bakwetu balume ba ku betele a Guyane Française abaadi abauku’shi kifundwe kyatudi bafule ngofu nyi Yeeshaya 6:8. Byabya, nsaa ibabaadi abetwitamina ku telefone, abaadi abamba’shi: “Anutentekyesha kifundwe kyenu kyanudi bafule kyakya?” Musango umune tubaadi atutundula’shi abetutumu ingi mbalo,  paapa, tubaadi atwamba’shi “Natwe bano, etutume!”

Tatubaadi atupwandikisha kwakwa kubabetutumu na kwatwikalanga nya, mwanda bino bibaadi bilombene kwitukutshishwa muloo mu yaya mbalo ipya. Tubaadi atukitshi mwetu moso bwa kwiukena na bakwetu bena Kidishitu ba yaya mbalo.

Jack: Bangi bakwetu bena Kidishitu abaadi abakyebe kwitukutshishwa kwenda ingi mbalo, mwanda abaadi abakumiina’shi twikale nka n’abo. Kadi, nsaa ibatudi bakatukye mu Guadeloupe, ungi mukwetu baadi mwitutentekyeshe mayi a Yesu e mu Mateo 13:38 aamba’shi: “Efuba nyi mpano pa nsenga.” Byayba nsaa yabetutumu ingi mbalo, atutentekyesha’shi tukwete kufuba nka mwifuba dimune sunga twekala mbalo kinyi. Byabya, ki na muulo mbantu na teritware!

Nsaa yatufiki mu teritware, atumonaa’shi bantu be mwanka mbemushale na muloo. Atwe namu atwitatshisha bwa kwikala na nshalelo abadi naye. Byakudya mbilombene kwilekena, anka, atudiya byabya byaabadi, na kutoma byabya byabatomo, na kwaata mpàngo ilombene kwitukwasha bwa kwikala na mbidi bukome. Atukitaa mwetu moso bwa kwakula nka bibuwa pabitale mbalo yoso yabetutumu.

Marie-Line: Atulongaa bibungi kwi bakwetu bena Kidishitu ba mu yaya mbalo yatudi. Natentekyesha mwanda ubaadi ukitshikye mafuku apeela n’atwe kufika mu Guyane Française. Mpeshi baadi munokye ngofu, tubaadi atwindila’shi atshibikye bwa’shi twende mu bulungudi. Anka ungi mukwetu mukashi baadi mungipushe’shi: “Twibalombene kwenda?” Ami nkumwaluula’shi: “nauno mpeshi?” Aye nkungaluula’shi: “Ata mufudji oobe, atwende na ma kinga eetu.” Nka paapa, ami nkulonga bya kukwata muufudi na kusunya nkinga musango umune. Ntshinadi nebiuku, ntshinadi mubande kulungula mukandu wibuwa mu mpeshi!

Nwibafilukye misusa 15. Nwi na mayi a kukwasha nao bangi pabitale kufiluka su?

Marie-Line: kufiluka nkulombene kwikala bu lukalakashi. Anka bibuwa kwikala na mbalo ya kwikisha nsaa ywaluka mu bulungudi.

Jack: Misusa yoso pabatudi atufiki mu ingi nshibo, naadi nele ingi mpentshi. Su bakwetu be ku filiale bamona’shi, mu nshibo kampanda mwatukatwele t’atwimushala mafuku ebungi, abaadi abandungula’shi “Jack, tobandanga kwela mpetshi!”

Marie-Line auku kulonga bintu kalolo! Baadi ele kintu kyoso mu ma carton na kufunda’shi  kano ke na bintu bya mu “kyolonyi,” mu “nshibo ya kulala,” sunga mu “kikuku.” Nsaa yatufiki mu nshibo yetu ipya, mbibofule bwatudya kutuula carton koso mu mbalo yako. Afundaa dingi bintu byoso bi mu carton koso kwisaki bwa’shi twikale na mushindo wa kupeta kintu kyatudi nakyo lukalo mususa umune.

Marie-Line: Mwanda twi balongye bya kwikala beluumbule, tubaadi atubanga mudimo wetu wa bulungudi kushi kunyegakana.

Nwi balumbuule nsaa yeenu mushindo kinyi bwa ‘kukumbasha kalolo bufubi bwenu’?​—2 Tim. 4:5.

Marie-Line: Mu dimune moso, atwikishaa na kuluumbula bisangilo. Mu dya kabidi moso, atwendaa mu bulungudi.

Jack: Sunga byekala’shi twi na bungi bwa nsaa abutungu kulombasha, tatwikutuulaa binangu nya. Kulungula mukandu wi buwa nyi kintu kii na muulo mu nshalelo etu. Kubanga nsaa yatukatuka ku nshibo mpa na nsaa yatwaluka, atukitaa mwetu moso bwa kwisamba na bantu boso batufumankana nabo.

Marie-Line: Bu kileshesho, nsaa yatwende ku pique-nique, nendaa na ma trakte. Bangi bantu abaadi abetwitamina bwa kwituteka mikanda, sunga tatwibebalungule’shi twi ba Temwe ba Yehowa. Nyi bwakinyi tubaadi atukitshi mwetu moso bwa kwikala na bikitshino bibuwa na nfwadilo ebuwa. Bantu abalaminaa bino bintu.

Jack: Tubaadi dingi atutusha bukamonyi pakwikala biya na ba nkungishanyi netu. Nadi nasangula masaki abaadi aapono mu nsenga sunga kukatusha butshafu. Ba nkugishanyi netu abaadi abebimono, nyi bwakinyi bangi abaadi abangipusha’shi: “Wekumpa namu Bible?”

Nwi bende mpa na mu ma teritware e kula. Kwi ka mwanda kanutentekyeshaa mu ino ngyendo yoso?

Jack: Mu Guyane, bibaadi bukopo bwa nkafika mu angi ma teritware. Tubaadi atutambuka bilometre 600 mu mashinda ebubi munda mwa lubingo. Tatwakuluba patubayile mu St. Élie mu mutamba wa Amazone. Tubadi batambukye munda mwa nsaa ibungi na motoka na bwato bwi na motere. Bebungi be kwakwa mbantu ababundulaa Òolo. Bwa kulesha lutumbu bwa mikanda yetu, bangi abetupele tu ma Òolo tupeela bu byabuntu! Ku kyolwa, tubaadi bebaleshe umune a ku ma video eetu a ndumbulwilo. Bantu bebungi abafikile mu kubandjila.

Marie-Line: Abaadi balungule Jack bwadya kwenda mu kwela mwisambo wa Kitentekyesho mu Camopi. Bwa kwikufika tubatambukile nsaa inanka mu mwela wa Oyapock na bwato bwi na motere. Ubaadi mwanda wi buwa byabya.

Jack: Mu mbalo ibaadi mema eepi, bibaadi masaku mwanda mema abaadi aakidi lubilo. Kumona abifiki mema lubilo nsaa ayifubwila bwato peepi, akukanyisha byabya. Bibaadi abitungu’shi muntu atambusha bwato aukye kalolo bya kwibutambusha mu aa ma mbalo. Bibaadi mwanda wibuwa byabya. Sunga mbyakubaadi penda ba Temwe 6, bantu bakile pa 50 abatwelele mu Kitentekyesho mpa na bangi ba Amerindiens.

Marie-Line: Ino myanda ibuwa bino ngitengyele ba nsongwa abakumiina kufubila Yehowa. Abitungu kukulupila mwi Yehowa mu ino nshalelo i bino, paapa, lukumiino lobe alunyingi. Twi bamone bibaadi Yehowa mwitukwashe mu mufubo waye.

Nwibalongye ndjimi ibungi. Abikalanga bibofule bwa kwiyilonga?

Jack: Nya. Naadi mulongye ino ndjimi mwanda kubaadi lukalo. Abaadi bantekye bwa kukunkusha kulonga kwa Kitenta kya Mulami mu ludimi lwa Sranantongo * ami shabandile sunga kukita mudimo wa kubadika kwa Bible. Nepwishe ungi mukwetu bwa kuuka su abapushanga byangakulanga. Bandungwile’shi, “ingi nsaa tatupushanga bingi bishima, kadi bikele buwa.” Bana abaadi bankwashe ngofu. Nsaa inadi nakula bibubi, abaadi abandungula, kadi bantu bakulu tababaadi abandungula kintu kya. Nemulongye bibungi kwi bana bakinga.

Marie-Line: Mu teritware umune, naadi nalongo na bantu Bible mu Fwalanse, mu ki portugais na mu Sranantongo. Ungi mukwetu mukashi baadi mumpe binangu bya’shi ne mulombene kubanga na ludimi lwi bukopo bwa kufudiisha na lwalwa lubofule. Nadi mumone’shi byabya binangu bi buwa.

Dingi efuku, nabangile kulonga na muntu mu  ludimi lwa Sranantongo, akupu nalonga na ungi mu ki Portugais. Nsaa inabangile kulonga na muntu a kabidi, mukwetu mukashi anaadi naye bakwile’shi: “Marie-Line, Okwete kwakula lungi ludimi!” natundwile’shi pamutwe pa kwakula ki Portugais na yawa mwana mukashi, ami naadinakula mu kina Sranantongo!

Abekalanga benufule ngofu kwi bakwetu banukwashanga. Mushindo kinyi wanudi bafikye mu kwikala mu bu kuuku n’aabo?

Jack: Nkindji 11:25 amba’shi: “Yawa apânâ bi bungi akatambula namu bi bungi.” T’atwialashenaa bwa kukisha nsaa pamune na bangi kwibakitshina myanda ibuwa nya. Pabitale kulumbuula Nshibo ya Bufumu, bangi bakwetu balume abaadi abandungula’shi: “Leka balungudi bakite wawa mudimo.” Kadi nadi ne baluula’shi: “Ami namu ne mulungudi. Su kwi mudimo autungu kukita, abitungu nami namu neukite.” Sunga byatudi na lukalo lwa nsaa, atutentekyeshaa’shi tabitungu bino bitukutshishwe kukitshina bangi bibuwa.

Marie-Line: Tubaadi atwikitshisha bwa kupasukila bakwetu bena Kidishitu muntu pa bupenka. Bino mbitukwashe bwa kwiuka nsaa yabaadi na lukalo lwa muntu a kwibatadila bana sunga kukebaata ku kalasa. Tubaadi balombene kukituula programe etu bwa kupeta nsaa ya kwibakwasha. Kukita bino nkwitukwashe bwa kunyingisha bu kuuku bwetu na bangi.

Myabi kinyi yanudi bapete pa kufuba mbalo i lukalo lwa balungudi?

Jack: Twibapete myabi ibungi mu mudimo wa nsaa yoso. Twibapete mpa na mwabi wa kubandjila bipangwa bya Yehowa. Sunga kwekala nkalakashi ibungi, twi na butaale, mwanda atuuku’shi atupete bukwashi bwa mwilo w’Efile mbalo yoso yatudi.

Pa nadi nsongwa, abaadi bankwate mu lukano mu Guyane Française mwanda wa kupela kutwelakana mu myanda ya politike. Su ta mudimo wa bu misionere, ntshinadi napwandikisha’shi dingi efuku ne kwimwalukiila, na kupeta matalwa a kwenda mu kulambukisha mu nkano. Eyendo, Yehowa e na kalolo mwanda kwete kwelela bantu boso myabi!

Marie-Line: Muloo ukata wandi nao ngwa kukwasha bangi. Twi na muloo wa kufubila Yehowa. Na dingi bino abinyingisha dibaka dyetu. Ingi nsaa, Jack baadi angipusha su twi balombene kwitamina bena dibaka be na lukalo lwa kunyingishibwa bwa kudya nabo. Nadi nalulaa’shi: “Nanangushenanga nami namu nka byabya!” Kebungi tubaadi na binangu bi mumune.

Jack: Mu mafuku ashale’mu, bekele bakwate mukumbo wa cancer ka prostate. Sunga’shi Marie-Line takumiinaa kwibipusha, namulungwile’shi: “Sunga nafwa maloba ‘tambununu nka bubakidi nya.’ Anka nafu na muloo, mwanda nauku’shi nemuushe muwa wande na myanda ya mukikudi, myanda i na muulo.”​—Kib. 25:8.

Marie-Line: Yehowa mmwitufungwile biibi na kwitupa mushindo wa kukita myanda yatushatupwandikishanga. Twi baushe muwa wetu na myanda ibuwa. Na lukulupilo loso mwi Efile Mukulu, koso akwitutumu ndubulwilo aye bwa kwenda, atwende!