Jack nanga Marie-Line e du a furuten diniwroko sensi 1988. Fu di den man fiti densrefi na ala sortu situwâsi, meki den ben kisi furu toewijzing na ini Gwadelup nanga Fransi Gayana. Now a bijkantoro fu Fransikondre e luku a wroko fu den tu kondre dati. Meki wi poti wan tu aksi gi Jack nanga Marie-Line.

Fu san ede unu bigin pionier?

Marie-Line: Mi kweki na ini Gwadelup. Di mi ben pikin mi ben go na ini a preikiwroko heri dei nanga mi mama, di ben de wan fayafaya Kotoigi. Mi lobi sma. Dati meki di mi kaba nanga skoro na ini 1985, mi bigin pionier wantewante.

Jack: Di mi ben yongu mi ben de furu nanga brada nanga sisa di ben e du a furuten diniwroko. Mi ben lobi du a yepipionier-wroko te mi ben abi fakansi. Son satra nanga sonde wi ben teki bus fu go preiki makandra nanga den pionier. Wi ben e preiki heri dei, dan baka dati wi ben go swen na ini a se. A ten dati ben de wan switi ten!

Syatu baka di mi nanga Marie-Line trow na ini 1988, mi ben prakseri: ’Noti no e tapu wi fu du moro gi Yehovah. Fu san ede mi no e pionier?’ Dati meki mi bigin pionier makandra nanga Marie-Line. Wán yari baka dati, baka di wi go na a Pionierskoro, wi tron spesrutu pionier. Wi kisi furu moi toewijzing na ini Gwadelup. Baka dati, den aksi wi fu go dini na Fransi Gayana.

Unu kisi furu difrenti toewijzing na ini den yari di pasa. San yepi unu fu fiti unsrefi na den nyun situwâsi dati?

Marie-Line: Den brada na a Betel fu Fransi Gayana ben sabi taki wi ben lobi a tekst fu Yesaya 6:8. Son leisi den ben e bel wi, dan den ben aksi wi: „Unu sabi a tekst di unu lobi?” Te den ben taki disi, dan wi ben sabi taki wi ben o kisi wan nyun toewijzing. Wi ben piki den: „Dya wi de! Seni wi!”

Te wi ben musu go dini na wan tra presi, dan wi no ben e sidon prakseri fa a ben de na ini na owru toewijzing fu wi. Efu wi ben o  du dati, dan wi no ben o prisiri nanga a nyun toewijzing. Wi ben e du muiti tu fu kon sabi den brada nanga sisa fu wi na a nyun presi pe wi ben go.

Jack: Na ini a ten di pasa, son mati no ben wani taki wi froisi gowe, fu di den ben wani taki wi tan nanga den. Ma di wi gowe libi Gwadelup, wan brada memre wi san Yesus taki na Mateyus 13:38: „A gron na grontapu.” Sobun, te wi ben kisi wan nyun toewijzing, wi ben memre wisrefi taki awinsi pe wi e go, wi e wroko a srefi gron. San moro prenspari, na taki wi ben de na wan presi pe wi kan preiki gi sma!

Te wi froisi go na wan nyun kontren, dan wi e si taki den sma di e libi drape de koloku. Dati meki wi e pruberi fu libi leki den sma na ini a kontren. Kande den e nyan sani di wi no gwenti nyan, ma toku wi e nyan san den e nyan, èn wi e dringi san den e dringi. Ma wi e luku bun tu nanga wi gosontu. Wi e pruberi fu taki soso fu den bun sani di wi ondrofeni na ini ala den toewijzing di wi kisi.

Marie-Line: Wi e leri furu tu fu den brada nanga sisa fu a presi pe wi e dini. Mi sabi ete san ben miti mi syatu baka di wi doro na ini Fransi Gayana. Fu di alen ben kon tranga, meki wi ben denki taki wi ben o abi fu wakti teleki alen stop, fosi wi ben o man go preiki. Ma dan a sisa aksi mi: „Wi o gowe now?” Mi aksi en: „Fa wi o gowe?” A sisa taigi mi: „Teki yu prasoro, dan wi o gowe tapu wi baisigri.” Na so mi leri fu hori wan prasoro na ini mi anu èn fu rèi mi baisigri na a srefi ten. Efu mi no ben leri fu du dati, noiti mi ben o preiki te alen ben fadon.

Unu froisi sowan 15 leisi. Sortu rai unu abi gi tra sma di musu froisi?

Marie-Line: A no makelek fu froisi. Ma toku a prenspari taki yu abi wan presi pe yu e firi switi te yu komoto fu a preikiwroko.

Jack: Nofo tron mi e ferfi inisei fu a nyun oso fu wi. Efu den brada fu a bijkantoro ben sabi taki wi no ben o tan langa na wan presi, dan den ben taigi mi: „Jack, no lasi yu ten fu ferfi na oso a leisi disi!”

Marie-Line sabi orga den sani fu wi bun te wi e froisi. A e poti ala sani na ini dosu, dan a e skrifi tapu den dosu na ini sortu kamra den musu go. Disi e meki en moro makelek fu poti den dosu na den presi te wi  doro na wi nyun oso. A e skrifi tapu wan lijst tu san de na ini ala den dosu, so taki a makelek fu feni san wi abi fanowdu.

Marie-Line: Fu di wi leri fu orga sani bun, meki wi kan bigin wantewante nanga wi wroko te wi kisi wan nyun toewijzing.

Fa unu e seti unu schema so taki unu kan ’du unu wroko finifini’?​—2 Tim. 4:5.

Marie-Line: Tapu munde wi e rostu èn wi e sreka gi den konmakandra. Den tra dei fu a wiki wi e go na ini a preikiwroko.

Jack: Aladi wi musu doro den yuru fu wi ala mun, toku wi no e prakseri soso den yuru di wi musu doro. A preikiwroko na a moro prenspari sani na ini wi libi. Dati meki te wi komoto oso wi e pruberi fu taki nanga ala sma di wi e miti. Wi e du disi teleki wi drai go baka na oso.

Marie-Line: Fu eksempre, ala ten te wi e go koiri, mi e tyari traktaat. Son sma e kon aksi wi efu wi abi buku gi den, aladi wi no taigi den taki wi na Yehovah Kotoigi. Dati meki wi e luku bun sortu krosi wi e weri èn fa wi e tyari wisrefi. Sma e luku den sani disi.

Jack: Wi e pruberi fu du bun sani tu gi den birtisma fu wi. Te wi si doti tapu strati, dan wi e krin en, so taki a birti tan krin. Wi e hark wi dyari èn dorosei fu wi dyari. Den birtisma e si san wi e du èn son leisi den aksi wi: „Unu abi wan Bijbel gi mi?”

Un preiki furu na fara presi. Unu kan fruteri wan moi sani di unu ondrofeni di un ben go preiki na wan fu den presi dati?

Jack: A muilek fu doro son kontren na ini Fransi Gayana. Furu tron wi ben abi fu rèi sowan 600 kilometer tapu broko pasi èn a ben teki wán wiki langa. Noiti mi o frigiti a leisi di wi ben go na a dorpu St. Élie na ini na Amasone-busi. A teki wan tu yuru fu doro drape èn wi ben go nanga wan hei wagi èn nanga wan pikin boto di ben abi wan masyin. Furu sma di ben e tan drape ben e wroko gowtu. Fu di son sma ben breiti nanga den buku di wi gi den, meki den ben e gi wi pikin pisi gowtu leki bijdrage! Te neti wi ben sori den wan fu den felem fu na organisâsi fu wi. Furu sma ben kon luku a felem.

Marie-Line: Wan tu yari pasa Jack ben musu hori wan lezing na a Memrefesa na ini a dorpu Camopi. Wi ben musu teki wan boto fu go drape. Fo yuru langa wi ben de tapu na Oyapock-liba. A ben de wan span sani.

Jack: Te a watra fu a liba ben lagi, den sula ben moro krasi. Te a boto e doro den sula, ala yu ati e bigin naki. A botoman musu sabi bun san a e du. Ma a ben de wan moi ondrofeni. Aladi wi ben de nanga 6 Kotoigi nomo, toku sowan 50 sma kon na a Memrefesa. Wan tu Ingi ben de na ini a grupu disi tu.

Marie-Line: Yonguwan di wani du moro gi Yehovah kan ondrofeni den srefi moi sani disi. Na ini den sortu situwâsi disi, yu musu frutrow tapu Yehovah. Ma yu bribi e kon moro tranga tu. Furu leisi wi si fa Yehovah yepi wi.

Un leri fu taki difrenti tongo. A makelek gi unu fu leri wan tra tongo?

Jack: Nôno. Mi leri taki den tongo disi fu di a ben de fanowdu. Mi ben musu hori a Waktitoren-studie na ini Sranantongo, * aladi mi no ben hori wan prati ete na den konmakandra! Mi aksi wan brada fa a ben go. A piki mi: „Son leisi wi no ben e frustan san yu e taki, ma a go heri bun.” Den pikin-nengre yepi wi furu. Te mi ben meki wan fowtu, dan a no den bigisma ben taigi mi, ma na den pikin-nengre. Mi leri furu fu den pikin.

Marie-Line: Na wan fu den presi pe wi ben dini, mi ben hori Bijbelstudie na ini Fransitongo, Potogisitongo nanga Sranantongo. Wan sisa ben gi mi a rai fu studeri fosi nanga den sma di ben e taki a tongo di muilek gi mi, èn baka dati mi ben musu studeri nanga sma di e taki a tongo di mi ben sabi taki bun kaba. Na ini a bigin, mi no ben frustan fu san ede a ben gi mi a rai disi.

 Ma wan dei mi studeri fosi nanga wan sma di e taki Sranantongo èn baka dati mi studeri nanga wan sma di e taki Potogisitongo. Di mi ben studeri nanga a di fu tu Bijbelstudie, a sisa di ben de nanga mi taki: „Marie-Line, a frow no e frustan san yu e taki!” Mi ben e taki Sranantongo nanga wan Brasyon frow, na presi fu taki Potogisitongo nanga en. Dan fosi mi frustan fu san ede a sisa ben gi mi a rai.

Na ala sei pe unu dini, sma ben lobi unu. Fa a du kon taki un tron bun mati fu den brada nanga sisa?

Jack: Odo 11:25 e taki: „Sani o waka bun gi wan sma di lobi fu gi trawan sani.” Wi lobi meki ten gi trawan èn wi lobi du sani gi den. Te wi ben e krin a Kownukondre zaal, dan son brada ben taigi mi: „Meki den preikiman du a wroko.” Ma mi ben piki den: „We, mi na wan preikiman tu. Sobun, efu wroko de fu du, dan mi wani du en tu.” Wi alamala abi ten gi wisrefi fanowdu son leisi. Ma wi no e meki dati tapu wi fu du bun gi trawan.

Marie-Line: Wi e du muiti fu kon sabi wi brada nanga sisa moro bun. Na so fasi wi ben kon sabi efu den ben abi wan sma fanowdu fu luku den pikin fu den noso fu go teki den na skoro. Wi ben kenki wi schema fu man yepi den. Fu di wi ben de klariklari fu yepi trawan, meki wi tron bun mati fu den.

Sortu blesi unu kisi fu di unu ben go dini pe moro yepi de fanowdu?

Jack: A furuten diniwroko meki wi kisi furu blesi. Fu di wi ben e wroko furu na ini busi, meki wi ben prisiri nanga den sani di Yehovah meki. Aladi a ben muilek son leisi, toku wi no ben bruya fu di wi ben sabi taki awinsi pe wi de, a pipel fu Gado ben o yepi wi.

Di mi ben moro yongu, den ben poti mi na strafu-oso na ini Fransi Gayana fu di mi no ben wani go na ini a legre. Noiti mi ben denki taki wan dei mi ben o drai go baka drape fu preiki na den strafu-oso. Yehovah blesi mi trutru!

Marie-Line: Wan sani di e gi mi furu prisiri, na fu yepi trawan. Wi de koloku fu di wi e wroko gi Yehovah. A yepi wi tu fu kon abi wan moro bun trowlibi. Son leisi te Jack si taki wan trowpaar lasi-ati, dan a e aksi mi efu wi kan kari den kon na wi oso fu nyan nanga wi. Furu tron mi e piki en: „Na dati mi ben prakseri tu!” A pasa furu taki wi e prakseri a srefi sani.

Jack: Wan tu yari pasa datra taigi mi taki mi abi prostaat kanker. Aladi Marie-Line no lobi te mi e taki so, toku mi e taigi en: „Gudu, mi no owru ete, ma efu mi dede tamara, dan mi sabi taki mi gebroiki mi libi fu du a moro bun sani. Dati na fu dini Yehovah èn dati meki mi de koloku.”​—Gen. 25:8.

Marie-Line: Yehovah meki wi du furu sani di wi no ben fruwakti. Wi kisi furu moi blesi. Fu di wi e frutrow tapu Yehovah, meki wi sa go awinsi pe na organisâsi fu en e seni wi go!