Jack naMarie-Line bebasolo basemsebentini wasikhatsi sonkhe kusukela nga-1988. Bakhonile kuvumelana netimo futsi bafeze tabelo letinyenti eGuadeloupe naseFrench Guiana. Totimbili letindzawo nyalo tinakekelwa ligatja laseFrance. Asesibute Jack naMarie-Line imibuto lembalwa.

Yini leyanikhutsata kutsi ningenele umsebenti wasikhatsi sonkhe?

Marie-Line: Ngakhulela eGuadeloupe futsi bengivame kuya emsebentini wekushumayela onkhe malanga namake lobekanguFakazi lokhutsele. Ngiyabatsandza bantfu, ngako ngacala kuba lihlahlandlela ngekushesha nje nangicedza sikolwa nga-1985.

Jack: Nangisakhula, bengicitsa sikhatsi lesinyenti netisebenti tasikhatsi sonkhe lebetiwutsandza umsebenti wekushumayela. Bengivame kuba lihlahlandlela lelisitako nakuvalwe tikolwa. Ngetimphelasontfo, besivame kugibela ibhasi siyoshumayela nalamanye emahlahlandlela ensimini yawo. Besishumayela lilanga lonkhe bese siyobhukusha. Bekumnandzi kakhulu!

Nga-1988 nangisandza kushada naMarie-Line ngatsi: ‘Kute lokungasivimba, kungani singenti lokwengetiwe emsebentini wekushumayela?’ Ngase ngicala kuba lihlahlandlela naMarie-Line. Ngemuva kwemnyaka sibuye esikolweni semahlahlandlela, sabekwa kutsi sibe ngemahlahlandlela lakhetsekile. Tinyenti tabelo lesatijabulela eGuadeloupe ngaphambi kwekutsi sicelwe kutsi siye eFrench Guiana.

Kuleminyaka leminyenti leyendlulile, nishintje tabelo tkhatsi letinyenti. Yini lenisitile nakhona kuvumelana netimo letinsha? 

Marie-Line: Bazalwane labasegatjeni laseFrench Guiana bebawati umBhalo lesiwutsandzako wa-Isaya 6:8. Ngako nabasishayela lucingo bebavame kusibuta, batsi: “Niyawukhumbula yini umBhalo leniwutsandzako?” Besivele sibone kutsi sesitawutfola sabelo lesisha ngako besivele sitsi: “Sikhona tsine! Tfuma tsine!”

Asifuni kucatsanisa tabelo tetfu tasesikhatsini lesendlulile ngobe kwenta njalo kungasenta singasasijabuleli  sabelo lesisha. Setama kwakha bungani nebazalwane nabodzadze lesibatfola esabelweni lesisha.

Jack: Esikhatsini lesendlulile, labanye bazalwane nabodzadze bebangafuni sihambe ngobe bebafuna sichubeke sihlala nabo. Kodvwa nasisuka eGuadeloupe lomunye umzalwane wasikhumbuta emavi aJesu laku-Matewu 13:38 latsi: “Insimu, ngulomhlaba.” Ngako nasishintja tabelo, sihlale sitikhumbuta kutsi solo senta umsebenti lofanako nobe ngabe sikuphi. Ngetulu kwako konkhe, lokubaluleke kakhulu bantfu lesibashumayelako!

Nasifika esabelweni lesisha, siyabona kutsi labanye bayakujabulela kuhlala kuleyo ndzawo. Ngako setama kuphila ngendlela bantfu bendzawo labaphila ngayo. Kungenteka kudliwa kudla lesingakwati, kodvwa sidla loko labakudlako, sinatse labakunatsako, kodvwa siyaciniseka kutsi kusuke kunemphilo. Setama kukhuluma kahle ngato tonkhe tabelo.

Marie-Line: Sifundza lokunyenti kubazalwane bakuleyo ndzawo. Ngikhumbula lokwenteka nasifika eFrench Guiana. Belina kakhulu, ngako besicabanga kutsi sitawuya emsebentini wekushumayela naselibalele. Kodvwa lomunye dzadze wangibuta, watsi: “Ngikulungele yini kuyoshumayela?” Ngamangala futsi ngambuta, ngatsi: “Sitawuhamba njani ngobe liyana?” Wangiphendvula watsi: “Tsatsa sambulelo sakho, sitawuhamba ngemabhayisikili.” Ngafundza kushova libhayisikili ngiphetse sambulelo. Kube angifundzanga lapho, ngabe angizange ngishumayele ngesikhatsi setimvula!

Nishintje indzawo yekuhlala tikhatsi letingaba ngu-15. Kukhona yini leningasita ngako labanye nakutiwa endzabeni yekushintja indzawo?

Marie-Line: Kungahle kube matima kushintja indzawo yekuhlala. Nobe kunjalo, kubalulekile kutfola indzawo lekahle yekuphumula nawubuya emsebentini wekushumayela.

Jack: Nasifika esabelweni lesisha, ngivame kuyipenda ngekhatsi indlu lesitohlala kuyo. Nangabe bazalwane basegatjeni bati kutsi kungenteka singahlali sikhatsi lesidze esabelweni setfu, bavame kutsi, “Jack, ungatihluphi ngekupenda!”

Marie-Line sewunelikhono lekupakisha! Ufaka tonkhe tintfo emabhokisini bese uyawabhala kutsi “kwase-bathroom,” “kwasekamelweni,” nobe “kwasekhishini.” Nasifika endlini lesiyohlala kuyo, kuba melula kubeka emabhokisi  endzaweni lefanele. Ubhala phansi tonkhe tintfo letisebhokisini ngalinye kuze sitosheshe sikutfole lesikufunako.

Marie-Line: Ngenca yekutsi sesifundze kuhleleka, siyakhona kuvele sicalise umsebenti wekushumayela ngekushesha nje nasifika.

Nisihlela njani sikhatsi senu kuze ‘niwente kahle umsebenti wenu’?—2 Thim. 4:5.

Marie-Line: NgeMsombuluko siyaphumula futsi silungiselele imihlangano. Kusukela ngaLesibili siya emsebenti wekushumayela.

Jack: Ngisho nobe kufanele sisebente ema-awa latsite emsebentini wekushumayela inyanga ngayinye, kodvwa loko akubi yintfo lesiyinaka kakhulu. Lokubaluleke kakhulu kitsi, kushumayela. Nasiphuma ekhaya, setama kucoca nabo bonkhe bantfu lesihlangana nabo size siyobuya.

Marie-Line: Nasiyotijabulisa, ngihlale ngiphetse emapheshana. Labanye beta kitsi bacele tincwadzi ngisho nobe singakabatjeli kutsi siBoFakazi BaJehova. Ngenca yaloko, sihlale sigcoke kahle futsi sitiphatsa kahle. Bantfu bayakunaka loko.

Jack: Siphindze sifakaze ngekutsi sibaphatse ngemusa bomakhelwane betfu. Ngibutsa emaphepha, ngicitse tibi futsi ngisuse nemacembe ngaphandle. Bomakhelwane betfu bayakunaka loko futsi ngalesinye sikhatsi babuta batsi, “Ungangipha yini liBhayibheli?”

Esikhatsini lesinyenti, benishumayela etindzaweni letikhashane kakhulu. Kukhona yini lenikukhumbulako lenikujabulele kuletindzawo?

Jack: EGuiana kumatima kufika kuletinye tindzawo. Ngeliviki, sivame kuhamba emakhilomitha langu-600 emigwacweni lemibi kakhulu. Ngikhumbula nasivakashele eSt. Élie lesekhatsi emahlatsini ase-Amazon. Sahamba ema-awa lamanyenti ngemoto lephakeme, saphindze sahamba ngesikebhe. Bantfu labanyenti labahlala eSt. Élie bagubha ligolide. Ngenca yekutsi bebatijabulela tincwadzi lebesibanika tona, labanye bebanikela ngetincetu teligolide! Naselishonile, sababukelisa lenye yema-video enhlangano futsi banyenti bantfu bendzawo lababa khona.

Marie-Line: Jack uke wacelwa kutsi ayobeka inkhulumo yeSikhumbuto eCamopi. Sahamba ema-awa lamane ngesikebhe emfuleni i-Oyapock saze sayofika. Salijabulela kakhulu loluhambo.

Jack: Bekuyingoti kuhamba endzaweni leshona kakhulu, ikakhulukati lapho emanti bekaba mancane khona. Kujabulisa kakhulu kubona lamanti lamanyenti nawuhamba ngesikebhe. Umuntfu loshayela sikebhe kufanele awati kahle umsebenti wakhe. Lesi kwaba sikhatsi lesimnandzi. Ngisho nobe bebasitfupha boFakazi lebeba khona, kodvwa baba ngu-50 lababa khona eSikhumbutweni, bebafaka ekhatsi ema-Amerindians!

Marie-Line: Nebantfu labasebasha bangatijabulela tibusiso letifana naleti nangabe bentela Jehova lokunyenti. Kufanele wetsembele kuJehova nangabe ubhekene netimo letifana naleti, futsi kukholwa kwakho kutawucina. Siyayibona indlela Jehova lasisita ngayo.

Tinyenti tilwimi lenitifundzile. Nikutfole kumelula yini kutifundza?

Jack: Akusimelula. Ngatifundza ngobe bengifuna kushumayela futsi ngisite nasebandleni. Kwadzingeka ngichube sifundvo se-Sicongosekulindza ngelulwimi lwesi-Sranantongo *, ngisho nobe bengingakaze ngabeka inkhulumo yekufundvwa kweliBhayibheli! Ngabuta lomunye umzalwane kutsi bengisichube njani le-Sicongosekulindza. Watsi, “Nanobe besingawacondzi lamanye emagama kodvwa usichube kahle.” Bantfwana bangisita kakhulu. Bebangitjela nangenta liphutsa, kodvwa bantfu labadzala bebangangitjeli. Kunyenti lengakufundza kulabantfwana.

Marie-Line: Kulenye indzawo bengichuba tifundvo teliBhayibheli ngelulwimi lwesi-French, siPutukezi nesi-Sranantongo. Lomunye dzadze waveta umbono wekutsi ngicale ngelulwimi lolulukhuni futsi ngigcine ngelulwimi lengilwetayele. Ngekushesha ngabona kutsi bekukuhlakanipha kwenta loko lakusho.

Ngalelinye lilanga, bengichuba sifundvo seliBhayibheli  ngelulwimi lwesi-Sranantongo nangesiPutukezi. Ngatsi nangicala kuchuba lesesibili sifundvo, lodzadze watsi, “Marie-Line, ngicabanga kutsi kungenteka kube nenkinga!” Ngase ngiyabona kutsi besengikhuluma si-Sranantongo nalona lebengifundza naye waseBrazil kunekutsi ngikhulume siPutukezi!

Banitsandza kakhulu bantfu lenike naba nabo. Nikhone njani kusondzelana nalabazalwane?

Jack: UmBhalo weTaga 11:25 utsi: “Umuntfu lowephanako, lanako kuyandza.” Siyatimisela kusita labanye futsi sicitse sikhatsi nabo. Mayelana nekunakekela liHholwa leMbuso, labanye bazalwane batsi kimi: “Kuyekele loko kwentiwe bamemeteli.” Kodvwa ngatsi: “Nami ngingummemeteli. Ngako nangabe kunemsebenti lokufanele wentiwe eHholweni, ngifuna kuba khona.” Nanobe wonkhe umuntfu asidzinga sikhatsi sekuba yedvwa, sihlale sitikhumbuta kutsi asifuni leso sikhatsi sisente singasabenteli lokuhle labanye.

Marie-Line: Senta tintfo letitsite kuze sikhombise kutsi siyabanaka bazalwane nabodzadzewetfu. Loko kusenta sati nangabe batawudzinga umuntfu lotawubagadzela bantfwana nobe lotawubalandzela bantfwana esikolweni. Sibese sihlela timo tetfu kuze sikhone kubasita. Loku kusenta sisondzelane kakhulu nabo futsi sihlale sikulungele kubasita nangabe badzinga lusito.

Ngutiphi tibusiso lenititfolile ngekukhonta lapho kunesidzingo lesikhulu khona?

Jack: Umsebenti wasikhatsi sonkhe usente sajabula kakhulu ekuphileni. Esikhatsini lesinyenti besivame kuba setindzaweni lapho besijabulela khona kubuka indalo yaJehova. Ngisho nobe betiba khona tinkinga, kodvwa siyajabula ngobe siyati kutsi Nkulunkulu uyabasekela bantfu bakhe ngisho nobe bakuphi.

Ngiseselijaha, ngaboshwa eFrench Guiana ngenca yekungatingeneli tepolitiki. Bengingacabangi kutsi ngitawuke ngibuyele kulelive sengisitfunywa selivangeli futsi ngivunyelwe kutsi ngishumayele emajele. Konkhe loku kukhombisa kutsi Jehova uyasibusisa futsi unemusa!

Marie-Line: Ngijabula kakhulu nangisita labanye. Sijabula kakhulu emsebentini waJehova, futsi loku kwente nemshado wetfu wacina. Ngaletinye tikhatsi, Jack uvame kungibuta kutsi singabamema yini labashadene labadzinga sikhutsato kutsi bete batowudla natsi. Ngivame kuphendvula ngitsi, “Nami bengicabanga loko!” Kuvamile kutsi sicabange tintfo letifanako.

Jack: Ngisandza kutfola kutsi ngine-prostate cancer. Ngisho nobe Marie-Line angayitsandzi lendzaba, ngihlale ngitsi kuye: “Sthandwa, kube bekutsiwa ngitakufa kusasa, bengingeke ngife ‘sengikhule kakhulu.’ Ngingafa ngenetisekile, ngati kutsi ngikhonte Nkulunkulu kuphila kwami konkhe futsi loko kungijabulisa kakhulu.”—Gen. 25:8.

Marie-Line: Jehova usinike tabelo lebesingakatilindzeli futsi usinike nelitfuba lekwenta tintfo lebesingakaze siticabange. Tinyenti tintfo letinhle lesitijabulele ekuphileni kwetfu. Ngenca yekutsi siyametsemba Nkulunkulu, sitakuya nobe ngukuphi lapho inhlangano yakhe isitfuma khona!