Fa nanomboke tamy 1988 ty Jack naho i Marie-Line vali’e ro niarake nanompo marain-tsy hariva. Maro ty toeragne fa nanendreagne iareo ta Goadelopy naho ta Guyane agne. Ty sampa i Frantsa ty miandraikitse o tane rehoe amy izao. Agnisa ty ahafantaragne i Jack mirovaly zao tihoe tsiela tamàgne amy ty toeragne anendreagne iareo sady tsy mba nandietse zao naho fa nahazo fanendreagne vaovao. Andao hagnonteneantikagne iareo.

Inogne ty nandrisike anareo mirovaly hanompo marain-tsy hariva?

Marie-Line: Nibey ta Goadelopy agne raho. Vavolombelo i Jehovah ty reneko sady nafana fo tamy ty fanompoagne. Mateteke zahay ro niarake nitory nanomboke maraindray hatra hariva tamy iraho mbe nikede. Tea ndaty raho, le nanao mpisava lalagne naho vaho niafake baka tamy 1985.

Jack: Mbe nikede raho le fa niteàko ty nifagnosehose tamo o mpanompo marain-tsy harivao. Lava nanao mpisava lalagne mpagnampe avao raho isake tie vakansy. Nisy fotoagne zahay naho fa sabotsy lahady, nanompo miarake amo o mpisava lalagneo amy ty faritane iareo agne. Nandeha bisy zahay naho fa nimbeo. Nitory maraindray hatra hariva zahay, le nitsangatsangagne tamoron-driakey naho fa boake nanompo. Tena nitea’ay i fotoagne rey!

Nanambaly i Marie-Line raho tamy 1988. Nieretseretse raho tafara kede izay tie: ‘Ino koahe ty mikalagne anay tsy hampitombo ty fanompoa’ay?’ Nanao mpisava lalagne niarake tamy i Marie-Line areke raho. Tao’e raike tafara ty nanoa’ay sekoly ty mpisava lalagne, le tinendre ho mpisava lalagne manokagne zahay. Nanompo tamy ty toeragne maro ta Goadelopy agne zahay. Tena nahafinaritse tamy izay. Nafindra ta Guyane tetoa zahay tafara izay.

Niovaova avao ty fanendreagne anareo. Ino ty nagnampe anareo hiatreke i fiovagne rey?

Marie-Line: Nihay i rahalahy tamy i Betela i Guyane tao rey tie Isaia 6:8 ty andinin-teny tena tea’ay. Naho fa niantso anay areke iareo, le mateteke ro misolesole anay hoe izao: “Ino moa ignỳ i andinin-teny tena tea’areoy?” Le avy le hai’ay tie fa hafindra ka zay zahay. Mateteke zahay ro nirehake hoe izao: ‘Intoagne Aba zahay hirahe’o!’

 Tsy mba mirehake zao zahay tie, ‘I fanendreagne anay talohay avao ty tena tea’ay.’ Ty anto’e, va’e hahavy anay tsy ho tea i fanendreagne vaovao niazo’aỳ zay. Mikezake ka zahay mba hiragnetse amy ty mpiara-manompo amy i toeragne anendreagne anaỳ.

Jack: Naìna ty mpiara-manompo ila’e tsy hifindra zahay fa hijanogne amy iareo eo avao. Nandrese lahatse anay aza iareo mba tsy handeha. Faie naho fa niala boake ta Goadelopy agne zahay, le nisy rahalahy raike zay naniahy anay i reha i Jesosy amy Matio 13:38 ao manao tihoey tie: ‘I tanembarey, le ty tane toy iaby.’ Naho fa miova areke ty fanendreagne anay, le tadidie’ay avao fa mbe manompo amy i tanembarey avao zahay ndra aia ndra aia. Sady o ndatio naho ty faritane hiasagne ro tena lahibey fa tsy ty toeragne anendreagne.

Naho fa niavy amy i faritane’ay vaovaoy agne zahay, le trea’ay fa tsy le tena mijale mafe ty ndaty agne sady falefale avao ka. Maregne fa tsy zatse anay ty hanegne agne faie ze hane iareo, le hane’ay ka. Ze raha inome iareo, le inome’ay ka. Faie mitao avao zahay mba tsy harare. Mikezake ka zahay mba hirehake raha soa avao miomba ty fanendreagne anay.

Marie-Line: Maro ty raha nianara’ay tamo o mpiara-manompò. Tadidiko soa ohatse fa tamy zahay vaho niavy ta Guyane tetoa, le nandeha nitory avao ndra tie niavy bey i oragney. Hoe zahay tamy izay: ‘Aleo tika mandigne ty hijanogna i oragney hey vaho izay mandeha.’ Faie nisy rahavave raike zay nagnontane ahy tie: “Tsy handeha vao itikao?” Nilatsa raho, le nirehake tie: “Hisoroke i oragney avao vao tika?” Le hoe reke: “Andeso i elo’oy, le andao hitingitse bisikileta.” Tamy izay raho vaho nianatse ze o mitingitse bisikileta ro sady mbe mitagne elo zao. Naho tsy nianatse izay raho, le tsy ho nivitako ty nandeha nitory isake tie niavy bey i oragney.

Fa nifindra in-15 teo ho eo nareo. Ino ty soso-kevetse mba tea’areo hambara ama’ay miomba izay?

Marie-Line: Misy raha sarotse atrehegne avao rehe naho fa mifindra. Soa areke ty mipay tragno soasoa, mba mahatamàgne azo sady ahafaha’o mitofa naho fa boake manompo.

Jack: Teako ty mandoko ty agnate i tragno’ay vaovaoy ao. Faie naho ohatse hay i rahalahy amy sampagne agne rey tie va’e tsy hitoboke ao maharetse zahay, le misy fotoagne iareo mirehake tie, “O Jack, ao rehe tsy handany lera handoko i tragno’areoy e!”

Nanjare tena nahay nagnambin’entagne areke ty Marie-Line! Isia’e soratse hoe izao ohatse i boritse misy i enta’ay rey: “ladosy”, “efetse firoroagne”, “lakozigne”, naho ty maro hafa. Tsy sahiragne sasa areke zahay naho fa avy amy i tragno’ay vaovaoy agne.  Atao’e lisitse ka ze entagne agnate ty boritse tsikiraidraike, amy izay tsy sarotse paliagne.

Marie-Line: Le avy le afake manompo areke zahay fa tsy lany fotoagne mikodebe ze raha palia’ay satria fa nalami’ay mialoha i enta’ay rey.

Akore ty nandamina’areo ty fotoa’areo mba hahafaha’areo ‘hamita soa ty fanompoa’areo’?—2 Tim. 4:5.

Marie-Line: Mitofatofa naho magnomagne fivoriagne zahay isake Tinainy. Le manompo avao zahay manomboke Talata hatrake Lahady.

Jack: Maregne fa misy lera tsy maintsy tratsere’ay faie tsy izay loatse ty tena ifantoha’ay. Tena raha lahibey ama’ay ty fanompoagne. Le avy le mitory amy ze ndaty trea’ay zahay naho vaho miakatse i tragno’aỳ sady tsy mijanogne naho tsy avy ao.

Marie-Line: Lava minday taratasy milimpy avao ohatse raho, naho fa izahay mitsangatsangagne. Avy ama’ay eo ty ndaty ila’e, le mangatake boke ama’ay, ie amy izao mbe tsy nirehafe’ay tie Vavolombelo i Jehovah zahay. Mikezake areke zahay mba ho soa findesan-tegna avao naho hanao akanjo milamigne soa satria dinehe o ndatio o raha rehoe.

Jack: Mikezake ho soa fagnahy amy ty mpiara-monegne ama’ay ka zahay. Timponeko naho raofeko ohatse ze taratasy naho raven-katae mipopoke an-kiririsa eo, le ariako ka ty fako iareo. Manjare liagne amy Baiboly iareo naho fa nahatrea ahy nanao izay, le misy fotoagne iareo mirehake tie, “Mba omeo Baiboly raho naho misy ty ama’o!”

Mateteke nareo nandeha nitory amy ty toeragne mitokagne. Aia amy irey ty trea’areo tie tena niambake?

Jack: Raty ty lalagne amy ty toeragne ila’e a Guyane etoa. Misy lalagne 600 kilaometatse eo ho eo zay ohatse, mateteke heregnandro raike ty angala’ay aze ie amy izao zahay fa mandeha tobile. Tena tsy haligno’ay i lia’ay ta Sainte-Élie, tamy ty ala i Amazonia agne zay. Nandeha katikaty naho lakagne zahay tamy izay, sady ela zahay vaho izay niavy agne. Mpihaly volamena ty ankamaroa ty ndaty agne. Tena nitea iareo i bokentikagne rey, le nimey ty ila’e amy iareo volamena kedekede zahay hatao fagnomezagne. Nandefasa’ay i video i fandaminagne rey ka iareo naho fa hariva, le nimaro ty niavy.

Marie-Line: Vaho tsiela zay, le tinendre hanao lahajaka ty Fahatsiarovagne ta Camopi agne ty Jack. Nandeha lakagne tagnate ty efatse lera tamy ty Saka i Oyapock zahay vaho izay niavy agne. Faie tena nitea’ay o lia’ay iohoe.

Jack: Feno vatovato ty toeragne ila’e amo o saka iohoe sady misy fotoagne i ranoy minday. Tena nahatondregne ahike ty nagnente ireo. Faie va’e hagnoho-doza ka o raha rehoe. Tsy maintsy ndaty fa zatse sady tena mahay minday lakagne areke ty mandeha mbeo. Faie tena nisoa aloha i lia’ay igne! Ni-enegne ty Vavolombelo i Jehovah nagnatreke Fahatsiarovagne tamy izay, le dimampolo teo ho eo ty isa ty ndaty hafa sady Indiana ty ila’e.

Marie-Line: Fiaignagne fanjaka hoe izay ty mandigne ze tanora magniry hampitombo ty fanompoa’e i Jehovah. Mila matoky aze rehe naho fa miatreke raha sarotse hoe irey amy izay hihamafe ty finoa’o. Mateteke tsapa’ay tie tena magnampe anay ty Jehovah.

Maro ty firehake hai’areo. Fa inareo vao ro mora mahay firehake hafa sa ino ty anto’e?

Jack: Aha’a, tsy izay. Noho irey ilaegne amy ty fanompoagne ty nahavy ahy nianatse aze. Le avy le nampitarihegne Fianaragne Fitalakesan-davitse amy ty firehake sranantongo * ohatse raho tie indraike. Faie naho ty amako, le anjara famakiagne Baiboly hey ty toko’e ho nampanoegne ahy. Nagnonteneako ze rahalahy raike zay naho fa nivita i fianaragney tie, ‘Niazo’areo avao vao ty rehako?’ Le hoe reke: “Nisy reha’o ila’e aloha tsy le niazo’ay faie tena nisoa i fianaragney!” O ajajao ty tena nagnampe ahy hahay firehake sady maro ka ty raha nianarako tamy iareo. Le avy le nahitsy iareo ohatse raho naho fa diso ty raha rinehako. Fa o ndaty beio tsy nanao izay.

Marie-Line: Nanagne mpianatse Baiboly mirehake frantsay, portogey, naho sranantongo raho tamy i faritane raike zay. Le hoe ze rahavave raike zay: “I aze amy i firehake tena sarotse ama’o rey ro anò voaloha’e naho fa mampianatse Baiboly rehe.” Treako tie tena soa i soso-keve’ey tsiela tafara izay.

 Nampianatse ndaty mirehake sranantongo raho tie indraike zay, le avy eo ndaty mirehake portogey. Ie naho fa nanomboke nampianatse i aze mirehake portogeỳ zahay, le hoe i rahavave niarake tamakoy: “O Marie Line, ao soa vao iheo?” Tamy izay vaho tsapako tie kay iraho tsy nirehake portogey fa sranantongo, ie amy izaò Breziliana i ampela nampianare’aỳ.

Tena tea anareo o mpiara-manompò. Ino ty nahavy anareo ho mpiragnetse bey amy iareo?

Jack: Hoe ty Ohabolana 11:25: “Ho valean-tsoa ze ndaty matarike.” Lava nanao raha hoahy ty hafa avao zahay mba hampihara’ay io. Naho fa nila nikolokoloegne ohatse i Anjomba i Fanjakagney, le nisy nirehake tamako tie: “Engao io fa mbe hanoe o mpitorio avao.” Le hoe raho: “Iraho ka anio mpitory! Le naho misy asa toko’e hatao, le mba te handrambe anjara ka raho.” Maregne fa misy fotoagne mba mila manao raha ho anay manokagne zahay mirovaly, faie tsy atao’ay sakagne tsy hagnampeagne ty hafa zay.

Marie-Line: Mikezake zahay mba hampiseho amo o mpiara-manompò tie tena mipay ze hahasoa iareo. Nanjare hai’ay ohatse tie naho fa ombia iareo ro mipay ndaty hiambegne ty ana iareo ndra hangalake aze an-dakilasy agne. Namboare’ay areke ty programa’ay mba hahavy anay ho afake hagnampe iareo avao naho fa misy raha nipalià iareo anay. Nahavy anay hifandrambe maifitse amy iareo ty fanoa’ay izay.

Inogne iaby ty fitahiagne niazo’areo noho inareo nanompo tamy ty toeragne tsy maro mpitory?

Jack: Maro ty fitahiagne niazo’ay noho izahay manompo marain-tsy hariva. Mateteke zahay fale satria afake mandineke ty raha niforogne i Jehovah. Maregne fa misy raha sarotse atrehe’ay faie milamin-tsaigne avao zahay. Ty anto’e, hai’ay tie manohagne anay avao ty Jehovah ndra aia ndra aia misy anay.

Nisy fotoagne raho ginadra tamy ty pirizò i Guyane tamy izaho mbe nitanora satria tsy nimete hanao maramila. Tsy mba nieretsereteko zao tie izaho zao ro ho misionera amo o tane iohoe afara atoy, sady hahazo alalagne hitory am-pirizò agne. Tena nimey i Jehovah fitahiagne maro raho!

Marie-Line: Tena mahafale ahy ty mahafoe tegna hoahy ty hafa. Mahafale anay ka ty manompo i Jehovah. Mahavy anay tena hifankatea zay. Misy fotoagne ty Jack mahatrea mpivaly kivikivy, le magnontane ahy reke tie kera azo’ay asaegne hihinagne ama’ay agne iareo. Le izao mateteke ty avaleko: “Fa ho nirehake izay tama’o ka anio irahò!” Mateteke mitovy hevetse hoe izay zahay.

Jack: Vaho tsiela zay ty nahafantara’ay tie voa ty kansera ty prostaty ndra aretegne amy ty maha lahilahy ahy ao raho. Nisy fotoagne raho nirehake hoe izao ndra tie tsy le tea i Marie-Line aza: “O valiko, naho mate raho naho maray, le mate tanora satria mbe tsy ‘antetse loatse.’ Faie tena fale raho satria nampiasaeko hanompoagne i Jehovah ty fiaignako. Azoko antoke tie tsy ho haligno i Jehovah ty raha nataoko ho aze.”—Gen. 25:8.

Marie-Line: Maro ty raha tsy nampoizegne natao i Jehovah ho anay. Nahavita raha maro tsy nieretserete’ay ho vita’ay zahay! Tsapa’ay tie sambatse zahay! Matoky i Jehovah avao zahay, le vognogne avao ndra aia ndra aia toeragne hagniraha i fandaminagne anay.