Jack ni Marie-Line va ngu thuma thumoni nya tepo yatshavbo gukhugeya khu 1988. Kha nga olu va tidwago na va kodza gu dzi pwananisa ni siemo nyo hambanehambane avo va dzumede gu gira mithumo nya yingi, Guadeloupe ni Guiana Francesa. Yatshavbo malanga yoyo, olu ma gu woneledwa khu Bheteli ya França. Hongoleni hi girani siwudziso nyo khaguri Jack ni Marie-Line.

Ginani gi mi kutsidego gu beleya thumo nya tepo yatshavbo?

Marie-Line: Nyi dandrede Guadeloupe nigu gutala nya dzitepo nyi di gu tshumayela litshigu latshavbo ni mamayi wangu, a nga ba ari Fakazi nya sighingi. Nyi ngu va haladza vathu, khu kharato, guvbedza nyi nga vbedza xikola khu 1985, nyi di pheya thumo nya wupiyonero.

Jack: Tepo nyi nga ba nyiri muphya nyi di gu oloveya gu vbungadza ni sithumi nya tepo yatshavbo si nga ba si gola ngudzu gu tshumayela. Nyi di gu oloveya gu thuma kha nga piyonero nyo phasedzeye teponi nya dziferiya dzangu dza xikwatunu. Guvbeyani nya semana, dzimbe dzitepo hi di gu khileya gibhomba gasi guya tshumayela ni vapiyonero gipandreni va nga ba va thuma umo. Hi di gu tshumayela litshigu latshavbo ganiolu guvbeyani nya litshigu hi di gu hongola phwani hiya hagana. Si di gu tsakisa ngudzu.

Hwanenyana nya gu tshadhe ni Marie-Line, khu 1988, nyi di dzi embeya esi, ‘Ethu hi tshulegide, khu ginani hi gu mba gira nya singi thumoni nyo tshumayele?’ Nyi di pheya neni gu thuma wupiyonero nga Marie--Line. Mwaga wu nga landreya, hwane nya xikola nya vapiyonero hi di pheya gu thuma kha nga vapiyonero nyo hathege. Hi manegide ni mithumo nya yingi nyo tsakise Guadeloupe na hi si gu ranedwi guya thumeya Guiana Francesa.

Khu gu gimbiya nya myaga mu ningidwe mithumo nyo hambanehambane. Ginani gi mi phasago gu dzi pwananisa ni siemo nya siphya?

Marie-Line: Vandriyathu va Bheteli ga Guiana Francesa va di gu dziti gu khavo lowo wathu hi wu golago ngudzu, Isaya 6:8. Khu kharato, tepo va nga ba va hi rana, va di gu tala gu pheya khu gu ganeya gu khavo: “Ina mu ngu wu dundruga lowo wanu mu wu golago ngudzu?” Tepo hi nga ba hipwa isoso hi di gu dzegeya gu si wona gu khethu womo thumo nya wuphya wu hi vireyago, khu kharato hi di gu hlamula, khethu: “Hi womo avba! Hi rume!”

Hi ngu potsa gu fananisa thumo wathu nya wuphya ni mithumo hi giridego gale yoyo kholu isoso si di hadzi  gu hi gira hi si tsakiswi khowu nya wuphya. Hi ngu dzi garadzeya gambe gu pheya khethu hi oloveya vandriyathu.

Jack: Gale yoyo, vandriyathu nyo khaguri va zamide gu hi kutsa gu ema gu gira thumo nyo endre-endre kholu va di gu vbweta gu khala nathu vbafuvbi. Ganiolu tepo hi nga khuga khu Guadeloupe, ndriyathu moyo a di hi dundrugisa malito ya Jesu ma gomogo omu ga Matewu 13:38: “Lithembwe khu litigo.” Khu kharato tepo hi vbindrugedzwago thumo nyo khaguri, ha gu dundruga gu khethu hi nga gu thuma thembweni ga gumogo ambari ha gu ba hi thumeya ni hayini!

Tepo hi vbohago ga gipandre nya giphya, hi ngu si wona gu khethu vambe vathu va ngu si kodza gu vbanya umomo na va tsakide. Khavbovbo, hi zama gu vbanya nga edzi va vbanyago khidzo. Dzimbe dzitepo guhodza gakona kha ha gu oloveya ganiolu ethu ha gu hodza esi va hodzago hi bwe hi seya esi va seyago na hi gu gira esi si vbwetegago gasi hi dzi vhikeya ga madwali. Hi ngu dzi garadza ngudzu gasi hi phara ni wevbini thumo hi ningwago khu ndziya nya yadi.

Marie-Line: Hi ngu hevbula gambe nya singi ga vandriyathu va gipandreni gyogyo. Nyi ngu dundruga gilo gimwegyo gi nga girega tepo hi nga vboha Guiana Francesa khu tepo nyo pheye. Gu di guwa ngudzu ndzadzi, khu kharato hi di gu pimisa gu khethu gwadi hi vireya kala ndzadzi yi ema gasi hi si kodza gu hongola thumoni nyo tshumayele. Ganiolu ndriyathu moyo nya nyamayi a di nyi wudzisa esi: “U dongide gasi hi hongola gutshumayelani?” Nyi di hlamala, nyi mu hakha kheni: “Hi na hongola kharini?” Uye a di khuye: “Dzega gwaridhaxuvha yago hi hongola hatshavbo khu dzibhisikaleta dzathu.” Khavbo nyi hevbudego avbo gu phara gwaridhaxuvha na nyi gu gimbidzisa bhisikaleta. Nari khatshi kha nya nga hevbula isoso, gima na nya sa tshumayela teponi nya ndzadzi!

Mu thumide malanga nyo hambanehambane tanga nya 15 dzitepo. Mu na ni mawonelo mu tsakeyago gu ninga vambe maningano ni gu fuluga?

Marie-Line: Gu fuluga gu ngu tshuka gu garadza. Si na ni lisima gu mana wulanga avba u na dzipwago nuri gaya tepo u wuyago khu gutshumayelani.

Jack: Gutala nya dzitepo nyi di gu pitari ndrani nya nyumba nya yiphya. Vandriyathu va Bheteli va nga ba va dziti gu khavo kha hi na nga khala khu tepo nyo laphe, dzimbe dzitepo va di gu ganeya khavo: “U nga dzi garadze khu gu pintari nyumba yeyi!”

Marie-Line a ngu si kodza gwadi gu vbageya silo! Uye a gu vegedzeya satshavbo si vbwetegago omu nya dzikaxa a vbedza a namegedzeya sidangaliyana khuye: “esi khya petoni,” “khya kwartunu,” “khya kozinyani” ni mambe malanga. Khu kharato tepo hi vbohago wulanga nya wuphya, si ngu hi vbevbugeya gu vegedzeya esi  hi dzudego naso malangani gu vbwetegago. Uye a gu gira sasamedzo nya esi si gomogo omu nya kaxa mweyo ni mweyo gasi ha gu vbweta gilo nyo khaguri hi vbiredza gu gi mana.

Marie-Line: Kha nga olu hi hevbudego gu vegedzeya gwadi silo sathu si ngu hi phasa gu pheya thumo wathu nya mba hweya.

Mwa gu sasamedza kharini tepo yanu gasi mu si kodza gu gira gwadi thumo wanu? — 2 Thim. 4:5.

Marie-Line: Khu muvhulo, ha gu hefemula ni gu dongiseya mitshangano. Khu mavili kala dimingo, ha gu hongola thumoni nyo tshumayele.

Jack: Ambari olu hi ghemedwego dziora hi yedego gu dzi enedza ngima ni ngima gutshumayelani, ethu kha hi vegi gupima ga idzo. Gutshumayela khigyo gilo nya lisima ngudzu womini wathu. Gukhugeya khu tepo hi khugago khu gaya kala tepo hi bweleyago, ha gu zama gu bhula ni vatshavbo hi mananago navo.

Marie-Line: Khu giyeyedzo, tepo hi hongolago wulanga nyo khaguri gasi guya vbungadza ni vandriyathu, nyi ngu tala gu dzega sidangaliyana. Vambe vathu va ngu hi hidzimeleya va hi lomba mabhuku, ambari na ha sa dzi tivegisa gwawe kha nga Dzifakazi dza Jehovha. Khu kotani nya isoso hi ngu dzi garadzeya gu ambala khu ndziya nya yadi hi bwe hi manega ni mavbanyelo nya yadi. Vathu va ngu si wona isoso.

Jack: Hi ngu ningeya wufakazi gambe khu gu gireya silo nya sadi vavhizinyo vathu. Nyi ngu va rwaleya malangaliya, nyi va rwaleya ndzilo nyi bwe nyi agisa--agisa vbavbandze. Tepo vavhizinyo vathu va si wonago isoso dzimbe dzitepo va ngu wudzisa esi: “Ina u nga nyi vbweteya Bhibhiliya?”

Mu ngu ba mu tshumayela sipandre sa hwindzo. Ina mu ngu dundruga gilo nyo khaguri nya lisima gya limwedo nya malanga mu ma endredego?

Jack: Simbe sipandre, Guiana, si ngu garadza gu si vboheya. Ndrani nya semana hi ngu tala gu gimbiya 600 km dziruwani nya mba khalega. Liendro hi li giridego gasi gu wuseya St. Élie, Amazon, kha hi na nga li divala. Gasi gu vboha iyoyo hi gimbide dziora nya dzingi ruwani nya mba khalega khu movha yi kodzago gu gimbiya ni hayini hi bwe hi thumisa ngalava nya motori. Vathu nya vangi va nga ba va vbanya iyoyo va di gu thuma omu nya mighodhi nya oru. Tepo hi va ningago mabhuku, gasi gu yeyedza gubonga, vambe va di gu hi ninga sipandryana nya oru kha nga ningelo wawe! Ni wutshigu hi di gu yeyedza mweyo nya dzivhidhiyu nya hengeledzano. Nigu nya vangi va di guta.

Marie-Line: Matshigwanaya, Jack a di lombwa guya vega ganelo nya Gidundrugiso gidhoropanani gya Camopi. Gasi gu vboha iyoyo, hi gimbide dziora dzina khu ngalava nya motori tsongoni ga Oiapoque. Isoso si hi tsakiside ngudzu.

Jack: Omu mati ma nga ba ma sa eta ngudzu tsongoni, gu diri ni mhangonyana . Si di gu samadzisa ngudzu tepo ngalava yi nga ba yiya yi hidzimeya malanga nya nga yoyo. Marinyero a di yede guti edzi a yedego gu gimbidzisa khidzo ngalava malangani yoyo. Ganiolu isoso si di gu hi tsakisa ngudzu. Ambari olu gu nga ba guri ni 6 Dzifakazi basi, tanga nya 50 vathu va dzude Gidundrugisotunu gupata ni vaAmeríndio nyo khaguri.

Marie-Line: Vaphya va nga manega ni matshango nyo tsakise nya nga aya va gu vbweta gu gireya nya singi Jehovha. Egi gi vbwetegago gu tumba Jehovha ga siemo nya nga esi nigu gukhodwa gwago go tiya. Gutala nya dzitepo hi di gu wona Jehovha na gu hi phasa.

Mu hevbude malimi nya mangi. Si ngu mi vbevbugeya gu hevbula malimi?

Khandri dzitepo dzatshavbo si vbevbugago. Nyi hevbude malimi yoyo kholu si di gu vbwetega. Nyi di yede gu gimbidzisa gihevbulo nya Mukhedziseyi khu giSurinamês * hwane nyo vege ganelo ya guagani. Khavbovbo, nyi di wudzisa ndriyathu moyo kheni, si pwade kharini! Uye a di hlamula khuye: “Dzimbe dzitepo kha ha nga ba hi ma pwisisa mambe malito ganiolu hi phasegide ngudzu.” Sanana si nyi phaside ngudzu. Khiso si nga ba sita nyi embeya omu nyi phazamidego nasiri vakhongolo. Nyi hevbude nya singi khiyo ga sanana.

Marie-Line: Gipandreni nyo khaguri, nyi diri ni sihevbulo nya Bhibhiliya nyi nga ba nyi hevbula naso khu giFrança, giPutukezi ni giSurinamês. Ndriyathu moyo nya nyamayi a di nyi ninga mawonelo yaya, wa gu ba uri ni sihevbulo nya singi si ganeyago malimi nyo hambane, pheya khu gu hevbula ni sile si ganeyago malimi ma gu garadzeyago u hegisa khu sile si ganeyago malimi ma gu vbevbugeyago. Nya mba hweya nyi di wona wugengeyi nya wusingalagadzi wowo.

Litshigu limwedo, nyi di yede gu gimbidzisa gihevbulo gimwegyo khu giSurinamês nyi bwe nyiya gimbidzisa  gimbe khu giPutukezi. Tepo nyi nga pheya egi nya wuvili, ndriyathu a nga ba ari ni eni a di khuye: “Marie-Line, khatshi somo si nga mba khala gwadi!” Nyi di tugula gu kheni nyi di gu ganeya ni nyamayi nya muBrazil khu giSurinamês wulangani nya giPutukezi.

Mu ngu godwa ngudzu khu vale mu thumidego navo. Mu si kodzide kharini gu khala dzipari nya dzadi ga vandriyathu vovo?

Jack: Mavingu 11:25, wari khuye: “Hefemulo wa muthu nya wuhindzi wu na hodza wu eneledwa.” Kha hi potsapotsi gu vbungadza ni vandriyathu gumogo ni gu va gireya silo nya sadi. Tepo hi nga ba hi wusedza Salawu yathu, vambe va nyi embede esi: “Diga vahuweleyi va gira isoso.” Ganiolu eni nyi di gu va hlamula kheni: “Khu lisine aneni nyi muhuweleyi. Khu kharato, go ba guri ni thumo wu nga ba wu vbweta gu girwa, aneni nyi di gu patega.” Ambari olu hatshavbo hi vbwetago tepo nyo khaguri gasi gu pimisa khethu vamune ni gu gira silo hi si golago, gutala nya dzitepo hi ngu dzi dundrugisa gu khethu kha hi vbweti gu khethu isoso si hi tandregisa gu gireya silo nya sadi vambe.

Marie-Line: Hi ngu gira satshavbo si kodzegago gasi gu yeyedza gukhathala gwathu khu vandriyathu. Khu ndziya yoyo, hi ngu si tugula tepo avo va vbwetago muthu nyo khaguri gasi gu khathaleya sanana sawe mwendro gu ya si dzega xikwatunu. Khavbovbo hi ngu si kodza gu sasamedza gwadi longoloko wathu gasi hi si kodza gu va phasa. Khu ndziya yoyo ha gu khala dzipari nya dzadi, dzi khadego na dzi dongide gu phasa vandriyathu tepo va vbwetago giphaso.

Makategwa muni mu ma manago khu gu thumeya omu gu vbwetegago vathumi nya vangi?

Jack: Thumo nya tepo yatshavbo wu ngu hi reseya makategwa nya mangi. Gutala nya dzitepo hi na ni lithomo nyo nengeye silo nya singi si vangidwego khu Jehovha. Ambari olu hi tshukago hi tshangana ni sigaradzo nyo khaguri, hi na ni gurula mapimoni kholu hi ngu dziti gu khethu hi ngu phasedzedwa khu vathu va Nungungulu ambari ha gu ba hiri ni hayini.

Tepo nyi nga ba nyiri muphya, nyi khothedwe pasoni dhoropani ga Guiana khu kotani nya olu nyi nga ba nyi si dzi bedzedzeyi omu nya silo nya politika.

Gima kha nya nga ba nyi pimisa gu kheni litshigu limwedo nyi na si kodza gu wuya Guiana kha nga misiyonario nyi bwe nyi dzumeledwa gu wuseya simbe sibotshwa kha nga mutshumayeli. Nya mba kanakana, Jehovha kha hi golodzeyi makategwa yaye!

Marie-Line: Si ngu nyi nengedzisa ngudzu gu thumeya vandriyathu. Hi ngu tsaka ngudzu kholu hi thumeyago Jehovha. Nigu si tiyiside ngudzu wupari wangu ni Jack kha nga patwa. Dzimbe dzitepo, Jack a ngu nyi wudzisa gu khuye, hi nga rana patwa moyo wu vbwetago gu tiyiswa gasi gu ta hodza gilogyo nathu. Gutala nya dzitepo, nyo heni kheni: “Aneni nyi di gu pimisa sasimweso!” Khandri gutsakisa gwaso.

Jack: Matshigwanaya, vadhogodheya va di nyi embeya gu khavo nyi na ni cancro da próstata. Ambari olu Marie-Line a si vbwetigo gu sipwa isoso, nyi ngu mu embeya kheni: “Ngadzangu, nyi nga si gumbi ganiolu ambari sa gu lombega gufa, nyi ngu dziti gu kheni nyi thumiside womi wangu gasi gu gira esi si gu na ni lisima ngudzu guvbanyani, gu thumeya Jehovha nigu isoso si ngu nyi ninga gutsaka nya gukhongolo.” — Gen. 25:8.

Marie-Line: Jehovha hi tulede malimba hi nga ba ha sa ma vireya a bwe a hi dzumeleya gu gira silo nya gu gima hi di ngasi si pimisi. Womi wathu wu tade khu silo nya singi nya sadi. Khu gu tumba Nungungulu, ni hayini avba hengeledzano yaye yi hi rumeyago, khavbo kamo hi na hongolago!