Jack aMarie-Line bakasaanguna mulimu wachiindi choonse mu1988. Bakazumina kuchincha-chincha kuchitila kuti beendelane azyiimo. Alubo bakachita milimu iisiyene-siyene kuGuadeloupe akuFrench Guiana. Ndawu eezi zyakaba aansi aamutabi wakuFrance. Atubabuzye-buzye zyakabachitikila.

Niinzi chakamusungwaazya kuti munjile mumulimu wachiindi choonse?

Marie-Line: Ndakakomenena kuGuadeloupe. Baama bakali sikupupulula uusungweete loko. Ndakali kukkala kandizwa aabo mumulimu wakukambawuka. Kuyanda bantu kwakapa kuti nditalike kupayona mu1985 nindakamaninsya chikolo.

Jack: Kandichikula, ndakali abeenzuma biingi bakali mumulimu wachiindi choonse alubo bakali kuuyanda mulimu wakukambawuka. Ndakali kubweza bupayona bwakugwasilizya nizyajalwa zikolo. Chimwi chiindi kumamanino aamviki, twakali kugada bbaasi kuti tuye kubusena bulaamapayona. Twakali kukambawuka ambabo buzuba boonse mpawo nitwachayisya twakali kwiinka kuyoolyookezya kumbali aalwizi. Kwakali kunoneezya loko.

Twakachada mu1988. Mbukunga teetwakali azintu zyakali kutuchelezya, twakayeeya kuyungizya mulimu wesu. Ndakajoyina Marie-Line kupayona. Nikwakayinda munyaka, twakanjila chikolo chamapayona mpawo twakakumbilwa kuti tube mapayona aayandikana. Twakabeleka kumasena aasiyene-siyene kuGuadeloupe mpawo twakazooyinka kuFrench Guiana.

Mwakachita milimu iisiyene-siyene mumbunga, niinzi chakamugwasya kuti mukonzye kuzibila zyiimo zisiyene-siyene? 

Marie-Line: Bakwesu bakumutabi wakuFrench Guiana balizi kuti tuyandisya lugwalo lwaIsaya 6:8. Kuti kabatufoonena bavuzya kwaamba kuti, “Muchiluyeeyede na lugwalo lwanu ndumuyandisya?” Kuti twamvwa kabali kwaamba oobo nga twaziba kuti bayanda kutuchincha mulimu nga twasandula kuti, “Ndiswe Aano Kamututuma!”

Tatweezyanisyi mulimu ngutuchita angutwakali kuchita chiindi nkaambo eezi zilakonzya  kupa kuti tutanoneezegwi amulimu ngutuchita. Alubo kuti twalongela muliimwi mbungano tuleezya kubaziba kabotu bakwesu abachizi.

Jack: Aali chimwi chiindi nitwakali kuyanda kulonga, bamwi beenzuma bakatukombelezya kuti tukkale. Pesi nitwakazwa kuGuadeloupe umwi mukwesu wakatubuzya majwi aaJesu aali muli Matayo 13:38 aati: “Muunda ninyika”. Lino kuti twalongela kuli bumbi busena tulibuzya kuti kufumbwa busena nkutubelekela muunda tuchinchi pe. Chiyandikana nkujana bantu luzutu.

Kuti twasika kuli bumbi busena nga twabona kuti bantu bankuko balabotelwa alubo andiswe tuleezya kupona mbuli mbubapona. Nzibalya anzibanywa zilakonzya kusiyana anzitujayide pesi tuleezya kuzijayila. Nikuba boobo tubikkila maanu kuti tulikwabilile kumalwazi. Tuleezya kuti tukkale katwaambuula zibotu atala azilawu zyoonse nzitwakabelekela.

Marie-Line: Twakayiya zyiingi kuzwa kubakwesu abachizi. Ndichiyeeyede nitwakasika kuFrench Guiana, mvula yakali kuwa loko. Ndakali kuyeeya kuti tulazwa mukukambawuka kuti yayimikila kuwa. Pesi umwi muchizi wakati, “Tweende.” Ndakagamba, ndilaamba: “Tuleenda biyeni?” Wakati: “Tulabelesya mabbasikili ama-ambulela.” Mbuubuzuba mbundakayiya kuchova bbasikili ooku kandijisi ambulela. Nikuli teendakayiya teendakayinookonzya kukambawuka chiindi chamvula.

Mwakalonga kwaziindi zili 15. Niinzi nzimukonzya kubuzya bamwi zinga zilabagwasya nibalikulonga?

Marie-Line: Chimwi chiindi kulonga nkuyumu. Pesi chipati nkujana busena bwakukkala mbulimvwa kuwaangunukide nwaazwa kukukambawuka.

Jack: Kuti twalonga nga ndayipenta mukati ng’anda njitubelesya. Chimwi chiindi bakwesu bakumutabi nibakabona kuti teetwakali kuyookkala kwachiindi chilamfu aali bumwi busena, bakandibuzya kuti: “Utalikataazyi biyo kupenta ng’anda eeyo!”

Mukayintu wangu ujeya biya kulongela zintu. Nga wabikka zintu mumabbokesi mpawo waalemba kuti, “zyamubbedilumu,” “zyakusambya,” “zyamukkichini” azimwi. Kuti twasika nkutuya, nga twawubilwa nkaambo ngatwabikka bbokesi limwi alimwi mpulyeelede kubikkwa. Alubo nga  walemba kuti bbokesi limwi alimwi lilaanzi kuchitila kuti tufwambaane kujana zintu nzituyanda.

Marie-Line: Akaambo kakuti zintu zyesu nga tuzibambide kabotu, tatuchiti mazuba miingi katutanasaanguna mulimu wakukambawuka.

Mulaamabambe na amugwasya kuti mukonzye kuuzuzikizya “cakumaninina mulimo” wanu?—2 Tim. 4:5.

Marie-Line: MuMuvulo ngatwapumuna akulibambila miswaangano. Kuzwa muli Bwabili ngatuli mumulimu wakukambawuka.

Jack: Nikuba kuti kuli ma-awa ngitweelede kusisya mweezi amweezi, kukambawuka nkutuchita teekwakuyanduula ma-awa pe. Pesi tukubona kakuyandikana. Nituzwa aang’anda anitujokela tuleezya kukambawukila bantu boonse mbituswaana munzila.

Marie-Line: Kuti katuya mumasena aakulyookezya ngandabweza tupepa twakubala. Bamwi bantu nga batukumbila mabbuku aakubala nikuba katutababuzizye kuti tuli Bakamboni baJehova. Eezi zipa kuti tuchenjelele nzila njituzwataayo ambutulijata nkaambo bantu balazibona.

Jack: Alubo tukambawukila bantu kwiinda mukuba basimayakilane babotu. Nga ndabweza mapepa, kusowa doti akusalazya lubuwa. Basimayakilane ngabazibona alubo chimwi chiindi nga bati, “Ndikumbila Bbayibbele.”

Chimwi chiindi mwakali kubelekela kumasena aali kule loko. Kuli nzimwakaswaana na nzimuchiyeeyede?

Jack: Aamwi masena kuGuiana alakataazya kusika. Chimwi chiindi nga tweenda makkilomita aasika ku600 mumviki mumigwagwa iifwide. Tandizoofwi ndaluba pe lweendo ndutwakachita nitwakali kuya kuSt. Élie iili kumasaka aakuAmazon. Twakeenda kwachiindi chilamfu amoota mpawo twakazoogada speed boat. Bantu biingi bakkala nkuko mbasikusya ngolida. Bamwi bakali kulumba mabbuku kwiinda mukutupa tupisi twangolida. Goko twakabatondeezya vidiyo. Alubo kwakasika bantu biingi.

Marie-Line: Muchiindi chayinda mulumaangu wakakumbilwa kuti akape nkani yaChiyubulusyo kuCamopi. Twakeenda kwama-awa aali 4 aspeed boat mumulonga waOyapock. Kwakali kunoneezya.

Jack: Kulakonzya kuba angozi kapati mundawu zilaamabwe kuti meenda kali mache mumulonga. Kulanoneezya kubona maanzi kalikuchijaana loko pesi sikweenzya bwaato weelede kubeleka changuzu. Lwakali lweendo lubotu. Kwakali basikupupulula bali 6 luzutu pesi kwakasika bantu basika ku50 kuChiyubulusyo kuswaanizya ama-Amerindian.

Marie-Line: Bachikula balakonzya kuzilabila zyoonse eezi kuti balipeda kuchita zyiingi mumulimu waJehova. Chiyandikana nkusyoma Jehova muzyiimo eezi alubo eezi zilapa kuti lusyomo lwako lusime. Twakabona kuboko kwaJehova kwaziindi zyiingi mubuumi bwesu.

Mwakayiya milaka iisiyene-siyene. Kuli biyeni kwiiya mulaka mupya?

Jack: Nkuyumu loko. Ndakayiya nkaambo ndakali kuyanda kwiibelesya nindipa nkani akukukambawuka. Chimwi chiindi ndakakumbilwa kuti ndichitisye Chiiyo chaNgaziyakulinda muchiSranantongo * nikuba kuti taakwe nikuba nindakali ndapegwa nikuba nkani yakubala Bbayibbele. Ndakabuzya umwi mukwesu kuti ndachita biyeni. Mpawo wakaamba kuti, “Yalikunoneezya nikuba kuti zimwi teezyalikumvwika.” Bana mbabo bakandigwasya loko nkaambo bakali kundibuzya kuti ndapambanisya pesi bapati bakali kundilanzya meso luzutu.

Marie-Line: Nitwakali kuli bumwi busena, ndakali azyiiyo zyakali kwaambuula chiFrench, chiPortuguese, achiSranantongo. Umwi muchizi wakandibuzya kuti kandisaanguna kwiiya amuntu ubelesya mulaka ngunditazi kabotu mpawo ndimaninsye angundizi. Zyakazoochitika zyakatondeezya kuti nzyakandibuzya zilagwasya.

 Limwi zuba ndakatalisya kwiiya amuntu waambuula chiSranantongo mpawo ndazooyiya amuntu waambuula chiPortuguese. Nitwakatalika kwiiya muchizi ngundakali kweendaawe wakati, “Marie-Line, kubaanga wapambanisya.” Ndakabona kuti ndakali kuyiisya muntu waambuula chiPortuguese muchiSranantongo.

Bantu bakkala kumasena ngimwakabelekela bamuyanda loko. Niinzi chakapa kuti mumvwanane?

Jack: Lugwalo lwa Tusimpi 11:25 luti: “Mwaabi uyoozwidilila.” Tatuwayi-wayi pe kugwasya bamwi. Nikwakali kubambululwa Ng’anda yaBwaami bamwi bakandibuzya kuti: “Mutalikataazyi pe basikupupulula balayinka.” Ndakati: “Ndilayinka nkaambo andime ndili sikupupulula. Ndeelede kuyoobeleka abamwi.” Nikuba kuti tuyanda kujana chiindi chakuba atulikke pesi tatuzumizyi kuyanda kuba atulikke kuti kutukachizye kugwasya bamwi.

Marie-Line: Tuleezya anzila zyoonse kuti tuchite zintu zitondeezya kuti tulabayanda bakombima. Eezi zipa kuti tubone mpubayanda kugwasigwa. Kuti bamwi kabayanda kusyaalilwa abana naakuti kuyoobwezelwa bana kuchikolo nga twachincha nzitwapulanide kuchitila kuti tubagwasye. Kukkala katulibambilide kugwasya bamwi kupa kuti tumvwanane loko ambabo.

Nzilongezyoonzi nzimwakajana akaambo kakubeleka kubusena buyanda basikugwasilizya?

Jack: Twakajana zilongezyo zyiingi akaambo kakuba mumulimu wachiindi choonse. Twakajana mweenya wakubotelwa kubona zilenge zyaJehova. Nikuba kuti twakaswaana buyumu-yumu pesi tulaaluumuno mumizeezo nkaambo tulizi kuti tuli abeenzuma batugwasya kufumbwa nkutubede.

Kandichikula ndakasungwa kuFrench Guiana akaambo kakukaka kuba musoja. Teendakali kuyeeyela pe kuti ndizoobweeda nkuko kandili mumishinali alubo ndakazumizigwa kuyooswaya basungwa. Nisimpe Jehova wakatupa zilongezyo zitabaliki!

Marie-Line: Chintu chindipa kubotelwa nkugwasya bamwi. Tulabotelwa akaambo kakubelekela Jehova. Eezi zyakapa kuti tumvwanane loko mulukwatano lwesu. Chimwi chiindi mulumaangu nga wandibuzya kuti uyanda kuti tutambe iimwi mpuli iiyanda kusungwaazigwa kuti tuzoolye aayo. Chiindi chiingi nga ndamubuzya kuti, “Nzindalikuyeeya andime!” Tukkala katuyeeya chintu chimwi.

Jack: Lino-lino ndakajatwa bulwazi bwakkensa. Nikuba kuti mwanakazi wangu tayandi pe kumvwa makani aaya. Ndakamubuzya kuti: “Kuti ndafwa juunza ndinooli ndafwa kandichili muniini. Pesi nga ndafwa kandili ndakkutisikana kandizi kuti ndabelekela Jehova kwabuumi bwangu boonse alubo eezi zindipa kubotelwa.”—Matl. 25:8.

Marie-Line: Jehova wakapa kuti tubeleke milimu njitwakatali kuyeeyela pe kuti tuzooyibeleka. Twajana zilongezyo mubuumi bwesu. Tulamusyoma Jehova alubo kufumbwa mbunga yakwe nkuyatutuma tulayinka!