Kirap long 1988, Jack na Marie-Line i wok wantaim long fultaim sevis. Tupela i redi long bihainim pasin bilong olgeta kain man, olsem na tupela i amamas long kisim planti asainmen long Guadelup na Frens Giana. Long nau brens ofis long Frans i lukautim ol teritori long ol dispela kantri. Yumi ken givim sampela askim long Jack na Marie-Line.

Wanem samting i kirapim yupela long insait long fultaim sevis?

Marie-Line: Mi bin kamap bikpela long Guadelup, na kirap long taim mi liklik yet, mi save autim tok inap long de olgeta wantaim mama bilong mi—Mama i bin stap strongpela Witnes. Mi laikim tru ol manmeri, olsem na taim mi pinisim skul, mi kirap mekim wok painia long 1985.

Jack: Taim mi yangpela yet, mi save bung wantaim ol fultaim sevan husat i laikim tru wok autim tok. Long taim bilong skul holide, mi save mekim wok painia haptaim. Long ol wiken, mi na ol narapela i save kalap long bas na go joinim ol painia long autim tok long teritori bilong ol. Mipela i save autim tok inap long de olgeta, na bihain mipela i save go long nambis. Mi save kisim bikpela amamas tru!

Long 1988, mi maritim Marie-Line, na bihain liklik mi tokim mi yet olsem, ‘Mipela i stap fri, olsem na mipela inap givim bikpela haptaim moa long autim tok.’ Mi joinim Marie-Line long mekim wok painia. Wanpela yia bihain, mipela i go long painia skul na kisim asainmen bilong kamap spesel painia. Mipela i amamas long ol asainmen bilong mipela long Guadelup, na bihain mipela i go long Frens Giana.

Olsem wanem yupela i stap amamas long planti kain kain asainmen yupela i bin kisim?

Marie-Line: Ol brata long Betel long Frens Giana i save olsem feiveret skripsa bilong mipela em Aisaia 6:8. Olsem na taim ol i ringim mipela, ol i save tok pilai olsem, “Yupela tingim yet feiveret skripsa bilong yupela?” Mipela i save olsem asainmen bilong mipela bai senis, so mipela i save tok, “Mipela stap! Salim mipela!”

Mipela i no save skelim nupela asainmen wantaim olpela asainmen bikos dispela inap pasim mipela long amamas long ol samting mipela i gat long  nupela asainmen. Na tu, mipela yet i save go long ol bratasista na toktok wantaim ol na save gut long ol.

Jack: Long bipo, sampela pren i no laik bai mipela i go long narapela hap bikos ol i laik bai mipela i stap klostu long ol. Taim mipela i lusim Guadelup, wanpela brata i kirapim mipela long tingim gen tok bilong Jisas long Matyu 13:38: “Gaden em i dispela graun.” Olsem na taim asainmen bilong mipela i senis, mipela i save tingim gen olsem mipela i mekim wok long wankain gaden maski mipela i go long wanem wanem hap. Em i bikpela samting moa long mipela i tingim ol manmeri na teritori ol i stap long en!

Taim mipela i kamap long nupela teritori, mipela i lukim olsem ol manmeri i stap amamas. Olsem na mipela i traim long bihainim pasin bilong ol asples lain. Sampela kaikai na dring bilong ol i nupela long mipela, tasol mipela i kisim ol dispela dring na kaikai, na long wankain taim mipela i lukautim mipela yet long sait bilong helt. Mipela i stori long ol gutpela samting long olgeta asainmen mipela i kisim.

Marie-Line: Mipela i kisim planti skul long ol bratasista bilong olgeta wan wan ples. Mi tingim fes taim mipela i go long Frens Giana. Bikpela ren i pundaun na mipela i ting mipela bai stap inap long ren i pinis na bihain bai mipela i go autim tok. Tasol wanpela sista i askim mi, “Yumi redi nau long i go?” Mi kirap nogut na tok, “Hau bai yumi go?” Sista i tok, “Kisim ambrela bilong yu, na yumi bai kalap long ol baisikol na go.” Long dispela taim, mi lain long holim ambrela na ronim baisikol. Sapos mi no bin lain long mekim olsem, mi bai no gat rot bilong autim tok long taim bilong ren!

Inap 15-pela taim olgeta yupela i bin muv. Yupela i gat sampela edvais?

Marie-Line: I gat ol hatwok bilong en. Tasol em i bikpela samting long yu mas i gat wanpela hap we yu inap malolo gut long en taim yu pinis long autim tok.

Jack: Mi save penim insait bilong haus. Taim ol brata long brens i luksave olsem mipela i no inap stap longpela taim long wanpela hap, sampela taim ol i save tok, “Jack, nau yu no ken bisi long peintim haus!”

Marie-Line em savemeri bilong pekim kago! Em i save putim olgeta samting long ol boks na antap long ol boks em i save raitim ol kain tok olsem “batrum,” “toilet,” “rum slip,” na “haus kuk.” Olsem na taim mipela i go kamap long nupela haus, mipela inap putim ol boks long ples stret bilong ol. Em i save wokim lista bilong olgeta samting i stap insait long ol boks, olsem na mipela inap painim kwik ol dispela samting.

 Marie-Line: Mipela i lain long stretim gut olgeta samting, olsem na mipela inap kirap kwik long mekim wok autim tok.

Wanem kain sediul i helpim yupela long “inapim tru wok bilong God”?—2 Tim. 4:5.

Marie-Line: Long Mande mipela i save malolo na redim ol samting bilong miting. Stat long Tunde, mipela i save go autim tok.

Jack: Mipela i mas inapim sampela aua, tasol mipela i no tingting planti long dispela. Wok autim tok em nambawan bikpela samting long laip bilong mipela. Taim mipela i lusim haus na i go inap long taim mipela i kam bek, mipela i save toktok wantaim olgeta man mipela i bungim.

Marie-Line: Taim mipela i laik go long piknik, mi save kisim ol nius i go wantaim mi. Sampela manmeri i save kam stret na askim long ol buk na nius maski mipela i no tokim ol olsem mipela ol Witnes Bilong Jehova. Olsem na mipela i save larim ol stretpela lo i stiaim pasin bilong mipela na wei bilong mipela long bilas. Ol dispela samting i save pulim ai bilong ol manmeri.

Jack: Na tu, mipela i save soim gutpela pasin long ol neiba, na long dispela rot mipela inap autim tok long ol. Mi save kolektim ol pepa long graun, rausim ol pipia long pipia dram, na reikim ol pipia long banis bilong mipela. Ol neiba i save lukim ol dispela samting na sampela taim ol i save askim olsem, “Yu gat wanpela Baibel yu inap givim long mi?”

Planti taim yupela i autim tok long ol ples i stap longwe. Yupela inap tingim sampela gutpela ekspiriens?

Jack: Long Giana, i hatwok long go long sampela teritori. Planti taim mipela i go long kar long visitim ol longwe ples, na insait long wanpela wik mipela inap raun winim 600 kilomita long ol rot nogut. Mipela i amamas tru long visitim Saint Élie, em wanpela ples i stap insait tru long bikbus bilong Amason. Mipela i yusim wanpela fo-wil kar na wanpela bot. Bihain long sampela aua, mipela i go kamap. Ol manmeri bilong dispela ples i save painim gol. Ol i amamas tru long ol buk na nius bilong mipela, na sampela i givim ol liklik hap gol olsem kontribiusen bilong ol! Long apinun, mipela i soim wanpela vidio bilong oganaisesen long ol. Planti manmeri i kam bung.

Marie-Line: I no longtaim i go pinis, Jack i kisim asainmen bilong mekim tok bilong Memorial long Camopi, em wanpela liklik ples. Mipela i kalap long moto bot na lusim 4-pela aua olgeta long bihainim Wara Oyapock. Mipela i kisim bikpela amamas tru.

Jack: Long ol hap we wara i no dip, bot inap pas long ol ston. Mipela i save amamas tru long lukim wara i spit antap long ol ston. Man i stiaim bot i mas save gut tru long wei bilong stiaim bot long ol kain hap olsem. I no gat hevi i painim mipela. I gat 6-pela Witnes tasol long dispela ples, tasol inap olsem 50 manmeri i kam long Memorial, na sampela em ol lain India bilong Amerika!

Marie-Line: Sapos ol yangpela i laik givim bikpela haptaim moa long mekim wok bilong Jehova, ol bai kisim bikpela amamas tru long ol kain ekspiriens olsem. Yu mas trastim Jehova long kain taim olsem, na dispela bai strongim moa yet bilip bilong yu. Planti taim mipela i lukim stret han bilong Jehova.

Yupela i lainim sampela tokples. Yupela ting em isi long lainim ol tokples?

Jack: Nogat tru. Mi lainim ol dispela tokples na bai mi inap autim tok na helpim kongrigesen i mekim dispela tokples. Maski mi no bin traim yet long kolim sampela tok bilong tokples Sranantongo, * olsem ritim Baibel long dispela tokples, ol i makim mi long lukautim Wastaua Stadi long dispela tokples! Mi askim wanpela brata sapos ol i kliagut long ol tok mi mekim. Em i tok, “Sampela taim mipela i no kliagut long sampela tok yu kolim, tasol yu bin mekim gut.” Mi kisim bikpela helpim long ol pikinini. Taim mi mekim popaia, ol i save tokim mi, tasol ol bikpela manmeri i no save tokim mi. Mi kisim planti skul long ol yangpela.

Marie-Line: Long wanpela teritori, mi gat ol Baibel stadi long tokples Frans, tokples Potugal, na tokples Sranantongo. Wanpela sista i tok mobeta mi stat wantaim tokples i hatwok moa na pinis wantaim tokples mi save gut long en. Bihain mi luksave olsem dispela em gutpela edvais.

 Wanpela taim mi gat Baibel stadi long tokples Sranantongo na narapela stadi long tokples Potugal. Taim mi stat long mekim namba 2 stadi, sista i stap wantaim mi i tok, “Marie-Line, ating dispela i no stret!” Mi luksave olsem mi toktok wantaim wanpela meri bilong Brasil na i stret long mi mekim tokples Potugal, tasol mi mekim tokples Sranantongo!

Ol bratasista i laikim tru yupela. Olsem wanem yupela inap pas gut wantaim ol?

Jack: Provep 11:25 i tok: “Man i gat pasin bilong givim, i stap bilong em bai kamap gutpela moa.” Mipela i save redi long lusim sampela haptaim bilong mipela long helpim ol narapela. Long sait bilong stretim Haus Kingdom, sampela brata i tokim mi olsem: “Larim ol pablisa i mekim dispela wok.” Tasol mi tok: “Na mi tu mi wanpela pablisa. Olsem na sapos i gat wok bilong mekim, orait mi tu laik mekim dispela wok.” Em tru olsem yumi olgeta i nidim sampela haptaim bilong yumi yet, tasol mipela i save tingim olsem mipela i no ken larim dispela tingting i pasim mipela long helpim ol narapela.

Marie-Line: Mipela i traim olgeta kain rot long soim olsem mipela i tingim tru ol bratasista. Long dispela rot, mipela i save taim ol i nidim wanpela long lukautim o kisim ol pikinini bilong ol taim ol i pinis long skul. Mipela inap mekim sampela senis long plen bilong mipela na bai mipela inap helpim ol. Olsem na mipela inap pas gut wantaim ol narapela, na sambai long ol taim ol i nidim helpim.

Yupela i kisim wanem ol blesing taim yupela i go long ol hap i sot long ol pablisa?

Jack: Fultaim sevis i mekim na laip bilong mipela i pulap tru long amamas. Planti taim mipela inap lukim ol samting Jehova i bin wokim, na kisim amamas long en. Maski mipela i bungim sampela hevi, mipela i stap bel isi bikos mipela i save olsem ol manmeri bilong God bai sambai long mipela long olgeta hap mipela i go long en.

Taim mi yangpela yet, ol i kalabusim mi long Giana bikos mi tok nogat long kamap soldia. Mi no bin ting olsem mi bai kamap misineri na go bek long hap na kisim tok orait bilong visitim ol banis kalabus na autim tok long ol kalabusman. Tru tumas, Jehova i save givim planti blesing long yumi!

Marie-Line: Mi kisim bikpela amamas tru taim mi helpim ol narapela. Mipela i amamas tru long mekim wok bilong Jehova. Dispela wok i strongim tru marit bilong mipela. Sampela taim Jack i save lukim ol marit husat i no stap amamas, na em i save askim mi sapos mitupela inap invaitim ol long kam kaikai wantaim mitupela. Mi save tok, “Mi tu mi tingting long wankain samting!” Planti taim mitupela i save holim wankain tingting.

Jack: I no longtaim i go pinis, dokta i toksave olsem mi gat prostet kensa. Marie-Line i no amamas long harim dispela tok, tasol mi tokim em: “Daling, sapos mi dai tumora, i no olsem mi ‘stap i go inap long mi lapun tru.’ Tasol mi amamas long laip bilong mi bikos mi save olsem mi bin yusim laip bilong mi long mekim wok bilong God, na dispela em gutpela samting tru.”—Stt. 25:8.

Marie-Line: Jehova i bin larim mipela long mekim ol wok we mipela i no ting mipela bai mekim. Mipela i kisim planti blesing. Mipela i bilip tru long God, na mipela i redi long go long olgeta hap we oganaisesen bilong God i laik salim mipela i go long en!