Jack ka Marie-Line, 1988 jimboksï uénaspti májku kʼéri marhuani tiempu kompletueri. Imechaksï ísï mítekatesti eskaksï sóntku pʼindesïnga nani engaksï jarhajka ka niárastiksï marhuani Guadalupe ka Guayana Francesa ísï, ini lugaricha jimbo, Francia anapu Beteli exesïndi aianhpikueri ambe. Ju je kurhamarhikuechani máru úkuani.

¿Ambe úspi eskajtsï erakupiringa tiempu kompletueri marhuani?

Marie-Line: Jini Guadalupe tʼarhexeska, ka pʼindespka chúskutani aianhpini juchiti nándi jingoni enga kánikua tsípikua jingoni marhuakuka Jeobani. Engani na uéntapkia eskuelarhu 1985 jimbo, jirejiresï prekursora úkuarhispka jimbokani kánikua xénchasïnga kʼuiripuni.

Jack: Engani tumbipka, méntkisï erachicha jingoni jarhasïrenga engaksï tiempu kompletueri marhuauenga ka engaksï kánikua tsitienga aianhpini. Engani bakasioni uérenga eskuelarhu, prekursori auksiliari úkuarhisïrenga. Máru fin de semana jimbo, autobusi jimbochi nirasïrenga chúskutani aianhpini prekursoricha jingoni. Tátsekuachi plaiarhu nirasïrenga. Kánikuachi tsípikuarhisïrenga.

Marie-Line ka ji tembuperaspkachi 1988 jimbo. Sánisï tátsekua, eratsespka: “Úpiringachi sánderu marhuakuni Tata Diosïni. No ma ambejtsïni ójkutasïndi”. Ísï jimbo, uénaspka tiempu kompletueri marhuani ísï eska Marie-Line. Ma uéxurhini tátsekua, engachi nípka Jorhentperakuarhu para Prekursoricha, arhinhaspkachi para marhuani komu prekursori espesialicha. Uápurisïchi marhuaspka jini Guadalupe ka kánikuachi sési pʼikuarheraspka jima marhuani, tátsekuachi axanhaspka Guayana Francesa.

Iámu ini uéxurhinicha jimbo, uápurisïjtsï axanhaska marhuani. ¿Ambeksïni jarhuatasïni parajtsï sóntku pʼindeni nani engajtsï jarhajka?

Marie-Line: Erachicha engaksï Beteli japka ixú Guayana Francesa, mítesptiksï eska tekstu engachi sánderu tsitijka jindeska Isaías 6:8. Ísï jimbo, engajtsïni telefunu jimbo uandajpenga, chʼanamuparintsïni arhisïrendi: “¿Miásïntsï nákiski tekstu engajtsï sánderu tsitijka?”. Mítespkachi eska inde ambe arhikuekasïrenga eskajtsïni máteru nani ísï axapiringuia. Ka juchachi uandasïrenga: “¡Ixúchi jarhaska! ¡Axajtsïni je!”.

Nóchi tsitisïnga terukutantani jarhani nani engachi xáni marhuakia jimbanhi jingoni, jimboka indeni ambe úni, úsïnga eskachi no jukaparharaaka imani ambe engachi  iásï jatsika. Ístuchi jánguarhintasïnga jima anapu erachichani míteani nani engachi apenasi niáraka.

Jack: Ióntki, no no sési ambe eratseparini, máru amiguechajtsïni arhisïrendi eskachi no mótsepiringa jimbokaksï no uékasïrenga eskachi iauani japiringa. Peru engachi nóteru Guadalupe irekani japkia, erachijtsïni ma arhispti ambe enga Jesusi uandapka Mateu 13:38 jimbo: “Echeri jindesti parhakpini”. Ísï jimbo, engachi mótsejka máteru nani ísï, miántasïngachi eska, nani uéjkichi jarhani, imani mismu echeri jimbochi ánchikuarhixaka. Jimboka ambe enga sánderu jukaparhakueka, jindeskaksï jima anapu kʼuiripuecha nani engachi niárajka marhuani.

Engachi máteru nani niárajka, exesïngachi eskaksï kʼuiripuecha jánguarhintasïnga tsípikua jingoni irekani. Ísï jimbo, juchachi jánguarhintasïnga ísï irekani eska imecha. Ísïsti eska tʼirekua no májkueniska, peruchi tʼiresïnga ambe engaksï imecha tʼirejka ka itsïmani ambe engaksï imecha itsïmajka, peruchi kuidarikuarisïnga parachi no pʼamenchani. Jánguarhintasïngachi méntkisï ambakiti ambe uandani imani lugaricheri ambe nani engachi marhuajka.

Marie-Line: Ístuchi uánikua ambe jorhenguarhesïnga jima anapu erachicheri ambe. Miásïnga ma ambe enga úkuarhipka jiáni engachi apenasi niárapka ixú Guayana Francesa. Kánikua janixapti, ísï jimbo, eratsespkachi eskachi jatsispka para erokuarhini astaka nóteru janipiringuia parachi úni nirani aianhpini. Peru pirenchirini ma kurhamarhispti: “¿Niuachia?”. Ískuni pakaraspka ka arhispka: “¿Peru néna?”. Arhisptirini eskani pariagua pʼíkupiringa ka eskachi bisikleta jimbo nipiringa. Ísï jorhenguarhispka bisikleta jimbo jámani ka ma jájki jimbo pariagua páni jupikatini. Engani no ísï úpiringa, peekani iámu emenda jimbo no aianhpepiringa.

Sáno kinse xanhari ísïjtsï mótseskia. ¿Ambejtsï arhiapirini máteruechani inderi ambe?

Marie-Line: Ménisï úkua jukasïndi méntku mótseni jarhani. Peru kánikua jukaparhakuesti jatsini nani enga ma, agustu pʼikuarheraaka enga ma na kʼamarajkia aianhpini.

Jack: Méntkisï engachi mótsejka, pʼindesïnga kʼumanchikuani atantani incharini ísï, ísï eskachi jucha na tsitijka. Ménisï, Beteli anapu erachichaksï mítesïrendi eskachi jamberi no ióni pakarapiringa nani, ísï jimbojtsïni arhisïrendi: “Jack, iásï ásï atanta kʼumanchikuani”.

Marie-Line kánikua sési jorhenasti jatsirani iámindu ambe. Kajecharhu jatsirasïndi iámindu ambe ka jatsikusïndi ambe enga jataka mándani kaja, por ejemplu, “Baniurhu anapu ambe”, “Kuarturhu anapu ambe” o “Kosinarhu anapu ambe”. Ísï, engachi niárajkia máteru kʼumanchikuarhu, mítesïngachi náni jurajkuani  kajechani. Parachi sóntku exentani ambe engachi jirinhantani jaka, Marie-Line karasïndi ambe enga xáni jataka mándani kajarhu.

Marie-Line: Jimbokachi jorhenguarhiskia iámindu ini ambe úni, úsïngachi sóntku uénani juchari ánchikuarhitani kúnguarhikuarhu.

¿Nénajtsï jámasïni parajtsï sési úni chári ánchikuarhitani aianhpikuarhu? (2 Tim. 4:5).

Marie-Line: Lunesïchanchi mintsikuarhesïnga ka prepararikuarisïngachi para tánguarhikuecha. Ka iámindu máteru jurhiatikuechanchi uérasïnga aianhpini.

Jack: Ísïsti eska mándani kutsï jatsiskachi para máru orechani andangutaani, peruchi no indeni ambejku eratseni jarhasïnga. Ambe enga sánderu jukaparhakueka, jindesti aianhpini. Desde engachi uérajka kʼumanchikuarhu asta jiáni engachi kʼuanhatsentajka, jánguarhintasïngachi para iámindu kʼuiripuechani jingoni uandontskuarheni.

Marie-Line: Por ejemplu, méntkisï engachi nirajka nani, paasïnga máru trataduechani. Máru kʼuiripuechajtsïni andarherasïndi ka kurhachesïndijtsïni publikasionichani nájkirukachi jucha no aianguajka eskachi Jeobaeri testigueska. Ísï jimbo, jánguarhentasïngachi para sési xukuparhani ka sési jámani. Kʼuiripu iámindu ambe exesïndi.

Jack: Ístuchi aianhpisïnga engachi ambakiti ambe újka juchari besinuecha jimbo. Pʼindeska tántani basura ambe enga jándentajka, basura tsïtani ka iretarhu anapu jardinini limpiarini. Besinuechaksï exesïndi ini ambe ka kurhamarhisïndijtsïni: “¿Nójtsï kámani jaki Biblia ma engajtsïni uáka íntskuni?”.

Somentsï iauanisï niraska aianhpini. ¿Úpirintsïni aianguni ma engajtsï sánderu miájka?

Jack: Guayana Francesa jimbo, jarhastiksï máru lugaricha enga kánikua úkua jukaka niárani. Somenchi jatsisïrenga para 600 kilometru (370 millas) xanharani ma semana jimbo jimesïsï enga kánikua no sési jándepka. Miásïnga engachi ma xanhari Saint Élie nípka jini Amazonia. Parachi jima niárani, iónchi biajarispka karru ma jimbo ka tátsekua, kanoaueni jásï ma jimbo. Sáno iámindu jima anapu kʼuiripu oru jámasïndi jirinhani. Kánikuaksï tsípispti imani publikasionicha jimbo engachi íntsaapka engaksï jamberi máru uékapka sáni jarhuajpini ka íntskusptijtsïni pedasu sapirhatichani orueri. Chúrikua, jatsikuntaspkachi bideu ma engaksï Jeobaeri testiguecha úka ka uánikua kʼuiripu niraspti exeni.

Marie-Line: Sáni iónistia engaksï Jackini arhipka eska nitamatarapiringa Miántskueri arhijtsïkperatani jini Camopi. Parachi jini niárani, kuatru orachi niraspka ríu Oyapock ísï ka kanoaueni jásï ma jimbochi niraspka. Kánikuachi tsitispka.

Jack: Kánikua peligrosuesti jimesïsï enga ríu no xáni jauamika, jimboka itsï sánderu uinhamu jurhani jarhasïnga. Kánikuari chésïnga engari axuterku exejkia enga itsï uinhamu jurhani jarhajka. Ima acheeti enga kanoaueni jásïni páni jarhajka jatsisïndi para sési míteni ambe enga úni jarhajka. Peruchi tsitispka imani biajini. Nájkirukaksï seisi Testiguechajku nipka Miántskuarhu, ma sinkuenta kʼuiripuechaksï niraspti asta máru Ámerica anapu indijenecha.

Marie-Line: Ini xáni ambakiti ambeksï uáti nitamakuarhini tumbiicha ka uátsïcha engaksï uéjka sánderu marhuakuni Jeobani. Enga ma ini ambe nitamakuarhijka, uétarhisïndi kánikua mintsikani Jeobani ka ísï juchari jakajkukua sánderu kʼésïndi. Somenchi exesïnga na engajtsïni jarhuatajka Jeoba.

Chájtsï uánikua idiomechani jorhenguarhiaska. ¿Nójtsï úkua jukanchasïni jorhenguarhiani?

Jack: Jo, kánikua úkua jukasïndi. Peruni jatsipka parani jorhenguarhiani. Por ejemplu, ma xanhari jatsispka parani nitamatarani Jorhenguarhikua Aianhpiri jingoni idioma sranantongo jimbo * ka ji nótkini méni nitamataraxapka ma Bibliaeri arhintskua kúnguarhikuarhu. Kurhamarhispka erachini ma sindini kurhanguchispi ka arhisptirini: “Ménisïchi no kurhanguasïrenga máru uandakuechani, peru kánikuari sési úska”. Sapiichajtsïni kánikua jarhuataspti. Imechajtsïni kʼóru arhisïrendi ambe engani no sési uandenga. Uánikua ambe jorhenguarhispka tumbi sapirhaticheri.

Marie-Line: Lugari ma jimbo, ji Bibliaeri ambe jorhentpisïrenga francés, portugués ka sranangtongo jimbo. Pirenchirini ma arhispti eskani orheta imani idioma jimbo arhistatspepiringa enga sánderu úkua jukapka ka últimu imani jimbo enga no xáni úkua jukapka. Sóntkuni kuenta íntskukuarhispka eska ima ambakiti konseju máespka.

Ma jurhiani, tsimani kʼuiripuni nipiringa jorhendani  Bibliaeri ambe, orheta sranantongo jimbo ka tátsekua portugués jimbo. Engani uénapka jorhendani imani enga portugués uandenga, ima pirenchi engarini nípka pambeni, arhisptirini: “Marie-Line, uarhiitikini no kurhanguchexati”. Exespka eskani Brasil anapu uarhiitini ma, sranantongo jimbo uandotskuarhikuxapka ka no portugués jimbo.

Erachicha engaksï imani lugaricha jimbo anapueka engajtsï xáni marhuakia, kánikuaksïni uékasïndi. ¿Ambejtsï úski parajtsï xáni sési pájperani imecha jingoni?

Jack: Proverbios 11:25 uandasïndi: “Ima kʼuiripuni enga intsïmpitika sési nikuati”. Nóchi erokuarhisïnga para jarhuataani máteruechani. Jiáni engani jarhuajpijka para Kʼumanchikua Reinuerini kuidarini, máru erachichajtsïni arhisïndi: “Jurajku eskaksï ini ambe aianhpiricha uáka”. Peru ji arhiasïnga: “Jíjtuni aianhpiriska. Enga ánchikuarhita ambe jaka, jíjtuni uékasïnga jarhuajpini”. Ísïsti eskachi iáminduecha uétarhinchasïnga jandiajku jarhani parachi mintsikuarhini sáni, peru juchiti uarhiiti ka ji nóchi uékasïnga eska inde ambejtsïni ójkutaaka parachi jarhuataani máteruechani.

Marie-Line: Jánguarhintasïngachi pendienti jarhani erachichani jimbo. Ísïchi mítesïnga sini nema uétarhinchani jaki eskachi kuidarikuauaka imecheri sapiichani o nirani eskuelarhu pʼiuantani. Jimajkani, exesïngachi ambe engachi xáni uáka parachi úni jarhuataani. Ini ambe úparini, úsïngachi ambakiti amiguechani jatsiani ka listuchi jarhasïnga para jarhuataani jiáni engaksï uétarhinchajka.

¿Náki kóntperatechantsï intsïnhaaskia jimbokajtsï marhuaska jimesïsï engaksï sánderu aianhpiricha uétarhijka?

Jack: Tiempu kompletueri marhuani, ústi eskachi kánikua tsípikua jingoni irekaaka. Somenchi marhuaska jimesïsï nani engachi újka exeni mámaru ambe enga Jeoba xáni kueraaka. Míteskachi eska nani uéjkichi jarhani, Tata Diosïri iretajtsïni méntkisï jarhuatasïnga ka inde ambe úsïndi eskachi no xáni uandanhiauaka nájkirukachi nitamakuarhiaka ambe ma.

Engani tumbipka, ónhakata jarhaspka ixú Guayana Francesa jimbokani no uékaspka soldadu úkuarhini. No méni eratsespka eskani kʼuanhatsentapiringa komu misioneru ma ka eskani úpiringa kárselichani jimbo nirani aianhpini. Ísïsti, Jeobajtsïni kánikua újchakurasïndi.

Marie-Line: Ambe enga újka eskani sánderu tsípikua jingoni irekaaka, jindesti máteruechani jarhuataani. Kánikuachi tsitisïnga Jeobani marhuakuni. Ini ambe úni, ístujtsïni jarhuatasti parachi temungurhirini sési irekani. Ménisïrini Jack kurhamarhisïndi sinchi uá pʼímarhini temungurhirini ma enga uétarhinchani jarhajka para uinhaperanhantani. Ka uánikua xanhari arhisïnga eskani jíjtuni májkueni eratsexapka. Somenchi májkueni ambe eratseni jarhasïnga.

Jack: Máru uéxurhini ísïstia engani kanseri de próstata exeminhantaka. Ka nájkiruka Marie-Line no uéjka eskani inderi ambe uandaaka, arhisïnga: “Ija, engani pauani uarhipiringa, jindepirindi jimbokani pʼamenchaxaka. Peruni tsípikua jingoni uarhipiringa míteparini eskani úraska juchiti tsípikuani parani Jeobani marhuakuni, ambe enga meru jukaparhakueka” (Gén. 25:8).

Marie-Line: Jeobajtsïni íntsaasti ánchikuarhitechani engachi no méni erokuarhiani japka ka jarhuatastijtsïni imani ambe úni engachi no méni eratsepka. Uánikua kóntperatechantsïni íntsaasti. Niuakachi nani uéjki engajtsïni Jeobaeri kúnguarhikua arhiaka, jimbokachi mintsikasïnga eskajtsïni Jeoba méntkisï jarhuatasïnga.