Jack na Marie-Line ŵachitira lumoza uteŵeti wanyengozose kwambira mu 1988. Pakuti ŵakuŵa ŵakunozgeka kusintha, iwo ŵachita mauteŵeti ghakupambanapambana mu Guadeloupe na French Guiana. Ofesi ya munthavi ya France ndiyo yikulaŵilira malo agha. Lekani tiŵafumbeko mafumbo ghachoko waka.

Chifukwa wuli mukamba uteŵeti wanyengozose?

Marie-Line: Ine nkhakulira ku Guadeloupe, ndipo kanandi nkhapharazganga na amama zuŵa lose. Nakuti amama ŵakaŵa Kaboni wakulimbikira chomene. Pakuti nkhuŵatemwa ŵanthu, so nati namalizga waka sukulu mu 1985, nkhamba upayiniya.

Jack: Apo nkhaŵa mwana, nyengo zose nkhatemwanga kuchezga na ŵateŵeti ŵanyengozose awo ŵakatemwanga chomene kupharazga. Kanandi nkhachitanga upayiniya wakanyengo para nili pa holide. Mu mazuŵa gha Chisulo na Sabata, nyengo zinyake tikendanga pa basi kuti tikapharazge na ŵapayiniya ku chigaŵa icho ŵakapharazganga. Tikapharazganga zuŵa lose ndipo pamanyuma tikalutanga ku nyanja. Nyengo iyi yikaŵanga yakukondweska chomene.

Nyengo yichoko waka yati yajumphapo nati natorana na Marie-Line mu 1988, nkhajifumba kuti, ‘Tilije chakutimbanizga chilichose, so talekerachi kuti tisazgireko uteŵeti withu?’ Ntheura nane nkhambapo upayiniya. Pati pajumpha chaka chimoza kufuma apo tikanjilira sukulu ya ŵapayiniya, tikimikika kuŵa ŵapayiniya ŵapadera. Tikachita mauteŵeti ghakupambanapambana mu Guadeloupe pambere tindasamire ku French Guiana.

Mu vyaka ivyo vyajumpha uteŵeti winu wasintha kanandi waka. Kasi ntchivichi chamovwirani kuti muzgoŵerenge luŵiro para uteŵeti wasintha? 

Marie-Line: Ŵabali pa Beteli ya French Guiana ŵakalimanyanga lemba ilo tikulitemwa la Yesaya 6:8. So para ŵatiyimbira foni, kanandi ŵakambanga kutifumba kuti, “Kasi mukulikumbuka lemba ilo mukulitemwa?” Para ŵatifumba nthena tikamanyanga kuti uteŵeti wasintha. Ntheura tikazgoranga kuti, “Ndise pano! Titumani!”

Tikuyaniska yayi uteŵeti withu uphya na wakale chifukwa tikuwona kuti para tingachita nthena mbwe tikondwenge yayi na uteŵeti uphya. Kweniso  tikuyezgayezganga kuŵa paubwezi na ŵabali na ŵadumbu ŵa ku malo uko tasamira.

Jack: Pakwamba ŵabali na ŵadumbu ŵanyake ŵakakhumbanga yayi kuti tilekane nawo, so ŵakayezganga kutinyengelera kuti tileke kusama. Kweni tikati tafumako ku Guadeloupe, mubali munyake wakatikumbuska mazgu gha Yesu agho ghali pa Mateyu 13:38 ghakuti: “Munda ni charu.” So para uteŵeti wasintha, tikujikumbuska kuti tichali kuteŵetera mu charu chimoza vilije kanthu malo agho ise tili. Nakuti chakuzirwa chomene ni ŵanthu na chigaŵa chakupharazgako.

Para tafika ku chigaŵa chiphya, tikuwona kuti ŵanji ŵakukhala waka mwakukondwa. Ntheura nase tikuyezgayezga kukhala nga umo ŵenecho ŵakukhalira. Nangauli chakurya chikuŵa chakupambana, kweni nase tikurya ivyo nawo ŵakurya kweniso kumwa ivyo nawo ŵakumwa, kweni kuti waka pa nkhani iyi tikuŵa maso. Tikuyezgayezga kuyowoya viwemi vya uteŵeti uliwose uwo tapika.

Marie-Line: Kweniso tikusambirako vinandi ku ŵabali na ŵadumbu. Nkhukumbuka icho chikachitika tikati tafika waka ku French Guiana. Kukalokwanga vula yikuru, so ine nkhaghanaghananga kuti tilutenge kukapharazga para vula yakata. Kweni mudumbu munyake wakanifumba kuti, “Asi tinganyamuka kukapharazga?” Nkhazizwa chomene ndipo nkhazgora kuti, “Tilutenge wuli uku vula yichali kulokwa?” Mudumbu uyu wakazgora kuti, “Torani ambulera, ndipo tendenge pa njinga.” Ntheura nkhasambira kukolera ambulera uku ukwendeska njinga. Nilekenge kusambira, mphanyi vikanitondanga kupharazga mu nyengo ya vula.

Mwakhala mukusamuka maulendo 15. Kasi muli na masachizgo ghalighose agho ghangawovwira ŵanji pa nkhani ya kusamira kunyake?

Marie-Line: Ntchakusuzga nadi kusamira ku malo ghanyake. Ndipouli, ntchakuzirwa chomene kusanga malo agho ukuwona kuti ungaŵa wakufwatuka.

Jack: Kanandi nyumba iyo tinjirengemo nkhutemwa kuyipentaso mukati. Para ŵabali ku ofesi ya munthavi ŵamanya kuti nikhaliskengeko yayi uko ŵatituma, nyengo zinyake ŵakuniphalira kuti, “Jack kujisuzga yayi na kupenta nyumba iyi!”

Marie-Line wakumanya kupakira makora vinthu. Wakupakira makora vyose mu makatoni na kulembapo. Mwachiyelezgero, wakulembapo kuti ivi ni “vyakubafa” “vyakuchipinda” panji “vyakukhichini.” So para tafika mu nyumba yithu yiphya, chikuŵa chipusu kuŵika makatoni ghithu mu vipinda vyakwenelera. Mu katoni yiliyose mukuŵa chipepara icho  walembapo katundu uyo wapakiramo, ndipo ivi vikovwira kuti tisange luŵiro chinthu icho tikukhumba.

Marie-Line: Pakuti tasambira kuchita vinthu mwandondomeko, vikutovwira kuti tambenge mwaluŵiro uteŵeti withu para tafika waka ku malo agho tasamirako.

Kasi mukugaŵa wuli nyengo mwakuti ‘mufiske uteŵeti winu mwakukwana’?—2 Tim. 4:5.

Marie-Line: Pa Mande, tikupumura na kunozgekera maungano. Kwamba pa Chiŵiri, tikunjira mu uteŵeti.

Jack: Nangauli pali maora ghakukhumbikwa agho tikwenera kufiska mwezi uliwose, kweni chomene mtima withu ukuŵa pakufiska waka maora yayi. Chakuzirwa chomene kwa ise nkhupharazga. Para tanjira waka mu uteŵeti, tikuyezgayezga kupharazgira waliyose uyo takumana nayo.

Marie-Line: Mwachiyelezgero, para tamutembeya waka nyengo zose nkhuyegha mathirakiti. Ŵanthu ŵakutipempha mabuku, nanga ni para tindaŵaphalire kuti ndise Ŵakaboni ŵa Yehova. Lekani nyengo zose tikuŵa maso pa nkhani ya kavwaliro na umo tikuchitira vinthu. Ŵanthu ŵakuwona vinthu ivi.

Jack: Kweniso tikupharazga pakuchita milimo yalusungu ku ŵazengezgani ŵithu. Nkhusoranga mapepara, kuwunjika viswaswa na kukhutura vinthu ivyo vili mu mabini. Ŵazengezgani ŵithu ŵakuwona vyose ivi, ndipo nyengo zinyake ŵakutifumba kuti, “Kasi muli na Baibolo lakuti mungatigaŵirako?”

Muli kupharazgako kanandi waka ku vigaŵa vyakumizi chomene. Kasi mukukumbukirapo chinthu chinyake chapadera icho chikachitika pa maulendo ghinu agha?

Jack: Ku Guiana, vigaŵa vinyake ni vyakusuzga kufikako. Kanandi mu sabata yimoza pera tikendanga mtunda wa makilomita 600 mu misewu yakunangika chomene. Ulendo uwo tikukumbuka chomene ni uwo tikaluta ku St. Élie, ku nkhorongo ya Amazon. Tikenda maora ghanandi chomene kuti tikafike ku malo agha chifukwa misewu njakusuzga, so mtunda unyake tikenda pa galimoto, unyake pa boti. Ŵanthu ŵanandi ŵa ku malo agha ŵakagwiranga ntchito ku migodi. Chifukwa cha kuwongera mabuku ghithu, ŵanyake ŵakatipa malibwe gha golide kuŵa chakupeleka. Namise tikaŵalongora yimoza mwa mavidiyo ghithu. Ŵanthu ŵanandi ŵakiza.

Marie-Line: Mwasonosono apa, Jack ŵakamupempha kuti wakayowoye nkhani ya Chikumbusko ku Camopi. Kuti tikafike ku malo agha, tikenda maora ghanayi pa boti mu Mlonga wa Oyapock. Ukaŵa ulendo wakukondweska chomene.

Jack: Mu malo umo maji ghakaŵanga ghachoko, mukaŵanga mwakofya chomene. Chikaŵa chakukondweska chomene para boti lili pafupi kufika mu malo agha. Wakwendeska boti wakeneranga kuŵa waluso chomene kuti wajumphe mu malo agha. Kweni ukaŵa ulendo wakukondweska chomene. Nangauli Ŵakaboni 6 pera ndiwo ŵakaŵapo pa Chikumbusko, kweni ŵanthu pafupifupi 50 ŵakiza. Ŵanyake mwa ŵanthu aŵa ŵakaŵa ŵa mtundu wa Amerindians.

Marie-Line: Ŵawukirano nawo ŵangaŵa na nyengo zakukondweska za nga ni izi usange ŵangachita vinandi pakuteŵetera Yehova. Mukwenera kugomezga Yehova pa nyengo za nga ni izi, ndipo chipulikano chinu chingakhozgeka. Kanandi tikuwona umo Yehova wakutovwilira.

Mwasambira viyowoyero vinandi. Kasi kwa imwe ntchipusu waka kusambira chiyowoyero?

Jack: Yayi. Nkhasambira viyowoyero ivi mwakuti nipharazgenge makora na kovwira mpingo. Nkhachitiska Sambiro la Gongwe la Mulinda mu Chisrantongo * pambere nindapikepo na nkhani yakuŵazga Baibolo wuwo. Nkhafumba mubali umo nkhachitiskira Sambiro. Iyo wakazgora kuti, “Nangauli vinyake tapulikiskanga yayi, kweni languŵa makora.” Ŵana ŵakanovwira chomene. Para nabudiska, ŵakaniphaliranga, kweni ŵalara ŵakaniphalirangapo yayi. Nkhasambira vinandi ku ŵawukirano.

Marie-Line: Mu chigaŵa chinyake, nkhaŵa na masambiro gha Baibolo mu Chifurenchi, Chiphwitikizi, na Chisranantongo. Mudumbu munyake wakasachizga kuti para nkhuchitiska masambiro agha, nambenge na chiyowoyero icho nkhuchimanya makora yayi na kumalira na chiyowoyero icho nkhuchimanya makora. Mwaluŵiro nkhamanya uwemi wa ulongozgi uwu.

 Zuŵa linyake, nkhasambira Baibolo na ŵanthu ŵaŵiri. Wakwamba mu Chisranantongo ndipo wachiŵiri mu Chiphwitikizi. Apo nkhambanga kusambira na munthu wachiŵiri, mudumbu uyo tikendera lumoza wakati, “Marie-Line, nkhuwona kuti apa pali suzgo!” Nkhamanya kuti nkhayowoyanga na munthu wa ku Brazil mu Chisranantongo m’malo mwa kuyowoya nayo mu Chiphwitikizi.

Ŵanthu awo mwateŵetera nawo ŵakumutemwani chomene. Ntchivichi chamovwirani kuti mutemwanenge chomene na ŵabali aŵa?

Jack: Lemba la Zintharika 11:25 likuti: “Uyo wakupa mwawanangwa vimwenderenge makora.” Tikutemwa chomene kuchezga na ŵabali na ŵadumbu na kuŵawovwira. Para tikunozga Nyumba ya Ufumu, ŵanyake ŵakuniphalira kuti: “Lekani ŵachite mbapharazgi.” Kweni ine nkhuzgoranga kuti: “Ok naneso ndine mupharazgi. So para pali ntchito, nane nkhwenera kugwirako.” Nangauli tikumanya kuti nase tikukhumbikwira kuŵa na nyengo yakuchita vinthu patekha, kweni kanandi tikujikumbuska kuti vyakuchita vithu vingatitondeskanga yayi kuchitira ŵanyithu viwemi.

Marie-Line: Tikuyezgayezga kutemwa ŵabali na ŵadumbu ŵithu. Ivi vikutovwira kumanya usange ŵakukhumba munthu munyake kuti waŵapwelelereko ŵana panji kukaŵatora ku sukulu. Para vyaŵa nthena, tikuyezga kusintha ndondomeko yithu mwakuti tiŵawovwire. Ntheura, ivi vikutovwira kuŵa nawo paubwezi, kweniso kuŵa ŵakunozgeka kuŵawovwira.

Kasi mwatumbikika wuli chifukwa cha kuteŵetera uko kukukhumbikwa ŵapharazgi ŵanandi?

Jack: Tatumbikika chomene chifukwa cha kuŵa mu uteŵeti wanyengozose. Taŵa na mwaŵi wakusangwa na chilengiwa cha Yehova. Nangauli tasangana na masuzgo, kweni tili na mtende wa mu mtima chifukwa tikumanya kuti Chiuta watovwirenge kulikose uko tingaŵa.

Apo nkhaŵa munyamata, nkhajalirika mu jele ku French Guiana chifukwa chakuleka kunjilirapo pa vya charu. Nkhamanya yayi kuti zuŵa linyake nizamuweleraso ku malo agha nga ni mishonale na kuzomerezgeka kupharazga ku majele gha ku charu ichi. Nadi Yehova wakuŵanora yayi vitumbiko ŵateŵeti ŵake.

Marie-Line: Nkhukondwa chomene para nkhovwira ŵanyane. Tili ŵakukondwa chomene kuŵa mu uteŵeti wanyengozose. Watovwiraso kukhozga nthengwa yithu. Nyengo zinyake mfumu wane Jack wakunipempha kuti ticheme mbumba iyo yikukhumbikwira kukhozgeka. Kanandi nkhuzgora kuti, “Nane ndivyo naghanaghananga.” Ivi vyachitikapo kanandi waka.

Jack: Mwasonosono apa, ŵali kunisanga na kansa. Marie-Line wakukondwa yayi para nkhumuphalira kuti: “Muwoli wane, nindachekure yayi, kweni nanga ningafwa, nkhumanya kuti nateŵetera Yehova umoyo wane wose, ndipo ichi chikunovwira kuti niŵe wakukondwa.”—Gen. 25:8.

Marie-Line: Yehova watipa uteŵeti uwo tikakhazganga yayi, ndipo watizomerezga kuchita vinthu ivyo tikaghanaghanangapo yayi. Tasangana na vinthu vinandi viwemi pa umoyo withu. Tilutenge kulikose uko gulu la Yehova latituma chifukwa tikugomezga kuti nyengo zose Yehova watovwirenge.