Jaʼto tal ta 1988 te Jack sok Marie-Line jun-nax ayik ta abatinel ta tiempo kompleto. Naʼbil sbaik te oranax ya xkʼayik te banti ya xkʼotike sok bayal banti abatinemik ta lum Guadalupe sok ta Guayana Francesa te jaʼ wentainbil yuʼun te sukursal yuʼun Francia. Ya jpasbeytik jojkʼoyeletik te ermanoetik ini.

¿Bin yuʼun la ataik ta nopel te ya x-abatinex ta tiempo kompleto?

Marie-Line: Chʼion ta lum Guadalupe. Kʼayemon-a te ya jchol skʼop Dios sjunal kʼajkʼal sok te jmama te spisil-ora jich la spase. Kʼux ta koʼtan te ants winiketike jaʼ yuʼun kʼalal laj koʼtan ta nop jun ta 1985 ochon ta prekursora.

Jack: Te kʼalal keremonto-ae la jokin te ermanoetik te ya x-abatinik ta tiempo kompleto sok te mero ya smulanik scholel te skʼop Diose. Kʼalal ya yakʼbonik bakasion ta eskuela ya x-ochon ta prekursor auksiliar-a, ay baeltik te ta jujun slajibal semana sjunal kʼajkʼal ya jcholtik skʼop Dios sok te prekursoretike. Te kʼalal ya xlaj koʼtantik ta scholel skʼop Dios-ae ya xbootik ta tiʼ mar, bayal la jmulan.

Nujpunon sok te Marie-Line ta 1988. Cheʼoxeb kʼajkʼal ta patil jich la jnop: «Ya skʼan bayalxan bin ya jpas ta abatinel ta stojol te Diose, maʼyuk bin ya smakon». Jaʼ yuʼun kajon ta abatinel ta tiempo kompleto jich bitʼil te kiname. Jun jaʼbil ta patil bootik ta eskuela yuʼun prekursor, tey-abi la kichʼtik akʼel ta prekursor espesial. Kʼootik ta bayal lugaretik ta Guadalupe te banti la jmulantik scholel te skʼop Diose. Ta patil la kichʼtik tikunel ta Guayana Francesa.

Bayal te banti abatinemexe, ¿bin ya apasik yuʼun ya xkʼayex te banti ya xkʼoexe?

Marie-Line: Te ermanoetik ta Betel ta Guayana Francesa snaʼojik-a te jaʼ kʼaxto ya jmulankotik te teksto yuʼun Isaías 6:8, jaʼ yuʼun kʼalal ya skʼoponotik tal ta telefono ay jich ya yalbotik ta tajimal: «¿Yatobal xjul ta awoʼtanik te bin teksto ya amulanike?». Jich jnaʼojtikix-a te ya kichʼtik yan asignasion, jaʼ yuʼun jich ya kaltik: «¡Liʼ ayonkotik! ¡Tikunawonkotik bael!».

Te kʼalal ya kichʼtik yan asignasion maba ya jpajtik sok te banti kʼaxotik tale, melel maniwan ya jmulantikix-a te yachʼil asignasione. Jaʼnix jich  maba ya jmaliytik te jaʼ nail ya xnoptsaj ta jtojoltik te ermanoetik te banti ya xkʼootike.

Jack: Ay kamigotaktik-a te ma skʼanik te namal ya xbootike, melel jaʼ ya skʼanik te nopol ya kil jbatik soke. Pero te kʼalal la kijkitaytik te lum Guadalupe jtul ermano la yalbotik te bin ya yal Mateo 13:38: «Te qʼuinal, ha te bahlumilal» te xchie. Jaʼ yuʼun te kʼalal ya xbootik ta yan asignasion ya xjul ta koʼtantik te jun-nax te kʼinal te banti yakotik ta aʼtel manchukme yanyantik lugar te banti ya x-abatinotike. Melel ma jaʼuk mukʼ skʼoplal te territorioe, jaʼ mukʼ skʼoplal te ants winiketike.

Te kʼalal ya xkʼootik ta yachʼil asignasion ya jtatik ta ilel te ay stseʼelil yoʼtan te ants winiketike, jaʼ yuʼun ya jpastik tulan ta snopel te bitʼil ya xkuxinike. Ya jpastik tulan ta sweʼel te bin ya sweʼike manchukme maba ya jnaʼbeytik sba, pero ya jkanantay jbatik yuʼun ma stsakotik chamel. Ta jujun asignasion te banti ya xkʼaxotike, jpasojtik tulan te lek ya kalbeytik skʼoplale.

Marie-Line: Bayal bin la jnoptik ta swenta te ermanoetik te banti ya xkʼootike. Ya xjul ta koʼtan te bin kʼot ta pasel te kʼalal mato jaluk jkʼoeltik ta Guayana Francesa. Yak ta yakʼel bayal jaʼal-a, jich yuʼun la jnoptik te ya jmaliytik ya xkʼax te jaʼal swenta ya xbootik ta scholel te skʼop Diose, pero jtul ermana jich la yalbon: «¿Chapalatixbal?». Chajpto la kaʼiy-a, jich yuʼun la kalbey: «Pero mato kʼaxem te jaʼale». La yalbon te ya xbootik ta bisikleta sok te ya jtuchtik bael te jsombriyatike. Jich la jnop stijel ta jun-nax jkʼab te bisikletae, melel ta yan jkʼab jaʼ ya jtsak te sombriyae. Te manchuk jich la jnop spasel-abi maniwan lokʼon ta scholel skʼop Dios te jayeb kʼajkʼal la yakʼ te jaʼale.

Ayniwan quince buelta ajeltayoj anaik, ¿bin-utʼil apasojik?

Marie-Line: Aynix wokol ya kaʼiytik te ya jeltay jnatike. Pero mukʼ skʼoplal te leknax ya kaʼiy jbatik te banti ya jkux koʼtantik te kʼalal ya xjulotik ta scholel te skʼop Diose.

Jack: Ta jujun buelta te ya jeltay te jnatike, kʼayemon-a te ya jbon te yutil te nae. Te ermanoetik ta Betel ay ya snaʼik-a te maniwan jal ya xnainotik tey-ae, jaʼ yuʼun ya yalbonik: «Jack, jaʼ lek te ma xa bon te nae».

Te Marie-Line mero ya snaʼ yotsesel ta kajaetik te jbiluktike sok ya stsʼibay tey-a te banti ya xtuun, jich bitʼil «Baño», «Kuarto» o «Kosina». Jich te kʼalal ya xkʼootik ta na te banti ya xnainotike, ya jnaʼtik banti ya kakʼtik te kajaetike. Swenta maba  wokol ya jtatik ta leel te jbiluktike te Marie-Line ya stsʼibay ta jun lista te bintik ay ta jujun kajae.

Marie-Line: Te bitʼil jnopojtikix ta lek schajpanel te jbiluktike, oranax ya xjajchotik ta spasel te kaʼteltik te banti ya xkʼootike.

¿Bin-utʼil ya achajpanik te bin ya apasik jujun kʼajkʼal swenta ya ajuʼtesik te awaʼtelike? (2 Tim. 4:5).

Marie-Line: Ta jujun lunes ya jkux koʼtantik sok ya jchajpan jbatik ta swenta te tsoblejetike. Te yantik kʼajkʼal ya jcholtik skʼop Dios.

Jack: Manchukme tsʼakal ya skʼan ya jpastik te jayeb ora ya kichʼtik kʼanbeyele, ma jaʼuk mukʼ skʼoplal ta koʼtantik-abi. Jaʼ mukʼ skʼoplal ta koʼtantik scholel te skʼop Diose. Te kʼalal ya xlokʼotik ta jnatik ya xjajchotik ta scholbeyel skʼop Dios spisil te machʼatik ya jtatik ta be jaʼto te kʼalal ya sujtotik ochele.

Marie-Line: Te kʼalal ya xbootik ta paxial ya kichʼ bael cheʼoxeb tratadoetik. Ay machʼatik ya xtal skʼanbotik publikasionetik manchukme maba kalojbeytik te testigootik yuʼun Jehová. Jaʼ yuʼun ya jpastik tulan te lekuk te bin yilel te jkʼuʼ jpakʼtik sok te jtaleltike. Melel te ants winiketik jaʼ ya yilik-abi.

Jack: Jaʼnix jich ya kakʼtik ta ilel te j-abatotik yuʼun Dios te kʼalal ay bin ya jpastik ta stojol te jpatxujktike. Kʼayemon-a te ya jtam te junetik chʼojbil ta be, ya jchʼoj bael te kʼaʼpal sok ya jtsob te yabenal teʼ te ay ta jardin ta lugar-abi. Te jpatxujktik ya yilik-abi sok ay ya yalbonik: «¿Aybal jpajkuk Biblia te ya xjuʼ ya awakʼbone?».

Ay bayal buelta namal ya skʼan ya xbaex ta scholel skʼop Dios, ¿yabal xjul ta awoʼtanik junuk?

Jack: Ay lugaretik ta Guayana Francesa te banti wokol ya xkʼootike. Bayal buelta la jbeentaytik 600 kilometro ta jun semana te banti mero chujkultik te bee. Ma xchʼay ta koʼtan te kʼalal bootik ta Saint Élie ta Amazonia. Swenta ya xkʼootik tey-a, beenotik chaneb ora ta jun karro te ya x-och ta chujkultik be, ta patil mootik ta jun lancha te ay smotoril. Jteb ma spisilik te machʼatik nainemik tey-ae ya x-aʼtejik ta sleel oro. Bayal la smulanik te junetik la kakʼbeytike, jaʼ yuʼun ay la yakʼik ta majtanil chʼin xejtʼelul oro ta swenta te junetike. Ta ajkʼabal-abi la kakʼbeytik yilik jun bideo yuʼun te organisasion, bayal machʼa kʼotik.

Marie-Line: Ayix tal kʼajkʼal la yichʼ ikʼel te Jack ta yakʼel jun diskurso ta Snaʼojibal slajel te Jesús ta lum Camopi. Swenta ya xkʼootik tey-a, beenotik chaneb ora ta lancha te ay smotoril ta mukʼul jaʼ te Oyapock sbiile. Bayal la jmulankotik.

Jack: Xiʼbantik sba te banti pekʼel sok te ay yip ya xbeen te mukʼul jaʼe. Chajpto ta ilel te kʼalal yakotik ta noptsajel bael tey-ae. Jich yuʼun te winik te ya stij te lanchae ya skʼan te yakuk snaʼ ta lek stijele. Bayal la jmulantik. Manchukme jaʼnax kʼotik waktul Testigoetik ta Snaʼojibal slajel te Jesuse, kʼotik cincuenta ta tul ants winiketik sok ay kʼotik indijenaetik.

Marie-Line: Te bintik tʼujbil ya xkʼax ta jkuxlejaltike, jaʼ te bin ya xjuʼ ya smulanik-euk te achʼix keremetik te ya skʼan ya x-abatinikxan ta stojol te Jehovae. Te kʼalal ay bin wokol ya xkʼax ta jtojoltike, jaʼ ya skʼan smukʼulin koʼtantik te Jehová, jichme ya stsakxan yip te schʼuunel koʼtantike. Yame jtatik ta ilel bayal buelta te ya skoltayotik te Jehovae.

Bayal kʼopil anopojik, ¿yuʼunbal maba wokol ya awaʼiyik snopel?

Jack: Wokolnix, pero la jnop ta skaj te bayal ya xtuune. Jun ejemplo, jaʼ te kʼalal la jta skʼasesel Te J-ilkʼinal ta toyol ta kʼopil sranangtongo * manchukme maʼyuk jtaoj skʼoponel-a te Biblia ta kʼopil-abi. La jojkʼoybey jtul ermano teme kʼot ta yoʼtan te bin la kale, jich la yalbon: «Aynix ma la kaʼiytik pero lek la apas» xchi te ermanoe. Pero jaʼ la skoltayonik bayal te alaletik, melel ya yalbonik te banti ya xchʼayone yan stukel te ermanoetike maba ya yalbonik ta jamal. Jaʼ bayal la snojptesonik te alaletike.

Marie-Line: Ta jun lugar la kakʼ kurso yuʼun Biblia ta francés, portugués sok sranangtongo. Jtul ermana la yalbon te jaʼuk nail ya kakʼ te kurso ta kʼopil te tulan ya kaʼiy te jaʼ te portugués sok te jaʼuk patil ya kakʼ te banti ma mero tulan ya kaʼiye. La kil te yuʼun-nix lek-a te bin la yalbone.

 Jun buelta la kakʼ cheb kurso yuʼun Biblia, jun ta kʼopil sranangtongo sok ta kʼopil portugués. Kʼalal yakonix ta yakʼel-a te schebal kursoe te ermana te jokinej-a jich la yalbon: «Marie-Line ma xkʼot ta yoʼtan te bin yakat ta yalel te antse». Jich la jnaʼ stojol te yakon ta kʼop ta sranangtongo sok jtul ants te ya xkʼopoj ta portugués te talem ta Brasil.

Jnaʼojtik te skʼanojex te ermanoetik te banti kʼaxemex ta abatinele, ¿bintik la apasik yuʼun ya awamigoin abaik ta lek sok te ermanoetike?

Jack: Te Proverbios 11:25 jich ya yal: «Te machʼa ma pʼisbiluc nax ya yacʼ, ya xpʼohl bintic ay yuʼun». Ma cheʼoxebuk buelta ya jnoptik te kʼalal ay machʼa ya jkoltaytike. Kʼalal ya xkoltaywanon ta slekubtesel te sNail Tsoblej ay ermanoetik te jich ya yalbonik: «Jaʼ xa awakʼbey spas te publikadoretike». Pero jich ya kaltiklanbey: « Publikadoron-euk. Ya jkʼan xkoltaywanon ta aʼtel». Ta melel aynix ya jkʼan ya jkux koʼtantik, pero ma jaʼuk ya kakʼ smakotik-abi yuʼun ya jkoltaytik te yantike.

Marie-Line: Ya jpastik tulan te ya kakʼbeytik yil te ay skʼoplal ta koʼtantik te ermanoetike. Jich ya jnaʼtik teme ya skʼanik koltayel ta skanantayel te alaletik o teme ya skʼan ya xbajt jtatik tal ta eskuela te alaletike. Te kʼalal ya jnaʼtik stojol te ya skʼanik koltayel, ya jlokʼesbeytik yorail. Jich ya kamigoin jbatikxan sok ya xjuʼ jkoltaytik te kʼalal ya xtuun yuʼunike.

¿Bintik bendision ataojik yuʼun te abatinemex te banti maʼyuk bayal publikadoretike?

Jack: Bayal jtaoj stseʼelil koʼtantik yuʼun te ya x-abatinotik ta tiempo kompleto. Bayal buelta abatinotik ta lugaretik te banti ya xjuʼ ya jmulantik te bintik tʼujbil spastiklanoj te Jehovae. Manchukme kʼaxem bayal jwokoltik, maba lajem te slamalil koʼtantike, melel jnaʼojtik te spisil-ora ya skoltayotik te lum yuʼun Dios chikan te banti ayotike.

Kʼalal keremonto-ae, la kichʼ otsesel ta karsel ta Guayana Francesa ta skaj te maba la jkʼan ochon ta soldado. Pero maʼyuk bin-ora la jnop te ya xjuʼ ya yakʼbonik permiso yuʼun ya x-ochon yan buelta tey-a jich bitʼil misionero swenta ya jcholbey yaʼiyik skʼop Dios te machʼatik chukulike. Ta melel kʼax bayal bendision yakʼojbotik te Diose.

Marie-Line: Jaʼ ya yakʼbonxan stseʼelil koʼtan skoltayel te yantike. Bayal ya jmulantik abatinel ta stojol te Jehová sok jaʼ skoltayojotik te joʼon sok te jmamalal yuʼun kʼux ya kaʼiyxan jbatik. Te Jack ay ya sjojkʼoybon teme ya xjuʼ ya kikʼtik ta weʼel jtul ermano sok yinam te pejkʼajem te schʼuunel yoʼtanik, bayal buelta ya kalbey te jichnix yakon ta snopel-euke. Bayal buelta jich jpasojkotik.

Jack: Te ayix xcheʼyoxebal tal jaʼbil la kichʼ tabeyel kanser ta próstata. Manchukme te Marie-Line ma smulan, jich kalojbey: «Marie-Line teme ya xlajon pajele, manchukme mato mamal ya xlajon maba ya jmel koʼtan yuʼun, melel jnaʼoj te la jpas te bin kʼax mukʼxan skʼoplal jaʼ te la jtuuntes te jkuxlejal ta stojol te Jehovae» (Gén. 25:8).

Marie-Line: Te Jehová bayal bin yakʼoj jpastik te xujtʼ maʼyuk talem ta koʼtantik-ae. Bayal bendision yakʼojbotik. Ya xbootik chikan banti ya kichʼtik tikunel bael yuʼun te organisasion, melel jkʼaxel jaʼ smukʼulinej koʼtantik te Jehová.