Джек но Мари-Лина 1988-тӥ арысен, вань дырзэс сётыса, ӵош ужало-тыршо. Соос ӝог дышизы улоназы воштӥськонъёслы, но со юрттӥз соослы быдэсъяны Инмарлы ужан-тыршонэн герӟаськем ужъёсты Гваделупа шормуӵын но Француз Гвиана мукожын, кудъёсыз сярысь Франциысь филиал сюлмаське. Юанъёс сётъяса, ми куримы соосты ӧжытак асьсэос сярысь вераны.

Мар тӥлесьтыд мылкыддэс ӝутӥз, вань дырдэс сётыса, ужаны-тыршыны?

Мари-Лина: Мынам пичи дыры Гваделупаын ортчиз. Тодам вайисько на, ӵем дыръя ми быдэс нунал тодытыса ветлӥмы анаеным ӵош, кудӥз вань улонэз ӵоже ӟырдыт мылкыдын ужаз-тыршиз. Мон адямиосты яратӥсько, соин ик 1985-тӥ арын, школаын дышетсконме быдтэме бере, мон пионер луыса ужаны-тыршыны кутски.

Джек: Егит дыръям мон ӵем вераськылӥ вань дырзэс сётыса ужась-тыршисьёсын, кудъёсыз туж яратӥзы тодытыны. Каникулъёсы дыръя мон юрттӥсь пионер луыса ужай-тырши. Куддыръя шутэтскон нуналъёсы ми пионеръёсын ӵош соослэн тодытонлы висъям интыязы автобусэн ветлӥмы. Ми быдэс нунал тодытӥськомы, нош собере ярдуре шутэтскыны мынӥськомы вал. Макем со умой нуналъёс вал!

1988-тӥ арын ми Мари-Линаен кышнояськимы, но соберегес ик мон аслым верай: «Милемыз номыр но уг куты. Ми ужан-тыршонын тросгес лэсьтыны быгатӥськомы». Мари-Линаен ӵош ми пионер луыса ужаны-тыршыны кутскимы. Нош ар ортчыса, пионеръёсты дышетӥсь школаез йылпумъяммы бере, ми нимысьтыз пионеръёс луимы. Нырысь ми Гваделупаын пӧртэм кенешъёсын ужамы-тыршимы, нош собере милемлы ӵектӥзы Француз Гвианае мыныны.

Ужан-тыршон аръёсты ӵоже тӥледыз трос пол выль интыосы мыныны курылӥзы. Мар тӥледлы юрттэ вал воштӥськонъёслы дышыны?

Мари-Лина: Француз Гвианаын интыяськем Вефильысь вын-агайёс тодо вал: милям яратоно кылбурмы — Исаия 6:8. Соин ик, куке соос милемлы жингыртылӥзы, ӵемысь серекъяса юало вал: «Ну  мар, тодӥськоды на-а яратоно кылбурдэс?» Со возьматӥз, ӝоген милемыз нош ик мукет интые ыстозы шуыса, но ми вераськомы вал: «Тани ми! Милемыз ысты!»

Выль интыез ми ӧм ӵошатэ азьвыл интыен, малы ке шуоно милемлы секыт луысал дунъяны сое, мармы милям вань. Озьы ик ми ӧм возьмалэ, куке вын-агайёс но сузэр-апайёс милемын тодматскозы, нош ми асьмеос соосын тодматскылӥмы.

Джек: Куд-ог вын-агайёслэн но сузэр-апайёслэн уг поты вал, ми мукет интые мед кошкомы шуыса, соин ик соос милемыз туж куризы кыльыны. Нош Гваделупаысь кошкыкумы, одӥг агай милемлы тодамы вайытӥз Иисуслэсь кылъёссэ, кудъёсыз гожтэмын Матфейлэсь 13:38: «Бусы — со дунне». Соин ик, мукет интые кошкыкумы, ми асьмелы тодамы вайытӥськомы, кытын гинэ ми медам ужалэ-тырше, бусы одӥг луэ шуыса. Нырысь ик милям потэ юрттэммы адямиослы, кудъёсыз тодытонлы висъям интыын уло.

Куке ми выль интые лыктӥськомы, ми адӟиськомы, адямиос отын шудоесь луыны быгато шуыса, но ми со интыысь адямиос кадь ик улыны тыршиськомы. Соослэн сиёнзы мукет луыны быгатэ ке но, ми сииськомы но юиськомы сое ик, мае соос сиё, нош со дыре ик тазалыкмы сярысь но ум вунэтӥське. Кытчы гинэ милемыз медаз ыстэ, ми котькуд инты сярысь умойзэ вераны тыршиськомы.

Мари-Лина: Ми тросэзлы дышетскиськомы со интыысь вын-агайёслэсь. Мон тодам вайисько одӥг учырез, куке ми кемалась ӧвӧл Француз Гвианае вуимы. Урамын жаль-жаль зоре вал, но ми малпамы нырысь возьманы но собере тодытыны мыныны. Нош одӥг сузэр юаз: «Мар, мынӥськом?» Зэмзэ вераса, мон туж пайми но верай: «Кызьы? Отын ведра дурысь кадь кисьтэ ук!» Нош со мыным вера: «Зонтикъёс кутом но велосипедъёсын мыном». Озьы мон дыши, киям зонтик кутыса, велосипедэн ветлыны. Ӧй дышысал ке, мон ӧй быгатысал зоро дыръёсы тодытыны.

Тӥ ог 15 пол улон интыдэс вошъяды. Быгатоды-а пайдаё визь-кенешъёс сётыны соослы, кинъёс мукет интые кошкыны малпало?

Мари-Лина: Мукет интые кошкон шуг-секытъёсын герӟаськемын. Нош выль интыын лэсьтоно озьы, тӥ отын асьтэдыз дорады кадь мед шӧдоды но, ужан-тыршон бере бертыса, шутэтскыны мед быгатоды шуыса.

Джек: Куке ми выль улон интые лыктӥськомы, мон ӵем дыръя отысь борддоръёссэ мукет буёлэн буясько. Куддыръя филиалысь вын-агайёс валало  вал, ми та интыын кема ум улэ шуыса, соин ик серекъяса вераллязы: «Джек, таяз учыре ке но буяськонлы дырдэ эн быдты вал!»

Мари-Лина туж быгатыса арбериосты люка! Со ваньзэ коробкаосы тыре но отчы гожтэ: «Мисьтӥськон инты», «Изён инты», «Пӧраськон инты» но мукет. Соин ик ми выль коркае лыктӥськомы ке, ми тодӥськомы, кыӵе комнатае мае пыртоно. Эшшо со гожтэ, мар тыремын котькуд коробкаын — со юрттэ милемлы кулэ луись арбериосты ӝог шедьтыны.

Мари-Лина: Мукет интые улыны кошкыку, ми ваньзэ умой радъяны быгатӥськомы бере, ми трос дырмес ум ыштӥське но соку ик ужан-тыршонэ пыриськыны быгатӥськомы.

Кызьы тӥ дырдэс радъяськоды, ужан-тыршонэ быдэсак пыриськон понна? (2 Тим. 4:5).

Мари-Лина: Вордӥськон нуналъёсы ми шутэтскиськомы но пумиськонъёслы дасяськиськомы, нош пуксён нуналысен кутскыса, ми ужан-тыршонэ пыриськиськомы.

Джек: Ужан-тыршонын нимысьтыз дыр ортчытыны кулэ ке но, ми понна со валтӥсез ӧвӧл. Милям вань улонмы ужан-тыршонэн герӟаськемын. Дорысьтымы потэммы дырысен но берытскытозямы ми тыршиськомы вераськыны ваньмыныз, кинэ пумитаськомы.

Мари-Лина: Кылсярысь, куке ми инкуазе шутэтскыны потӥськомы, мон котьку но сьӧрам буклетъёс басьтӥсько. Куд-ог адямиос ми доры лыкто но мае ке лыдӟыны куро, ми Адӟись-Ивортӥсьёс шуыса ӧм вералэ ке но. Соин ик ми котьку но чакласькомы, кызьы ми дӥсяськиськомы но кызьы асьмеды возиськомы. Адямиос талы саклык висъяло.

Джек: Эшшо ми бускельёсмылы ӟеч ужъёсын тодытӥськомы. Аслам урамысьтым мон жуг-жагъёсты бичасько но усем куаръёсты октӥсько-калтӥсько. Бускельёсы тае адӟо но куддыръя юало: «Тӥ мыным Библия сётыны уд быгатэ-а?»

Тӥ ӵемысь кыдёкысь интыосы тодытыны ветлӥськоды. Быгатӥськоды-а тодады вайыны, мар тужгес но тӥледлы тунсыко потӥз?

Джек: Гвианаын вань сыӵе интыос, кытчы сюрыны секыт. Ӵем дыръя арня куспын урод сюресъёстӥ ог 600 иськем ветлоно луэ. Мон тужгес но тодам вайисько Сент-Эли гуртэ ветлэммес, кудӥз амазон нюлэсъёсын ватӥськемын. Отчы вуон понна, милям кӧня ке час дырмы кошкиз — нырысь моторной лодкаен мынӥмы, нош собере внедорожникен. Отын улӥсьёс зарни поттонын ужало. Публикациосмы понна тау карыса, соос милемлы пичиесь зарни изъёс сётӥзы! Ӝытазе ми организацимылэсь одӥг фильмзэ возьматӥмы. Со гуртысь трос улӥсьёс сое учкыны лыктӥзы.

Мари-Лина: Кемалась ик ӧвӧл Джекез куризы Тодэ ваён ӝытан дыръя Камопи гуртын речь вераны. Ми отчы Ояпок шур кузя ньыль час ӵоже моторной лодкаен мынӥмы. Со зэмзэ ик туж тунсыко учыр вал!

Джек: Бен, отын, кытын шурысь ву ӧжыт кылиз, туж кышкыт вал, малы ке шуоно изъёс пӧлы шедьыны луэ вал. Оске мыным: со бадӟым изъёсты адӟысалды ке, сюлэмды пыдтышкады вуысал! Интыез умой тодӥсь адямитэк отын секыт луысал. Озьы ке но та гуртэ ветлыны милемлы яраз. Отын куать гинэ Адӟись-Ивортӥсьёс вал ке но, Ӝытанэ ог 50 адямиос лыктӥзы, соос пӧлын индеецъёс но вал!

Мари-Лина: Егит вын-агайёслэн но сузэр-апайёслэн Иеговалы тросгес лэсьтэмзы потэ ке, соос но пӧртэм тунсыко учыръёсын пумиськыны быгатозы. Сыӵе учыръёсын Инмармылы оскиськыны кулэ — соку оскон эшшо но юнмалоз. Асьмелэн улонамы ми ӵем дыръя Иеговалэсь кизэ адӟиськомы.

Тӥ кӧня ке кылъёс дышетӥды. Тӥляд кыӵе ке нимысьтыз быгатонлыкъёсты вань-а?

Джек: Нокыӵе но ӧвӧл! Мон та кылъёсты дышетӥ, малы ке шуоно со кулэ вал. Одӥг пол мыным ортчытоно луиз «Возьмаськон башняез» эскеронэз сранан-тонго a кылын, та кылын Библиез лыдӟон уж но мыным сётэмын ӧй вал на ке но! Одӥг агайлэсь мон юай, кызьы мынам пӧрмиз. «Тынад туж умой пӧрмиз,— вераз со,— нош шонерзэ вераса, куддыръя ми тонэ ӧм валалэ». Мыным туж юрттӥзы нылпиос. Куке мон янгышъёс лэсьтылӥ, соос монэ тупатъязы, нош бадӟымъёсыз — ноку но ӧз. Мон нылпиослэсь тросэзлы дышетскылӥ.

Мари-Лина: Огпол ми ужамы-тыршимы сыӵе интыын, кудаз мынам португал, француз но сранан-тонго кылъёсын дышетонъёсы вал. Одӥг сузэр  ӵектӥз дышетонэз кутскыны со кылын, кудӥз мыным секытгес потӥз, нош йылпумъяны тодмогес кылын. Ӝоген мон валай, макем со умой визь-кенеш вал.

Одӥг пол мыным кык дышетонъёсты ортчытыны кулэ вал: нырысетӥез — сранан-тонго кылын, нош кыкетӥез — португал кылын. Куке мон кыкетӥ дышетонме кутски, мынам эше вераз: «Мари-Лина, со уг вала, мар тон солы вераськод!» Соку гинэ мон валай, бразиль калыкысь кышномуртэн, португал кыл интые, сранан-тонго кылын вераськи шуыса!

Тӥледыз туж ярато вын-агайёс но сузэр-апайёс, кудъёсыныз ӵош тӥ ужады-тыршиды. Мар юрттӥз тӥледлы соосын эшъяськыны?

Джек: Мадёнъёсын 11:25 верамын, ӟеч уж лэсьтӥсь азинлыко луоз шуыса. Мукетъёслы ӟеч уж лэсьтон понна, ми асьмеды ум жаляське. Эксэйлык юртъёсты эскерон-тупатъян но утялтон ужъёс дыръя вын-агайёс мыным верало: «Сое ивортӥсьёс мед лэсьтозы». Нош мон соослы верасько: «Мон но ивортӥсь ук. Кыӵе ке уж вань ке, мон сое шумпотыса быдэсто». Котькудмылы аслыз дыр висъяны кулэ ке но, милям уг поты, со мукетъёслы ӟеч уж лэсьтыны мед люкетоз шуыса.

Мари-Лина: Ми сюлмысь тунсыкъяськыны тыршиськомы вын-агайёсын но сузэр-апайёсын. Кылсярысь, ми тодӥськомы, ку нылпиосынызы пуконо яке соосты школаысь пумитано. Со понна ми асьмелэсь ужъёсмес но воштӥськомы. Вын-агайёслы но сузэр-апайёслы юрттыса, ми соослы зэмос эшъёс луиськомы.

Кыӵе бакель каронъёс вайиз тӥледлы ужан-тыршон отын, кытын тросгес тодытӥсьёс кулэ?

Джек: Вань дырмес сётыса ужан-тыршон милемыз шудогес кариз. Ми инкуазез чакланы ӵем потаськомы но Иеговалэн пӧртэм кылдытэмъёсызлы шумпотӥськомы. Шуг-секытъёсын пумиськоно луэ ке но, ми сюлмамы каньыллык возьыны тыршиськомы, малы ке шуоно тодӥськомы: кытын гинэ ми медам луэ, Инмарлэн калыкез милемлы юрттоз.

Егит дыръям Француз Гвианаын монэ пытсэтэ пуктӥзы, армие мыныны пумит луэме понна. Мон малпаны но ӧй быгаты, куке но отчы миссионер луыса берытско но пытсэтын пукисьёслы тодыто шуыса. Зэм но, Иегова милемыз туж бакель кариз!

Мари-Лина: Мыным кельше адямиослы юрттыны. Со мыным котьмалэсь бадӟым шумпотон вае. Ми шудоесь, малы ке шуоно Иеговалы ужаськомы-тыршиськомы. Со юрттэ милемлы Джекен кусыпъёсмес юнматыны. Куддыръя Джек мынэсьтым юа, дорамы сиськыны ум ӧте-а шуыса кыӵе ке кузпалъёсты, кудъёсызлы буйгатон кулэ, нош мон верасько, мон ӵапак та сярысь малпасько вал шуыса! Милям малпанъёсмы ӵем дыръя тупало.

Джек: Кемалась ик ӧвӧл, простатаям рак шедьтӥзы. Мон Мари-Линалы верасько (солы та сярысь кылыны уг кельшы ке но): «Дуное, ӵуказе кулӥ ке, мон „бадӟым арлыдэ“ вуыса уг кулы. Нош куло, улонлы шумпотыса, малы ке шуоно мон тодӥсько, мынам улонэ Инмарлы йыбырттонэн но зэмзэ ик кулэ луись ужъёсын пачылмемын вал шуыса» (Ул.-выл. 25:8).

Мари-Лина: Иегова ми азьын возьмамтэ луонлыкъёс усьтӥз но оскиз ужъёсты, кудъёсыз сярысь ми малпаны но ӧм быгатэ. Милям улонамы сомында умоез! Ми быдэсак Иеговалы оскиськомы, соин ик, кытчы гинэ солэн организациез милемыз медаз ысты, ми али ик мыныны дась!