Jack ni Marie-Line aavara vamosa muteko wa Muluku wa okathi wotheene okhuma mwaakha wa 1988. Awo anniimananiha olimalela makhalelo masya ni yaaheemererya soothanleliwa soovirikana oGuadeloupe ni oGuiana Francesa. Mapuro awo oomanli anikhapeleliwa ni eBetheli ya oFrança. Vano nrowe nimukohe munna Jack ni Marie-Line makoho vakhaani.

Exeeni ewiirinheni okela muteko wa Muluku wa okathi wotheene?

Marie-Line: Kiyariwe oGuadeloupe, nto okathi kaari aka mwaana, kaamakela olaleerya nihiku notheene ni maama aka, yoowo aari Namoona ooluttuweliwa. Kaanaaphenta vanceene atthu, nto moohipisa nuumala omaliha osoma oxikola mwaakha wa 1985, kaahipacerya muteko wa opioneero.

Jack: Okhuma onamwane aka, keetta vamosa ni atthu yaavara muteko wa Muluku wa okathi wotheene ni yaasiveliwa olaleerya. Okathi wa ifeeriya kaarumeela ntoko pioneero ookhaliherya. Nto wanikisa wa esumana, miyo, amaama ni anna akina a ammulokoni naaniwela ekaaro nrowaka olaleerya ni mapioneero a muttetthe mukina. Naanilaleerya nihiku notheene, nto makaaripi naanirowa ophareya. Mahiku awo yaakhala oohakalaliha!

Moohipisa nuumala omuthela Marie-Line mwaakha wa 1988 kaahiikoha wira: ‘Khanrina itthu sinceene soovara, xeeni kihinincererya aka muteko aka woolaleerya?’ Vano kaahipacerya okhala pioneero ni Marie-Line. Nuuvira mwaakha mmosa naahisoma exikola ya mapioneero, naahithanliwa okhala mapioneero a vameekhaaya. Naanihakalala vanceene ovara yoothanleliha ahu eyo oGuadeloupe nihinatthi othaamiheriwa oGuiana Francesa.

Mwa iyaakha sinceene yoothanleliwa anyu yaamakela oturukiwa. Exeeni yookhaliheryani olimalela makhalelo masya? 

Marie-Line: Anna a eBetheli ya oGuiana Francesa annisuwela oratteene yoolepa ennisivela vanceene, eyo piiyo, Yesaya 6:8. Nto vaavo yaanilikarela aya, yaaninikoha atheyaka wira: “Munnuupuwela yolepa enoosivelani?” Vaavo yaanikoha aya siiso, naanisuwela wira yoothanleliwa ahu yaamuturukiwa. Nto naaniwaakhula so: “Hiyo Nri va: Munirumeke!”

Okathi owo naanisyaka olikanyiha yoothanleliwa ahu ya khalai ni ya niinaano, maana opaka eyo yaamuniiriha  ohisiveliwa yoothanleliwa ahu ya niinaano. Nave naaniimananiha waasuwela saana anna ni arokora a yoothanleliwa ahu esya.

Jack: Yaahikhala anna ni arokora yaawo yahaaphavela wira nikhume yaaniimananiha onikhulumula wira nihikhume opuro naarumeela ahu. Masi okathi naakhuma ahu oGuadeloupe, munna mmosa aahinuupuxerya moolumo a Yesu ari Matheyo 13:38, yaawo ani: “Ematt’eyo, olumwenkú”. Nto vaavo yoothanleliwa ahu yaaturukiwa aya, naanuupuwela wira nlelo naarumeela ematta emosa moohicikha opuro naakhala ahu. Etthu naatepa ahu ovaha efaita yaari atthu naalaleerya ahu!

Vaavo naaphiya ahu muttetthe musya, naanoona wira atthu awo yaanihakalala. Nto naaniimananiha okhala ntoko atthu awo. Ekeekhai wira yoolya yaari yoovirikana, masi naanilya ele yaalya aya, naaniwurya ele yaawurya aya ni naaniikhapelela wira nihiphwanye iretta. Nave, naaniimananiha olavula mooloka khula yoothanleliwa naavahiwa ahu.

Marie-Line: Nave naaniixutta itthu sinceene ni anna ni arokora a muttetthe owo. Kinnuupuwela etthu yiiraneyale moohipisa nuumala ophiya oGuiana Francesa. Yaanirupa epula yinceene, nto naahaana olipelela omaaxa wira nalaleerye. Nlelo epula erupaka murokora mmosa aahikikoha wira: “Muhiilokiherya wira nalaleerye?” Kitikinihiwe ene kaahimwaakhula wira: “Ninrowa okhuma sai?” Vano owo aahikaakhula wira: “Mmukuxe guarda-chuva, nnrooke ni abisikleta ahu”. Nto kaahiixutta moota wonvarela guarda-chuva kimweettihaka bisikleta. Khalai nkaawerya opaka eyo, mwaha woowi nkaatonko olaleerya erupaka epula!

Mwaahithaamihiwa ikwaha 15. Niireke mookhala oowaavaha malakiheryo oovareleya muteko atthu ale anithaamihiwa?

Marie-Line: Okhala wene othaama oxankiha. Masi etthu yootepa otthuneya ophwanya opuro onnisivela wira nimumuleke naakhumaka muteko woolaleerya.

Jack: Ikwaha sinceene kaamakela opintari mpaani. Akhala wira anna a ofiliyaali yaanisuwela wira naarowa okhala okathi vakhaani, awo yaanikileela wira: “Jack khivantthuneya opintari empa eyo niinaano!”

Marie-line aanisuwela saana ohela ekanyero itthu! Owo aanihela itthu sotheene mukaaxani ni ekanyeryo ya itthu sa okwaartu, oxoworo, okosinya ni itthu sa mapuro makina. Nto naphiya empa naarowa ahu okhalaka, vaaninikhweela ohela itthu moovarihana ni opuro aya. Nave aanipaka elista ya itthu naahela ahu khula ekaaxa wira naakuveke ophwanya naaphavelaka.

Marie-Line: Okhala wira naahiixutta wiilokiherya saana, naanaakuvela otthikela olaleerya moohipisa.

 Mwampaka sai programa wira nwerye omaleliha ‘olaleya ehapari yorera’?—2 Tim. 4:5.

Marie-Line: Khula Segunda-feira namphumurya ni oreherya mithukumano. Okhuma Namanli orowa ohoolo naamulaleerya.

Jack: Nnaamwi naarina mukano wa iwoora naalaleerya ahu khula mweeri, hiyo khinaaphavela paahi omaleliha iwoora iyo naavekeliwa ahu. Maana etthu yootepexa otthuneya mookumini mwahu, olaleya ihapari sooreera. Okhuma okathi naakhuma ahu owaani ni naahokolowa ahu, naaniimananiha waalaleerya atthu otheene naaphwanya ahu.

Marie-Line: Okathi naarowa ahu mapuro naatthekula ahu ni anna, ikwaha sinceene kaanikuxa itratato. Atthu akina yaanirwa onivekela iliivuru nnaamwi nahaaleelale wira na Anamoona a Yehova. Okhala wira naaniwara saana ni nookhalana moonelo wooloka atthu akina yaaniniweha.

Jack: Ikwaha sikina naanalaleerya anamwaattamanani ihu mwaha wowaareerela murima. Ikwaha sinceene kaanittotta ipaphelo saamorela vathi, orowa oyeeha ikokhola ni ovela ota wa ekintaali ahu. Anamwaattamanani ahu yaaniniweha, nto okathi mukina yaaninikoha wira: “Mookhala ookivaha Biibiliya?”

Ikwaha sinceene mwaamakela olaleerya mittetthe soorakamela opooma. Niireke yookhala etthu yooloka muhinliyala anyu okathi mwaalaleerya anyu mapuro awo?

Jack: Mittetthe sikina sa oGuiana onnixankiha ophiya. Naahaana weetta esumana ntero ikiloomo 600 niviraka iphiro soohiloka. Okathi naaxukurya ahu eviila ya Saint-Élie, ntakhwa na wAmazônia, yaari etthu yoohakalaliha vanceene. Naaniviriha iwoora sinceene ni ekaaro off-road 4x4, yeeyo yaarina tração maroota otheene ni naaniwela ikalawa sa mutooro. Atthu anceene, anthipa maluku oowaarya. Vaavo naavaha ahu iliivuru awo yaanisonkherya anivahaka maluku macikhaani a eweero. Ohiyu naaniwooniherya iviidiyu sa mutthenkeso ahu. Atthu anceene a muttetthe ole yaanirwa oweha.

Marie-Line: Okathi vakhaani ovinre Jack aahivekeliwa olavula mwaha wa Wuupuwelela oCamopi. Wira niphiye muttetthe ole naahiviriha iwoora 4 neettaka ni ekalawa ya mutooro niviraka Muro Oiapoque. Yaari yoowiraneya yoohakalaliha.

Jack: Mapuro oorakama a miro, maasi annikhuruwa moowuupa ni tootupa vanceene, nto mapuro awo towoopiha. Ti voohakalaliha oweha mapuro awo vaavo ekalawa enaattamela aya. Nto wira ovire mapuro awo, ole oneettiha ekalawa ohaana osuwela weettiha saana. Masi sowiiraneya iyo saanikihakalaliha vanceene. Nnaamwi yaakhanle Anamoona a Yehova 6 paahi alopwana ni athiyana, atthu oowiiraka 50 yaahirwa Wuupuwelela okhwa wa Kristu, waahela muhina atthu akina yaakhumme wÍndia anakhala wÁmerica.

Marie-Line: Amiravo anoowerya okhalana sowiiraneya soohakalaliha akhala wira anniphavela wuncererya muteko aninvarela aya Yehova. Akhala wira munoomuroromela Yehova okathi owo munoolipiha waamini wanyu. Ikwaha sinceene ninniweha moota Yehova onnikhaliherya awe.

Noosuwela wira muhiixutta mattaava manceene, niireke vaanookhweelani wiixutta mattaava awo?

Jack: Nnaari. Kihiixutta wira kaakhaliheryeke anna a mmulokoni ni atthu akina. Kaanihoolela Yoosoma ya Owehaweha nttaava Sranantongo * kihinatthi omusoma Biibiliya! Kaahinvekela munna wira okileele akhala wira atthu yaaniiwa etthu ele kaalavula aka. Owo aakaakhunle wira: “Ikwaha sikina khanniiwa etthu munlavula anyu, masi ti voohakalaliha woowiriyanani”. Anamwane yaanikikhaliherya vanceene. Vaavo kaalavulaka etthu yoohiloka atthu aalupale khiyaakileela, masi anamwane yaanikileela oratteene. Tthiri amiravo aakiixuttiha itthu sinceene.

Marie-Line: Muttetthe mmosa kaniwiixuttiha atthu Biibiliya ni eFrancês, Ekunya ni Sranantongo. Murokora mmosa aahikileela wira kaahaana opacerya waasomiha atthu Biibiliya ni nttaava naakixankiha nto kikiseryeke nttaava naakikhweela. Moohipisa kaahoona wira miruku iye saamukikhaliherya vanceene.

Nihiku nimosa, kiiriha yoosoma ya Biibiliya ni nttaava Sranantongo nuumala-vo, kaahiiriha yoosoma ya Biibiliya ni Ekunya. Vaavo kaapacenrye aka wiiriha yoosoma ya nenli, murokora aari ni miyo aahikileela wira: “Marie-Line kinoona wira mookhalana muxankiho!” Kaahoona wira kaalavula  ni muthiyana a oBrasil kirumeela aka nttaava Sranantongo ohiya Ekunya!

Tthiri nyuwo munniphentiwa vanceene ni anna mwaarumeela anyu. Mwaawerya sai opatthana saana ni anna?

Jack: Yoolepa ya Miruku 11:25, enihimya so: “Mulipa-òvaha onovahiwa vowatta”. Hiyo naaniviriha okathi munceene nivaraka itthu sinaakhaliherya atthu akina. Okathi naalokiherya ahu Empa ya Omwene, atthu akina yaanikileela wira: “Muteko owo onivariwa ni anamalaleerya paahi”. Masi miyo kaaniwaakhula wira: “Ni miyo-tho ka namalaleerya. Nto kihaana ovara muteko”. Okathi mukina otheene ahu ninniphavela okhala mekhihu, masi ikwaha sinceene nihaana wuupuwela wira ophavela okhala mekhihu ohiniiriheke ohiya opaka itthu sooloka wira naakhaliherye atthu akina.

Marie-Line: Okathi wotheene ninniimananiha owooniherya anna ni arokora wira ninnaathokorerya. Opaka eyo enninikhaliherya osuwela akhala wira ookhala munna oniphavela okhaliheriwa waakhapelela anaawe aahiiso waarowela anamwane oxikola. Naanilokiherya eprograma ahu wira niweryeke waakhaliherya atthu akina. Opaka eyo enninikhaliherya okhala mpatthani ooloka ni waakhaliherya ale aniphavela.

Mareeliho xeeni mphwannye anyu mwaha woorumeela mapuro oothowa anamalaleerya?

Jack: Okhala wira ninvara muteko wa Muluku wa okathi wotheene, noophwanya ohakalala ni mareeliho manceene. Ikwaha sinceene naahikhalana eparakha ya oweha itthu soovirikana Yehova opattunxe awe. Nnaamwi naakumanne mixankiho, ninniphwanya murettele wa mmuupuweloni mwaha woosuwela wira ninnikhaliheriwa ni atthu a Muluku moohicikha opuro ninkhala ahu.

Kiri ene mmiravo kaahitthukweliwa oGuiana Francesa mwaha wa waamini waka. Nkuupuwela wira kaamutthikela elapo ele kiri ene misionaario ni weemereriwa waaxukurya mapereso. Mwaha wa oreera murima wa Yehova koophwanya mareeliho awo!

Marie-Line: Etthu yuulupale enkihakalaliha, orumeela okumi aka wira kaakhaliherye atthu akina. Ninnihakalala ovara muteko wa Yehova. Nave nookhalana waataana wooloka ni noolipiha ekasamento ahu. Okathi mukina Jack aanikivekela akhala wira vaamureerela waalattula anamathelana akhulumunwe wira nlye vamosa wira naalipihe. Nto ikwaha sinceene kaanimwaakhula wira: “Ni miyo kuupuwela siiso!” Ikwaha sinceene naamakela wuupuwela etthu emosaru.

Jack: Okathi vakhaani ovinre, koophwanyaniwa câncer de próstata. Nnaamwi Marie-Line ohiphavelaka owiriyana vaavo kimmuleela aka wira: “Mwaraka, meelo kinimookhwa, masi kinrowa okhwa ‘kihuuluvanle vanceene’. Hata vari siiso, kinrowa okhwa kihakalanle ene mwaha woowi koorumeela okumi aka kivaraka etthu ya faita, eri omurumeela Yehova, nto eyo ennikihakalaliha vanceene”.—Maph. 25:8.

Marie-Line: Yehova oonivaha soothanleliwa nahaalipelela ahu, nave ooneemererya opaka itthu nahuupuwela ahu. Okumi ahu wotheene noophwanya itthu sooloka. Hiyo nnoorowa khula opuro mutthenkeso wa Yehova onnivekela awe, mwaha woowi ninnikupali ni murima wotheene wira Yehova onoonikhaliherya!