Jaakinne Marelena 1988⁠ppe doommidi issippe ubba wode haggaazuwaa haggaazidosona. Eti dumma dumma hanotaa meezetana danddayoosona, qassi etayyo Guwadeloppeeninne French Giyanan dumma dumma daro oosoy imettiis. He naaˈˈu sohotun oosettiyaabaa Paransaaye macara biiroy kaallees. Ane nuuni eta amarida oyshata oychchoos.

Ubba wode haggaazuwaa doommanaadan inttena denttettidabay aybee?

Mareleno: Taani naatettan Guwadeloppen diccaas, he wode ta aayeera kumetta gallassaa darotoo sabbakays; A haˈˈikka mino Yihoowa Markka. Taani asaa siiqiyo gishshawu, 1985n timirttiyaa wurssosaara aqinye gidaas.

Jaaka: Haggaazuwaa dosiya ubba wode haggaaziyaageetuura taani yelagatettan deˈaas. Timirtte keettay gorddettiyo wode taani ubbatoo kaafiya aqinye gidada haggaazays. Qeeraanne Wogaa gallassi, aqinyetuura gayttidi kumetta gallassaa etaara sabbakanawu issitoo issitoo otobisiyan boos. Yaatidi abbaa heeri boos. He gallassatun keehi ufayttoos!

Taani 1988n Mareleno machchada takkennan, ‘Nuussi ayba aawatettikka baynna gishshawu, nuuni loytti haggaazana koshshees’ gaada qoppaas. Taanikka aqinye gidada Mareleniira haggaaziyoogaa doommaas. Issi layttappe guyyiyan, taani aqinyetu timirtte keettan tamaara simmin, nuuni dumma aqinye gididi sunttettida. Nuuni French Giyana baanaadan shoobettanaappe kase Guwadeloppen ufayssiya dumma dumma oosota oottida.

Intte daro layttan darosaa laamettideta. Ooratta hanotaa meezetanaadan inttena maaddidabay aybee? 

Mareleno: Nuuni dosiyo xiqisee Isiyaasa 6:8 gidiyoogaa French Giyana Beeteelen deˈiya ishantti eroosona. Hegaa gishshawu, eti silkkiyaa nuuyyo dawaliyo wode, “Intte dosiyo xiqisiyaa hassayeetii?” yaagidi, nuna ubbatoo naaciiddi oychchoosona. Hegee nuna harasaa laammana haniyoogaa gidiyoogaa eroos. Nuuni, “Hekko, Nuna Kiitta!” yaagoos.

Nuuni ooratti maddabettido sohuwan ufayttennan aggana danddayiyo gishshawu, ooratti maddabettido sohuwaa kaseegaara geddarssokko. Nuuni  ooratti maddabettido heeran deˈiya ishanttuuranne michchonttuura laggetanawu baaxetoos.

Jaaka: Kase, amarida ishanttinne michchontti nuuni baanaadan koyenna gishshawu etaara takkanaadan nuna ammanttanawu baaxetidosona. Gidoppe attin, nuuni Guwadeloppeppe harasaa laamettiyo wode, issi ishay Yesuusi yootido Maatiyoosa 13:38n deˈiya “Goshshai sa7aa” giya qofaa nuna hassayissiis. Hegaa gishshawu, nuuni harasaa laamettiyo wode, nu deˈiyo sohoy awanne gidin issi mala goshshan oottiiddi deˈiyoogaa hassayoos. Qassi, moottay awanne gidin nuuni asawu sabbakanawu kiitettida!

Nuuni ooratta moottaa gakkiyo wode, hegan deˈiya harati keehi ufayttiyoogaa akeekoos. Yaatiyo gishshawu, nuuni he heeraa asaagaadan deˈanawu baaxetoos. Qumay dumma gidana danddayees, shin nuuni payyatettaara gayttidaagan naagettidi eti miyoobaa moosinne eti uyiyoobaa uyoos. Nuuni maddabettido ubba heeraa xeelliyaagan loˈˈobaa haasayanawu baaxetoos.

Mareleno: Heeraa ishanttuppekka nuuni darobaa tamaarida. Nuuni French Giyana koyro gakki simmin, hanidabaa taani hassayays. He wode iray soosiyo gishshawu, nuuni sabbakanawu baanaappe kase, iray aggana gakkanaashin naagana koshshees giidi qoppida. SHin heede issi michchiyaa, “Baanee?” yaagada tana oychchaasu. Taani garamettada, “Waanidi baanee?” gaada zaaraas. A, “Ne yanxxilaa ekka, nuuni bishkkiliitetun baana” yaagada zaaraasu. Hegaa gishshawu, taani yanxxilaa oyqqada bishkkiliitiyaa waata laagganaakko tamaaraas. Taani tamaarennaakko, iray bukkishin mule sabbakikke!

Intte 15 gidiya sohuwaa laamettideta. Harasaa laamettiyoogaa xeelliyaagan harata maaddiyaabaa intte yootiyoobi deˈii?

Mareleno: Harasaa laamettiyoogee metiyaaba gidana danddayees. Neeni haggaazuwaappe simmiyo wode, injjetiya keetta demmiyoogee keehi koshshiyaaba.

Jaaka: Taani nu keettaa muletoo qalamiyaa zaarettada tiyayiis. Macara biiruwan deˈiya ishantti nuuni hegan daro wodiyawu takkennaagaa erikko, issi issitoo “Jaaka, ha keettaa qalamiyaa tiyoppa!” yaagidi qiroosona.

Marelena son deˈiyaabaa shiishshada issiban yegga giigissiyoogan gooba! A ubbabaa saaxiniyan yeggawusu, yaatada hegaa bolli “bollaa meecettiyo kifiliyaa,” “zinnˈiyo kifiliyaa,” woy “qumaa kattiyoosaa” giya malaataa wottawusu. Hegaa gishshawu,  nuuni ooratta keettaa geliyo wode, he saaxineta A kifiliyan kifiliyan metoottennan wottana danddayoos. Ubba saaxinetun deˈiyaabaa A xaafa wottido gishshawu, koshshiyaabaa nuuni eesuwaara demmana danddayoos.

Mareleno: Nuuni loytti darajjayettiyoogaa tamaarido gishshawu, sohuwaara haggaazuwaa doommana danddayoos.

Intte “oottiyo ooso ubbaa” polanawu wodiyaa waati bazzeetii?—2 Xim. 4:5.

Mareleno: Nuuni Saynno gallassi shemppoosinne shiiqotuyyo giigettoos. Masqqaynnoppe doommidi haggaazoos.

Jaaka: Nuuppe koyettiya saatee deˈikkonne, nuuni xeelaa wottiyoy hegaana gidenna. Sabbakiyoogee nuuni xoqqu ootti xeelliyooba. Nuuni sooppe kiyo saatiyaappe doommidi soo simmana gakkanaassi, nunaara gayttiya asaa haasayissanawu baaxetoos.

Mareleno: Leemisuwawu, nuuni allaxxanawu biyo wode, taani ubbatoo traktteta ekkada bays. Nuuni Yihoowa Markka gidiyoogaa etawu yootana xayikkonne, amarida asay nuukko yiidi xuufiyaa nuna oychchees. Hegaa gishshawu, nuuni maayiyoobaaninne oottiyooban keehi naagettoos. Asay hegaa akeekees.

Jaaka: Nuuni nu shoorotuyyo loˈˈobaa oottiyoogankka markkattoos. Taani moorettida woraqataa saˈaappe denttays, yaatada moorettidabaa yeggiyoobaa geeshshays qassi buuraa kareppe shiishshays. Nu shooroti hegaa akeekidi issi issitoo nuna, “Taayyo Geeshsha Maxaafaa immuuteetii?” yaagidi oychchoosona.

Intte darotoo haahosan deˈiya moottatun sabbakideta. Intte manddariyo wode gayttidabaappe hassayiyoobi deˈii?

Jaaka: Giyanan, amarida moottata gakkanawu keehi metees. Nuuni metiya ogiyan 600 kilo meetire gidiyaagaa ubbatoo boos. Amaazoona woraa giddon deˈiya Sent Eli giyo katamaa nuuni biido wodiyaa dogokko. Ogee baynnasaara biya kaamiyaanne motoriyan oottiya wolwoluwaa goˈettidi yaa gakkanawu unddenna saatiyaa ekkees. Yan deˈiya asaappe dariya baggay worqqaa maadiniyaa bookkees. Nu xuufeta nashshiya amaridaageeti, xuufiyaa gishshaa guutta worqqaa nuuyyo immoosona! Nu dirijjitee giigissido biidotuppe issuwaa omarssi bessida. Heeraa asay daroy shiiqiis.

Mareleno: Kamopi giyosan Godaa Kahuwaa haasayaa haasayanaadan, Jaaka mata wode oychchidosona. Yaa gakkanawu, nuuni motoriyan oottiya wolwoluwan Oyapooka SHaafan oyddu saate gidiyaagaa hemettida. Hegaappe keehi ufayssiyaabaa tamaarida.

Jaaka: He shaafan haattay keehi kixxiyo wode, yaanne haanne shocettiya haattay qohana danddayees. He shocettiya haattay wolwoluwaakko gakkiyoogaa beˈiyoogee maalaalissiyaaba. Wolwoluwaa laaggiyaagee ay oottanaakko erees. SHin hegee nu deˈuwan beˈido maalaalissiyaaba. Yihoowa Markkati 6 xalla gidikkonne, Amarkkaa Hinddeta amaridaageeta gujjin, Godaa Kahuwawu 50 gidiya asay shiiqiis.

Mareleno: Yelagati Yihoowawu oottikko, hegaa mala ufayssiyaabaa tamaarana danddayoosona. He hanotan neeni Yihoowan ammanettaasa, qassi ne ammanoy kaseegaappe mino gidees. Yihooway nuna keehi maaddiyoogaa nuuni darotoo beˈoos.

Intte daro doonata tamaarideta. Tamaariyoogee inttena metennee?

Jaaka: Metenna. Sabbakanawunne gubaaˈiyaa maaddanawu he qaalata taani tamaaraas. Sranantongo * qaalan taani Geeshsha Maxaafaa nibaabiyaa gubaaˈiyan nabbabanaappe kase, Wochiyo Keelaa Xinaatiyaa kaalettana koshshiis! ‘Taani haasayidobaa eti akeekiyoonaa’ gaada issi ishaa oychchaas. I, “Nuuni issi issi qaalata akeekana xayikkonne, loytta kaalettadasa” yaagidi zaariis. Naati tana keehi maaddidosona. Taani baliyo wode gita asay yootenna, shin naati taayyo yootoosona. Taani naatuppe darobaa tamaaraas.

Mareleno: Issi moottan, Paransaaye, Porchchugaalenne Sranantongo doonan taani Geeshsha Maxaafaa xannaˈissiyo xinaateti deˈoosona. Issi michchiyaa taani deexxiya doonan Geeshsha Maxaafaa xannaˈissiyoogaa koyro doommanaadaaninne loytta eriyo doonan kuuyanaadan zoraasu. He zoree maaddiyoogaa taani sohuwaara akeekaas.

 Issi gallassi taani Sranantongo doonan Geeshsha Maxaafaa xannaˈissada kaalliyaagaa Porchchugaalettuwan xannaˈissaas. Naaˈˈanttoogaa xannaˈissiyoogaa taani doommin issi michchiyaa, “Marelene, metoy merettidaba milatees” yaagaasu. Taani Porchchugaale doonan haasayissana bessishin Sranantongo doonan Brazile biittaa maccaasiyo haasayissiyoogaa akeekaas.

Intte haggaazido heeran deˈiyaageeti inttena keehi siiqoosona. Ishanttuura intte loˈˈo lagge waani gididetii?

Jaaka: Leemiso 11:25y hagaadan gees: “Keha asi duretana.” Nuuni haratuura wodiyaa aattanawunne etawu oottanawu mammottokko. SHiiquwaa Addaraashaa loyttiyoogaa xeelliyaagan amaridaageeti taayyo hagaadan giidosona: “Hegaa aassiyaageeti oottona.” SHin taani etayyo hagaadan gays: “Taanikka aassiyaagaa. Yaatiyo gishshawu, oottiyoobi deˈikko, taani yaa baada oottanawu koyays.” Nuussi ubbawu wodee koshshikkonne, hegee nuuni haratuyyo loˈˈobaa oottiyoogaa diggana koshshennaagaa ubbatoo hassayoos.

Mareleno: Nuuni nu ishanttanne michchontta siiqanawu baaxetana koshshees. Yaatiyoogan, eta naata naagiya woy timirtte keettaappe ehiya ura koshshiyo wode nuuni eroos. Hegaa gishshawu, nuuni eta maaddanaadan nu prograamiyaa giigissana danddayoos. Hegaadan oottiyoogan, nuuni loˈˈo lagge gidida, qassi etawu maadoy koshshiyo wode eta maaddanawu giigi uttida.

Aassiyaageeti keehi koshshiyoosan haggaazidoogan ayba anjjota demmidetii?

Jaaka: Nuuni ubba wode haggaazuwaa haggaaziyo gishshawu daro anjjota demmida. Yihoowa meretan ufayttiyo injjiyaa nuuni darotoo demmida. Paacciyaabay deˈikkonne, Xoossaa asaa maaddiyoogaa nuuni eriyo gishshawu nuuyyo wozanaa sarotettay deˈees.

Taani Polotikaaban oossinne exatenna gishshawu, yelagatettan French Giyanan qashettaas. Taani misoonaawenne haymaanootiyaabaa oottiyaagaa gidada issi gallassi he qasho keettata simmada beˈana gaada mule qoppa erikke. Yihooway kehatettan daroban anjjees!

Mareleno: Haratuyyo immiyoogan taani keehi ufayttays. Nuuni Yihoowayyo haggaaziyoogan ufayttoos. Yihoowayyo haggaaziyoogee nu aqo deˈoy kaseegaappe minnanaadan oottiis. Minttettoy koshshiyo issi aqo laggeti nunaara qumaa maanaadan shoobbana danddayiyaakkonne Jaaki issi issitoo tana oychchees. Taani darotoo, “Taanikka neegaadan qoppaas” yaagada zaarays. Nuuni darotoo issi malabaa qoppoos.

Jaaka: Tana prosteti kansseree oyqqidoogaa mata wode eraas. Marelena hegaa siyanawu koyennabaa gidikkonne, taani iyyo hagaadan gaas: “Ta siiqee, taani keehi ceeggabeykke, shin mata wode taani hayqqikkokka, Yihoowawu haggaaziyoogan, ta deˈuwan xoqqu ootta xeelliyoobaa taani oottidoogaa erays; qassi hegee tana ufayssees. “—Doo. 25:8.

Mareleno: Yihooway nuuni mule naagibeenna aawatettaa nuuyyo immiis; qassi nuuni mule qoppi erenna oosota oottanaadan I paqqadiis. Nu deˈoy loˈˈoban kumiis. Yihooway nuna maaddanaagaa nuuni loytti ammanettiyo gishshawu, nu baanaadan Yihoowa dirijjitee nuna oychchiyo awanne baana.