Hira Jack ngan Marie-Line magkaupod nga nag-aalagad hin bug-os-panahon tikang pa han 1988. Kilala hira ha ira pagin mapauyon-uyon gud, ngan kinarawat hira hin damu nga toka ha Guadeloupe ngan French Guiana. Yana, ito nga mga lugar ginpapanginano han sanga nga opisina han France. May-ada kita pipira nga pakiana kanda Jack ngan Marie-Line.

Ano an nagpagios ha iyo nga mag-alagad hin bug-os-panahon?

Marie-Line: Ha Guadeloupe han bata pa ako, kaurogan nga nagsasangyaw ako ha bug-os nga adlaw kaupod hi Nanay, nga madasigon nga Saksi. Hinigugma ko an mga tawo, salit katapos ko gud pag-eskwela han 1985, nagpayunir ako.

Jack: Han bata pa ako, kaupod ko pirme an mga payunir nga nahigugma ha ministeryo. Nag-o-auxiliary payunir ako kon bakasyon ha eskwelahan. Kon weekend, usahay nasakay kami hin bus basi umupod ha mga payunir ha ira teritoryo. Bug-os-adlaw kami nga nagsasangyaw ngan katapos, napakadto kami ha dagat. Makalilipay gud adto nga mga adlaw!

Waray pag-iha, katapos kami ikasal ni Marie-Line han 1988, nagsiring ako ha akon kalugaringon, ‘Waray kami bisan ano nga obligasyon, salit kay ano nga diri namon pauswagon an amon ministeryo?’ Nagpayunir liwat ako pariho kan Marie-Line. Paglabay hin usa ka tuig, katapos umiskwela ha pioneer school, gintoka kami sugad nga espesyal payunir. Nagkaada kami pipira nga makalilipay nga toka ha Guadeloupe antes kami imbitaron nga bumalhin ha French Guiana.

Nagkaada kamo damu nga pagbag-o ha iyo toka ha paglabay han panahon. Ano an nakabulig ha iyo nga makapahiuyon ha bag-o nga mga kahimtang?

Marie-Line: Maaram an kabugtoan ha Bethel ha French Guiana nga an Isaias 6:8 an amon paborito nga teksto. Salit kon gintatawagan nira kami, kaurogan na nga nagpapatawa hira nga nasiring, “Nahinunumdoman ba niyo an iyo paborito nga teksto?” Maaram kami nga an karuyag sidngon hito, magkakaada kami bag-o nga toka, salit nasiring kami, “Aadi kami! Sugoa kami!”

Diri namon ginkukompara an amon bag-o nga toka ha amon naglabay nga mga toka kay kon bubuhaton  namon ito diri namon maaapresyar an amon bag-o nga toka. Nangangalimbasog liwat kami nga makilala an kabugtoan.

Jack: Hadto, ginkukombinse kami han pipira nga kabugtoan nga maopay an intensyon nga diri bumalhin kay karuyag nira nga magpabilin la kami kaupod nira. Pero han binaya kami ha Guadeloupe, usa nga brother an nagpahinumdom ha amon han ginsiring ni Jesus ha Mateo 13:38: “An uma amo an kalibotan.” Salit kon nagbabag-o an amon toka, ginpapahinumdoman namon an amon kalugaringon nga nag-aalagad pa gihapon kami ha pariho nga uma bisan hain man kami. Aw, an mga tawo ngan an teritoryo amo an pinakaimportante!

Kon naabot kami ha usa nga bag-o nga teritoryo, nakikita namon nga an iba nagkikinabuhi didto nga malipayon. Salit, nangangalimbasog kami nga magkinabuhi pariho han mga tawo didto. Oo, bangin iba an ira pagkaon, pero amon ginkakaon kon ano an ira ginkakaon ngan amon gin-iinom kon ano an ira gin-iinom, kondi ginhihirotan namon an amon kahimsog. Nangangalimbasog kami nga magin positibo ha amon igin-iistorya parte han amon mga toka.

Marie-Line: Damu an amon nahibaroan tikang ha lokal nga kabugtoan. Nahinunumdoman ko han bag-o pa la kami ha French Guiana. Makusog hadto an uran, salit naghunahuna kami nga huhulaton pa namon nga humuraw antes kami gumawas pagsangyaw. Pero may sister nga nagpakiana ha akon, “Ano, makadto na kita?” Binaton ako nga nahipapausa, “Paonan-o?” Binaton hiya, “Pagpayong, ngan magbibisikleta kita.” Salit nahibaro ako magbisikleta samtang may kapot nga payong. Kon waray ako mahibaro hito, diri ako makakasangyaw kon tag-uran!

Mga 15 ka beses na kamo nga nagbalhin. May maisusuhestyon ba kamo ha iba mahitungod ha pagbalhin?

Marie-Line: Diri masayon an pagbalhin. Bisan pa hito, importante nga magbiling ka hin balay diin makakarelaks ka pag-uli mo tikang ha ministeryo.

Jack: Kasagaran na nga ginpipintaran ko an sulod han amon balay. Tungod kay maaram an kabugtoan ha sanga nga opisina nga diri kami mag-iiha hito nga balay, usahay nasiring hira, “Jack, ayaw na pagpintari ito nga balay!”

Hi Marie-Line eksperto ha pag-impake! Ginsusulod niya an ngatanan ha mga karton ngan ginsusuratan ito hin “kasilyas,” “kwarto,” “kusina,” ngan iba pa. Salit kon naabot kami ha amon bag-o nga balay, naibubutang dayon namon an mga karton ha angayan nga lugar. Naghihimo hiya hin lista han sulod han tagsa nga karton basi masayon namon mabilngan an amon kinahanglan.

 Marie-Line: Tungod kay nahibaro kami nga magin organisado, nakakagtikang dayon kami han amon ministeryo.

Paonan-o niyo gin-ieskedyol an iyo panahon basi ‘bug-os nga matuman an iyo ministeryo’?​—2 Tim. 4:5.

Marie-Line: Ha Lunes, napahuway kami ngan nag-aandam para ha mga katirok. Tikang ha Martes, nagawas kami ha ministeryo.

Jack: Bisan kon may gin-aabot kami nga oras, diri kami nagpupokus hito. An ministeryo an pinakaimportante ha amon kinabuhi. Tikang ha pagbaya namon ha balay tubtob ha pag-uli, nangangalimbasog kami nga makaistorya an tanan nga amon iginkikita.

Marie-Line: Pananglitan, kon nagpipiknik kami, pirme ako nagdadara hin mga tract. May mga tawo nga nadaop ha amon ngan nangangaro hin publikasyon, bisan kon waray kami magsumat ha ira nga mga Saksi ni Jehova kami. Tungod hito, naghihirot kami ha amon pamado ngan panggawi. Napapansin ito han mga tawo.

Jack: Nakakasangyaw liwat kami pinaagi ha pagin maopay nga amyaw. Ginpupurot ko an mga papel, iginlalabog an mga basura, ngan gintitirok ko an mga dahon ha garden ha palibot han amon balay gamit an kagkag. Nakikita ito han amon mga amyaw ngan usahay napakiana hira, “Puydi mo ba ako tagan hin Biblia?”

Kasagaran na nga nagsasangyaw kamo ha higrayo nga teritoryo. May mga eksperyensya ba kamo hito nga mga pagbiyahe nga diri niyo makakalimtan?

Jack: Ha Guiana, may mga teritoryo nga makuri kadtoan. Ha usa ka semana, kasagaran nga nagbibiyahe kami hin 600 ka kilometro ha makuri nga mga kalsada. Diri gud namon makakalimtan an amon pagbisita ha St. Élie, ha kagurangan han Amazon. Nagbiyahe kami hin pipira ka oras gamit an panlubak nga awto ngan hin powerboat. Kadam-an han mga naukoy didto mga minero hin bulawan. Tungod han ira pagpasalamat ha mga publikasyon, an iba naghatag ha amon hin gudtiay nga pidaso hin bulawan sugad nga donasyon! Ha gab-i, iginpasalida namon an usa han mga video han organisasyon. Damu an nagkita hito.

Marie-Line: Diri pa la maiha, ginhangyo hi Jack nga magpahayag para ha Memoryal ha baryo han Camopi. Basi makaabot didto, nagbiyahe kami hin upat ka oras ha motorboat ha Oyapock River. Makalilipay ito nga eksperyensya.

Jack: Kon hamabaw an tubig han salog, may mga masulog nga dapit han salog nga delikado gud. Maopay gud pagkinitaon ito nga mga dapit han salog samtang nagtitikahirani dida hito an baluto. An bangkero kinahanglan maaram gud han iya hihimoon pag-agi dida hito. Pero maopay gud adto nga pagbiyahe. Bisan kon 6 la nga Saksi an presente, mga 50 ka tawo an inatender han Memoryal, upod na an pipira nga Amerindian!

Marie-Line: An mga batan-on mahimo magkaada hin sugad nga mag-opay nga eksperyensya kon dudugangan nira an ira ginhihimo para kan Jehova. Kinahanglan mo sumarig kan Jehova hini nga mga kahimtang, ngan nagririg-on an imo pagtoo. Kasagaran na nga nakikita namon nga ginbubuligan kami ni Jehova.

Nahibaro kamo hin pipira nga linggwahe. Masayon la ba para ha iyo nga mahibaro?

Jack: Diri. Gin-adman ko ini nga mga linggwahe basi makasangyaw ngan makabulig ha kongregasyon. Kinahanglan ko magdumara hin Pag-aram ha Barantayan ha Sranantongo * nga linggwahe antes pa man ako magkaada bahin hin pagbasa ha Biblia! Ginpakianhan ko an usa nga bugto kon kumusta an akon pagdumara. Binaton hiya, “Danay, diri namon nasasabtan an iba nga mga pulong, pero maopay gud adto.” Daku nga bulig an kabataan. Kon nagsasayop ako, ginsisidngan nira ako, pero diri ito ginbubuhat han mga adulto. Damu an akon nahibaroan ha kabataan.

Marie-Line: Ha usa nga teritoryo, may mga Bible study ako nga French, Portuguese, ngan Sranantongo an linggwahe. Usa nga sister an nagsuhestyon nga unahon ko an linggwahe nga pinakamakuri ngan ig-urhi an pinakapamilyar ha akon. Waray pag-iha, nasabtan ko nga maaramon ito nga sagdon.

Usa ka adlaw, nag-Bible study ako ha Sranantongo nga linggwahe ngan an ikaduha ha Portuguese. Han  nagtikang ako ha ikaduha nga pag-Bible study, an sister nga kaupod ko nagsiring ha akon, “Marie-Line, baga hin may problema!” Nakikiistorya na ngay-an ako ha usa nga Brazilian nga babaye ha Sranantongo nga linggwahe imbes nga ha Portuguese!

Hinigugma gud kamo hadton mga nakakaupod niyo ha pag-alagad. Ano an iyo ginhihimo basi magin duok ha kabugtoan?

Jack: An Proberbios 11:25 nasiring: “An mahinatagon nga tawo mag-uuswag.” Diri kami nag-aalang ha paghatag hin panahon basi makaupod an iba ngan ha pagbulig ha ira. May kalabotan ha pagmintinar han Kingdom Hall, an iba nagsiring ha akon, “An mga magwarali na la an patrabahoa hito.” Pero nabaton ako: “Aw, magwarali man liwat ako. Salit kon may kinahanglan trabahoon, karuyag ko nga aadto ako.” Bisan kon kita ngatanan nagkikinahanglan hin panahon para ha aton kalugaringon, pirme namon ginpapahinumdom an amon kalugaringon nga diri namon karuyag nga ito nga amon panginahanglan makaulang ha amon ha pagbuhat hin maopay ha iba.

Marie-Line: Nangangalimbasog kami nga magpakita hin personal nga interes ha kabugtoan. Hito nga paagi, nahibabaro kami kon kinahanglan nira hin magbabantay han ira mga anak o makuha ha ira ha eskwelahan. Tungod hito, mahimo namon organisaron utro an amon mga plano basi kami makabulig. Salit nagin maopay kami nga magsarangkay, tungod kay andam kami bumulig ha ira kon kinahanglan.

Ano nga mga bendisyon an iyo nakarawat ha pag-alagad ha lugar nga mas daku an panginahanglan?

Jack: Malipayon gud an amon kinabuhi tungod han bug-os-panahon nga pag-alagad. Kaurogan na nga may mga higayon kami nga ig-enjoy an iba-iba nga linarang ni Jehova. Bisan kon may mga kakurian, murayaw an amon hunahuna kay maaram kami nga nasuporta ha amon an katawohan ni Jehova hain man kami.

Han batan-on ako, napriso ako ha French Guiana tungod ha pagin neutral. Waray ko gud mahunahuna nga makakabalik ako sugad nga misyonero ngan makakabisita ha mga prisohan sugad nga ministro. Hura gud nga nagbibendisyon hi Jehova!

Marie-Line: An akon daku gud nga kalipay amo an paggamit han akon kinabuhi para ha iba. Nalilipay kami nga nag-aalagad kami kan Jehova. Nakabulig liwat ito nga magin marig-on an amon pag-asawa. Usahay, napakiana hi Jack kon puydi namon imbitaron ha pangaon an usa nga mag-asawa nga nagkikinahanglan hin pagdasig. Kaurogan na nga nabaton ako, “Ito liwat an akon nahunahuna!” Haros pirme nagkakapariho an amon ginhuhunahuna.

Jack: Diri pa la maiha, nadayagnos ako nga may prostate cancer. Bisan kon nadiri hi Marie-Line nga mabatian ito, nagsiring ako ha iya: “Darling, kon mamatay ako buwas, diri ako mamamatay nga lagas. Pero mamamatay ako nga kontento kay maaram ako nga gin-gamit ko an akon kinabuhi ha espirituwal nga mga butang, nga amo an importante gud.”​—Gen. 25:8.

Marie-Line: Gintagan kami ni Jehova hin mga toka nga waray gud namon laumi ngan gintugotan kami nga magbuhat hin mga butang nga waray gud namon maimadyin. An amon kinabuhi puno gud hin mag-opay nga butang. Tungod kay bug-os nga nasarig kami ha Dios, bisan diin kami pakadtoon han iya organisasyon, mapakadto kami!