ჯეკ დო მერილინ 1988 წანაშე მოჸუნაფილ სრულ დროთ მსახურენა. თინეფ ადვილო მიარჩქვანუნა შხვადოშხვა მდგომარეობას; თე ჩილ დო ქომონჯიქ ბრელ შხვადოშხვანერ დანიშნულება მიღეს გვადელუპას დო საფრანგეთიშ გვიანას. ჟირხოლო ტერიტორიას საფრანგეთიშ ბეთელ ზედამხედველენს. მორთ ჯეკის დო მერილინს მუსხირენ კითხვა ქუდუსვათ.

მუშენ გინოჭყვიდით სრულ დროთ მსახურებაშ დოჭყაფა?

მერილინი: მა გვადელუპას იბრდუდ დო ხშირას მთელ დღას დიაჩქიმწკუმა ართო ფქადაგენდჷ, ნამუთ ირიათო დუდგინოდვალირ მაქადაგებელ რდუ. მა ხალხ მიჸორს, ათეშენ 1985 წანას, მუჟამსით სკოლა გუვათე, პიონერო მსახურება ქიდიბჭყჷ.

ჯეკი: ახალგაზრდა ვორდინ, ირიათო სრულ დროთ მსახურეფწკუმა მიღუდ ურთიერთობა, მიდგას უჸორდჷ მსახურება. სკოლაშ არდადეგეფიშ დროს, დამხმარე პიონერო ვმსახურენდჷ. მინშა საბატონ დო ჟეშხას, პიონერეფწკუმა ართო ავტობუსით მევურდით თინეფიშ უბნეფშა. ჩქი მთელ დღას ფქადაგენდით დო უკულ ზღვაპიჯშა მევურდით. მართალო ჯგირ დრო რდუ!

მერილინშა დაქორწინებაშ უკულ ხეთეშე, 1988 წანას, ჩქიმ დუდის ვუწი: „ჩქი თავისუფალეფ ვორეთ, ათეშენ შემლებნა უმოს ვაკეთათ მსახურებას“. მერილინცალო, მა ხოლო ქიდიბჭყჷ პიონერო მსახურება. ართ წანაშა, პიონერულ სკოლას გურაფაშ უკულ, სპეციალურ პიონერეფო დაბნიშნეს. ჩქი მუსხირენ ჯგირ დანიშნულება მიბღით გვადელუპას. თეშ უკულ საფრანგეთიშ გვიანას დაბნიშნეს.

წანეფიშ დინახალე თქვა ბრელშა გათირეს დანიშნულებეფქ. მუ გოხვარნა ქიმიარჩქვანათ ახალ ტერიტორიას?

მერილინი: საფრანგეთიშ გვიანაშ ბეთელს, ჯიმალეფს უჩქუდეს, ნამდა არძაშ უმოსო მობწონა ესაიაშ 6:8. ათეშენ, მუჟამსით მირეკუნდეს, თინეფ ხშირას რაგადის ციგანებულო იჭყანდეს დო მირაგადუდეს: „ხომ ქორშუნა თი მუხლ, ნამუთ არძაშ უმოსო მორწონა?“. თეშნერო მეფხვადუდით, ნამდა ახალ დანიშნულებას მიბღენდით, ათეშენ ვურაგადუდით: „ჩქი ვურთ! ჩქი მიდმაშქვით!“.

ჩქი ახალ დო ჯვეშ დანიშნულებეფს ართიანს ვა უდარენთ, მუშენდა თენა მეცილებნა დუვაფასათ  თი დანიშნულება, ნამუთ ასე მიღნა. თეს გეძინელ, ინიციატივას გიმიფრჩქინანთ, ნამდა გეფჩინებაფუათ და დო ჯიმალეფ დო დევეახლოვათ თინეფს.

ჯეკი: თეიშახ, ნამთინე მეგობარს ვაკოდ ახალ ტერიტორიაშა გეგნოფრთითკო, მუშენდა ოკოდეს თინეფწკუმა ქუდოფსკიდითკო. მარა, მუჟამსით გვადელუპაშე მიდაფრთით, ართ ჯიმაქ იესოშ სიტყვეფ ქუგმოშინეს, ნამუთ მათეშ 13:38-ს ჭარჷ: „მინდორ ქვეყნიერება რე“. ათეშენ, მუჟამსით დანიშნულებეფ მათირუნა, ჩქინ დუდის გუვოშინანთ, ნამდა ვა უღჷ მნიშვნელობა სო ვორეთ, ჩქი იგივე „მინდორს“ ვმსახურენთ. მთავარ თინა რე, ნამდა თე ტერიტორიას ხალხ რე!

მუჟამსით ახალ ტერიტორიაშა გინვურთ, ვორწყეთ, ნამდა თექ ხალხ ბედნერ რე. ათეშენ, ვოცადუთ თექიანეფცალო იფცხოვრათ. შილებე განსხვავებულ ოჭკუმალ უღდან, მარა ჩქი თის ბჭკუმუნთ დო ბშუნთ, მუდგას თინეფ ჭკუმნა დო შუნა; თეწკუმა ართო, ჯამრთელობას ხოლო ვუფრთხილანთ. ჩქი ირნერო ვოცადუთ, არძა დანიშნულებაშე დადებითო ბრაგადუათ.

მერილინი: თეს გეძინელ, ჩქი ბრელ მუდგარენს ბგურაფლენთ ადგილობრივ და დო ჯიმალეფშე. ჯგირო ფშუ ართ შემთხვევა, ნამუთ საფრანგეთიშ გვიანაშა ჩქინ პირველ მეულაშე მალას მიღუდეს. მანგარო ჭვენდჷ, ათეშენ იფიფქრით, ნამდა ჭვემაშ გინოღალას ოკო ქუჯინითკო დო უკულ მიდაფრთითკო ოქადაგეფშა. მარა ართ დაქ ბკითხჷ: „მზათ ქორექო მსახურებაშა ოულარო?“. მა გაკვირებულო ვუპასუხ: „ქო, მარა მუჭო?“. თიქ მიწუ: „გეჭოფ სქან ზონდიკ დო ველისპეტეფით იბდათ“. თეშნერო ქიდიბგურე, მუჭო შილებე ქოთ ზონდიკ გიკინებდას დო ქოთ ველისპეტ მერჸუნდას. თენა ვამგურუაფუდკონ, დღას ვეფშჷ ოქადაგებშა ჭვემაია დღას!

თქვა სოდგარენ 15-შა გინორთით შხვა ტერიტორიაშა. მუ პრაქტიკულ რჩევეფს მეჩანდით შხვეფს?

მერილინი: შხვადო გინულა შილებე რთულ რდას. ათეშენ მნიშვნელოვან რე, თიცალ ადგილ დოგორათ, სოდეთ მსახურებაშ უკულ კომფორტულო იგინანთ დუდის.

ჯეკი: მა, მუჭოთ წესინ, ჩქინ ახალ ჸუდეს დინახალეშე გინობღაფუნქ. ფილიალს ჯიმალეფს ქოუჩქნა, ნამდა შილებე თექ ბრელ ხანს ვა მაჸუან გაჩერებელქ-და, ციგანებულო მირაგადნა: „ჯეკ, ჯიმა ვარკო თე ჸუდეშ ღაფუა!“.

მერილინს ჯგირო ოხერხ, ნივთეფიშ ენონწყუალა. თინა ირფელს ყუთეფს ენოდვანს დო მიკაჭარანს: „აბანო“, „დანჯირუ ოთახ“, „კუხნა“ დო შხვა. ათეშენ, მუჟამსით ახალ ჸუდეშა მევურთ, შემლებნა უმოს ადვილო დობდვათ ყუთეფ მუშ-მუშ ოთახის. მერილინ ჭარუნს ნამ ყუთის მუ ენოძ, თაშ  ნამდა, შემლებნა ხეთე ქიმვაგათ თის, მუთ მოსაჭირნა.

მერილინი: ჩქი ქიდიბგურეთ, ნამდა ორგანიზებულეფ ვორდათ, ათეშენ შემლებნა გინულაშ უკულ ხეთე დიბჭყათ მსახურება.

მუჭო აგეგმენთ დროს თეშ, ნამდა ირნერო შეასრულათ თქვან მსახურება? (2 ტიმ. 4:5)

მერილინი: მუჭოთ წესინ, თუთაშხას იფსვანჯუთ დო კრებაშ შეხვალამაშო ვემზადებუთ. თახაშხაშე მოჸუნაფილ ვმსახურენთ.

ჯეკი: მართალ რე, ირ თუთას საათეფიშ გარკვეულ რაოდენობა ოკო ჩუვაბარათ, მარა თენა ვა რე ჩქინო არძაშ უმოს მნიშვნელოვან. ჩქინო არძაშ უმოს მნიშვნელოვან ქადაგება რე. ჸუდეშე გიმულაშ მომენტშე დორთაშახ ვოცადუთ არძას ვუქადაგათ, მიდგას შეფხვადუთ.

მერილინი: მაგალთო, მუჟამსით პიკნიკშა მევურთ, ირო მემიღ ბუკლეტეფ. ნამთინე ჩქინდა მოურს დო ფთხინა, ქიმეფჩათ პუბლიკაციეფ, თიშ უმკუჯინუო, ნამდა თინეფშა ვამთქუალნა იეჰოვაშ მოწმეეფ ვორეთინ. ათეშენ, ირო ვაქციენთ ყურადღებას ჩქინ მიკოქუნას დო საქციელს. ხალხ ხეთე ორწყე თეცალ მუდგარენეფს.

ჯეკი: თეს გეძინელ, ჯგირ საქმეეფით მეზობელეფწკუმა ხოლო ვამოწმენთ. ჩქინ ჸუდეშ გოხოლუას დიხაშე ქარღადეფს ებკორობუნქ, გვამიშ ყუთის ფჩოლანქ დო ჯაშე გითოცუმილ ფურცელეფს ფხუშუნქ. ჩქინ მეზობელეფ თეს ოკვირნა დო მინშა მოკითხნა: „ბიბლია ხომ ვაიღნა ჩქიმო?“.

თქვა ხშირას ქადაგენდით დაშორებულ ტერიტორიეფს. ხომ ვეგიშინანდით თე დროს მოხვალამირ ნამდგაინ განსაკუთრებულ შემთხვევას?

ჯეკი: გვიანას, ნამთინე ტერიტორიაშა მეულა რთულ რე. ხშირას ართ მარაშ დინახალე გლახა შარეფს 600 კილომეტრ მაფნა ოულარ. ართ-ართ დასამახსოვრებელ შემთხვევა მიღუდეს სანტ ელის, ამაზონიშ ტყას. თექ კატერით ქიმემრთუმდესკონ, მუსხირენ საათ რდუ საჭირო. თი ხალხიშ უმენტაშ, მით თექ ცხოვრენდჷ, ოქროშ მაგორალეფ რდეს. თინეფქ ჩქინ მეჩამილ პუბლიკაციეფიშ გურშენ მარდულობა თით გიმოხანტეს, ნამდა ოქროშ ჭიჭე ნოტეხეფ შესაწირავო ქომჩეს! ონჯუას თექ ჩქინ ორგანიზაციაშ ართ-ართ ვიდეო ვოძირეთ, ნამდგას ბრელ ადგილობრივქ უჯინ.

მერილინი: მუსხირენ წანაშ წოხოლე, ჯეკის თხუეს, კამოპის გოშინაშ ონჯუაშ მოხსენება წეკითხკო. თექ მიოულარო, მალწყარ ოიაპოკის ოთხ საათის მიფშით კატერით. თენა მართალო განსაკუთრებულ შემთხვევა რდუ.

ჯეკი: ოშქურანჯ რდუ თი ადგილეფ, სოდეთ მარჩხაწყარ რდუ დო ჩქარას მიშჷ. მოკო გიწუათ, ნამდა თე ჩქარ დინებაშ ჯინა მანგარ სასიამოვნო რე. კატერიშ შოფერს ჯგირო ოკო უჩქუდკო მუშ საქმე, ნამდა უსაფრთხოთ გემკორთკო თე ადგილეფ. მარა თენა მართალო საინტერესო მოგზაურობა რდუ. გოშინაშ ონჯუას სოდგარენ 50 პიროვნებაქ დესწრჷ, თინეფ შქას ამერიკელ ინდიელეფქ, თიშ უმკუჯინუო, ნამდა თექ ხვალე 6 იეჰოვაშ მოწმე რდუ!

მერილინი: თეცალ ჯგირ შემთხვევეფ ელჷ თი ახალგაზრდეფს, მიდგას უმოსიშ კეთება ოკო იეჰოვაშო. თეცალ სიტუაციეფს, იეჰოვას ოკო მიენდათ დო თენა რწმენას გაიმანგარენა. ჩქი ხშირას ბგინაფლენთ იეჰოვაშ მოხვარას მსახურებაშ საქმეს.

თქვა მუსხირენ ნინა დიგურეთ. ადვილ რდუო თინეფიშ გურაფა?

ჯეკი: შუროთ ვარ. თე ნინეფ თიშენ იბგურე, ნამდა საჭირო რდუ. სოიშახ კრებას სრანანტონგო * ნინაშა ბიბლიაშ კითხირს მუჩანდეს, „გინაჯინალ კოშკიშ“ შეხვალამა ოკო ჩუვატარკო! შეხვალამაშ უკულ ართ ჯიმას ბკითხჷ, მუჭო ჩუვატარ თინა. თიქ მიპასუხ: „მინშა ნამთინე სიტყვას ვა ბგებულენდით, მარა იშენ ჯგირ რდუ“. ბაღანეფქ მანგარო მიმეხვარეს. მუჟამსით შეცდომეფს ვუშვენდჷ, თეს დიდეფ ვარინ ჭიჭელეფ მირაგადუდეს. ახალგაზრდეფშე ბრელ მუდგარენ დიბგურე.

მერილინი: ართ უბანს ბიბლიაშ გურაფეფ მიღუდ ფრანგულ, პორტუგალიურ დო სრანანტონგო ნინეფშა. ართ დაქ ელამიჩ, ნამდა დიო თი ნინაშა ჩუვატარკო ბიბლიაშ გურაფა, ნამუთ არძაშ უმოსო მიჭირდჷ, თენა რდუ პორტუგალიურ, დო ბოლოს თი ნინაშა ჩუვატარკო, ნამუთ არძაშ უჯგუშო მიჩქუდ. მალას ქიმეფხვად, ნამდა თე რჩევა ბრძნულ რდუ.

ართ დღას, ართ ბიბლიაშ გურაფა ოკო ჩუვატარკო სრანანტონგო ნინაშა დო მაჟია პორტუგალიურშა.  მუჟამსით მაჟია გურაფაშ ჩატარება ქიდიბჭყჷ, თი დაქ, ნამუთ ჩქიმწკუმა რდუ, მიწუ: „მერილინ, თინა ვა გებულენს სქან ნარაგადის!“. ქიმეფხვად, ნამდა ბრაზილიელ ოსურს პორტუგალიურიშ მანგიორო სრანანტონგო ნინაშა ვურაგადუდ!

თქვა მანგარო უჸორთ თინეფს, მიდგაწკუმა ართო მსახურენთ. მუჭო დეახლოვით თე და დო ჯიმალეფს?

ჯეკი: იგავეფიშ 11:25-ის ჭარჷ: „ხეგოფაჩილ კოჩის მუთუნ ვა მაკორდუ“. ჩქი ირნერო ვოცადუთ, შხვეფწკუმა გუვატარათ დრო დო მივეხვარათ თინეფს. სამეფო დარბაზიშ დონწყუალაშ დროს ნამთინექ მიწუ: „თეს მაუწყებელეფ გაკეთენა“. მარა მა ვუპასუხ: „მა ხოლო მაუწყებელ ვორექ. თაშ ნამდა, საქმე ოკეთებელ ქორენ-და, მოკო მა ვაკეთე“. მართალ რე, არძას მოკონა ჩქინ დუდის დაუთმათ დრო, მარა მა დო მერილინს ვა მოკონა თექ შხვეფშა ჯგირიშ კეთებას მეცილან დო თეს ხშირას გუვოშინანთ ჩქინ დუდის.

მერილინი: ჩქი ირნერო ვოცადუთ, პირად ინტერეს გეგმიფრჩქინათ და დო ჯიმალეფიშ მიმართ. შედეგო, მიჩქნა მის მუჟამ ოსაჭირ ბაღანეფიშ მიკოლუაფა ვარდა სკოლაშე თინეფიშ მოჸუნაფა. ჩქი გეგმეფს თეშ ფთირანთ, ნამდა შხვეფშა შემალებუან მოხვარაქ. თეშნერო, ვეახლოვებუთ შხვეფს დო მზათ ვორეთ მივეხვარათ, მუჟამსით თენა ოსაჭირნა.

მუ კურთხევეფ მოიღეს თექ მსახურებაქ, სოდეთ მაქადაგებელეფიშ საჭიროება რე?

ჯეკი: სრულ დროთ მსახურებაქ ბრელ კურთხევეფ მომღეს. ჩქი ხშირას მიღდეს საშვალება, ნამდა ქიბსიამოვნითკო იეჰოვაშ გუნაჭყეფშე დაკვირებათ. მართალ რე, თეცალ მსახურებას სირთულეეფ ხოლო მოჸუნს, მარა შინაგან სიმშვიდე მიღნა, მუშენდა მიჩქნა, ნამდა სოდგა ვა ვორდათინ ღორონთიშ ხალხ ელამრენა.

ახალგაზრდა ვორდინ, ქრისტიანულ ნეიტრალიტეტიშ გურშენ საფრანგეთიშ გვიანას ობჭოფეს. დღას ვეფიფქრენდჷ, ნამდა მუთუნ დროს თექ მისიონერიშ სტატუსით დიბრთუდ დო უფლება მაღვენუდ ციხეშა ოქადაგებშა გემნობრთკო. მართალო, იეჰოვა კურთხევეფს ვა მარკენა!

მერილინი: ჩქიმდა დიდ ხიოლ მოუღ შხვეფიშ მოხვარას. ჩქი ბედნერეფ ვორეთ, მუშენდა ვომსახურუთ იეჰოვას. თექ, მუჭოთ ჩილ დო ქომონჯ, ართიანწკუმა უმოსო დუმაახლოვეს. მინშა ჯეკ მოკითხ, შემლებნან დო ვარ სადილშა დუვაპატიჟათ თი დაქორწინებულ წყვილ, ნამდგას გურიშ ელაკინა ოსაჭირ. ხშირას ჩქიმ პასუხ რე: „ზუსტას თეს ფიფქრენდჷ!“. თაშ ნამდა, ხშირას ართნერო ფიფქრენთ.

ჯეკი: მუსხირენ წანაშ წოხოლე პროსტატაშ კიბოშ დიაგნოზ ქიგემშქვეს. მართალ რე, მერილინს ვა უჸორს თეს იბჩიებუქინ, მარა მა იშენით ვურაგადუქ: „მერილინ, დიო მოხუცებულ ვა ვორექ, მარა მალას დობღურ-და, მიჩქჷ, ნამდა მთელ ჩქიმ ცხოვრება იეჰოვაშ მსახურებას მევუძღვინ, მუთ დასურო ღირებულ რე დო თეშ რჩქინას ჩქიმდა ბედნერობა მოუღ“ (დაბ. 25:8).

მერილინი: იეჰოვაქ თიცალ დანიშნულებეფ მუჩეს დო თიცალ საქმეეფ მოკეთებაფეს, მუდგას დღას ვეფიფქრენდით. ჩქინ ცხოვრება ჯგირ მუდგარენეფით რე ეფშა. ჩქი სრულაშე ვონდუთ ღორონთის დო ათეშენ, თიშ ორგანიზაციაქ სოდგა ვა ფთხუან ულა, ირდიხაშა ვურთჷ!