Rango taminy 1988 i Jack ndreky Marie-Line Bergame niaraka nanompo manontolo andra. Iro io malaza mahay mizatra fiain̈ana vaovao, ndray matetiky mifindrafindra. Marobe tany efa nanendren̈a iro ta Goadelopy ndreky ta Guyane tan̈y, ary nikendro aby jiaby. Sampan̈any France miandraikitry tany aroe io avahizo. Alo han̈ontaniantsika hely iro roe fivadiany.

Ino raha nandrisiky anaro han̈ano fanompoan̈a manontolo andra?

Marie-Line: Ta Goadelopy tan̈y zaho tombo. Mamako Vavolombelon̈o Jehovah sady ten̈a nazoto nitory. Tamy zaho mbo hely, matetiky zahay roe niaraka nitory nan̈ariva andra. Zaho tia olo, ke nan̈ano pisava lalan̈a zaho koa fa nafaka bac taminy 1985.

Jack: Efa tia nifan̈osihosy tamy panompo manontolo andra edy zaho rango mbala hely. Iro io tia fanompoan̈a mare. Nan̈ano pisava lalan̈a pan̈ampy zaho, isaka vakansy. Koa fa farany herin̈iandra, niondran̈a bisy zahay niaraka nanompo tamindro pisava lalan̈a aby io tamy faritanindro tan̈y. Nitory nan̈ariva andra zahay, baka io mangala tsitsìko hely amorondranomasin̈y. Zay zaka tsara e!

Nan̈ano mariazy zahay roeny Marie-Line taminy 1988. Ho dinikinaka baka tio: ‘Nan̈ino ma tsy zahay roe lastio man̈ano fanompoan̈a manontolo andra? Tsisy raha misakana zahay ane.’ Mba nan̈ano pisava lalan̈a maharitry koa zaho, niaraka tamy vadiko. Taon̈o araiky tafaranizen̈y zahay voatendry pisava lalan̈a manokan̈a, koa fa baka nan̈ano sekoliny pisava lalan̈a. Ravoravo zahay nanompo tamy faritry maro ta Goadelopy. Zahay baka tio nalefa ta Guyane.

Niovaova mare fanendren̈a nazonaro. Ino raha nan̈ampy anaro ho zatra fiain̈ana vaovao?

Marie-Line: Haindro ranadahy tamy Betelany Guyane tao fa Isaia 6:8 andininteny ten̈a tianay. Lera iro nikaiky zahay, matetiky iro misongetaka aminay: “Ino andininteny tianaro be in̈y?” Direkty hainay fa hiova ndraiky koa fanendren̈anay, ke ho zahay tamindro: “Ty Oe Zahay, Iraha!”

Zahay tsy mampiran̈a fanendren̈anay vaovao amy lay taloha, amy zen̈y zahay hankasitraka izio  tsarabe. Ataonay naman̈a koa iro piaramanompo aby amy faritaninay vaovao io.

Jack: Namango iro namanay sasany aby io nandresy lahatra zahay tsy handeha, fotony tiandro loatra zahay. Fa zahay koa fa niala ta Goadelopy, nisy rahalahy araiky zay nampatsiaro zahay volan̈any Jesosy amy Matio 13:38 ty: “Tanimbary io donia ty.” Isaka zahay miova fanendren̈a, alenay onon̈o fo fa mbala manompo amy tanimbary io fo zahay na aia na aia tany misy zahay. Olo ndreky faritany itorian̈a ny raha ten̈a maventy!

Zahay koa fa navy tamy faritaninay vaovao io, hitanay normaly fiain̈ananolo tao sady ravoravo iro. Nalainay tahaka fomba fiain̈anandro zen̈y. Tsy mahazatra zahay marin̈y ndraiky hanin̈indro, fa zay raha hoanindro hoaninay, avio zay rano igiahindro igiahinay. Zahay ndraiky nitandrin̈y fo tsao marary. Zahay koa fa mikoran̈a, raha tsara momba fanendren̈a azonay fo koran̈inay.

Marie-Line: Maro raha nianaranay baka tamy piaramanompo. Azoko onon̈o tsy elany navianay ta Guyane teto, nisy mahalen̈y be, kanefa zahay taminio handeha hitory. Ke zahay nieritreritry fa hiambin̈y mahalen̈y io voly zay vo mandeha. Fa rahavavy araiky zay nan̈ontany zaho: “Akory ma atsika, tsendriky handeha?” Lany fan̈ahy zaho nivolan̈a taminany: “Akory ma handianantsika amy mahalen̈y be ty drako?” Ho izy: “Aleva parasolinao ndreky biskiletinao, alô atsika!” Tamy zen̈y nahaizako mitondra biskilety man̈ano large tan̈anilany sady mitana parasoly. Tsy nahavita nitory taminandra asara foeky donko zaho ôtrizay, izikoa tsy nianatra nan̈ano zen̈y.

Kadiriny im-15 anaro nifindrafindra. Ino sosokevitry mety amianaro olo momba zen̈y?

Marie-Line: Mifindrafindra io tsy mora. Ke tsara izikoa atao mahatamana tran̈o pitrahanten̈a, amy zen̈y isaka anao baka manompo, mahatsiaro velombelon̈o fo.

Jack: Matetiky isaka zahay mifindra, tsiary tsy paindreko fo tran̈onay vaovao. Efa haindro rahalahy amy sampan̈a an̈y raha zen̈y, ke izikoa efa haindro fa mety tsy hidoko ela amy tany araiky zahay, misy iro mivolan̈a: “Ndraikiny ty, anao aza mandany lera mipaindra Jack e!”

Marie-Line nanjary spesialistiny fifindran̈a! Ataony an̈atiny karton entan̈anay, baka io asiany soratra: “Ladosy”, “tany fandrian̈a”, “lakozìny”, sy ny tariny. Samby aminy an̈arany aby karton jiaby.  Ke zahay koa fa avy amy tran̈onay vaovao, zahay tsy sahiran̈a mandamin̈y karton aby io amy tany tokony ho hisy izy. Ataony listy ambelan̈any karton tsiaraikiaraiky entan̈a an̈atinizio, baka tsy mijaly anten̈a lera mitady izy.

Marie-Line: Nanjary nahay nandamindraha zahay, ke tsy lany fotoan̈a eky fa direkty afaka nanompo.

Akory fandaminanaro fotoan̈a misy hahavitanaro tsara ‘fanompoan̈anaro’?—2 Tim. 4:5.

Marie-Line: Isaka tinainy zahay mangala jery hely sady man̈oman̈a. Komansy talata zahay manompo.

Jack: Zahay misy lera ian̈iny, fa tsy zen̈y raha ten̈a ifantohanay. Efa fanompoan̈a fo fiain̈ananay! Mitory fo zahay miaraka vo miboaka antran̈o firaka zahay mody hariva; lan̈iany olo hitanay efa itorianay edy.

Marie-Line: Mitondra trakty fo koa zaho lera zahay mangala diandian̈a. Misy olo man̈aton̈o fo zahay ndray tsendriky nivolan̈a oe Vavolombelon̈o Jehovah; iro mangataka boky. Ke mitandrin̈y fo zahay amy fisikinan̈anay ndreky amy raha ataonay, fotony olo raha mangala onon̈o fo.

Jack: Mifen̈y fo koa zahay ho tsara fan̈ahy amy jiràny antanàna. Efa fitorian̈a baka zen̈y. Koa fa maloto man̈odidin̈y lakoronay, tsimpiniko taratasy jiaby mipariparitaka, hadosoko ravindraha latsaka baka io hariako fako. Mitazan̈a iro. Ho iro aminaka: “Ameza Baiboly kony zaho, koa misy aminao.”

Matetiky anaro nandeha nitory tamy tany mitokan̈a, ke aia tamy dianaro aby zen̈y ten̈a hitanaro fa niavaka?

Jack: Ratsy mare lalan̈a sasany a Guyane eto. Matetiky zahay mandeha tomabily kadiriny 600 kilometra amy lalan̈a ratsy, an̈atiny herin̈iandra. Tsy mety adin̈anay dianay ta Saint-Élie, tan̈atialany Amazonie zay. Niomba 4x4 ndreky lakan̈a zahay nengo tan̈y. Refindrefin̈y hely kony zahay vo navy tan̈y! Ankamarozanolo an̈y pangady ndreky panivan̈a volamena. Tiandro mare bokintsika, ke teta na volamena maro madiniky nataondro fan̈amezan̈a antsitrapo. Nan̈aboahanay videony fandaminan̈a iro harivariva, ke naro olo navy.

Marie-Line: Nisy lerany Jack navoatendry han̈ano kabarony Fahatsirovan̈a, ta Camopi. Nandeha lakana tan̈atiny efatra lera tamy Ten̈aranony Oyapock zahay vo navy tan̈y. Tsara dianay tamy zen̈y!

Jack: Ambany rano amy ten̈arano io kanefa feno vato sady mandeha marebe. Rikian̈a kony anao mahita raha zen̈y e! Izikoa tsy mahay olo pitondra lakan̈a, mety hantreky amy vato lakan̈a, ke hamono. Fa an̈y ndraiky tsara e. Tsiota fo zahay Vavolombelon̈o Jehovah, kanefa kadiriny 50 olo nan̈aton̈o Fahatsiarovan̈a. Indiain sasany tamindro.

Marie-Line: Fiain̈ana tsarabe karaha zen̈y miambin̈y tanora tihampitombo fanompoan̈a. Mahaifatatra fo finoan̈anten̈a, fotony anten̈a mianatra matoky Jehovah. Matetiky, hitanao tsarabe tan̈any Jehovah man̈ampy.

Maromaro volan̈a hainaro zay. Mora taminaro ma nianatra volan̈a vaovao aby zen̈y?

Jack: Ôbabe, tsy honohono! Raha nilain̈a tamy fanompoan̈a koa volan̈a aby io ke, zen̈y nahavy zaho nianatra iro io. Nirahin̈y nitariky Fianaran̈a Tilikambo Fiambesan̈a tamy volan̈a sranan tongo * zaho, kanefa na anjara vaky Baiboly mbala tsiary nataoko tamy volan̈a io! Izikoa fa vita fianaran̈a in̈y, ho zaho tamy rahalahy zay: ‘Akory fitaritako izy tao?’ Ho izy: “Pare rahalahy! Nisy raha sasany fo tsy hainay.” Olobe baka tsy nasaky nan̈itsy zaho foeky ndray tsy marin̈y raha nivolan̈ako. Tsaiky ndraiky tsy karaha zen̈y fa nahitsindro fo zaho isaka tafivolan̈a raha diso, ke iro ten̈a nan̈ampy zaho sady nahaizako raha maro.

Marie-Line: Tamy faritany araiky zay, zaho nanan̈a fampianaran̈a Baiboly tamy teny fransay, portigey, ndreky sranan tongo. Nisy rahavavy araiky nivolan̈a taminaka oe lay pianatranao miteny portigey ataova voanalohany, fotony anao tsy mahay miteny portigey tsara, iô anao vo mampianatra lay amy volan̈a hafa. Hitako tsarabe fahamarin̈any raha zen̈y, tafara tatỳ.

Tandraraiky zaho, nampianatra pianatranaka miteny sranan tongo talohany lay miteny portigey.  Zaho koa fa nampianatra araiky faharoe io, nivolan̈a rahavavy fanamako: “E Marie-Line, tsy hainy kony raha volan̈inao zen̈y e!” Kaiky zaho taminio efa tafivolan̈a sranan tongo, kanefa man̈angy nampianarinay io breziliainy ke miteny portigey!

Anaro ten̈a tiany piaramanompo. Karakory nahavy anaro nanjary kamaradindro mare?

Jack: Ohabolana 11:25 mivolan̈a: “Hahazo hatsaran̈a lan̈iany olo tsy matity.” Narehanay volan̈a zen̈y. Nifen̈y fo zahay nan̈ampy olo. Izikoa fa nisy raha nila namboarin̈y tamy Tran̈o Fivorian̈a, nisy olo nivolan̈a taminaka: “Ambilà pitory aby io man̈ano izio, rahalahy.” Ho zaho: “Zaho kony mba pitory e! Ke izikoa misy asa mila atao, zaho von̈ono han̈ampy.” Misy lerany anten̈a mba tihitokana hely, karaha olo jiaby fo. Fa nalenay onon̈o fo ndraiky fa tsy tokony hatao tamban̈a tsy han̈anovan̈a ny tsara aminolo raha zen̈y.

Marie-Line: Zahay tihan̈ampy piaramanompo taminay, ke nifen̈y zahay nan̈ano zen̈y. Nanjary hainay ombian̈a iro mila olo hiambin̈y zanakandro, na hangala tsaiky ta lekoly, ke nampifan̈arahinay tamy zen̈y fotoan̈anay, nan̈ampian̈a iro. Von̈ono fo zahay koa fa misy raha ilandro zahay, ke nanjary nifankatia mare zahay.

Ino aby hatsaran̈a nazonaro izikoa fa nandeha tamy tany nila pitory maromaro?

Jack: Fanompoan̈a manontolo andra io mampasambatra. Ravoravo anten̈a, fotony manan̈a fotoan̈a ankafizan̈a raha isankarazany niasainy Jehovah. Tsy maintsy misy fo raha sarotro. Milamin̈y fo ndraiky jerinay, fotony hainay fa vahoakany Jehovah tsy mety hiala zahay ndray aia ndray aia tany misy zahay.

Nigadra tamy prizony Guyane zaho tamy mbala manafo lahy, fotony tsy nan̈eky han̈ano maramila. Tsy tan̈aty jeriko foeky oe zaho io mbala hanjary misionera ke hahazo lalan̈a hitory tao. Ten̈a maro hatsaran̈a nazoko tamy Jehovah!

Marie-Line: Sambatra oe anten̈a koa fa man̈ampy olo. Ravoravo zahay manompo Jehovah. Nahainifankatia fo koa zahay fivadiany. Misy Jack koa fa mahita olo fivadiany kivikivy, ho izy aminaka: ‘Alô iro io ainvitentsika.’ Ho zaho: “Zen̈y edy raha tseky hivolan̈iko!” Mitovy fo raha tan̈aty jerinay.

Jack: Tsendriky ela, hita fa zaho avoany kanserany prôstaty. Ho zaho tamy Marie-Line: “Ren̈inao vadiko, koa misy hifatesako aminy amaray an̈y, marin̈y ndraiky fa ‘maty matoe’ zaho, fa zaho afapo. Tsy nanen̈iny foeky zaho nampiasa fiain̈ananaka nanompoan̈a Jehovah. Tsy very bôriny raha nataoko.” (Gen. 25:8) Halany Marie-Line zaho mivolan̈a zen̈y, fa zen̈y raha tsapako.

Marie-Line: Maro varavaran̈a nibiafiny Jehovah taminay; tsy nampoizinay foeky sasany. Maro raha niritriretinay tsy ho vita kanefa vita fo. Tianay mare fiain̈ananay! Matoky Jehovah mare zahay. Von̈ono fo zahay ndray aia tany han̈irahany fandaminan̈a zahay!