Jack na Marie-Line aima digo nimangisunge Kindo ti aregbo dũ naatona rogo 1988. I na rengba ka manga ariapai kuti agu apai du yo rogoho ni bakiakia, na i ima idapa badungu asunge ni bakiakia Guadeloupe yo na French Guiana yo. Agi arago re dunduko du tiibe gu be-basunge nga ga France awere. Ani sananga aJack na Marie-Line na bete asanahe.

Ginipai nafõngbaduroniyo oni tona sunge Kindo ti aregbo dũ?

Marie-Line: Mbu re ni tooni gude Guadeloupe yo, ani anaatungusapai dedede tona wiso da ku nyemu na nina, nga guri naadu ni zaaza natungusipai. Mi ima kpinyemu aboro, sidu, fuo mi nyasi sukuru rogo 1985, mi atona sunge abazakigene nibasa.

Jack: Mbu re ni tooni gude, mi anaadia regbo dedede na agu amangisunge Kindo ti aregbo dũ naima kpinyemu sunge tungusapai ni kerehe. Mi anaamanga sunge ni moundo abazakigene dedede ti regbo gu ongoda nga ga sukuru. Ti kura aregbo ti digido aposo, ani anaabita tarambiri tipa ka ndu fuo abazakigene ku rogo gu dagbarago i anaatungusapai rogoho. Ani anaatungusapai rogo gu uru re naabaha, fuoho ani kini ndu ka sungo rii ngume yo pangba baime. Agu aregbo re aima ngba ni kerehe!

Ngbutuko fuo ani mangi rogatise na Marie-Line rogo 1988, mi ape gupai fu tire nga, ‛Atindiro ho du kurii rani awere te, si naida ani kiisi gaani sunge tungusapai.’ Sidu, mi atona sunge abazakigene na Marie-Line naima du mbata ni nazakigene. Fuo garã sa kusa, i amoi rani ni kparakpara abazakigene tingbafuo ani mangi gu sukuru nga ga abazakigene. Ani amangi dungu wene asunge Guadeloupe yo nga gu ani agbia ngbarago ti ni mbata fu i yambu rani ani ga ku French Guiana yo.

I ima aria gaoni asunge ni badunguhe rogo agu agarã susi. Ginipai undo roni oni iniditironi na wai apai aˈaria tihe furoni ni vovoho?

Marie-Line: Agu awirina du rogo gu Betere nga ga French Guiana aima ino gupai nga gu veresi ningba angba tirani gbe nga Yesaya 6:8. Sidu, ho i anaayamba rani ni rogo terefuni, i anaaba wia dedede nga, “Ya mo oni natingidapa gu veresi ningba angba tironi gbe?” Ani anainoho nga gipai re nayugo gupai nga i naida ka aria gaani sunge, sidu, ani anaakaragapai nga, “Ani du re! Oni kedi rani!”

 Ani naaringbisanga gaani vovo sunge na kuruhe te, mbiko ka ani mangihe wo, ani adunga na rengba ka gbia ngbarago ti gaani vovo sunge te. Berewe a, ani naadia regbo ka ino awirinarani wenengai.

Jack: Bakuru kusayo, kura awirina aaidanga ani guari patiyo te, sidu, i aasadi ka aria berãrani ani nye. Ono ho ani aguari ni Guadeloupe yo, wirina sa atingidi rani na gu fugo Yesu du rogo Matayo 13:38: “Gu ati re nga zegino.” Sidu, ho i aˈaria gaani sunge ni, ani natingida tirani na gupai nga ani na mangasunge kina rogo gu bangisa ati re ka ani vura du kina wari vurũ. Gu kurapai berewe nga, gupai du na nyanyakipaha kisusi nga i furani ku rogo gu dagbarago du na aboro rogoho tipa ani tungusapai fuyo!

Ho ani ada ni rogo vovo dagbarago nga ga sunge, ani nabi gupai nga agu aboro du yo na kina rengba ka raka rogo gu ba re na ngbarago. Sidu, ani namanga asadatise ka raka kina wai agu aboro du rogo gu dagbarago re araka. Agu ariahe i arihe ima rengba kadu kia, ono ani nari kina guhe i arihe na kini mbiri kina gu ime i ambiraha, ono kidu na rubangirise na pa kpotorani. Ani naamanga ome ka fura wenengai bara ai sunge.

Marie-Line: Ani naawirika badungu apai a be agu awirina du rogo gu dagbarago re. Mi natingidapa pai sa namangi ngbutuko fuo ani da French Guiana yo. Mai aana ni kerehe, sidu, ani aberẽ gupai nga si naida ani sungudi mai si kati mbata ani kini ru ka ndu gene tungusapai yo. Ono kura wirina asana re nga, “Ya mo ka ani ndu?” Kina ngbare nazere mi ki karagapai nga, “Ani nika ndu wai?” Ri aya, “Mo di gamo amburera, na ani nika ndu na angbagida.” Rogo gi gene re, mi awiriki wai ka zada amburera na kini si ngbagida kina ti gu bangisa regbo re. Wa ka mi aawirikanga ha ya, ka mi adunga na rengba ka tungusapai kito te!

Oni ima ta wa bara 15 rogo aba na sunge Kindo. Ya mo aberãpai ngbaroni fu kura aboro tipa gipa re?

Marie-Line: Ga ku rogo kura ba ima rengba kadu ni kpakarakpakaraha. Wa vura duhe wo, si ni nyanyakipa pai ka gbia gu ba du ni wenehe mo nikaa ongoda rogoho ho mo nikaa yego ni gene tungusapai yo.

Jack: Dedede, mi naambeda vuru gaani vovo bambu yo berewe na rangi. Ka agu awirina du be-sunge yo ini gupai nga ani aimanga ku rogo gu ba re na sunge te, ti kura aregbo, i naape gupai fere nga, “Jack, ka mo mbusi nga tiro ka mbida gu bambu re na rangi ya!”

Marie-Line ima ino wai ka mbakada bara ahe wenengai! Ri namaa ahe dunduko ku rogo sanduki na ki kekeapai ti ni nga “aũ ba mbida ime,” “aũ bambu rame,” watadu “aũ manga riahe.” Sidu, ho ani ada ni rogo gaani vovo kporo, ani nadu na rengba ka maa agu asanduki re ni basasa kina rogo gu bambu si aida si du rogoho. Ri naakeka rimo agu ahe dunduko du rogo asanduki nibasasa,  tipa gupai nga ani du na rengba ka gbia guhe ani aidaha ni wiri ipo.

Marie-Line: Mbiko wa ani naima wirika wai ka maa gaani apai ti genehe, ani nidu na rengba ka tona gaani sunge tungusapai nibasa.

Waigu oni aringbisa gaoni regbo tungusapai tipa gupai nga oni du na rengba ka ‘digiso gaoni sunge’?—2 Tim. 4:5.

Marie-Line: Ani naaongoda rago Sa Sunge na kini mbakadi gaani adunguratise. Tona Rago Ue ka ndu kumbatayo, ani nandu gene tungusapai yo.

Jack: Wa vura duhe nga bange asa kinaho si aida ani tungusipai tipaha rogo diwi yo sa, ani naamaanga berãrani kutini te. Tungusapai nga nyanyakipa pai rogo gaani raka yo. Tona ti gu regbo ani aguari kporo yo da kuti gu regbo ani akaraga tirani, ani ninaamanga ome ka fura na agu aboro dunduko ani agbia yo.

Marie-Line: Ni kpiapai, ho ani akura ni ka taã ndurani, mi naarogoda atrakte na mi ti aregbo dũ. Gu kura aboro ni naye fuo rani na kini sana rani tipa awaraga, ka si vura du vurũ nga ani agumbanga ha fuyo nga aDezire Yekova nga ani te. Si nga ndu gupai ani nidu na rubangirise tini na wai ani avo roko na wai ani amangapai. Aboro nabi agi apai re abi.

Jack: Ani naamanga dezirepai a nidu ani ni wene amurakporo. Mi naadungura kpatakpata awaraga sende, kini uka guguda kusayo rogo ũ guguda, na kini gara akpe kusayo pangba kpurani. Gaani amurakporo nabi gipai re abi na ti kura regbo, i naasanahe nga, “Ya mo ka mi gbia Baibiri beroni?”

Dedede, oni ima tungusapai rogo agu arago du tuturũ. Ya mo pai ho oni atingidaha ti ai agu anunguro re?

Jack: Guiana yo, kura adagbarago kinaho duhe ni mbumbuhe kada rogoho. Dedede, si naaida ani ndu anunguro nga akirometere 600 tipa poso sa na ti gbegberẽ agene. Gaani nunguro ku rogo gu gbaria nga St. Élie, du rogo gu bire nga Amazon, nga gupai bangirani nikaa gonga ti ni ya. Si adi rani na dungu asa ani da yo, ani andu na tarambiri gbiati gu kurungba du na makana ti ni. Badungu agu aboro naaraka yo nangia age dahabu. Bete aguyo afu mbusuduru dahabu furani ni gamahe tipa ka yugo gayo tambuahe tipa gaani awaraga! Nyemu, ani ayugu vidio sa dagba agu avidio nga ga riigbu. Badungu aboro rogo gu dagbarago re aye ka bihe.

Marie-Line: Bete agarã kusayo, i agumba gupai fu Jack nga ko ndu ka manga gumbapai nga ga Tingida Pakpio Yesu Camopi yo. Tipa ani da yo, ani andu na kurungba tipa dungu asa bangiri gu di nga Oyapock. Wene nunguro du naadu.

Jack: Agu aba ime afu rogoho na ome rii ambia aima rengba kadu ni kerehe ho ime anaadunga ni ni hihihe gbe ya. Bibi agu aba ime afu rogoho na ome rii ambia ima ngba ni kerehe ho kurungba ambeda ni na ni. Si naida bakama kurungba du na birĩ ka ino wai ka kura rogo agi aba re. Ono wene nunguro du naadu. Wa vura duhe nga aDezire Yekova 6 gbua naadu rogo gi ba re, aboro wa 50 naye tipa Tingida Pakpio Yesu kodihe na bete agu aboro nga Amerindian!

Marie-Line: Gi weneapai re ima rengba ka manga fu paranga aboro ka i mangisunge ni bakerehe fu Yekova. Si naida mo du nakido kuti Yekova rogo apai wa gere, na si nanyakasa gamo idapase. Dedede, anaabi wai abi Yekova aundo rani.

Oni ima wirika dungu afugo. Ya mo si taata furoni ka wirika afugo?

Jack: Wagusa te. Mi awiriki agi afugo re tipa gupai nga kadu na rengba ka tungusapai na ka undo rogo dungurati. I afu sunge nungusa Ngbaõbambu Sinziri fere rogo gu fugo nga Sranantongo * mbata fu i fu kina kandara geda Ziazia Kekeapai fere! Mi asana kura wirina kangia aboro aagia gupai mi aagumbaha. Ko akaragapai nga, “Kura aregbo kinaho ani naagianga kura afugo ya, ono si niima ngba.” Agude aima undore ni bakerehe. Ho mi anaamanga ingahe ni, i anaapehe ape fere, ono tipa kuru aboro tigayo, i anaapengaha te. Sidu, mi aima wirika badungu apai be rukutu agude.

Marie-Line: Rogo kura dagbarago sa, mi adu na aboro rogoho mi aawisigo Ziazia Kekeapai nayo rogo Faransée, pa aboro Portugal, gbiati Sranantongo. Kura wirina sa afu gu berãpai fere nga si naida mi tonaha na gu fugo mi ainongo ho wenengai ya na ki digisihe na gu fugo mi naima inoho. Fuoho ngbutuko, mi arugu tire na gu tatamana naadu kugii gu rugute re.

Rogo kura uru sa, mi adu na wisigo Ziazia Kekeapai  rogo Sranantongo na gu kuraha kidu rogo pa aboro Portugal. Ho mi atona gu ue he re ni, gu wirina ani adu na ri aya, “Marie-Line, mi naberãha nga kpakarapai gudu ho!” Mi aye ka bi gupai nga mi aafura fu gu dee nangia boro Braziri rogo gu fugo nga Sranantongo kuba gupai nga mi fura na ri rogo pa aboro Portugal!

Agu aboro oni namangisunge na yo ima kpinyemu roni ni kerehe. Waigu oni amangi kadu na wene pabakure na awirina wa gure?

Jack: Asanza 11:25 naya: “Iragamahe azuga azuga gbe.” Ani ninaadunga na ndundu ka dia regbo na kura aboro na kini mangiapai fuyo te. Nibipa ngerafuo Bambu Kindo, kura aboro aima gumba gupai fere nga: “Si naida mo mbu gure fu abatungusipai i mangihe.” Ono mi naakaragapai nga: “Kina batungusipai nga mi a. Sidu, ka sidu nga sunge gudu ho si aida i mangihe, si naida mi duadu pati ni a.” Wa vura duhe nga ani dunduko ni naida aida kadu ni sarani ti kura aregbo, ani ninaatingida tirani dedede na gupai nga, si aidanga ani mbupa gaani padu na nyemu kadu nisase si ka na ani ti manga weneapai fu kura aboro te.

Marie-Line: Ani ninaamanga asadatise tipa ka yugo gupai nga nyemu awirinarani kina tirani. Rogo gi gene re, ani naye ka ino gu regbo i aida boro ngerefuo awiriyo watadu boro ndu ka dia yo sukuru yo. Fuoho, ani nambakada agu apai du tipa rani tipa gupai nga ani du na rengba ka undo. Ngba gi gene re, ani namanga wene pabakure na kura aboro, ni du ani nga regerege ka undoyo ho i aida undo ni.

Gini amaku oni nagbiaha ti mangasunge rogo gu ba du na bakere zingo abatungusipai rogoho?

Jack: Mangasunge Kindo ti aregbo dũ ima ye na dungu amaku furani. Ani nidu dedede mbembedi na ga Yekova kusikusiahe ngba arikaho na na kini gbia ngbarago ti ni. Wa vura duhe nga akpakarapai kinaho, ani nidu ti aregbo dũ na zereda berãse yo mbiko ani ima ino gupai nga ani na gu undo nga ga ga Mbori aboro rogo ai gu ba rengbe ani kadu rogoho.

Mbure ni paranga boro, i azi re ku bambukiso yo French Guiana yo mbiko mi aká kadu ni banzengere. Mi aaberãnga gupai nga uru adu kinaho sa mi nika karagatire koyo ni mokedi na kidu na rengba ka ndu ku bambukiso yo ka tungusapai yo te. Nirengo, Yekova aringinga na gako amaku te!

Marie-Line: Gimi bakere ngbarago naye ti fu mi tire ka undo kura aboro. Ani na ngbarago kadu ti ngba ga Yekova sunge. Si ima sa gaani ramukporo a sidu ni nyanyakihe. Ti kura aregbo, Jack ninaasana re singia ani rengbe ka yamba agu arogotise naida na ngarasaro i ye ani ri riahe na yo wa sa. Dedede, mi naakaragapai nga, “kina gu bangisapai re a mi naaberãha!” Na kinawo si naamanga dedede.

Jack: Bete agarã kusayo, i abire na gu kaza nga kansa. Wa vura duhe nga Marie-Line aidanga ka gia gupai re te, mi aima pe gupai furi nga: “Mi ata gbinzanga te diare, ono ka si vura du nga mi nika kpi barambeda, mi ima ino gupai nga mi ima mangasunge na gimi raka ka manga gupai du na nyanyakipaha, nga ka mangasunge fu Yekova na si nasare mi du na ngbarago.”—Bam. P. 25:8.

Marie-Line: Yekova ima fu gu sunge furani ani aaberãnga nga ka ani gbiaha ya, na ki fu momu furani ani mangi agu apai ani aaberãnga nga ka ani mangihe ya. Nirengo, gaani raka ima hi be weneapai. Ani nika ndu ku rogo ai gu ba ga Yekova riigbu asana rani ani ndu ku rogoho, mbiko ani na bakere kido nga Yekova nikaa undorani ti aregbo dũ!