လေ့လာရန် ဆောင်းပါး ၁၂
စကားပြောသင့်တဲ့အချိန်
“နှုတ်ဆိတ်နေရတဲ့အချိန်နဲ့ စကားပြောရတဲ့အချိန် ရှိတယ်။”—ဒေ. ၃:၇။
သီချင်း ၁၂၄ သစ္စာမြဲပါ
အကြိုသုံးသပ်ချက် *
၁။ ဒေသနာ ၃:၇ က ဘာသင်ပေးသလဲ။
တချို့က စကားပြောရတာကို ကြိုက်ကြတယ်။ တချို့ကတော့ တိတ်တိတ်လေး နေရတာကို ကြိုက်ကြတယ်။ ဒီဆောင်းပါးရဲ့ အဓိက ကျမ်းချက်မှာ ဖော်ပြတဲ့အတိုင်း စကားပြောရတဲ့အချိန်၊ နှုတ်ဆိတ်ရတဲ့အချိန် ရှိတယ်။ (ဒေသနာ ၃:၇ ကိုဖတ်ပါ။) ကျွန်တော်တို့က ညီအစ်ကို/မတချို့ကို စကား ပိုပြောစေချင်ပေမဲ့ တချို့ကိုတော့ စကား လျှော့ပြောစေချင်တာမျိုး ရှိနိုင်တယ်။
၂။ ဘယ်အချိန်မှာ ဘယ်လို ပြောသင့်တယ်ဆိုတာကို ဘယ်သူ သတ်မှတ်ပေးသင့်သလဲ။
၂ စကားပြောနိုင်စွမ်းဟာ ယေဟောဝါဆီက လက်ဆောင်ပါ။ (ထွ. ၄:၁၀၊ ၁၁။ ဗျာ. ၄:၁၁) ဒီလက်ဆောင်ကို ဘယ်လို သုံးရမယ်ဆိုတာ သိဖို့ ကျမ်းစာကတစ်ဆင့် ဘုရား ကူညီပေးတယ်။ စကားပြောရတဲ့အချိန်၊ နှုတ်ဆိတ်ရတဲ့အချိန်ကို သိဖို့ ကူညီပေးတဲ့ ကျမ်းစာပုံနမူနာတွေကို ဒီဆောင်းပါးမှာ ဆွေးနွေးပါမယ်။ ကျွန်တော်တို့ ပြောလိုက်တဲ့ စကားကို ယေဟောဝါ ဘယ်လို သဘောထားကြောင်းလည်း ဆွေးနွေးပါမယ်။ အရင်ဆုံး ဘယ်အချိန်မှာ စကားပြောသင့်ကြောင်း ဆွေးနွေးကြည့်ကြစို့။
ဘယ်အချိန်မှာ စကားပြောသင့်သလဲ
၃။ ရောမ ၁၀:၁၄ အရ ဘယ်အချိန်မှာ စကားပြောသင့်သလဲ။
၃ မြေကြီးပေါ် ယေရှု လာတဲ့ အဓိက အကြောင်းရင်းတစ်ခုက ဖခင်နဲ့ပတ်သက်တဲ့ အမှန်တရားကို သင်ပေးဖို့ပဲ။ (ယော. ၁၈:၃၇) ကျွန်တော်တို့လည်း ယေဟောဝါနဲ့ နိုင်ငံတော်အကြောင်း ပြောဖို့ အမြဲ အသင့်ရှိနေသင့်တယ်။ (မ. ၂၄:၁၄။ ရောမ ၁၀:၁၄ ကိုဖတ်ပါ။) ဒီနည်းအားဖြင့် ယေရှုကို တုပကြတယ်။ ဒါပေမဲ့ ကျွန်တော်တို့ ဘယ်လို ပြောတယ်ဆိုတာလည်း အရေးကြီးတယ်။ ယေဟောဝါအကြောင်း တခြားသူတွေကို “နူးညံ့တဲ့သဘော၊ အလွန်လေးစားတဲ့သဘောနဲ့” ပြောရမယ်။ တခြားသူတွေရဲ့ ခံစားချက်၊ ယုံကြည်ချက်တွေကို ထည့်တွက်ရမယ်။ (၁ ပေ. ၃:၁၅) ဒီနည်းအားဖြင့် ပြောရုံလောက်သာ မဟုတ်ဘဲ စိတ်နှလုံး ထိမိအောင် သွန်သင်ပေးနိုင်မယ်။
၄။ ပညာအလိမ္မာ ၉:၉ အရ အကြီးအကဲတွေရဲ့ စကားက တခြားသူတွေကို ဘယ်လို ကူညီပေးနိုင်သလဲ။
၄ ညီအစ်ကို/မ တစ်ယောက်ယောက်ကို ဆုံးမဖို့ လိုတဲ့အခါ အကြီးအကဲတွေ တွန့်ဆုတ်မနေသင့်ဘူး။ ဒါပေမဲ့ သူတို့ စိတ်အနှောင့်အယှက် မဖြစ်အောင် သင့်တော်တဲ့အချိန်၊ သီးသန့်ဖြစ်မယ့် အချိန်ကို ရွေးရမယ်။ အကြီးအကဲတွေက နားထောင်သူရဲ့ ဂုဏ်သိက္ခာကို မထိခိုက်စေမယ့်နည်းနဲ့ ပြောဖို့ အမြဲ ကြိုးစားကြတယ်။ ပညာရှိရှိ ပြုမူဖို့ ကူညီပေးနိုင်တဲ့ ကျမ်းစာမူတွေကို ပြောပြကြတယ်။ (ပညာအလိမ္မာ ၉:၉ ကိုဖတ်ပါ။) လိုအပ်တဲ့အခါ သတ္တိရှိရှိ စကားပြောဖို့ ဘာကြောင့် အလွန်အရေးကြီးသလဲ။ ခြားနားတဲ့ နမူနာ နှစ်ခုကို သုံးသပ်ကြည့်ပါ။ တစ်ခုက သားတွေကို ဆုံးမဖို့ လိုအပ်ခဲ့တဲ့ အမျိုးသား။ နောက်တစ်ခုက ဘုရင်ဖြစ်လာမယ့်သူကို စကားပြောခဲ့တဲ့ အမျိုးသမီး။
၅။ ပုရောဟိတ်မင်း ဧလိဟာ ဘယ်အချိန်မှာ စကားပြောဖို့ ပျက်ကွက်ခဲ့သလဲ။
၅ ပုရောဟိတ်မင်း ဧလိမှာ သိပ်ချစ်ရတဲ့ သားနှစ်ယောက် ရှိတယ်။ ဒါပေမဲ့ အဲဒီသားတွေဟာ ယေဟောဝါကို မလေးစားကြဘူး။ တဲတော်မှာ ပုရောဟိတ်အဖြစ် အရေးကြီးတဲ့ တာဝန်ကို ထမ်းဆောင်ရပေမဲ့ အခွင့်အာဏာကို အလွဲသုံးစား လုပ်ကြတယ်။ ယေဟောဝါဆီ ဆက်သတဲ့ အလှူတွေကို မလေးမစား လုပ်ကြတယ်။ ပြောင်ကျကျ လိင်အကျင့်ယိုယွင်းကြတယ်။ (၁ ရှ. ၂:၁၂-၁၇၊ ၂၂) မောရှေပညတ်အရ ဧလိရဲ့ သားတွေဟာ သေဒဏ် ခံထိုက်ပေမဲ့ ဧလိက ခပ်ပျော့ပျော့ပဲ ဆုံးမပြီး တဲတော်မှာ အမှုဆောင်ဖို့ ဆက်ခွင့်ပြုထားတယ်။ (တရား. ၂၁:၁၈-၂၁) ဧလိရဲ့ ကိုင်တွယ်ပုံကို ယေဟောဝါ ဘယ်လို ရှုမြင်သလဲ။ “ဘာလို့ မင်းရဲ့သားတွေကို ငါ့ထက် ချီးမြှောက်နေရတာလဲ” လို့ ဧလိကို ပြောတယ်။ အဲဒီလူဆိုးနှစ်ယောက်ကို သတ်ပစ်ဖို့ ယေဟောဝါ ဆုံးဖြတ်လိုက်တယ်။—၁ ရှ. ၂:၂၉၊ ၃၄။
၆။ ဧလိဆီကနေ ဘာသင်ယူရသလဲ။
၆ ဧလိဆီကနေ အရေးကြီး သင်ခန်းစာတစ်ခု သင်ယူရတယ်။ မိတ်ဆွေ၊ ဆွေမျိုးတစ်ယောက် ဘုရားပညတ် ချိုးဖောက်ထားမှန်း သိလာရင် ယေဟောဝါရဲ့ စံနှုန်းတွေအကြောင်း သတိပေးရမယ်။ ယေဟောဝါ ခန့်အပ်ထားသူတွေဆီကနေ အကူအညီ ယူဖို့ ပြောရမယ်။ (ယာ. ၅:၁၄) ဧလိလို မိတ်ဆွေ၊ ဆွေမျိုးကို ယေဟောဝါထက် ပိုချီးမြှောက်တာမျိုး မဖြစ်ချင်ကြဘူး။ ဆုံးမမှု လိုအပ်သူကို သတိပေးဖို့ သတ္တိ လိုအပ်ပေမဲ့ အကျိုးရှိပါတယ်။ ဧလိနဲ့ အစ္စရေး အမျိုးသမီး အဘိဂဲလရဲ့ ကွာခြားမှုကို သုံးသပ်ကြည့်ပါ။
၇။ ဒါဝိဒ်ကို အဘိဂဲလ ဘာကြောင့် သတ္တိရှိရှိ စကားပြောခဲ့သလဲ။
၇ အဘိဂဲလဟာ ချမ်းသာတဲ့ လယ်ပိုင်ရှင် နာဗလရဲ့ ဇနီးဖြစ်တယ်။ ဒါဝိဒ်နဲ့ လူတွေဟာ ဘုရင်ရှောလု ရန်ကနေ ထွက်ပြေးတုန်းက နာဗလရဲ့ သိုးထိန်းတွေ၊ သိုးအုပ်တွေကို လုယက်သူတွေရဲ့ ရန်ကနေ ကာကွယ်ပေးခဲ့တယ်။ ဒီအတွက် နာဗလ ကျေးဇူးတင်သလား။ မတင်ဘူး။ မိမိလူတွေကို စားစရာနဲ့ ရေ နည်းနည်းပေးဖို့ ဒါဝိဒ် တောင်းဆိုတဲ့အခါ နာဗလ ဒေါသတကြီး အော်ထုတ်ခဲ့တယ်။ (၁ ရှ. ၂၅:၅-၈၊ ၁၀-၁၂၊ ၁၄) ဒါကြောင့် နာဗလရဲ့ အိမ်သား ယောက်ျားအားလုံးကို သတ်ဖို့ ဒါဝိဒ် ဆုံးဖြတ်လိုက်တယ်။ (၁ ရှ. ၂၅:၁၃၊ ၂၂) ဒီအဖြစ်ဆိုးကို ဘယ်လို တားဆီးနိုင်ခဲ့သလဲ။ စကားပြောရမယ့် အချိန်ပဲဆိုတာ အဘိဂဲလ သိတဲ့အတွက် ဆာလောင်၊ ဒေါသထွက်နေတဲ့ လက်နက်ကိုင် လူ ၄၀၀ နဲ့ ဒါဝိဒ်ကို သတ္တိရှိရှိ သွားတွေ့ပြီး စကားပြောခဲ့တယ်။
၈။ အဘိဂဲလဆီကနေ ဘာသင်ယူရသလဲ။
၈ အဘိဂဲလဟာ ဒါဝိဒ်ကို တွေ့တဲ့အခါ သတ္တိရှိရှိ၊ လေးလေးစားစား၊ ဖျောင်းဖျပြောဆိုတယ်။ ကိုယ့်ကြောင့်ဖြစ်တဲ့ ပြဿနာ မဟုတ်ပေမဲ့ ဒါဝိဒ်ကို တောင်းပန်တယ်။ ဒါဝိဒ်ရဲ့ အရည်အသွေးကောင်းတွေကို ချီးမွမ်းပြောဆိုတယ်။ အကူအညီရဖို့ ယေဟောဝါကို အားကိုးတယ်။ (၁ ရှ. ၂၅:၂၄၊ ၂၆၊ ၂၈၊ ၃၃၊ ၃၄) တစ်ယောက်ယောက် လမ်းမှားတော့မယ်ဆိုတာ ရိပ်မိရင် အဘိဂဲလလိုပဲ သတ္တိရှိရှိ၊ လေးလေးစားစား ပြောဆိုပါ။ (ဆာ. ၁၄၁:၅) မေတ္တာပါပါ ဆုံးမတာက မိတ်ဆွေစစ်ဖြစ်ကြောင်း ဖော်ပြရာရောက်တယ်။—ပညာ. ၂၇:၁၇။
၉-၁၀။ တခြားသူတွေကို ဆုံးမတဲ့အခါ အကြီးအကဲတွေ ဘာကို သတိရသင့်သလဲ။
၉ အထူးသဖြင့် အကြီးအကဲတွေဟာ အသင်းတော်ထဲက ခြေလှမ်းမှားသူတွေကို ပဲ့ပြင်ပေးဖို့ သတ္တိရှိရမယ်။ (ဂလ. ၆:၁) မိမိတို့လည်း မစုံလင်တဲ့အတွက် တစ်နေ့နေ့မှာ ဆုံးမမှု လိုအပ်နိုင်ကြောင်း နှိမ့်ချစွာ အသိအမှတ်ပြုပေမဲ့ အဲဒီအကြောင်းကြောင့် ဆုံးမဖို့ တွန့်ဆုတ်မနေဘူး။ (၂ တိ. ၄:၂။ တိ. ၁:၉) စကားပြောနိုင်စွမ်း ဆုလက်ဆောင်ကို ကျွမ်းကျင်စွာ၊ စိတ်ရှည်စွာ သုံးပြီး ဆုံးမတယ်။ ခြေလှမ်းမှားနေတဲ့သူကို ချစ်တဲ့အတွက် အတတ်နိုင်ဆုံး ကူညီပေးတယ်။ (ပညာ. ၁၃:၂၄) ဒါပေမဲ့ အကြီးအကဲတွေအတွက် အရေးကြီးဆုံးကတော့ ယေဟောဝါရဲ့ စံနှုန်းတွေကို ထောက်ခံခြင်း၊ အသင်းတော်ကို ကာကွယ်ခြင်းအားဖြင့် ဘုရားကို ဂုဏ်တင်ဖို့ ဖြစ်တယ်။—တ. ၂၀:၂၈။
၁၀ ဘယ်အချိန်မှာ စကားပြောရမယ်ဆိုတာ ဆွေးနွေးခဲ့ကြပြီ။ ဒါပေမဲ့ နှုတ်ဆိတ်ရမယ့် အချိန်လည်း ရှိတယ်။ ဘယ်အချိန်မှာ နှုတ်ဆိတ်ရမလဲ။
ဘယ်အချိန်မှာ နှုတ်ဆိတ်နေသင့်သလဲ
၁၁။ ယာကုပ် ဘယ်ပုံဥပမာကို သုံးခဲ့သလဲ။ ဘာကြောင့် သင့်တော်သလဲ။
၁၁ နှုတ်ကို ထိန်းဖို့ ခက်တယ်။ “စကားမမှားဖူးတဲ့သူဟာ ပြည့်ဝစုံလင်သူ၊ တစ်ကိုယ်လုံးကို ထိန်းနိုင်တဲ့သူပဲ။ မြင်းကို လိုရာခိုင်းချင်တဲ့အခါ ဇက်ကြိုး ခွံ့လိုက်ရင် မြင်းတစ်ကောင်လုံးကို ထိန်းနိုင်ပြီ” လို့ ကျမ်းရေးသူ ယာကုပ် ဥပမာပေးခဲ့တယ်။ (ယာ. ၃:၂၊ ၃) မြင်းစီးသူက မြင်းရဲ့ ဇက်ကြိုးကို ဆွဲပြီး မြင်းကို ထိန်းချုပ်နိုင်တယ်။ ကြိုးလွတ်သွားရင် မြင်းက ခြေဦးတည့်ရာ ပြေးတဲ့အတွက် မြင်းကော မြင်းစီးသူပါ ဒုက္ခရောက်နိုင်တယ်။ အဲဒီလိုပဲ အပြောအဆို မထိန်းချုပ်ရင် ပြဿနာတွေ ပေါ်နိုင်တယ်။ ဘယ်အချိန်တွေမှာ ထိန်းချုပ်ရမလဲဆိုတာ သုံးသပ်ကြည့်ကြစို့။
၁၂။ ဘယ်အချိန်မှာ အပြောအဆိုကို ထိန်းချုပ်သင့်သလဲ။
၁၂ လျှို့ဝှက်ထားရမယ့် ကိစ္စကို ညီအစ်ကို/မတစ်ယောက် သိထားရင် သင် ဘာလုပ်မလဲ။ ဥပမာ၊ လုပ်ငန်း ပိတ်ပင်ထားတဲ့ နိုင်ငံမှာ နေတဲ့သူတစ်ယောက်နဲ့ တွေ့တဲ့အခါ လုပ်ငန်း လုပ်ဆောင်ပုံ အသေးစိတ်အချက်တွေကို မေးချင်သလား။ ညီအစ်ကို/မတွေကို ချစ်ပြီး ဘာဖြစ်နေတယ်ဆိုတာ သိချင်လို့၊ သူတို့အတွက် သတ်သတ်မှတ်မှတ် ဆုတောင်းပေးချင်လို့ စိတ်ရင်းနဲ့ မေးတာပါ။ ဒါပေမဲ့
ဒီအချိန်ဟာ အပြောအဆိုကို ထိန်းချုပ်ရမယ့် အချိန်ပဲ။ လျှို့ဝှက်ချက်တွေကို ပြောဖို့ ဖိအားပေးရင် အဲဒီညီအစ်ကို/မကိုရော အဲဒီနိုင်ငံမှာ ရှိတဲ့ ညီအစ်ကို/မတွေကိုပါ မေတ္တာမဲ့ရာကျတယ်။ ပိတ်ပင်ထားတဲ့ နိုင်ငံမှာနေတဲ့ ညီအစ်ကို/မတွေကို ကျွန်တော်တို့ ပိုအခက်မတွေ့စေချင်ပါဘူး။ အဲဒီညီအစ်ကို/မတွေလည်း အမှုဆောင်နဲ့ ခရစ်ယာန် လုပ်ငန်းဆောင်တာတွေကို ဘယ်လို လုပ်ဆောင်နေသလဲဆိုတဲ့ အသေးစိတ်အချက်တွေကို ဖွင့်မပြောချင်ကြပါဘူး။၁၃။ ပညာအလိမ္မာ ၁၁:၁၃ အရ အကြီးအကဲတွေ ဘာလုပ်ရမလဲ။ ဘာကြောင့်လဲ။
၁၃ အထူးသဖြင့် အကြီးအကဲတွေဟာ အတွင်းရေးကိစ္စတွေကို လျှို့ဝှက်ထားခြင်းအားဖြင့် ပညာအလိမ္မာ ၁၁:၁၃ မှာပါတဲ့ ကျမ်းစာမူကို လိုက်နာရမယ်။ (ဖတ်ပါ။) အိမ်ထောင်ရှိတဲ့ အကြီးအကဲတွေအတွက် ပိုခက်နိုင်တယ်။ ဇနီးမောင်နှံတွေဟာ ဆက်ဆံရေးကောင်းဖို့ ခံစားချက်တွေ၊ စိုးရိမ်မှုတွေကို ရင်ဖွင့်ပြောလေ့ရှိတယ်။ ဒါပေမဲ့ အသင်းတော်မှာ ရှိတဲ့ တခြားသူတွေရဲ့ “အတွင်းရေး” ကို မပြောရဘူး။ ပြောလိုက်ရင် ကိုယ်တိုင် နာမည်ပျက်ရုံသာမက ညီအစ်ကို/မတွေရဲ့ ယုံကြည်စိတ်ချမှုကိုလည်း ဆုံးရှုံးသွားမယ်။ အသင်းတော်မှာ တာဝန်ရှိသူတွေဟာ “လျှာနှစ်ခွနဲ့ ပြောတတ်သူ၊” တစ်နည်းအားဖြင့် လှည့်စားပြောဆိုတတ်သူ မဖြစ်ရဘူး။ (၁ တိ. ၃:၈၊ အောက်ခြေမှတ်ချက်) အတင်းအဖျင်း မပြောရဘူး။ အကြီးအကဲဟာ ဇနီးကို ချစ်မယ်ဆိုရင် သူသိဖို့ မလိုတဲ့ အချက်အလက်တွေကို ပြောပြီး ဝန်လေးစေမှာ မဟုတ်ဘူး။
၁၄။ အကြီးအကဲရဲ့ ဇနီးဟာ ခင်ပွန်းရဲ့ နာမည်ကောင်းကို ဘယ်လို ထိန်းသိမ်းပေးနိုင်သလဲ။
၁၄ ဇနီးဟာ လျှို့ဝှက်ထားရမယ့် ကိစ္စတွေအကြောင်း အတင်း မမေးခြင်းအားဖြင့် ခင်ပွန်းရဲ့ နာမည်ကောင်းကို ထိန်းသိမ်းပေးနိုင်တယ်။ ဒီနည်းအားဖြင့် ခင်ပွန်းကို ထောက်မပေးရုံသာမက ခင်ပွန်းဆီ ရင်ဖွင့်ထားသူတွေကိုပါ လေးစားကြောင်း ပြတယ်။ အရေးကြီးဆုံးကတော့ အသင်းတော်ရဲ့ ငြိမ်သက်စည်းလုံးမှုကို တိုးများစေတဲ့အတွက် ယေဟောဝါကို ပျော်ရွှင်စေတယ်။—ရော. ၁၄:၁၉။
ကျွန်တော်တို့ ပြောတဲ့စကားကို ယေဟောဝါ ဘယ်လို သဘောထားသလဲ
၁၅။ ယောဘရဲ့ မိတ်ဆွေ သုံးယောက်ကို ယေဟောဝါ ဘယ်လို သဘောထားသလဲ။ ဘာကြောင့်လဲ။
၁၅ ဘယ်အချိန်မှာ ဘယ်လို စကားပြောရမယ်ဆိုတာနဲ့ပတ်သက်ပြီး ယောဘကျမ်းကနေ များစွာသင်ယူနိုင်တယ်။ အဖြစ်ဆိုးတွေ တစ်ခုပြီးတစ်ခု ကြုံခဲ့ရတဲ့ ယောဘကို နှစ်သိမ့်ပေးဖို့ လူလေးယောက် ရောက်လာတယ်။ သူတို့ အချိန်အတော်ကြာ နှုတ်ဆိတ်နေတယ်။ နောက်ပိုင်း ဧလိဖတ်၊ ဗိလဒဒ်၊ ဇောဖာတို့သုံးယောက် စကားပြောတယ်။ ဒါပေမဲ့ နှုတ်ဆိတ်နေချိန်မှာ ယောဘကို ဘယ်လို ကူညီပေးရမယ်ဆိုတာ စဉ်းစားမနေကြောင်း သူတို့ ပြောတဲ့စကားက ဖော်ပြတယ်။ ယောဘ အမှား ကျူးလွန်ထားတယ်ဆိုတာ ထောက်ပြဖို့ပဲ စဉ်းစားနေကြတာ။ သူတို့ပြောတဲ့ စကားတချို့က မှန်ပေမဲ့ ယောဘအကြောင်း၊ ယေဟောဝါအကြောင်း အတော်များများကတော့ မကြင်နာတဲ့ စကား၊ မဟုတ်မမှန်တဲ့ စကားတွေပဲ။ ယောဘကို သူတို့ ပြင်းပြင်းထန်ထန် ဝေဖန်ကြတယ်။ (ယောဘ ၃၂:၁-၃) ယေဟောဝါ ဘယ်လို တုံ့ပြန်သလဲ။ အဲဒီသုံးယောက်ကို ဒေါသထွက်ပြီး မိုက်မဲသူတွေလို့ ပြောတယ်။ သူတို့အတွက် ဆုတောင်းပေးဖို့ ယောဘဆီမှာ အသနားခံစေတယ်။—ယောဘ ၄၂:၇-၉။
၁၆။ ဧလိဖတ်၊ ဗိလဒဒ်၊ ဇောဖာတို့ရဲ့ မကောင်းတဲ့ ပုံနမူနာကနေ ဘာသင်ခန်းစာ ရသလဲ။
၁၆ ဧလိဖတ်၊ ဗိလဒဒ်၊ ဇောဖာတို့ရဲ့ မကောင်းတဲ့ ပုံနမူနာကနေ သင်ခန်းစာ အများကြီးရတယ်။ ပထမ၊ ညီအစ်ကိုတွေကို မဝေဖန်သင့်ဘူး။ (မ. ၇:၁-၅) စကား မပြောခင် အသေအချာ နားထောင်ရမယ်။ ဒါမှ အခြေအနေကို နားလည်နိုင်မယ်။ (၁ ပေ. ၃:၈) ဒုတိယ၊ ကျွန်တော်တို့ ပြောတဲ့စကားက တိကျမှန်ကန်ရမယ်။ ဒါပေမဲ့ ကြင်ကြင်နာနာ ပြောရမယ်။ (ဧ. ၄:၂၅) တတိယ၊ အချင်းချင်း ဘယ်လို စကားပြောနေတယ်ဆိုတာ ယေဟောဝါ အလွန်စိတ်ဝင်စားတယ်။
၁၇။ ဧလိဟုဆီကနေ ဘာသင်ယူနိုင်သလဲ။
၁၇ ယောဘဆီ လာလည်တဲ့ စတုတ္ထပုဂ္ဂိုလ်ကတော့ အာဗြဟံနဲ့ ဆွေမျိုးတော်တဲ့ ဧလိဟု ဖြစ်တယ်။ ယောဘနဲ့ တခြားသုံးယောက် စကားပြောနေချိန်မှာ ဧလိဟု နားထောင်နေတယ်။ ယောဘရဲ့ အတွေးအခေါ်ကို မေတ္တာပါပါ၊ ပွင့်ပွင့်လင်းလင်း တည့်မတ်ပေးတာကို ကြည့်ရင် သူတို့ပြောတာတွေကို အာရုံစိုက် နားထောင်ခဲ့မှန်း သိသာတယ်။ (ယောဘ ၃၃:၁၊ ၆၊ ၁၇) ဧလိဟုအတွက် အရေးကြီးဆုံးက ကိုယ့်ကိုယ်ကိုယ် ဒါမှမဟုတ် တခြားသူကို ဂုဏ်တင်ဖို့ မဟုတ်ဘဲ ယေဟောဝါကို ဂုဏ်တင်ဖို့ပဲ။ (ယောဘ ၃၂:၂၁၊ ၂၂။ ၃၇:၂၃၊ ၂၄) နှုတ်ဆိတ်ပြီး နားထောင်ရတဲ့အချိန် ရှိကြောင်း ဧလိဟုဆီကနေ သင်ယူရတယ်။ (ယာ. ၁:၁၉) ဆုံးမတဲ့အခါ ကိုယ့်ကိုယ်ကိုယ် မဟုတ်ဘဲ ယေဟောဝါကို ဂုဏ်တင်ဖို့ အဓိကထားသင့်ကြောင်းလည်း သင်ယူရတယ်။
၁၈။ စကားပြောနိုင်စွမ်း ဆုလက်ဆောင်ကို တန်ဖိုးထားကြောင်း ဘယ်လို ဖော်ပြနိုင်သလဲ။
၁၈ ဘယ်အချိန်မှာ ဘယ်လို စကားပြောရမယ်ဆိုတဲ့ ကျမ်းစာအကြံဉာဏ်ကို လိုက်နာခြင်းအားဖြင့် စကားပြောနိုင်စွမ်း ဆုလက်ဆောင်ကို တန်ဖိုးထားကြောင်း ဖော်ပြနိုင်တယ်။ “သင့်တော်တဲ့အချိန်မှာ ပြောလိုက်တဲ့စကားဟာ ငွေလင်ပန်းထဲက ရွှေပန်းသီးတွေနဲ့ တူတယ်” လို့ ပညာရှိဘုရင် ရှောလမုန် ပြောတယ်။ (ပညာ. ၂၅:၁၁) တခြားသူ ပြောတာကို ဂရုစိုက် နားထောင်မယ်၊ မပြောခင် စဉ်းစားမယ်ဆိုရင် ကျွန်တော်တို့ရဲ့ စကားဟာ နည်းနည်းပဲ ပြောပြော၊ များများပဲ ပြောပြော ရွှေပန်းသီးလို တန်ဖိုးရှိပြီး လှပပါလိမ့်မယ်။ တခြားသူတွေကို တည်ဆောက်မှု ဖြစ်စေပြီး ယေဟောဝါကို ပျော်ရွှင်စေပါလိမ့်မယ်။ (ပညာ. ၂၃:၁၅။ ဧ. ၄:၂၉) ဘုရားပေး လက်ဆောင်ကို ကျေးဇူးတင်လေးမြတ်ကြောင်း ဖော်ပြနိုင်တဲ့ အကောင်းဆုံးနည်းပါပဲ။
သီချင်း ၈၂ ‘အလင်းကို လင်းစေကြ’
^ အပိုဒ်၊ 5 စကားပြောရမယ့်အချိန်၊ နှုတ်ဆိတ်ရမယ့်အချိန်ကို သိဖို့ ကျမ်းစာမူတွေက ကူညီပေးနိုင်တယ်။ အဲဒါတွေကို သိပြီး လက်တွေ့ကျင့်သုံးတဲ့အခါ ကျွန်တော်တို့ရဲ့ စကားတွေဟာ ယေဟောဝါရှေ့မှာ နှစ်သက်စရာ ဖြစ်ပါလိမ့်မယ်။
^ အပိုဒ်၊ 62 ပုံအညွှန်း– အကြံကောင်း ပေးဖို့ လိုနေတာကို ညီအစ်မတစ်ယောက် သတိထားမိ။
^ အပိုဒ်၊ 64 ပုံအညွှန်း– သန့်ရှင်းမှုနဲ့ပတ်သက်ပြီး ညီအစ်ကိုတစ်ယောက် အကြံပေးနေ။
^ အပိုဒ်၊ 66 ပုံအညွှန်း– သင့်တော်တဲ့အချိန်မှာ ဒါဝိဒ်ကို အဘိဂဲလ စကားပြောတဲ့အတွက် ရလဒ်ကောင်း ရခဲ့။
^ အပိုဒ်၊ 68 ပုံအညွှန်း– ပိတ်ပင်ထားတဲ့ နိုင်ငံက လုပ်ငန်းအကြောင်း အသေးစိတ်အချက်တွေကို မောင်နှံတစ်စုံ ထုတ်မပြော။
^ အပိုဒ်၊ 70 ပုံအညွှန်း– အသင်းတော် အတွင်းရေးကို တခြားသူ မကြားအောင် အကြီးအကဲတစ်ယောက် ဂရုစိုက်။