1. Unsang espesipikong sugo ang gihatag ni Jesus sa iyang mga tinun-an? (Tan-awa ang hulagway sa atubangan sa magasin.)

SA GABII una mamatay si Jesus, siya mihatag ug espesipikong sugo sa iyang mga tinun-an. Giingnan niya sila: “Sama sa akong paghigugma kaninyo, kamo usab maghigugmaay.” Dayon siya midugang: “Kon kamo dunay gugma sa usag usa, ang tanan makaila nga kamo akong mga tinun-an.”​—Juan 13:34, 35.

2. Nganong importante nga maghigugmaay ta?

² Si Jesus miingon nga ang tinuod niyang mga tinun-an klarong mailhan kon ilang ipakita ang samang gugma nga iyang gipakita. Ang iyang giingon tinuod sa unang siglo ug tinuod sab karon. Busa importante gyod nga maghigugmaay ta bisan sa dihang lisod kining himoon.

3. Unsay atong hisgotan niining artikuloha?

³ Kay dili ta hingpit, malisdan ta sa paghigugma pag-ayo sa usag usa. Bisan pa niana, kinahanglan natong sundogon ang Kristo. Niining artikuloha, atong hisgotan kon sa unsang paagi ang gugma makatabang nato nga mahimong makigdaiton, dili mapihigon, ug maabiabihon. Samtang imo ning tun-an, pangutan-a ang kaugalingon: ‘Unsay akong makat-onan sa mga igsoon nga padayong nagpakitag gugma sa usag usa bisan sa dihang lisod kining himoon?’

4. Sumala sa Mateo 5:23, 24, nganong makigdait ta sa igsoon nga nahiubos kanato?

⁴ Si Jesus nagtudlo kanato nga importante kaayong makigdait  sa igsoon nga nahiubos kanato. (Basaha ang Mateo 5:23, 24.) Iyang gipasiugda nga kinahanglang mentinahon ang maayong relasyon sa uban kon gusto natong mapahimut-an ang Diyos. Malipay si Jehova kon maningkamot ta pag-ayo sa pagpakigdait sa atong mga igsoon. Dili dawaton ni Jehova ang atong pagsimba kon padayon tang masuko sa usa ka tawo ug dili makigdait kaniya.​—1 Juan 4:20.

5. Nganong nalisdan si Mark sa pagpakigdait?

⁵ Tingali malisdan ta sa pagpakigdait sa uban. Ngano? Tagda ang nahitabo kang Mark. * Nasakitan siya sa dihang ang usa ka brader nanaway niya ug nanultig dili maayo bahin niya diha sa kongregasyon. Unsa may reaksiyon ni Mark? Siya miingon, “Wala na ko kapugong ug gikasab-an nako siya.” Hinuon sa ulahi, nagbasol si Mark sa iyang gihimo ug misulay siya sa pagpangayog pasaylo ug pagpakigdait sa maong brader. Pero ang brader dili gustong makig-uli. Sa sinugdan, naghunahuna si Mark, ‘Nganong maningkamot pa man ko sa pagpakig-uli niya nga dili man siya gusto?’ Pero ang tigdumala sa sirkito nagdasig kang Mark nga dili mosurender. Unsay gihimo ni Mark?

6. (a) Sa unsang paagi padayong naningkamot si Mark sa pagpakigdait? (b) Giunsa pagpadapat ni Mark ang Colosas 3:13, 14?

⁶ Sa dihang gianalisar ni Mark ang iyang kaugalingon, nakaamgo siya nga usahay maghunahuna siya nga labaw siya sa uban. Nakita niya nga kinahanglan niyang usbon ang iyang panghunahuna. (Col. 3:8, 9, 12) Mapainubsanon siyang miduol pag-usab sa maong brader ug nangayog pasaylo. Kapila pod siya magsulat aron isulti nga naguol kaayo siya sa nahitabo ug gusto niyang magkauliay sila. Gihatagan pa gani ni Mark ang brader ug ginagmayng regalo nga iyang gihunahuna nga magustohan sa brader. Ikasubo nga wala gyod makig-uli ang brader. Bisan pa niana, si Mark padayong misunod sa  sugo ni Jesus nga higugmaon ang igsoon ug magmapinasayloon. (Basaha ang Colosas 3:13, 14.) Bisag dili mosanong ang uban sa atong mga paningkamot nga makigdait, ang tinuod nga Kristohanong gugma motabang kanato nga padayong magpasaylo kanila ug mag-ampo nga mahibalik ra ang maayong relasyon.​—Mat. 18:21, 22; Gal. 6:9.

7. (a) Unsay giawhag ni Jesus nga atong himoon? (b) Unsang lisod nga situwasyon ang nasinatian ni Lara?

⁷ Si Jesus nag-awhag kanato nga padayong trataron ang uban sa paagi nga gusto natong trataron ta. Miingon sab siya nga dili lang kadtong mobalos sa atong gugma ang atong higugmaon. (Luc. 6:31-33) Bisag talagsa ra ning mahitabo, unsa kaha kon naay igsoon sa kongregasyon nga molikay nimo ug dili managad? Mao nay nasinatian ni Lara. Siya miingon: “Dihay sister nga dili managad nako. Ambot ngano. Na-stress kaayo ko ug dili ko ganahang motambong sa tigom.” Sa primero, si Lara naghunahuna: ‘Wala man koy sala. Kon buot hunahunaon, ang ubang igsoon sa kongregasyon mibati sab nga kini nga sister lahig kinaiya.’

8. Unsay gihimo ni Lara aron makigdait, ug unsay atong makat-onan kaniya?

⁸ Si Lara mihimog mga lakang aron makigdait. Nag-ampo siya kang Jehova ug midesisyon nga makigsulti sa maong sister. Ilang giestoryahan ang problema, unya naggaksanay sila ug nagkauliay. Morag okey na ang tanan. Si Lara miingon: “Pero sa ulahi, wala na pod ko tagda sa sister. Naguol kaayo ko.” Sa sinugdan, gibati ni Lara nga magmalipayon lang siya kon mag-usab ang sister. Pero sa ngadtongadto, naamgohan ni Lara nga ang pinakamaayo niyang mahimo mao ang padayong pagtratar sa sister sa mahigugmaong paagi ug ang ‘kinasingkasing nga pagpasaylo’ kaniya. (Efe. 4:32–5:2) Si Lara nahinumdom nga ang tinuod nga Kristohanong gugma “dili maghupot ug listahan sa kadaot. Kini moantos sa tanang butang, motuo sa tanang butang, molaom sa tanang butang, molahutay sa tanang butang.” (1 Cor. 13:5, 7) Si Lara wala na mabalaka.  Sa ngadtongadto, ang sister mas mahigalaon na kaniya. Sa dihang makigdait ka sa mga igsoon ug padayong magpakitag gugma kanila, makaseguro ka nga ‘ang Diyos sa gugma ug sa kalinaw mag-uban kanimo.’​—2 Cor. 13:11.

9. Sumala sa Buhat 10:34, 35, nganong dili ta angayng magmapihigon?

⁹ Si Jehova dili mapihigon. (Basaha ang Buhat 10:34, 35.) Kon dili ta mapihigon, gipamatud-an nato nga mga anak ta niya. Gisunod nato ang sugo nga higugmaon ang isigkatawo sama sa atong kaugalingon, ug gimentinar nato ang kalinaw sa atong espirituwal nga pamilya.​—Roma 12:9, 10; Sant. 2:8, 9.

10-11. Sa unsang paagi nawala ang negatibong pagbati sa usa ka sister?

¹⁰ Ang pagpabiling dili mapihigon dili tingali sayon para sa pipila. Pananglitan, tagda ang nahitabo sa sister nga si Ruth. Sa bata pa si Ruth, siya may dili maayong eksperyensiya maylabot sa usa ka tawo gikan sa laing nasod. Unsay epekto niini kaniya? Si Ruth miadmitir: “Gidumtan nako ang tanan nianang nasora. Naghunahuna ko nga parehas ra ang tanang tawo didto, bisan ang mga igsoon.” Sa unsang paagi nasuklan ni Ruth ang maong pagbati?

¹¹ Naamgohan ni Ruth nga kinahanglan niyang suklan ang negatibong hunahuna. Nagbasa siyag mga eksperyensiya ug report sa Tinuig nga Basahon bahin nianang nasora. Siya miingon: “Naningkamot ko nga maghunahunag positibo bahin sa mga tawo nianang nasora. Unya akong namatikdan nga ang mga igsoon didto madasigong nag-alagad kang Jehova. Nakita nako nga bahin sab sila sa atong tibuok kalibotang panag-igsoonay.” Anam-anam nga nasabtan ni Ruth nga kinahanglan siyang mohimog labaw pa. Siya miingon: “Sa dihang makailaila kog mga igsoon gikan nianang nasora, maningkamot gyod ko nga makighigala nila. Makig-estorya ko nila ug ilhon sila pag-ayo.” Unsay resulta? Si Ruth miingon: “Sa ngadtongadto, nawala ang akong negatibong pagbati.”

12. Unsay sayop nga panghunahuna ni Sarah?

¹² Ang uban tingali wala makabantay nga mapihigon diay sila. Pananglitan, si Sarah naghunahuna nga dili siya mapihigon kay dili niya hukman ang mga tawo base sa ilang rasa, kahimtang sa pinansiyal, o sa ilang mga pribilehiyo sa organisasyon. Pero miangkon siya: “Nakaamgo ko nga mapihigon diay ko.” Nganong nakaingon siya niana? Si Sarah naggikan sa edukado nga pamilya ug mas ganahan siyang makig-uban niadtong mga edukado pod. Kas-a, giingnan pa gani niya ang usa sa iyang mga higala: “Makig-uban ko sa mga igsoon nga edukado. Maglikay ko niadtong dili edukado.” Klaro nga kinahanglang usbon ni Sarah ang iyang hunahuna. Sa unsang paagi?

13. Unsay atong makat-onan sa gihimo ni Sarah aron mausab ang iyang panghunahuna?

¹³ Si Sarah gitabangan sa usa ka tigdumala sa sirkito nga maanalisar ang iyang panghunahuna. Siya miingon: “Iya kong gikomendahan tungod sa akong matinumanong pag-alagad, maayong mga komento, ug kahibalo sa Kasulatan. Dayon gipatin-aw niya nako nga samtang mag-uswag ang atong kahibalo, kinahanglan sab natong ugmaron ang Kristohanong mga hiyas sama sa pagkamapainubsanon, pag-ila sa limitasyon, ug kaluoy.” Gipadapat ni Sarah ang tambag sa tigdumala sa sirkito. Siya miingon: “Nakaamgo ko nga ang importante mao nga kita buotan ug mahigugmaon.” Ingong resulta, giusab niya ang iyang panglantaw sa mga igsoon. Matod pa niya: “Naningkamot ko nga masabtan kon  unsa nga mga hiyas ang nakapahimo nilang bililhon kang Jehova.” Komosta man pod ta? Dili gyod ta maghunahuna nga labaw ta sa uban tungod sa atong edukasyon! Kon gihigugma nato pag-ayo “ang tanang igsoon,” likayan nato ang pagkamapihigon.​—1 Ped. 2:17.

14. Sumala sa Hebreohanon 13:16, unsay bation ni Jehova kon magpakita tag pagkamaabiabihon?

¹⁴ Gipabilhan pag-ayo ni Jehova ang pagkamaabiabihon. (Basaha ang Hebreohanon 13:16.) Giisip niya kini ingong bahin sa atong pagsimba, ilabina sa dihang motabang ta sa nanginahanglan. (Sant. 1:27; 2:14-17) Busa, gidasig ta sa Kasulatan nga ‘batasanon ang pagkamaabiabihon.’ (Roma 12:13) Atong gipakita nga gimahal nato pag-ayo ang uban ug gusto natong makighigala nila kon maabiabihon ta. Puwede tang mo-offer ug snack o mainom, mangimbitar ug kaon, o mohatag kanilag panahon ug atensiyon. Kon ato nang himoon, malipay si Jehova. (1 Ped. 4:8-10) Pero malisdan tingali ta sa pagpakitag pagkamaabiabihon tungod sa pipila ka hinungdan.

15-16. (a) Nganong ang pipila magduhaduha sa pag-abiabi? (b) Unsay nakatabang kang Edit nga dili na magduhaduha sa pag-abiabi?

¹⁵ Tingali magduhaduha ta sa pag-abiabi sa uban tungod sa atong kahimtang o kinaiya. Konsideraha ang biyudang si Edit. Sa wala pa siya ma-Saksi, dili kaayo siya ganahang moabiabi. Naghunahuna siya nga ang uban mas makaarang sa pag-abiabi.

¹⁶ Sa dihang na-Saksi na siya, giusab ni Edit ang iyang panghunahuna. Naningkamot siya nga mahimong maabiabihon. Siya miingon: “Sa dihang gitukod ang among bag-ong Kingdom Hall, gisultihan ko sa usa ka ansiyano bahin sa magtiayon nga moabot aron motabang sa proyekto, ug gihangyo ko niya nga pasak-on sila sa akong balay ug duha ka semana. Nahinumdom ko kon giunsa pagpanalangin ni Jehova ang babayeng balo sa Zarepta.” (1 Hari 17:12-16) Misugot si Edit nga pasak-on ang magtiayon. Gipanalanginan ba siya? Siya  miingon: “Ang duha ka semana nahimong duha ka bulan. Nianang panahona, nagkasuod mi.” Si Edit nakabaton sab ug suod nga mga higala diha sa kongregasyon. Karon payunir na siya ug malipay siyang mangimbitar ug snack niadtong makauban niya sa ministeryo. Siya miingon: “Ang paghatag makapalipay nako! Ang tinuod, daghan kaayo kog nadawat nga panalangin tungod niana.”​—Heb. 13:1, 2.

17. Unsay naamgohan ni Luke ug sa iyang asawa?

¹⁷ Tingali maabiabihon na ta, pero mapauswag pa ba nato ang atong pagkamaabiabihon? Pananglitan, si Luke ug ang iyang asawa maoy maabiabihong magtiayon. Batasan nila nga imbitahon sa ilang balay ang ilang ginikanan, paryente, suod nga mga higala, ug ang tigdumala sa sirkito ug ang iyang asawa. Pero si Luke miingon, “Nakaamgo mi nga mga suod ra diay namo ang among gipangimbitar.” Unsay gihimo ni Luke ug sa iyang asawa aron mahimo silang mas maabiabihon?

18. Sa unsang paagi si Luke ug ang iyang asawa miuswag sa ilang pagkamaabiabihon?

¹⁸ Nausab ang panghunahuna ni Luke ug sa iyang asawa sa dihang gipamalandong nila ang giingon ni Jesus: “Kon ang inyong higugmaon kadto lang nahigugma kaninyo, unsa may inyong ganti?” (Mat. 5:45-47) Naamgohan nila nga kinahanglan nilang sundogon si Jehova, kinsa mahinatagon sa tanan. Busa nakadesisyon sila nga imbitahon ang mga igsoon nga wala pa nila maimbitar sa una. Si Luke miingon: “Kaming tanan nag-enjoy kaayo niini nga mga okasyon. Ang tanan nadasig ug nalig-on.”

19. Sa unsang paagi nato mapamatud-an nga tinun-an ta ni Jesus, ug unsay determinado nimong buhaton?

¹⁹ Ato nang nahisgotan kon sa unsang paagi ang paghigugma pag-ayo sa usag usa makatabang nato nga mahimong makigdaiton, dili mapihigon, ug maabiabihon. Angay natong suklan ang bisan unsang negatibong pagbati ug higugmaon pag-ayo ang atong mga igsoon nga kinasingkasing. Kon buhaton nato kana, magmalipayon ta ug atong mapamatud-an nga tinuod tang mga tinun-an ni Jesus.​—Juan 13:17, 35.