1. Jezun aplea xisank khoinchi khas adnea dili? (Masikachem fuddlem chitr polloiat.)

JEZU melo tea rati tannem aplea xisank ek khas adnea dili. Tannem tankam oxem sanglem: “Hanvem tumcho mog kela, tosoch tumi-i ekamekacho mog korat.” Uprant tannem sanglem: “Ekamekacho mog korxat zalear, hache voilean tumi mhoje xis mhonn sogllea monxank kolltolem.”—Juanv 13:34, 35.

2. Eka-mekacho mog korop kiteak gorjechem?

² Jezuche xis Jezu sarkoch mog dakhoitat zalearuch te tache khore xis mhunn lok tankam vollkhotole oxem Jezun sanglem. Him utram poilea xekddeant khorim aslim ani aiz pasun tim khorim zaun asat. Tor sogleo oddchonneo pois korun eka-mekacho kallzant thaun mog korop kitlem gorjechem zaun asa!

3. Hea lekhant ami kitem xiktolim?

³ Amchea opurnntaiek lagon amkam kallzant thaun eka-mekacho mog korunk kotthin zaunk puro. Tori punn, ami Jezu Kristachi dekh gheunk zai. Mog aslolean ami xanti-korpi, bhed-bhav korinant toslim ani poramos korpi koxim zaunk xoktat, tem hea lekhant ami xiktolim. Tumi hea lekhacho obheas kortana, tumkanch vicharat: ‘Oddchonneo aslear pasun bhav-bhoinnamnim eka-mekacho mog korit ravlolean mhaka tanchea thaun kitem xikonk melltta?’

4. Eka bhavak vo bhoinnik amchea add kitem-i asa zalear Matev 5:23, 24-ant sanglolea pormonnem ami tanchea sangata kiteak xanti korunk zai?

⁴ Eka bhavak amchea add kitem-i asa zalear tachea sangata xanti korop kitlem gorjechem tem Jezun xikoilem. (Matev 5: 23, 24 vachat.) Ami Devak manovlolim zai zalear, dusream sangata boro sombond dovrop kitlem gorjechem tacher tannem zor dilo. Amchea bhav-bhoinnam sangata xanti korunk amchean zata tem soglem kortat tednam Jehova khuxal zata. Ami rag dovrun ravtat zalear vo xanti korcho proitn korinant zalear to amchi bhokti manun gheuncho na.—1 Juanv 4:20.

5. Eka bhavak xanti korunk kiteak kotthin zalem?

⁵ Xanti korunk amkam kotthin zaunk puro. Kiteak? Mark-a sangata kitem ghoddlem tem polloiat. * Eka bhavan tacheo khoddeo kaddleo ani tache vixim sobhechea herank vaitt khobro sangleo tednam taka khub dukh bhoglem. Mark-an kitem kelem? To sangta: “Hanv tea bhavacher samko ragar zalom ani tacher taplom.” Punn uprant, apnnem kitem kelem tachea vixim Mark-ak vaitt dislem ani tannem tea bhava lagim vochon bhogsonnem maglem, ani tachea sangata portun xanti korcho proitn kelo. Punn tea bhavak xanti korunk naka asli. Poilim-poilim Mark-ak dislem, ‘Tea bhavak xanti korunk naka zalear hanvem kiteak proitn korit ravonk zai?’ Punn, Mark-achea sorkittachea dekhrekh korpean taka soddun dium naka mhunn sanglem. Mark-an kitem kelem?

6. (a) Xanti korunk Mark koso proitn korit ravlo? (b) Koloskarank 3:13, 14-ant sanglolim utram Mark-an koxim pall’llim?

⁶ Mark-an aplea sobhavacher dhean dilem tednam apnna bhitor khaltikai unni asa ani apunn kednam-kednam dusream poros vorto mhunn chint’ta hem taka kollon ailem. Tannem aplo sobhav bodlunk zai mhunn taka kollon ailem. (Kol. 3:8, 9, 12) Tannem portun tea bhava lagim vochon apnnem kitem kelem tachea pasot bhogsonnem maglem. Apnnak kitlem dukh bhogta ani portun ixttagot zoddunk apunn kitlo axeun asa tem sangonk, Mark-an tea bhavak chitteo boroileo. Tea bhavak avoddttolim toslim dennim pasun Mark-an taka dilim. Dukhachem mhunnttlear, tea bhavan Mark-ak bhogsunk na. Punn, Mark Jezuchi adnea pallun aplea bhavacho mog korit ravlo ani bhogxit ravlo.  (Koloskarank 3:13, 14 vachat.) Ami xanti korcho proitn kortat tednam pasun dusrim xanti korunk sodhinant zalear, Jezu bhaxen mog dakhoilolean tankam bhogxit ravonk ani xanti korunk magnnem korit ravonk amkam modot zatoli.—Mt. 18:21, 22; Gal. 6:9.

7. (a) Jezun amkam kitem korunk sanglem? (b) Eke bhoinnik kosle kotthin poristhiticho fuddo korcho poddlo?

⁷ Dusreamnim amchea sangata koxem vaglolem amkam zai teach toren ami tanchea sangata vagonk zai mhunn Jezun sanglem. Tea bhair, ami fokot amcho mog kortat tanchoch mog korcho nhoi mhunn tannem sanglem. (Lukas 6:31-33) Sobhent konn eklo amkam hoddkina zalear vo zap korina zalear, tumi kitem kortolim? Oxem sodanch ghoddona, punn Lara-ak kitem zalem tem polloum-ia. Tem mhunntta: “Ek bhoinn mhaka kiteak zap korinasli tem mhaka kollonk na. Hanv hea vixim khub chintunk laglem, ani mittingek vochonk mhaka bejar ieunk laglo.” Poilem-poilem Lara-an chintlem: ‘Mhoji kainch chuk na. Hanvem tika kaim vaitt korunk na. Karonn ti bhoinn teach bhaxen vagta mhunn sobhentlea dusreank pasun distalem.’

8. Xanti korunk lagon Lara-n kitem kelem, ani tachea udharonnantlean ami kitem xikonk zata?

⁸ Lara-an xanti korunk thoddim pavlam ghetlim. Tannem Jehova lagim magnnem kelem ani tea bhoinni lagim ulounk tharailem. Tim tea somosia vixim uloilim, eka-mekak veng marli ani xanti keli. Soglem suttavem zalem oxem dislem. Punn Lara mhunntta: “Ti bhoinn portun tech bhaxen vagunk lagli. Hanv khub nirax zalem.” Tea bhoinnin aplo sobhav bodol’learuch apunn khuxal astolem mhunn Lara-ak poilim dislem. Punn uprant, tea bhoinni sangata mogan vagot ravonk ani ‘bhogxit’ ravonk tich sogleam poros bori vatt mhunn Lara somzolem. (Ef. 4:32–5:2) Khoro pritimog “koslench vaitt monant dhorina . . .  dusreancheo chuki-khoddi somzun gheta, dusreancher visvas dovorta, bhorvanso dhorun ravta, sosnnikaien ani dhiran soglleak fuddo korta”, mhunn Lara-n ugddasak haddlem. (1 Kor. 13:5, 7) Lara-k portun monachi xanti mell’lli. Hollu-hollu ti bhoinn Lara lagim borea bhaxen vagonk lagli. Tumi tumchea  bhav-bhoinnancho mog korun tanchea sangata xanti korcho proitn korit ravtat tednam, “mogacho ani xanticho Dev tumche sovem astolo” mhunn tumi bhorvonso dovrunk zata.—2 Kor. 13:11.

9. Itihas 10:34, 35-ant sanglolea pormonnem ami kiteak bhed-bhav korcho nhoi?

⁹ Jehova bhed-bhav korina. (Itihas 10:34, 35 vachat.) Ami bhed-bhav korinant tednam ami tachim bhurgim mhunn dakhoun ditat. Ami amcho kortat toso, amchea peleacho mog korcho ho kaido ami pallttat. Ani amchea bhav-bhoinnam sangata xanti samballunk ami modot kortat.—Rom. 12:9, 10; Jak. 2:8, 9.

10-11. Eke bhoinnin aplem chukichem chintop koxem pois kelem?

¹⁰ Thoddeank bhed-bhav korinastana ravonk kotthin zaunk puro. Udharonnak, Ruth nanvachea eka bhoinni sangata kitem ghoddlem tem polloiat. Tem tornnattem aslem tednam dusrea desantli ek bail tachea sangata vaitt toren vagli. Hacho tacher koslo porinnam poddlo? Tem mhunntta: “Hanv tea desacho dves korunk laglem. Tea desantle sogle lok, thoim aslolim bhav-bhoinnam pasun toslinch oxem mhaka dislem.” Ruth-an aplim chukichim bhavnam koxim pois kelim?

¹¹ Aplim chukichim bhavnam kaddun uddounk zai mhunn Ruth-ak somzolem. Tea desa vixim Yearbook-ant aslole bhav-bhoinnanche onnbhov ani ripott vachunk laglem. Tem mhunntta: “Tea desantlea lokam vixim borem chintunk hanvem proitn kelo. Thoinchea bhav-bhoinnak Jehovachea sevent urba asli mhunn hanvem polloilem. Ani amchea sonvsarbhorchea bhav-bhoinnam modem tim pasun asat mhunn mhaka sarkem koll’llem.” Punn titlench kelear pavchem na mhunn Ruth-ak uprant somzolem. Tem sangta: “Tea desantlea bhav-bhoinnank hanv mellttalem tednam tanchea sangata ixttagot korunk hanv chodd proitn korunk laglem. Tanchea koddem uloun hanv tankam anik bore toren vollkhonk pavlem.” Porinnam kitem zalo? Ruth mhunntta: “Hollu-hollu, mhojim chukichim bhavnam nach zalim.”

12. Sarah nanvachea eka bhoinnik kosli somosia asli?

¹² Thoddim chintinastana pasun bhed-bhav korunk xoktat. Sarah-chem udharonn gheiat. Eklo khoinchea kullacho vo to kitlo girest asa vo songottnnent taka kosli zobabdari asa tachea pormonnem tem nit korinaslem, tor apunn bhed-bhav korina oxem taka distalem. Punn tem mhunntta: “Khorem mhunnttlear hanv bhed-bhav kortalem mhunn mhaka uprant kollon ailem.” Koxe toren? Sarah chodd xikop kelolea familintlean ail’lem. Tor jim konn chodd xiklolim asat, toslea lokam sangata tem ixttagot kortalem. Ek pavtt tannem eka ixttak oxem pasun mhunnttlem: “Jim bhav-bhoinnam borim xikleant tanchea sangata mhaka ixttagot korunk borem dista. Punn dusream sangata ixttagot korunk hanv vochona.” Khorench, Sarah-n aplo sobhav bodlunk zai aslo. Koso?

13. Sarah-n aplo sobhav koso bodol’lo tantuntlean ami kitem xiktat?

¹³ Sarah-cho sobhav bodlunk eka sorkittachea dekhrekh korpean taka modot keli. Tem mhunntta: “Hanvem visvaxiponnan kelolea Jehovache sevek lagon, sobhent hanv ditam tea borea zobabank lagon, ani Bible-a vixim mhaka aslolea gineanak lagon tannem mhaka xabaski dili. Punn uprant, amchem ginean vaddtta toxem ami amchea bhitor Kristi gunn, zoxe khaltikai, mannsugen vagop, ani doia pasun vaddounchi goroz asa mhunn tannem somzailem.” Sorkittachea dekhrekh korpean sanglolem tem Sarah-n manun ghetlem. Tem mhunntta: “Ami doia ani mog dakhovop chodd gorjechem mhunn mhaka kollon ailem.” Tea uprant, tem aplea bhav-bhoinnam sangata borea bhaxen vagonk laglem. Tem mhunntta:  “Tanche khoinche gunn Jehovak avoddttat astole tem hanvem zannam zauncho proitn kelo.” Amchea vixim kitem? Amkam aslolea xikxonnak lagon ami dusream poros vortim mhunn kednach chintchem nhoi! Ami amchea soglea “bhavambhoinnincho” kallzant thaun mog kortat zalear ami bhed-bhav korchimnant.—1 Ped. 2:17.

14. Hebrevank 13:16-ant sanglolea pormonnem ami dusreancho poramos kortat tednam Jehovak koxem dista?

¹⁴ Ami eka-mekacho poramos kortat tednam Jehova chodd khuxal zata. (Hebrevank 13:16 vachat.) Chodd korun ami gorjevontak modot kortat tednam ho amchea bhoktecho bhag mhunn to lekhta. (Jak. 1:27; 2:14-17) Bible-ant amkam “poramos” korit ravonk urba melltta. (Rom. 12:13) Ami dusreank kallji dakhoitat, tancho mog kortat, ani tanche ixtt zaunk sodhtat mhunn dakhoitat. Ami dusreank kitem-i khaunk, pieunk, vo amcho vell ditat tednam Jehova khuxal zata. (1 Ped. 4:8-10) Punn, amkam eka-mekacho poramos korunk thoddeo oddchonneo asonk puro.

15-16. (a) Poramos korunk thoddim fatti-fuddem kiteak sortat? (b) Poramos korunk fuddem soronk Edit-ak koxi modot zali?

¹⁵ Amchea poristhitik lagon ami poramos korunk fatti-fuddem soronk puro. Edit nanvachea eke vidvecho onnbhov polloiat. Ti Jehovachi Sakxi zaunchea poilim, dusream sangata chodd ixttagot dovornasli. Aplea poros dusrim bore toren poramos korunk xoktolim mhunn ti chint’tali.

¹⁶ Edit Sakxi zalea uprant tinnem aplem chintop bodol’lem. Poramos korunk tinnem thoddim pavlam ghetlim. Ti sangta: “Amchea novea Raj-ghorachem bandkam suru zalem tednam, modot korunk ek zoddpem ieunchem asa mhunn eka vhoddilan mhaka sanglem. Tannem mhaka mhojean tea zoddpeank don sumanam pasot mhojea ghorant dovrunk zata kai mhunn vicharlem. Tednam Zarephath vidvek Jehovan koxim besanvam dilim tem mhojea ugddasak ailem.” (1 Raz. 17:12-16)  Tea zoddpeak dovrunk Edit toiar zali. Tika besanvam mell’llim kai? Ti sangta: “Don sumanam bodlek tim don mhoine ravlim. Tea don mhoineamnim ami borim ixtt zaunk pavlim.” Anik ek besanv mhunnttlear, Edit-ak sobhent pasun zaitim ixttam mell’llim. Ti atam ek pioneer zaun asa ani zanchea sangata ti sevent kam korta, tankam ti aplea ghora chaiek apoita. Ti mhunntta: “Hanv dusreank ditam tednam mhaka khub borem dista! Khorem mhunnttlear, dilolean mhaka anik chodd besanvam mellttat.”—Heb. 13:1, 2.

17. Luke-ak ani tache bailek kitem kollon ailem?

¹⁷ Ami ghoddie poramos kortat astolim, punn ami hem anik chodd korunk zata kai? Udharonnak, Luke ani tachi bail khub poramos kortat. Tim aplea avoi-bapaik, soireank, laginchea ixttank, ani sorkittachi dekhrekh korpi ani tache bailek pasun sodanch aplea ghora apoitalim. Punn Luke mhunntta, “Ami choddxim, amchea lagim asat tankanch amchea ghora apoitalim mhunn amkam kollon ailem.” Luke ani tachi bail anik chodd poramos koxim korunk pavlim?

18. Luke ani tachi bail anik chodd poramos koxim korunk pavlim?

¹⁸ Jezuchea hea utrancher dhean dilolean, Luke-an ani tache bailen aplem chintop bodol’lem: “Tumcho mog kortoleancho tumi mog korxat zalear, kosli tumkam mozuri mellot?” (Mt. 5:45-47) Apnnem pasun Jehova bhaxen udar kallzachim zaunk zai mhunn tankam kollon ailem. Tor zankam tannim poilim kednanch ghorak apounk nant, tankam tim aplea ghora apounk laglim. Luke sangta: “Ami sangata mellon ietat tednam amkam khub khuxalkai bhogta. Sogleank urba ani ghottai melltta.”

19. Ami Jezuche xis mhunn koxim dakhoun ditat, ani tunvem kitem korunk tharailam?

¹⁹ Ami kallzant thaun eka-mekacho mog kortat tednam ami xanti korpi, bhed-bhav korinaslolim ani poramos korpi koxim zaunk pavtat tea vixim ami hea lekhant xiklim. Amchea bhav-bhoinnam vixim chukichem chintop ami pois korchem gorjechem ani tancho kallzant thaun mog korcho gorjecho. Ami toxem kortat zalear sodanch khuxal astolim ani Jezuche khore xis mhunn dakhoun ditolim.—Juanv 13:17, 35.