1. ¿Mbaʼe mandamiéntopa Jesús omeʼẽ vaʼekue idisipulokuérape? (Ehecha pe taʼanga oĩva ko rrevísta apére).

PE PYHARE omano mboyve, Jesús omeʼẽ idisipulokuérape ko mandamiénto: “Che pohayhu haguéicha, peẽ pejoayhu vaʼerã avei. Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:34, 35).

2. ¿Mbaʼérepa iñimportánte jahechauka jajoayhuha?

² Jesús heʼi vaʼekue ojekuaa porãtaha mávapa umi idisípulo verdadéro ohayhúramo hikuái la héntepe haʼe oporohayhu haguéicha. Ha upeichaite ojapo vaʼekue umi kristianokuéra yma síglo primérope guare ha ko tiémpope avei. Upévare iñimportanteterei jahechauka jajoayhuha, sapyʼánte ijetuʼúramo jepe jajapo hag̃ua upéva.

3. ¿Mbaʼépa jahecháta ko artíkulope?

³ Ñande ningo ñaneimperfékto ha ñane ermanokuéra avei, upévare ijetuʼu ñandéve jajoayhu hag̃ua ñande pyʼaite guive. Upéicharõ jepe ñañehaʼãmante vaʼerã jasegi Cristo ehémplo. Ko artíkulope jahecháta mbaʼéichapa pe mborayhu ñanepytyvõ jaiko hag̃ua pyʼaguapýpe, jatrata enterovépe peteĩchapánte, ñanembaʼeporã ha jarresivi porã enterovépe. Jastudiakuévo ko artíkulo ñañeporandukuaa: “¿Mbaʼépa ikatu aaprende umi ermáno ha ermanakuéra osegi vaʼekuégui oporohayhu sapyʼánte ijetuʼúramo jepe?”.

4. Heʼiháicha Mateo 5:23, 24, ¿mbaʼérepa jaiko porã jey vaʼerã peteĩ ermáno ipochy vaʼekuéndi ñanendive?

⁴ Jesús ningo ñanemboʼe vaʼekue iñimportantetereiha jaiko porã jey ñane ermánondi jaikuaáramo ipochyha ñanendive (elee Mateo 5:23, 24). Haʼe omyesakã porã vaʼekue tekotevẽha jajogueraha porã ñande rapichakuérandi jaipotáramo Ñandejára ñandeguerohory. Jehová ningo ovyʼa ohecháramo ñande ñañehaʼãmbaiteha jaiko hag̃ua pyʼaguapýpe ñane ermanokuérandi.  Haʼe ndoaseptamoʼãi umi mbaʼe jajapóva iservísiope japytáramo ñandepyʼaro ñane ermánore, ha ni ndajajaposéiramo mbaʼeve jaiko porã jey hag̃ua hendive (1 Juan 4:20).

5. ¿Mbaʼérepa Márcospe ijetuʼu raʼe oiko porã jey hag̃ua peteĩ ermánondi?

⁵ Ñandéve g̃uarã ningo ikatu oime ijetuʼu jaiko porã jey hag̃ua ótrondi. ¿Mbaʼérepa upéva? Jahechamína mbaʼépa oiko vaʼekue peteĩ ermáno héravare Marcos. * Haʼe oñeñandu vai oikuaárõ guare peteĩ ermáno okritika hague chupe ha oñeʼẽ vai hague hese kongregasiónpe. ¿Mbaʼépa Marcos ojapo raʼe upe situasiónpe? Haʼe heʼi: “Arrenegaiterei ha ndajejokovéi, upévare ajaʼo vaipaite chupe”. Upe riréma haʼe ombyasy la ojapo vaʼekue ha ojerure diskúlpa pe ermánope oiko porã jey hag̃ua hendive. Péro pe ermáno ndoaseptái chugui mbaʼeve. Ñepyrũrã Marcos opensa: “Haʼe ningo ndoikoporãsevéima chendive, ¿mbaʼére piko upéicharõ che asegi vaʼerã añehaʼã?”. Péro pe superintendénte de sirkuíto omokyreʼỹ chupe ani hag̃ua oñentrega. ¿Ha mbaʼépa ojapo Marcos?

6. a) ¿Mbaʼéichapa Marcos osegi oñehaʼã oiko jey hag̃ua pyʼaguapýpe pe ermánondi? b) ¿Mbaʼéichapa Marcos ojapo raʼe heʼíva Colosenses 3:13, 14-pe?

⁶ Marcos ojepyʼamongetárõ guare mbaʼéichapa haʼe opensa, ohechakuaa sapyʼánte ofaltaha jepi chupe iñumílde ha opensaha jepi haʼe ojapo porãveha entéro mbaʼe umi ótrogui. Haʼe ohechakuaa tekotevẽha okambia (Col. 3:8, 9, 12). Upévare haʼe oho jey pe ermáno rendápe ha umíldemente ojediskulpa upe ojapo vaʼekuére. Marcos oskrivi avei unas kuánta kárta pe ermánope heʼi hag̃ua chupe mbaʼeichaitépa ombyasy la ojapo vaʼekue ha hiʼãiteha chupe oiko jey hikuái oñoamígoramo. Marcos orregala avei pe ermánope umi mbaʼe opensáva ogustataha chupe. Péro ñambyasýramo jepe, pe ermáno noperdonái chupe ha osegi ipochy hendive. Upéicharõ jepe, Marcos ojapo pe Jesús omanda vaʼekue, ha osegi ohayhu ha operdona iñermánope (elee Colosenses 3:13, 14). Ñande jahayhúramo la héntepe Jesús oporohayhu haguéicha, jasegíta ñaperdona chupekuéra ha ñañemboʼéta jaiko jey hag̃ua hendivekuéra pyʼaguapýpe, ha jajapóta upéicha oĩramo jepe  ndoikoporãséi jeýva ñanendive (Mat. 18:21, 22; Gál. 6:9).

7. a) ¿Mbaʼépa Jesús omanda vaʼekue jajapo hag̃ua? b) ¿Mbaʼe situasión ijetuʼúvapa ombohovái peteĩ ermána hérava Lara?

⁷ Jesús omanda vaʼekue ñandéve jatrata hag̃ua ótrope jaipotaháicha haʼekuéra ñandetrata. Haʼe heʼi vaʼekue avei ndahaʼéi vaʼerãha jahayhúva umi ñanderayhúvapente (Luc. 6:31-33). Péro, ¿mbaʼépa rejapóta peteĩ ermáno térã ermána noñeʼẽsevéiramo ndéve ha ni nandesaludasevéiramo? Ndoikoguasúiramo jepe upéva kongregasiónpe, peteĩ ermána héravare Lara oiko vaʼekue upéva. Haʼe omombeʼu: “Peteĩ ermána ningo ndacherechaiete guaʼu, ha ndaikuaái mbaʼérepa. Upéva chemonerviosaiterei ha ndaigustovéi chéve aha rreunionhápe”. Ñepyrũrã Lara opensa: “Ndahaʼéingo che kúlpa, ha hiʼarive heta oĩ kongregasiónpe heʼíva avei ko ermána oñekomporta extráño lénto jepiha”.

8. a) ¿Mbaʼépa ojapo Lara oiko porã jey hag̃ua pe ermánandi? b) ¿Mbaʼépa ñaaprende Lara ohasa vaʼekuégui?

⁸ Lara ojapo unas kuánta kósa oiko porã jey hag̃ua pe ermánandi. Haʼe oñemboʼe Jehovápe ha odesidi oñemongeta pe ermánandi. Haʼekuéra oñeʼẽ la provlémare, oñoañuã ha oiko porã jey hikuái oñondive. Haʼetévaicha kuri trankilopámava. Péro Lara omombeʼu: “Upéi pe ermána oñepyrũ jey ndachesaludavéi ymave guaréicha. Ha upéva chemokangypaite jey”. Ñepyrũrã, Lara opensa ovyʼataha pe ermána okambiáramo añoite. Péro upéi ohechakuaa iporãvetanteha osegi otrata chupe mborayhúpe ha ‘operdona chupe ipyʼaite guive’ (Efes. 4:32–5:2). Lara imanduʼa pe kristiáno oporohayhu añetéva ‘ndaipyʼaroiha, oaguanta entéro mbaʼe, osegi oguerovia entéro mbaʼe, siémpre oreko esperánsa ha ni mbaʼevéicharõ noñentregaiha’ (1 Cor. 13:5, 7). Upéva oipytyvõ Lárape anivéma hag̃ua ojepyʼapy upe situasiónre. Ha tiémpo rire, pe ermána oñepyrũma otrata porãve chupe. Ha ñande ñañehaʼãramo jaiko pyʼaguapýpe ñane ermáno ha ermanakuérandi, ha jasegíramo jahayhu chupekuéra, katuete ‘Ñandejára oporohayhúva ha omeʼẽva pyʼaguapy oĩta ñanendive’ (2 Cor. 13:11).

9. Heʼiháicha Hechos 10:34, 35, ¿mbaʼérepa tekotevẽ jatrata enterovépe peteĩchante?

⁹ Jehová ningo otrata enterovépe peteĩchante (elee Hechos 10:34, 35). Ha ñande jahechauka hína haʼeha itaʼýra ha itajýra jatrata jave ñande rapichakuérape peteĩchapa. Avei ñakumpli pe mandamiénto heʼíva jahayhu vaʼerãha ñande rapichápe ñande voi jajehayhuháicha, ha ñañehaʼã jaiko pyʼaguapýpe ñane ermáno ha ermanakuérandi kongregasiónpe (Rom. 12:9, 10; Sant. 2:8, 9).

10, 11. ¿Mbaʼépa ojapo peteĩ ermána anivéma hag̃ua opensa vai ótrore?

¹⁰ Algúnope g̃uarã ikatu ijetuʼu otrata hag̃ua enterovépe peteĩchapa. Jahechamína por ehémplo mbaʼépa oiko vaʼekue peteĩ ermána héravare Rut. Haʼe imitãrõ guare, peteĩ persóna ótro paisgua ojapo vaʼekue álgo operhudika vaietereíva ifamíliape. ¿Mbaʼéichapa haʼe opyta upevakuére? Rut omombeʼu: “Che ndaikuaaséi vaʼekue mbaʼevete upe paísgui. Apensa voi enterove upe paisgua upeichagua hénte memeha, umi ermáno ha ermanakuéra entéro”. ¿Mbaʼépa oipytyvõ raʼe Rútpe anivéma hag̃ua opensa upéicha?

¹¹ Rut ohechakuaa tekotevẽha oñehaʼãmbaite anivéma hag̃ua opensa vai upéicha. Haʼe olee umi experiénsia ha infórme oĩva pe Anuáriope oñeʼẽva upe paísre. Haʼe heʼi: “Chéngo añehaʼãmbaite kuri apensa hag̃ua iporãva umi hénte upe paispeguáre. Ha añepyrũ ahechakuaa umi ermáno ha ermanakuéra oserviha Jehovápe ipyʼaite guive. Hesakã porãiterei chéve haʼekuéra haʼeha avei ñane ermáno ha ermanakuéra oĩva opárupi ko yvy ape ári”. Mbeguekatúpe, Rut ohechakuaa tekotevẽha avei ohechauka oporohayhuha. Haʼe omombeʼu: “Atopa jave umi ermanokuéra upe paisguáre, añehaʼãmbaite cheamávle hendivekuéra. Ha añemongeta hendivekuéra aikuaa porãve hag̃ua chupekuéra”. ¿Mbaʼépa oiko Rut ojapo haguére upéicha? Haʼe heʼi: “Tiémpo rire, umi pensamiénto vai areko vaʼekue opa”.

12. ¿Mbaʼe provlémapa oreko peteĩ ermána hérava Sara?

¹² Oĩ avei umi oimoʼãʼỹre ndotratáiva enterovépe peteĩchapa. Por ehémplo, peteĩ ermána hérava Sara opensa vaʼekue haʼe otrataha enterovépe peteĩchapa. Haʼe opensa upéva ndohusgái rupi la héntepe ipire kolór térã ipíntare, iplátapa térã imboriahu, térã mbaʼe rresponsavilidápa oreko Jehová organisasiónpe. Péro Sara orrekonose: “Añepyrũ ahechakuaa añetehápe ndatrataiha enterovépe peteĩchapa”. ¿Mbaʼére piko heʼi upéva? Sara ningo okakuaa vaʼekue peteĩ família ijestúdio porãvape, ha haʼe ojeheʼaseve umichagua héntere avei. Peteĩ vuéltape heʼi voi peteĩ iñamígope: “Che ajeheʼa umi ermáno ijestúdio porãvarente, ha amboyke umi ijestudioʼívape”. Péicha jahechakuaa Sara tekotevẽha okambia. ¿Mbaʼéichapa haʼe ojapo raʼe upéva?

13. ¿Mbaʼépa ojapo vaʼekue Sara okambia hag̃ua opensa lája ha mbaʼépa ñaaprende upévagui?

¹³ Peteĩ superintendénte de sirkuíto ningo oipytyvõ vaʼekue Sárape ojepyʼamongeta hag̃ua isituasiónre. Sara omombeʼu: “Haʼéngo cheguerohory aservi haguére fiélmente Jehovápe, iporã haguére che komentariokuéra ha aikuaa haguére heta mbaʼe la Bíbliagui. Upéi oexplika chéve amáske jaikuaa hetave mbaʼe, tekotevẽha avei ñaneumílde, ñarrekonose oĩha umi mbaʼe ndaikatumoʼãiva jajapo ha jaiporiahuvereko vaʼerãha ñande rapichápe”. Sara ojapo pe superintendénte de sirkuíto heʼi vaʼekue chupe. Haʼe omombeʼu: “Ahechakuaa iñimportanteveha ñaneamávle ha jahechauka japorohayhuha”. Upéicha ojapo rupi, haʼe oñepyrũma okambia ohecha lája ermanokuérape. Sara heʼi: “Jehová ningo oguerohory chupekuéra, upévare añehaʼãmbaite aikuaa mbaʼe kualida porãpa oreko hikuái”. ¿Ha mbaʼépa ikatu jaʼe ñandejehe? Ñande ningo arakaʼeve nañapensaséi  ñandevaleveha ótrogui jareko rupi estúdio porã. ‘Jahayhúramo enterove ermanokuérape’ ñande pyʼaite guive, jatratáta enterovépe peteĩchapa (1 Ped. 2:17).

14. Heʼiháicha Hebreos 13:16, ¿mbaʼéichapa Jehová oñeñandu ohechávo ñainvitaha ótrope ñande rógape?

¹⁴ Jehová omombaʼeterei ohecháramo jarresivi porãha ñande rapichakuérape ha ñanembaʼeporãha hendivekuéra (elee Hebreos 13:16). Jajapo jave upéicha, Jehová heʼi jaadoraha hína chupe, ha koʼytevéntema haʼe ohecha upéicha ñaipytyvõ jave peteĩ oikotevẽvape (Sant. 1:27; 2:14-17). Añetehápe la Biblia ñanemokyreʼỹ ‘siémpre jarresivi porã hag̃ua ñande rapichakuérape ha ñanembaʼeporã hag̃ua hendivekuéra’ (Rom. 12:13). Ñainvita jave ótrope ñande rógape, jahechauka hína ñañeinteresaha hesekuéra, jahayhuha chupekuéra ha jaikoseha iñamigokuéraramo. Jehovápe ningo ogustaiterei voi ohecháramo ñakompartiha ñande rapichándi álgo hoʼumi vaʼerã, sonserami jepe ha avei jahasa tiémpo hendivekuéra (1 Ped. 4:8-10). Upéicharõ jepe ikatu ijetuʼu jepi ñandéve ñainvita hag̃ua ñande rapichakuérape.

15, 16. a) ¿Mbaʼérepa ikatu oĩ okyhyjéva oporoinvita hag̃ua hógape? b) ¿Mbaʼépa oipytyvõ raʼe Edítpe okambia hag̃ua ha opororresivi hógape?

¹⁵ Ikatu oime jakyhyje jepi ñaporoinvita hag̃ua ñande rógape ñapensa rupi ñane situasión nomeʼẽiha jajapo hag̃ua upéva. Jahechamína peteĩ viúda hérava Edit ehémplo. Haʼe ningo oiko mboyve chugui Testígo, ndojeheʼaseguasúi vaʼekue avavére. Edit opensa umi ótro situasión iporãveha oporoinvita hag̃ua hógape.

¹⁶ Péro oiko rire chugui Testígo, Edit okambia opensa lája ha oñehaʼãmbaite opororresivi hag̃ua hógape. Haʼe omombeʼu: “Ore Salón pyahu oñemopuʼãrõ guare, peteĩ ansiáno heʼi chéve peteĩ matrimónio outaha oipytyvõ pe konstruksiónpe, ha oporandu chéve ndaikatuichénepa arresivi chupekuéra che rógape 2 semánare. Upépe che chemanduʼa mbaʼeichaitépa Jehová ovendesi vaʼekue pe viúda de Saréptape” (1 Rey. 17:12-16). Edit heʼi pe matrimónio ikatuha opyta hógape. ¿Ha ohupyty piko raʼe heta mbaʼe porã upévare? Haʼe heʼi: “Chéngo  avyʼaiterei haʼekuéra opyta haguére che rógape 2 mésere, ha ndahaʼéi 2 semánante. Upe tiémpope ningo oikóma orehegui oñoamigoite”. Edit oñepyrũ avei oreko heta amista iporãva kongregasiónpe. Koʼág̃a haʼe prekursóra ha vyʼápe orresivi hógape umi osẽvape hendive predikasiónpe. Haʼe heʼi: “Ameʼẽ jave, añeñandu porãiterei. Ha añetehápe ahupyty hetaiterei vendisión upe haguére” (Heb. 13:1, 2).

17. ¿Mbaʼépa ohechakuaa ijehe Lucas ha hembireko?

¹⁷ Oiméramo ñande ñaporoinvita jepi voi ñande rógape, ¿mbaʼépa ikatu jajapo ñamehorave hag̃ua? Por ehémplo, Lucas ha hembirekópe ojekuaa imbaʼeporã ha opororresivi porã haguére hógape. Haʼekuéra ojepokuaa vaʼekue oinvita hógape ituakuérape, iparientekuéra, umi iñamigoitépe ha pe superintendénte de sirkuíto ha hembirekópe. Péro Lucas heʼi: “Ore rohechakuaa roinvitaha roikóvo umi oreamigokuetépente”. ¿Mbaʼépa oipytyvõ Lucas ha hembirekópe omehora hag̃ua ko mbaʼépe?

18. ¿Mbaʼépa ojapo Lucas ha hembireko omehorave hag̃ua oporoinvita jave?

¹⁸ Lucas ha hembireko okambia opensa lája ojepyʼamongeta rire Jesús heʼi vaʼekuére: “¿Mbaʼe vendisión guaʼu piko pemerese pehayhúramo umi penderayhúvapente?” (Mat. 5:45-47). Haʼekuéra ohechakuaa tekotevẽha osegi Jehová ehémplo, pórke haʼe imbaʼeporã enterovéndi. Upévare odesidi hikuái oinvitataha umi ermáno ha ermána núnka noinvitái vaʼekuépe. Lucas heʼi: “Enterove rohasa porãiterei jepi oñondive. Péicha jave ningo roñomokyreʼỹ, rojoayhuve ha roñemoag̃uive Jehováre”.

19. a) ¿Mbaʼéichapa jahechauka hína ñande haʼeha Jesús disípulo? b) ¿Mbaʼépa jajedesidíma jajapo?

¹⁹ Ko artíkulope jahecháma jajoayhúramo ñande pyʼaite guive, jaikotaha pyʼaguapýpe ñande rapichándi, jatratáta enterovépe peteĩchapa ha ñanembaʼeporã ha japororresivi porãtaha. Ñande ningo ñañehaʼãmbaite vaʼerã jaipeʼa ñandejehegui oimehaichagua pensamiénto vai, ha jahayhu ñane ermáno ha ermanakuérape ñande pyʼaite guive. Jajapóramo upéicha, jaikóta vyʼápe ha jahechaukáta ñande añetehápe haʼeha Jesús disípulo (Juan 13:17, 35).