1. Jesus éí bídahoołʼaahii haʼátʼíí níigo yichʼįʼ haadzííʼ? (Naaltsoos bikááʼdę́ʼígíí níníłʼı̨́.)

JESUS éí bídahoołʼaahii kóníigo yichʼįʼ haadzííʼ: “Tʼáá ayóóʼádanihííníshʼní yę́ęgi átʼéego, nihí ałdóʼ ayóóʼádaʼahíínóhʼní.” Áádóó ánáádooʼniid: “Ayóóʼádaʼahíínóhʼníigo shídahoołʼaahii danohłı̨́įgo diné tʼáá ałtso bił béédahózin doo.”—John 13:​34, 35.

2. Haʼátʼíí biniyé ayóóʼádaʼahííníiʼníi doo?

² Jesus éí diné ayóóʼáyóʼní, ákondi bídahoołʼaahii tʼáá ákódaatʼéego éí tʼáá aaníí bídahoołʼaahii danilı̨́įgo diné bił bééhózin doo. Éí tʼáá ałkʼidą́ą́ʼ índa tʼahdii tʼáá ákódaatʼé. Áko azhą́ ayóóʼádaʼahijóʼníi dooleełgi nantłʼa shı̨́į ndi, bikʼeh didiidleełgo átʼé!

3. Haʼátʼíí baa nídadíitʼįįł?

³ Tʼáá áníiltso nidaʼiyiilzííh, áko haleebee ayóóʼádaʼahííníiʼníi dooleeł yę́ęgi nihá nantłʼago áyósin. Azhą́ ákótʼée ndi, Jesus bedaʼiilʼı̨́į doo. Ayóóʼóʼóʼní bee haitʼéego kʼé náʼííłeeł, aheełtʼéego aa nitsíikees, índa nihił hadleeʼ dooleełgi baa ídahwiidiilʼááł. Áádóó díí baa nitsíníkees: ‘Brothers dóó sisters ayóóʼádaʼahóʼníigi łahda bá ndanitłʼa ndi, haʼátʼíí bitsʼą́ą́dóó baa íhwiideeshʼááł?’

4. Matthew 5:​23, 24 bikʼehgo nihibrother łaʼ doo yáʼátʼééhgóó nihaa nitsídeezkéezgo haʼátʼíí biniyé bił kʼé náʼahididiiʼniił?

⁴ Jesus éí nihibrother łaʼ doo kʼé nihóʼníi dago éí tʼóó kʼé náʼahidóhní nihiłní. (Matthew 5:​23, 24 yíníłtaʼ.) Áádóó  Diyin bił honishǫ́ǫ doo niidzingo éí hazhóʼó diné bił kʼé ahidiʼníi doo nihiłní. Kótʼéego nihibrothers bił kʼé náʼahidiʼníigo Jiihóvah yaa bił hózhǫ́. Doo kʼé náhodeeshłeeł da niidzingo éí Jiihóvah bichʼįʼ sodiilzin índa bá naʼaʼaʼ yę́ęgi doo nihá yinízin da doo.—1 John 4:20.

5. Mark éí chʼééh kʼé níʼjiłeehgo haʼátʼíí hatsʼą́ą́ʼ neinółtłʼah?

⁵ Haʼátʼíí biniinaa kʼé nididííʼniiłgi ayóó nihá nantłʼa? Mark * kótʼéego baa haneʼ. Éí nihibrother łaʼ congregationgi doo yáʼátʼééhgóó haa yáłtiʼgo baa hozhdiiztsʼą́ąʼgo biniinaa bikʼee yínííł jizlı̨́ı̨́ʼ. Mark ájíní: “Éí shibrother bichʼįʼ ayóó átʼéego sháhóóchįįd.” Mark ájiidzaagi bąą hániʼ áádóó habrother bił kʼé náʼahidideeshniił jiniizı̨́ı̨́ʼ, ndi habrother éí tʼáadoo kʼé náhodooʼniid da. Áádóó Mark íizniizı̨́įʼgo ‘haʼátʼíí biniyé shí kʼé náhodishníi doo, hó éí doo kʼé jinízin da.’ Ndi, circuit overseer éí tʼááká bikʼidoonááh lágo hodííniid. Áko Mark haajiidzaa?

6. (a) Mark éí haitʼéego chʼééh kʼé náhojoołeeł? (b) Mark éí Colossians 3:​13, 14 haitʼéego yeʼiilaa?

⁶ Mark éí náánáłahdę́ę́ʼ diné biláahdi áníshtʼé jinízingo nitsíjíkees lágo bee ádaa ákozhniizı̨́ı̨́ʼ. Áko díí kótʼéego nitséskeesgi hashtʼedeeshłííł jiniizı̨́ı̨́ʼ. (Col. 3:​8, 9, 12) Éí tʼáadoo ayóó ádaa nitsíjíkeesígo habrother bił kʼé nináʼahizhdidooʼniił biniyé baa náájidzá. Ájiidzaaígíí ayóó átʼéego bąą hániʼgo hazhóʼó ałkʼis náániidlı̨́į doo jiníigo naaltsoos bichʼįʼ áníʼjilʼįįh. Habrother éí díí shı̨́ı̨́ bił yáʼátʼéeh jinízingo gifts baa jiinííł. Ndi habrother doo kʼé náhodoʼneʼ átʼée da. Ákótʼée ndi, Mark éí Jesus nihikʼis ayóóʼádeínóhʼní nínę́ęgi tʼóó bikʼehgóó ájítʼéego kʼé níʼjoołeeł. (Colossians 3:​13, 14 yíníłtaʼ.) Łaʼda kótʼéego chʼééh bił  kʼé náʼahizhdiʼníigo Oodlání tʼáá aaníinii bibee ayóóʼóʼóʼní nihee hólǫ́ǫgo éí tʼáá kʼé níʼjoołeełgo yáʼátʼééh náhodoodleeł jiníigo sozdilzin doo.—Matt. 18:​21, 22; Gal. 6:9.

7. (a) Jesus éí haʼátʼíí ádadiiʼnííł nihóʼní? (b) Nihisister łaʼ haʼátʼíí bee bichʼįʼ anáhóótʼiʼ hazlı̨́ı̨́ʼ?

⁷ Jesus éí tʼáá diné hachʼįʼ ádaaníił leʼ danohsinígi átʼéego, nihí ałdóʼ tʼáá ákótʼéego bichʼįʼ ádaahnííł, nihiłní. Ayóóʼádanihóʼnínígíí tʼéí ayóóʼádeínóhʼní, doo nihiłníi da. (Luke 6:​31-33) Łaʼda congregationgi doo kʼé hodideeshniił da nízingo tʼóó níighah nidílwoʼgoshąʼ? Lara ákóbiʼdiilyaa. Éí ání: “Sister łaʼ tʼóó shíighah nidílwoʼ, áko haʼátʼíí lá biniyé nisin. Ayóó átʼéego shíniʼ áyósin áádóó áłah náʼádleehgóó ałnánashdááh yę́ę doo bíneeshdlı̨́į da sélı̨́ı̨́ʼ.” Áłtsé éí kwíinisin jiní: ‘Shí yeeʼ doo áshtʼı̨́į da. Congregationgi yah anáhjahígíí ałdóʼ haʼátʼíí lá biniyé ákójítʼé danízingo haa nitsídaakees.’

8. Lara éí haitʼéego kʼé náhodoodleeł niizı̨́įʼgo yikʼehgóó ádzaa? Éí haitʼéego bitsʼą́ą́dóó bídahwiidiilʼááł?

⁸ Lara éí kótʼéego kʼé náhodoodleeł jinízingo Jiihóvah bichʼįʼ sozdoolzin áádóó hasister bił yádeeshtih jiniizı̨́ı̨́ʼ. Bee ałchʼįʼ hajoodzíiʼgo kʼé náʼahizhdooʼniid. Yáʼátʼééh nídahasdlı̨́ı̨́ʼ hwiiniidzı̨́ı̨́ʼ. Lara ájíní: “Ndi tʼahádóó díí sister tʼáá akónáánátʼı̨́. Bikʼee doo ákóníshtʼée da.” Díí sister éí doo ákójítʼéégóogo éí shił hózhǫ́ǫ doo jinízin. Ndi, Lara éí hasister tʼóó ayóóʼájóʼníigo ‘bá yóóʼanáhizhdiiʼaah’ dooleełgo baa ákozhniizı̨́ı̨́ʼ. (Eph. 4:32–5:2) Lara hoł bééhózingo Oodlání tʼáá aaníinii bibee ayóóʼóʼóʼní éí “doo nidi nichǫ́ʼígíí akʼijįʼ yisʼą́ą da; . . . tʼáá ałtsoní yééʼooʼníihgo tʼóó yił átʼé, tʼáá ałtsojįʼ oodlą́, tʼáá ałtsojįʼ bił chohooʼı̨́, tʼáá ałtsoní yichʼįʼ haʼólní.” (1 Cor. 13:​5, 7) Áko díí binahjįʼ Lara éí díí doo bąą hániʼ da jizlı̨́ı̨́ʼ. Hasister éí tʼahádóó hachʼįʼ bił hózhǫ́ silı̨́ı̨́ʼ. Nibrothers dóó nisisters ayóóʼííníʼníigo  bił kʼé náʼahidiʼníigo éí “Diyin God ayóóʼóʼóʼníinii índa tʼáá éí achʼįʼ hózhǫ́ eidiiʼaahii nihił hólǫ́ǫ doo.”—2 Cor. 13:11.

9. Acts 10:​34, 35 bikʼehgo haʼátʼíí biniyé ahehoołtʼéego aa nitsíikees doo?

⁹ Jiihóvah éí doo ałʼohgo diné yaa nitsíkees da. (Acts 10:​34, 35 yíníłtaʼ.) Nihí ałdóʼ kótʼéego nitsíikeesgo éí Diyin baʼáłchíní niidlı̨́. Tʼáá ni ádííníʼnínígi átʼéego bił kééhótʼíinii ayóóʼííníʼní nihidiʼníigi bikʼehgóó ániitʼé, áádóó nihibrothers dóó nihisisters kʼé bił nítʼiʼgo ííníilzin.—Rom. 12:​9, 10; Jas. 2:​8, 9.

10-11. Ruth éí haitʼéego doo yáʼátʼééhgóó aa nitsékees ńtʼééʼ?

¹⁰ Aheełtʼéego aa nitsáhákeesgi łaʼ tʼáá bá nidantłʼago átʼé. Nihisister Ruth kótʼéego baa haneʼ. Éí tʼah teenager jílı̨́įgo éí kéyah náánáłahdę́ę́ʼ naagháago doo yáʼátʼéhígi áhóółʼįįd. Áko haitʼéego hohodiiłtʼiʼ? Ruth ájíní: “Éí hakéyah tʼáá ałtsoní bee jooshłxá sélı̨́ı̨́ʼ. Diné tʼáá ałtso áádę́ę́ʼ ndaakaiígíí tʼáá ákódajítʼé nisin, nihibrothers dóó nihisisters ndi ałdóʼ.” Áko Ruth éí kótʼéego doo yáʼátʼééhgóó nitsíjíkeesgi haitʼéego bikʼeh jideesdlı̨́ı̨́ʼ?

¹¹ Ruth baa ákozhniidzı̨́įʼgo éí kótʼéego nitsíjíkeesgi yéigo bikʼeh jididlı̨́į doo. Éí naaltsoos Yearbook biiʼ, díí kéyahdę́ę́ʼ baa haneʼígíí baa ajółtaʼgo baa nízhdiidzá. Ájíní: “Diné éí díí kéyahdę́ę́ʼ ndaakaiígíí hazhóʼó baa nitséskeesgo baa nídiisdzá. Brothers dóó sisters áádę́ę́ʼ ndaakaiígíí éí Jiihóvah yá nidaalnishgi ayóó yídaneedlı̨́ı̨́ lágo baa ákoniidzı̨́ı̨́ʼ. Shił ííshjání áyiilaago nahasdzáán bikááʼgóó nihibrothers dóó nihisisters dah yikahígíí éí bí ałdóʼ daʼatah.” Áko Ruth éí haitʼéego nitsíjíkees jizlı̨́ı̨́ʼ? “Doo yáʼátʼééhgóó aa nitséskees yę́ęgi doo áníshtʼée da sélı̨́ı̨́ʼ,” jiní.

12. Sarah éí haʼátʼíí bee hachʼįʼ anáhóótʼiʼ?

¹² Łaʼ shı̨́ı̨́ éí aheełtʼéego aa nitsáhákeesgi doo hazhóʼó yee ádaa ákodanízin da. Sarah ákótʼéego haa haneʼ. Éí diné tʼáá aheełtʼéego baa nitséskees jinízin, háálá diné ádóoneʼé nilı̨́įgi, bibéeso ląʼí hólǫ́, doodaiiʼ binaanish ílı̨́įgo doo bee baa nijítʼı̨́į da. Ndi ájíní: “Diné doo aheełtʼéego baa nitséskees lágo bee ádaa ákoniizı̨́ı̨́ʼ.” Sarah éí hakʼéí ayóó daʼííłtaʼii danilı̨́, áko tʼáá ákótʼéego ayóó daʼííłtaʼii tʼéiyá bił ahíníjiikahgo hoł yáʼátʼééh. Łah hakʼis łaʼ ábijiní: “Shibrothers dóó shisisters ayóó daʼííłtaʼii tʼéiyá bił ahínéishkah, doo daʼííłtaʼii tʼéí bitsʼąą áníshtʼé.” Bééhózinígo Sarah éí hazhóʼó tsínízdookos. Éí haitʼéego?

13. Sarah haʼátʼíí bitsʼą́ą́dóó bídahwiilʼą́ą́ʼ?

¹³ Hazhóʼó ádaa nitsíjíkees dooleełgi circuit overseer łaʼ háká aalwod. Sarah ájíní: “Neʼoodlą́ bidziil, nizhónígo comment áʼíłʼı̨́, índa Diyin Bizaad ayóó nił bééhózin shidííniid. Ląʼígóó íhwiilʼaah, áádóó Oodlání ídlı̨́įgi éí aʼohgo éʼétʼéii índa ajoobaʼ bee ániitʼée dooleełgi bineilnish doo, shiłní.” Circuit overseer áhodííniidígíí bikʼehgóó áʼjiilaa. Sarah ání: “Baa ákoniizı̨́įʼgo éí tʼóó jiiniibaʼgo ayóóʼíʼííníiʼníi doo.” Áádóó habrothers dóó hasisters hazhóʼó baa nitsíjíkees jizlı̨́ı̨́ʼ. Éí ájíní: “Haʼátʼíidashąʼ bee Jiihóvah ayóó ájílı̨́įgo haa nitsékees nisin łeh.” Nihíshąʼ? Ayóó ííłtaʼii niidlı̨́įgo shí yeeʼ haláahgo áníshtʼé tʼáadoo niidziní doo! “Christ bee ałkʼisóó danidlíinii” ayóóʼádaʼahííníiʼníigo aheełtʼéego ałhaa nitsídeikees doo.—1 Pet. 2:17.

14. Hebrews 13:16 éí nihił hadleeʼgo Jiihóvah haitʼéego yaa nitsékees ní?

¹⁴ Jiihóvah éí nihił hadleeʼgo ayóó baa bił hózhǫ́. (Hebrews 13:16 yíníłtaʼ.) Ił hadleeʼ éí Jiihóvah bee bichʼįʼ hodílzinii átʼé, éí bichʼįʼ anídahaztʼiʼii bíká ánéilwoʼgo íiyisíí bee bichʼįʼ hodílzinii átʼé. (Jas. 1:27; 2:​14-17) Áko Diyin Bizaad ánihiłníigo éí “nihaʼałkʼee nídaakahígíí nihił” danilı̨́. (Rom. 12:13) Nihił hadleeʼgo éí ayóóʼíʼííníiʼní, nihá áhwiinítʼı̨́ʼí, índa akʼis niidlı̨́į łeh. Tʼáá áłchʼı̨́dí oodą́ą́ʼ índa oodlą́ąʼ ndi, doodaiiʼ łaʼda tʼóó bił hojílǫ́ǫ ndi, éí Jiihóvah yaa bił hózhǫ́. (1 Pet. 4:​8-10) Ndi, nihił hadleeʼ dooleeł yę́ęgi ndanółtłʼaii dahólǫ́ǫgo shı̨́ı̨́ ádaatʼé.

15-16. (a) Ił hadleeʼ dooleeł yę́ęgi haʼátʼíí biniinaa łaʼ tʼą́ą́ʼ danilı̨́? (b) Edit éí haitʼéego ayóó bił hadleeʼ silı̨́ı̨́ʼ?

¹⁵ Tʼáá nihił hazʼą́ągida biniinaa nihił hadleeʼ dooleeł yę́ęgi bichʼįʼ tʼą́ą́ʼ nidlı̨́ı̨́ shı̨́į łeh. Edit kótʼéego baa haneʼ. Éí tʼah doo Jiihóvah Yá Halneʼé jileeh yę́ędą́ą́ʼ éí diné bił nijildeehgo doo ayóó jinízin da. Éí shı̨́ı̨́ aají diné bichʼįʼ hoł dahadleeʼ doo jinízin ńtʼééʼ.

¹⁶ Jiihóvah Yá Halneʼé jizlı̨́ı̨́ʼdóó, Edit doo ákójítʼée da jizlı̨́ı̨́ʼ. Ayóó hoł hadleeʼ jizlı̨́ı̨́ʼ. Éí ájíní: “Kingdom Hall índa łaʼ nihá álnéehgo elder łaʼ áníigo éí ahastiin dóó eʼasdzą́ą́ nílı̨́įgo nihíká ahiʼnilchéeh doo. Éí naaki damóo azlı̨́įʼjįʼ nighangi bá hwiidííłʼaałgoósh tʼáá bíighah shiłní. Jiihóvah éí Zárefath yikʼihasdliʼ yę́ęgi bénáshniiʼ.” (1 Ki. 17:​12-16) Edit éí tʼáá áko bíighah jidííniid. Éísh hakʼihasdliʼ? Éí ájíní: “Naaki damóo azlı̨́ı̨́ʼ áádóó naaki nídeezid. Éí ayóó átʼéego ałkʼis dasiidlı̨́ı̨́ʼ.” Edit ałdóʼ habrothers dóó hasisters ayóó átʼéego hakʼis daazlı̨́ı̨́ʼ. Kʼad éí pioneer jílı̨́, áádóó bił nidahojilneʼígíí haghandi nídaakahgo bee hááʼdooyįhii bił nídajidı̨́ı̨́h. Edit ání: “Shił hadleeʼgo  ayóó yee shił hóshǫ́! Áádóó nátʼą́ą́ʼ aa ná iideeł.”—Heb. 13:​1, 2.

17. Luke dóó bichʼooní haʼátʼíí yee ádaa ákoniidzı̨́ı̨́ʼ?

¹⁷ Tʼáá shı̨́ı̨́ íídą́ą́ʼ ayóó nihił hadleeʼ, ndi tʼáásh yédígo nihił nááhadleeʼ doogo átʼé? Luke dóó bichʼooní ayóó bił hadleeʼ. Éí hazhéʼé dóó hamá, hakʼéí, ahánígo dahakʼis, índa circuit overseer dóó bichʼooní tʼéiyá haghangi haa nákahgo ájósin. Ákondi Luke ájíní: “Ahánígo bił ahééhoniilzinígíí tʼéiyá bichʼįʼ nihił hadleeʼ lágo baa ákoniidzı̨́ı̨́ʼ.” Luke dóó hachʼooní éí hoł hadleeʼgi haitʼéego hashtʼejiilaa?

18. Luke dóó bichʼooní éí haitʼéego bił hadleeʼ silı̨́ı̨́ʼ?

¹⁸ Luke dóó bichʼooní éí Jesus haadzííʼ yę́ę baa nitsíjíkeesgo bitsʼą́ą́dóó íhojiiłʼą́ą́ʼ. Éí Jesus ání: “Ayóóʼádanihóʼníinii tʼéí ayóóʼádeínóhʼníigo, haʼátʼíísh bikʼé nihaa doolyééł?” (Matt. 5:​45-47) Jiihóvah tʼáá ałtsoní yichʼįʼ bił hadleeʼii beʼjíłʼı̨́į dooleełgo baa ákozniizı̨́ı̨́ʼ. Áko habrothers dóó hasisters tʼah doo bichʼįʼ hoł hadleeʼ daaígíí haa nídaakahgo ájiilaa. Luke ájíní: “Kʼad éí tʼáá áníiltso ahídaniidlı̨́įgo ahínéiikah. Nihił dahózhǫ́ǫgo ahee daniildzil.”

19. Jesus bídahoołʼaahii daniidlı̨́į dooleełgo haitʼéego ííshjání ádaʼdiilnííł? Áádóó haʼátʼíí ádadiiʼnííł?

¹⁹ Haleebee ayóóʼóʼóʼníigo éí kʼé níʼjoołeeł, aheełtʼéego aa nitsáhákees, índa ił hadleeʼgo áʼósingo átʼéegi baa ídahwiilʼą́ą́ʼ. Hazhóʼó aa nitsíikeesgo nihibrothers dóó nihisisters haleebee ayóóʼádeíníiʼníi doo. Kódeiitʼı̨́įgo éí nihił dahózhǫ́ áádóó Jesus bídahoołʼaahii daniidlı̨́įgo bee ííshjání ádaʼiilʼı̨́.—John 13:​17, 35.