1. Која јасно заповед денѓа о Исус пле учениконге? (Дикх и слика тари насловно страна.)

И РАТ англедер те мерел, о Исус денѓа јекх јасно заповед пле учениконге. Ов вакерѓа ленге: „Сар ме со мангљум тумен, аѓаар тумен да манген тумен јекх јекхеа“. А пало адава вакерѓа: „Таро адава сарине ка џанен кај сиен мле ученикија, ако иси тумен мангипе машкар туменде“ (Јован 13:34, 35).

2. Соске тано важно те сикава мангипе јекх јекхеске?

² О Исус вакерѓа пле учениконге кај, ако мангена пе јекх јекхеа аѓаар сар ов со мангља лен, о јавера ка шај јасно те дикхен кај ола тане лескере чачутне следбеникија. Асавко мангипе ваљани сине те овел и главно бути пали која со ка овен пенџарде о чачутне христијања хем ко прво веко хем авдиве. Адалеске бут тано важно те сикава мангипе, чак кеда адава нане локхо!

3. Со ка дикха ки акаја статија?

³ Адалеске со сием несовршена, понекогаш тано пхаро те сикава искрено мангипе. Ама, мора те трудина амен те ова сар о Христос. Ки акаја статија ка дикха сар о мангипе поможинела аменге те ова ко мир е јаверенцар, те на ова пристрасна хем те ова гостопримлива. Џикоте проучинеа акаја статија, пуч тут: „Со шај те сикљовав таро пхраља хем таро пхења кола со на чхинавѓе те сикавен мангипе чак кеда адава на сине ленге локхо?“

4. Спрема Матеј 5:23, 24, соске ваљани те смирина амен несаве пхралеа со иси ле нешто против аменде?

⁴ О Исус сикавѓа амен кобор тано важно те смирина амен несаве пхралеа со иси ле нешто против аменде. (Читин Матеј 5:23, 24.) Ов истакнинѓа кај ваљани те ова ко шукар односија е јаверенцар ако мангаја те угодина е Јеховаске. О Јехова тано бахтало кеда даја амендар са те шај те ова ко мир амаре пхраленцар. Ов нане те прифатинел и служба со кераја баши лесте ако икераја холи хем ако на кераја ништо те шај те смирина амен ленцар (1. Јов. 4:20).

5. Соске јекхе пхралеске сине пхаро те смиринел пе јавере пхралеа?

⁵ Понекогаш тано пхаро те смирина амен некасаја. Соске? Размислин башо адава со случинѓа пе јекхе пхралеске со викинела пе Марк. * Ов сине бут повредимо таро јекх пхрал кова со критикујнѓа ле англо јавера хем вакерѓа лошна буќа баши лесте. Сар реагиринѓа о Марк? Ов вакерела: „Нашти сине више те издржинав хем викинѓум леске“. Ама, пало адава сине леске жал со постапинѓа аѓаар, хем пробинѓа те извининел пе леске хем те смиринел пе леа. О пхрал на мангела сине те смиринел пе леа. Ко почеток, о Марк вакерѓа песке: „Соске ме упорно те трудинав ма кеда јасно тано кај ов на мангела те смирина амен?“ Ама, о покраинско надгледнико поттикнинѓа ле те на откажинел пе. Со керѓа о Марк?

6. а) Со керѓа о Марк те шај те смиринел пе е пхралеа? б) Сар о Марк применинѓа о начело таро Колошаните 3:13, 14?

⁶ Кеда о Марк размислинѓа башо пло стави, дикхља кај нане доволно понизно хем мислинела сине кај тано пошукар таро јавера. Халило кај мора те менинел пло стави (Кол. 3:8, 9, 12). Ов палем гело ко пхрал хем понизно извининѓа пе леске башо адава сар постапинѓа леа. Исто аѓаар, пишинѓа леске писмија коте со вакерѓа кај бут леске  жал хем кај мангела палем те овен амала. Чак некобор пути денѓа ле тикне поклонија. Ама, о пхрал на мангља те простинел леске хем понадари да сине леске хољамо. Сепак, о Марк понадари да сине послушно ки заповед е Исусескири — те мангел пле пхрале хем те простинел леске. (Читин Колошаните 3:13, 14.) Чак ако о јавера на реагиринена позитивно кеда трудинаја амен те смирина амен ленцар, о чачутно христијанско мангипе ка поможинел амен секогаш те простина хем те молина амен те ова палем ко мир ленцар (Мат. 18:21, 22; Гал. 6:9).

7. а) Ко со поттикнинѓа амен о Исус? б) Ки сави ситуација аракхлили јекх пхен?

⁷ О Исус поттикнинѓа амен те понашина амен е јаверенцар аѓаар сар со мангаја ола те понашинен пе аменцар. Освен адава, ов пхенѓа кај нане доволно те манга само околен со мангена амен (Лука 6:31-33). На пример, со ако некој ко собрание избегинела тут хем на мангела те поздравинел пе туја? Акава случинѓа пе е Лараке. Ој објаснинела: „Јекх пхен игнориринела ман сине, а ни на сине манге јасно соске. Адава нервиринела ман сине хем на џала пе сине манге ко состанок“. Ко почеток, и Лара мислинела сине песке: „О проблеми нане ки манде. Јавера да ко собрание дикхена кај понашинела пе хари чудно“.

8. Со керѓа и Лара те шај те овел ко мир е пхењаја, хем со сикљоваја таро адава со случинѓа пе лаке?

⁸ И Лара керѓа нешто те шај те овел ко мир е пхењаја. Ој молинѓа пе е Јеховаске хем одлучинѓа те керел лаја лафи. Откеда керѓе лафи башо проблеми, гушинѓе пе хем смиринѓе пе. Дикхјола сине кај са тано шукар. И Лара вакерела: „Ама, пало несаво време и пхен палем почминѓа те понашинел пе манцар исто сар англедер. Сиум сине бут разочарими“. Ко почеток, и Лара мислинела сине кај ка овел бахтали само ако и пхен менинела пло стави. Ама, ко крајо халили кај, са со шај те керел тано понадари да те мангел ла хем те простинел лаке (Еф. 4:32—5:2). Ој сетинѓа пе ко лафија е Павлескере кова со вакерѓа кај о мангипе „на памтинела о лошнипе“ хем кај „са учхарела, са верујнела,  ко са надинела пе, са трпинела“ (1. Кор. 13:5, 7). Акава поможинѓа е Лараке те на секиринел пе више башо проблеми. Сар со накхела сине о време, и пхен почминѓа пошукар те понашинел пе лаја. Ако трудинеа тут те ове ко мир тле пхраленцар хем пхењенцар, хем ако понадари да мангеа лен ов уверимо кај „о Девел сој пхердо мангипаја хем со дела мир“ ка овел туја (2. Кор. 13:11).

9. Спрема Дела 10:34, 35, соске на ваљани те ова пристрасна?

⁹ О Јехова нане пристрасно. (Читин Дела 10:34, 35.) Кеда на сием пристрасна, џаја пало лескоро пример сар лескере чхаве. Шунаја и заповед те манга амаре пашутне сар аменде, хем поможинаја ки амари духовно фамилија понадари да те овел мир (Рим. 12:9, 10; Јак. 2:8, 9).

10-11. Сар јекх пхен успејнѓа те накхавел о негативна чувствија?

¹⁰ Несавенге шај тано пхаро те на овен пристрасна. На пример, те дикха со случинѓа пе јекхе пхењаке со викинела пе Рут. Кеда сине тинејџерка, сине ла лошно искуство некасаја со сине тари јавер пхув. Сар влијајнѓа адава упри лате? И Рут вакерела: „Мрзинава сине са сој поврзимо адале пхувјаја. Мислинѓум кај сарине сој тари адаја пхув тане иста, чак о пхраља хем о пхења“. Сар успејнѓа и Рут те икљовел ко крајо е негативна чувствонцар?

¹¹ Ој халили кај ваљани те боринел пе те на размислинел више аѓаар. Почминѓа те читинел искуствија хем извештаија баши адаја пхув таро Годишнико. И Рут вакерела: „Трудинава ман сине те размислинав позитивно башо мануша тари адаја пхув. Почминѓум те приметинав кај о пхраља хем о пхења адатхар ревно служинена е Јеховаске. Халиљум кај ола да тане дело таро амаро пхралипе сој ко цело свето“. Пало несаво време и Рут халили кај ваљани те сикавел повише мангипе. Ој објаснинела: „Кеда аракхава сине пхрален хем пхењен тари адаја пхув, посебно трудинава ман сине те овав ленцар љубезно. Керава сине ленцар лафи хем аѓаар запознајнава лен сине пошукар“. Саво сине о резултати? И Рут вакерела: „Сар со накхела сине о време, успејнѓум те накхавав о негативна чувствија“.

12. Саво проблеми сине е Сара?

¹² Несаве шај те овен пристрасна бизо те овен свесна башо адава. На пример, и Сара мислинела сине кај нане пристрасно адалеске со на керела сине разлика тари сави раса тане о мануша, сави тани ленгири финансиско состојба или кобор одговорностија иси лен ки е Девлескири организација. Ама, ој вакерела: „Халиљум кај сепак сиум сине пристрасно“. Ко саво начин? И Сара авела сине тари фамилија коте со повише лендар сине лен бари школа, хем мангела сине те дружинел пе манушенцар колен со исто аѓаар сине лен бари школа. Ки јекх прилика, чак вакерѓа јекхе амалеске: „Обично дружинава ман само пхраленцар хем пхењенцар со иси лен бари школа“. Јасно сине кај и Сара ваљани те менинел пло стави. Со керѓа?

13. Сар менинѓа и Сара пло стави, хем со сикљоваја таро адава?

¹³ Јекх покраинско надгледнико поможинѓа е Сараке те испитинел пло стави. Ој вакерела: „Фалинѓа ман баши мли верно служба, башо шуже коментарија хем башо адава кај шукар пенџарава и Библија. А пало адава објаснинѓа кај, освен сој тано шукар те овел амен пенџарибе, ваљани исто аѓаар те развина о христијанска особине, сар сој и понизност, и скромност хем и милост“. И Сара сериозно халили лескере лафија. Ој објаснинела: „Халиљум кај најважно таро са тано те  ова шукар хем те манга е јаверен“. Акава поможинѓа лаке те дикхел појавер ко пхраља хем ко пхења. Исто аѓаар вакерѓа: „Трудинѓум ман те дикхав о шуже особине кола со о Јехова ценинела лен ки ленде“. Со сикљоваја таро акава? Никогаш те на мислина кај сием пошукар таро јавера само адалеске со шај иси амен побари школа! Ако искрено мангаја е пхрален, нане те ова пристрасна (1. Пет. 2:17).

14. Спрема Евреите 13:16, сар осетинела пе о Јехова кеда сикаваја гостопримливост?

¹⁴ О Јехова бут ценинела кеда сикаваја гостопримство. (Читин Евреите 13:16.) Ов аџикерела амендар сар лескере слуге те сикава гостопримство, посебно спрема адала сој тане чороле (Јак. 1:27; 2:14-17). Адалеске, ко пло Лафи, поттикнинела амен те ова гостопримлива (Рим. 12:13). Кеда сикаваја гостопримливост, о јавера шај те дикхен кај чаче грижинаја амен ленге, мангаја лен хем мангаја те овен амаре амала. О Јехова тано бахтало кеда спремно делинаја е јаверенцар, бизи разлика дали ка викина лен ки кафа, ко ручко, или ка накхава време ленцар (1. Пет. 4:8-10). Ама, несаве буќа шај те керен аменге пхаро те ова гостопримлива.

15-16. а) Соске несавенге нане локхо те сикавен гостопримство? б) Со поможинѓа е Едитаке те овел гостопримливо?

¹⁵ Јекх бути со шај те чхинавел амен те сикава гостопримливост тане амаре околностија или амаре навике со сине амен англедер. Те дикха о пример јекхе удовицакоро со викинела пе Едит. Англедер те овел е Јеховаскоро сведоко, ој на мангела сине те овел бут ко контакт е јавере манушенцар, хем адалеске на канинела сине гостија.

¹⁶ Ама, откеда ули Сведоко, и Едит почминѓа те размислинел појавер хем одлучинѓа те керел нешто башо адава. Ој вакерела: „Кеда градинела пе сине амари дворана, јекх старешина вакерѓа манге кај ка авел јекх брачно пари со ка поможинел ко градибе, хем пучља ман дали шај те ачховен ки манде дуј курке. Сетинѓум ман сар о Јехова денѓа берекети е  удовицаке тари Сарепта“ (1. Цар. 17:12-16). И Едит вакерѓа кај шај те ачховен ки лате. Дали о Јехова денѓа ла берекети? Ој објаснинела: „Наместо дуј курке, ачхиле дуј масек. Џикоте сине ки манде, улем бут паше амала“. Панда јекх берекети сине лаке адава со акана иси ла паше амала хем ко собрание. Акана служинела сар пионери хем уживинела те канинел адален коленцар со џала ки служба те авен ки лате ко гости. Ој вакерела: „Бут сиум бахтали кеда дава е јаверенге! Хем адалеске добинава бут повише берекетија“ (Евр. 13:1, 2).

17. Со халиле о Лука хем лескири ромни?

¹⁷ Иако шај сикаваја више гостопримливост, шај ли те кера адава панда ки побари мера? На пример, о Лука хем лескири ромни тане бут гостопримлива. Ола секогаш канинена сине ки песте пумаре родителен, фамилија, паше амален, исто е покраинско надгледнико хем лескере ромња. Ама, о Лука вакерела: „Халилем кај канинаја само околен касаја со сием паше“. Со керѓе те шај те овен панда погостопримлива?

18. Со керѓе о Лука хем лескири ромни те шај ки побари мера те сикавен гостопримливост?

¹⁸ О Лука хем лескири ромни халиле со чаче значинела те овел пе гостопримливо кеда размислинѓе башо е Исусескере лафија: „Ако мангена адален со мангена тумен, сави награда аџикерена?“ (Мат. 5:45-47). Ола халиле кај ваљани те џан пало е Јеховаскоро пример, кова сој дарежливо спрема сариненде. Адалеске чхивѓе песке цел те канинен пхрален хем пхењен кола со англедер на сине ленде ко гости. О Лука вакерела: „Бут уживинаја ко асавке прилике. Сарине осетинаја амен охрабриме хем духовно зајакниме“.

19. Сар ка сикава кај сием е Исусескере ученикија, хем со сиан одлучно те кере?

¹⁹ Дикхлем сар о искрено мангипе шај те поможинел аменге те ова ко мир е јаверенцар, те на ова пристрасна хем те ова гостопримлива. Мора те борина амен секоле негативно чувствоја, хем те манга амаре пхрален хем пхењен хор таро вило. Ако кераја адава, ка ова бахтале хем ка сикава кај чаче сием е Исусескере ученикија (Јован 13:17, 35).