1. Саво особо законо о Иисусо дя пэстирэ учениконэнди? (Диқэн и картинка пэ обложка.)

ВЭЧЭРОСА англа кода, сар о Иисусо тэ мэрэл, во дя пэстирэ учениконэнди особо законо. Во ԥэндя лэнди: «Сар мэ любисарав тумэн, кадя и тумэ любин ек еқэс». И инке ԥэндя: «И кала машкар тумэндэ исин любовь, всаворэ ӷатярэна, кай тумэ мэрнэ ученикоря» (Иоанна 13:34, 35).

2. Васо трэбуй тэ любисарас ек еқэс?

² О Иисусо ԥэндя, кай лэстирэ чачунэ учениконэн, авэла вушэро тэ ӷатярэн па кода, кай вонэ авэна тэ любин кадя жэ, сар во любияс. Када дицолас андэ пэрво вико и када дицол акана. Важ када трэбуй тэ виритярас любо ԥаримос и тэ любисарас ек еқэс!

3. Пала со амэ подаса дума андэ кадэя статья?

³ Важ кода кай амэ найсовершэни, амэнди ԥарэс анда вся оди тэ любисарас ек еқэс. И всаек амэнди трэбуй тэ сытювас кай о Иисусо. Анда кадэя статья амэ уӷанаса, сар и любовь поможыя тэ терас, кай тэ авэл мирно, тэ на гиндосарас пала авэр вэрыто и анда оди тэ прилас аврэн пэстэ цэрэ. Кала ласа тэ адиносарас кадэя статья, пуш пэстар: «Сости мэ моӷу тэ сытював лэ ԥралэндар и лэ ԥэяндар, савэ на парашэлэ тэ любин аврэн, хоть када сас ԥарэс?»

4. Васо, сар пистромэ андэ Матфея 5:23, 24, амэнди трэбуй тэ поладисарас лэ ԥралэса, саво холинако пар мэндэ?

⁴ О Иисусо сытярэлас, кай трэбуй тэ ладисарас кодэлэ ԥралэса,  савэстэ пар мэндэ холи. (Адиносар Матфея 5:23, 24 *.) Во ԥэндя, кай если амэ камас, кай о Дэл тэ авэл лошало, тоди, амэнди трэбуй тэ на парашас драго тэ полас ек еқэс. О Иегова фартэ радуийпэ, кала амэ терас вся, кай тэ поладисарас лэ ԥралэнца и лэ ԥэянца. Если амэ ритярас и холи и на камас хоть варисо тэ стерас, кай тэ поладисарас лэ манушэса, амари служэния лэ Иеговасти авэла евья (1 Иоанна 4:20).

5. Васо лэ Маркости сас ԥарэс тэ помирийпэ лэ ԥралэса?

⁵ Тэ помириспэ лэ ԥралэса можэт тэ авэл найвушэро. Васо? Уӷанам, со сас лэ Маркоса *. Во холяйля, кала ек ԥрал ворта ԥэндя, со лэсти на чалёл андо Марко. Инке, кадэва ԥрал найдраго дя дума пала думэ важ лэстэ лэ ԥралэнца и лэ ԥэянца. Со стердя о Марко? Во росԥэнэн: «Мэ холяйлэм и вижылэм андар пэстэ». Но май интя, во поля, кай найдраго тердя. О Марко мангля, кай о ԥрал тэ простий лэс, кай тэ помирийпэ лэса. Но кодэва ԥрал на простисардя. Спэрва о Марко погиндосардя: «Если во на камэл тэ помирийпэ, тоди васо мэ трэбуй тэ старысавав тэ поладисарав лэса?» Ай о раёно надзирателё ԥэндя лэ Маркости, кай во всаек тэ старыийпэ варисо тэ терэл, кай тэ помирийпэ лэ ԥралэса. Со стердя о Марко?

6. а) Со терэлас о Марко, кай тэ помирийпэ? б) Сар о Марко тердя кадя, сар пистромэ андэ Колоссянам 3:13, 14?

⁶ О Марко стодя зор, кай тэ полэл корко пэс и поля, кай во идоси гиндой, кай во май лашо аврэндар. Во поля, кай лэсти трэбуй тэ парувэл о гиндо пала авэр мануша (Колоссянам 3:8, 9, 12). О Марко инке еқвар пашэля каринг кодэва ԥрал и мангля, кай во лэс тэ простий. Кадяжэ во пистросардя лэсти най ек письмо, андэ савэ росԥэндя, кай лэсти найдраго кодэлэстар, сар во пэс андярдя и мангля лэс вся тэ забистрэл. О Марко най еқвар дарияс  лэ ԥралэсти подаркоря, савэ, сар во гиндояс, лэсти чалёна. Но лэ ԥралэстар кадя и на отжыля и во лэс на простисардя. Но всаек о Марко на парашэлас тэ ритярэл лэ Иисусоско законо, кай тэ любий и тэ простий пэстирэ ԥралэс. (Адиносар Колоссянам 3:13, 14 *.) Можэт кацаво тэ авэл и тумэнца, кай о ԥрал на закамэла тэ мирийпэ тумэнца. Но важ кода кай тумэ па чачимастэ любин, сар христианоря, тумэ на парашэна тэ простин и тэ мангэнпэ пала кода, кай тэ поладин (Матфея 18:21, 22; Галатам 6:9).

7. а) Со о Иисусо ԥэндя амэнди тэ терас? б) Со сас ла Жаннаса?

⁷ О Иисусо ԥэнэнас, кай амэ тэ андярас пэс аврэнца кадя, сар амэ камас, кай вонэ тэ обжанпэ амэнца. Инке во ԥэндя, кай амэ на трэбуй тэ любисарас кати кодэлэн, ко амэн любий (Луки 6:31—33). Со тумэ терэна, если варико анда собрания парашэла тумэнца тэ доровкыийпэ? Канешно, кацаво терэлпэ най часто, но кадя сас ла Жаннаса. Вой росԥэнэн: «Ек ԥэй парашэля манца тэ доровкыийпэ, и мэ нисар на полавас васо. Када сас кадя найдраго. Сар ававас пэ собрании, мэ будэр на лошававас». И Жанна погиндосардя: «Мэ нисо на стердэм лати вэрыто. И авэр анда собрания кадяжэ диқэн, кай вой най кацави, сар всаворэ».

8. Сар и Жанна старыияспэ тэ поладий ла ԥэяса, и состар амэ латар сытювас?

⁸ Кай тэ поладий, и Жанна мангляпэ лэ Иеговасти и закамля тэ подэл дума ла ԥэяса. Вонэ пала вся подинэ дума, облинэпэ и, здэласпэ, кай и холи ужэ нинай. Но и Жанна росԥэнэн: «Прожыля дэсави время и вся рисайля. Мандэ умэклэпэ и вас». Спэрва и Жанна гиндояс, кай вой на улэлапэ, пока и ԥэй на парудёлапэ. Прожыля время и вой поля, кай май фэдэр авэла, если вой на парашэла тэ любий кадэла ԥэя и на парашэла анда вся оди ла тэ простий (Эфесянам 4:32—5:2). И Жанна сэрэлас, кай и чачуни христианско любовь «на адиной, скативар холярдэ», вой «вся виритярэл,  всаворэсти патял, пэ вся надеийпэ, вся састэс пэрэандярэл» (1 Коринфянам 13:5, 7). Када поможысардя, кай латэ тэ авэл драго по ди. Прожыля время, и кодэя ԥэй ля тэ андярэл пэс ла Жаннаса май драго. Если тумэ старыинпэ тэ поладин лэ ԥралэнца и лэ ԥэянца и на парашэн лэн тэ любин, тоди можэте тэ патян, кай «о Дэл, саво дэл любовь и миро, авэла тумэнца» (2 Коринфянам 13:11).

9. Васо, сар пистромэ андэ Деяния 10:34, 35, амэнди на трэбуй тэ гиндосарас ни пала кастэ вэрыто?

⁹ О Иегова на гиндой ни пала кастэ вэрыто. (Адиносар Деяния 10:34, 35 *.) Если амэ кадяжэ на гиндосарас вэрыто, тоди амэ сыкавас, кай амэ лэстирэ бэяцэ. Амэ терас па законо тэ любисарас манушэн, сар корко пэс и терас, кай тэ авэл мирно андэ амаро ери, савэса патяс андо ек Дэл (Римлянам 12:9, 10; Иакова 2:8, 9).

10, 11. Сар и Рита уля пэстирэ найлашэ гиндоря?

¹⁰ Дэкасти ԥарэс тэ на гиндон пала авэр вэрыто. Акэ со сас ла ԥэяса, савя ақарэн Рита. Кала вой сас тэрнёры, латирэ ереса найдраго обжыляпэ ек манушни анда авэр страна. Сар и Рита ля пэс тэ андярэл? Вой росԥэнэн: «Мэ вэрыцысардэм вся, со сас андэ кодэя страна. Мэ гиндосаравас, кай всаворэ, ко котэ жувэнас, дажэ и ԥрала и ԥэя, кацавэ жэ, сар кодэя манушни». Со поможысардя ла Ритати тэ на вэрыцый аврэн?

¹¹ И Рита поля, кай трэбуй варисо тэ парувэл. Вой ля тэ адиной андо «Ежегоднико», сар служынас андэ кодэя страна, савэ лэндэ отчоторя и со сас лэ ԥралэнца и лэ ԥэянца, савэ котэ служынас. И Рита росԥэнэн: «Манди прижыляпэ тэ став бут зор, кай драго тэ гиндосарав пала мануша, савэ жувэнас котэ. Мэ лэм тэ шав сама, кай и ԥрала и ԥэя служын лэ Иеговасти котэ анда вся оди. Мэ полэм, кай амэ лэнца ек ери, саво патял андо ек Дэл». Прожыля время и Рита поля, кай лати трэбуй инке варисо тэ терэл, кай тэ сыкавэл пэстири любовь. Вой ԥэнэн: «Кажно разо, кала мэ диқавас лэ ԥралэн и лэ ԥэян анда кодэя страна, мэ теравас вся, кай тэ андярав пэс лэнца драго. Мэ екжэни задавас дума лэнца и старысававас май драго лэн тэ уӷанав». Со анда када вижыля? Вой ԥэнэн: «Прожыля время, и мэ будэр на гиндосаравас найдраго пала кодэла мануша».

12. Со пала пэстэ поля и Сара?

¹² Дэко дажэ на дополэл, кай лэндэ исин найлашэ гиндоря пала авэр. Ек ԥэй, савя ақарэнас Сара, гиндояс, кай латэ нинай найлашо гиндо пала мануша. Вой на шолас сама пэ кода, катар о мануш, скати лэстэ ловэ и сави дила во терэл андэ собрания. Но и Сара ԥэнэн: «Мэ лэм тэ полав, кай па чачимастэ мандэ исин вэрыти гиндоря пала авэр». Со вой кадэлэса камэлас тэ ԥэнэн? Вой сас анда ери, саво фартэ ӷрамотно и вой дэлас дума кати кодэлэнца, кастэ сас кацави жэ бари образования. Еқварэс вой дажэ ԥэндя пэстирэ друӷости: «Мэ проандярав и время кодэлэ ԥралэнца и ԥэянца, савэндэ бари образования, ай аврэн дажэ на шав сама». Ла Сарати трэбуй сас тэ парудёл. Со вой стердя?

13. Сости амэн сытярэл кода, со сас ла Сараса?

¹³ О раёно надзирателё поможысардя ла Сарати тэ парувэл пэстирэ гиндоря пала ԥрала и ԥэя. Вой росԥэнэн: «Во похвалисардя ман, кай мэ на парашав тэ служысарав лэ Иеговасти, кай пэ собрании мэ дав лашэ атветоря и кай мэ драго ӷанав и Библия. Ай потом во ԥэндя, кай трэбуй най кати бут тэ ӷанав, но и тэ старысавав, кай мандэ тэ авэн лашэ качестворя. Када, кай тэ на гиндосарав, кай мэ май лащи аврэндар и тэ жалуисарав аврэн анда вся оди». И Сара кангля, со лати ԥэндя о раёно надзирателё. Вой ԥэнэн: «Мэ полэм, кай со май важно,  тэ любисарав и тэ терав лашимос аврэнди». Вой ля па аврятэ тэ андярэл пэс лэ ԥралэнца и лэ ԥэянца. Вой ԥэнэн: «Мэ старысававас тэ полав, савэ качестворя андэр лэндэ цэний о Иегова». Ай со можно тэ ԥэнас пала амэндэ? Амэнди нащи тэ гиндосарас, кай кала амэндэ бари образования, тоди амэ май лашэ аврэндар! Сар амэ па чачимастэ любисарас всаворэн амарэ ԥралэн и лэ ԥэян, тоди амэ ласа тэ улас и вэрыти гиндоря пала лэндэ (1 Петра 2:17).

14. Со, сар пистромэ андэ Евреям 13:16, андо ди кай о Иегова, кала амэ шас сама аврэн?

¹⁴ О Иегова фартэ лошавэл, кала амэ анда вся оди шас сама лэ манушэн. (Адиносар Евреям 13:16 *.) Важ о Иегова када кадяжэ, сар тэ тэлювас лэсти. Но май фартэ во лошавэл, кала шас сама кодэлэн, касти када фартэ трэбуй (Иакова 1:27; 2:14—17). Важ када андэ Библия пистромэ: «Шон сама анда оди аврэн» (Римлянам 12:13). Кацаво мануш шол сама аврэн, любий и заботийпэ пала лэндэ. Лэ Иеговасти чалёл, кала амэ стас тэ хан, тэ пэн и проандярас лэ манушэнца время (1 Петра 4:8—10). Но най всаворэнди вушэро кадя тэ терэн.

15, 16. а) Васо дэко дарал тэ ақарэл пэстэ цэрэ? б) Со поможысардя ла Лалати май часто тэ ақарэл пэстэ цэрэ?

¹⁵ Дэсавэ даран тэ ақарэн каринг пэстэ цэрэ. Ек ԥивли, савя ақарэн Лала, росԥэнэн, кай, сар тэ ашэл лэ Иеговаско свидетелё, вой терэлас вся, кай май набут када тэ терэл. И Лала гиндояс, кай лати на трэбуй тэ ақарэл пэстэ цэрэ.

¹⁶ Сар и Лала ашэля лэ Иеговаско свидетелё, вой закамля тэ ақарэл лэ мирос пэстэ цэрэ. Акэ со вой росԥэнэн: «Амэндэ линэ тэ строин о Зало Царства, и о старейшына ԥэндя манди, кай ек ери авэла тэ поможын. Во пушля, можэт чи най кадэва ери тэ пожувэл мандэ дуй курте. Мэ сгиндосардэм, сар о Иегова блаӷословисардя ла ԥивля жувля анда Сарепта, и соӷласисайлэм» (1 Царей 17:12—16). На обгиндосайля  и Лала? Вой росԥэнэн: «Дуй курте пэрэжылэ андэ дуй шона. Важ и кадэя время, амэ лям тэ дружысарас». Ай инке латэ ашэлэ бут друӷоря андэ собрания. Акана и Лала служый пианероса, и лати чалёл тэ ақарэл пэстэ цэрэ, кай тэ хал кодэлэнца, каса служый. Вой ԥэнэн: «Мэ полэм пар пэстэ, кала терэс аврэнди лашимос, тути рияпэ май бут!» (Евреям 13:1, 2).

17. Со поля о Ландышо и лэстири хулаи?

¹⁷ Тумэ любин тэ ақарэн лэ манушэн пэстэ цэрэ. Но сар тумэ можэте инке май фартэ тэ шон сама лэ манушэн? Акэ со росԥэнэн о Ландышо и лэстири хулаи. Вонэ часто ақарэнас пэстэ цэрэ лэ родителёнэн, лэ родэс, лэ лашэ друӷонэн и лэ раёнонэ надзирателёс ла хулаяса. Но о Ландышо ԥэнэн: «Амэ полям, кай ақарас кати кодэлэн, кас драго ӷанас». Со стердэ о Ландышо и лэстири хулаи, кай май фартэ тэ шон сама аврэн?

18. Со поможысардя лэ Ландышости и лэстири хулаяти инке май фартэ тэ шон сама аврэн?

¹⁸ Вся паруделяпэ, кала о Ландышо и лэстири хулаи погиндосардэ пала лэ Иисусостирэ алава: «Кала тумэ любин кати кодэлэн, ко любий тумэн, саво тумэнди кадэлэстар лашимос?» (Матфея 5:45—47). Вонэ полинэ, кай вонэ трэбуй тэ сытён кай о Иегова, ай во анда вся оди шол сама всаворэн манушэн. Важ када о Ландышо ла хулаяса закамлэ тэ ақарэн пэстэ цэрэ лэ ԥралэн и лэ ԥэян, савэ инке на сас лэндэ цэрэ. О Ландышо ԥэнэн: «Всаворэнди амэнди фартэ чалёл тэ стидаспэ еқэҭанэ, кай тэ хас и тэ пас. Кала всаворэ стидаспэ, када дэл зор и кадэлэстар ашэл драго по ди».

19. а) Сар тэ сыкавас, кай амэ лэ Иисусостирэ ученикоря? б) И со тумэ камэн тэ терэн?

¹⁹ Амэ дям дума, сар кода, кала фартэ любисарас ек еқэс, поможыя амэнди тэ терас, кай тэ авэл мирно. Кадяжэ поможый тэ на гиндосарас пала авэр вэрыто и анда вся оди тэ шас сама лэ манушэн. Амэ трэбуй тэ на домэкас, кай варисо тэ на дэл амэнди тэ любисарас амарэн ԥралэн и лэ ԥэян анда вся оди. Кала амэ кадя тераса, амэ аваса инке май бахталэ и сыкаваса, кай амэ па чачимастэ лэ Иисусостирэ ученикоря (Иоанна 13:17, 35).