1. Mulawo nzi uugaminide Jesu ngwaakapa basikwiiya bakwe? (Amubone cifwanikiso icili aacivwumbyo.)

BUSIKU bwakuti juunza ulafwa, Jesu wakapa basikwiiya bakwe mulawo uugaminide. Wakabaambila kuti: “Mbubonya mbondali kumuyanda, amuyandane mbubonya anywebo.” Mpoonya wakayungizya kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—Joh. 13:34, 35.

2. Nkaambo nzi ncociyandika kapati kuyandana?

² Jesu wakaamba kuti basikwiiya bakwe bakali kuyoozyibwa kabotu-kabotu ikuti naa batondezya luyando ndulonya ndwaakatondezya walo. Oobo mbocakabede mumwaanda wamyaka wakusaanguna alimwi mbocibede asunu. Nkakaambo kaako cilayandika kapati kuti katuyandana noliba leelyo nocikatazya kucita boobo!

3. Ncinzi ncotutiilange-lange mucibalo eeci?

³ Kutalondoka kupa kuti kacitukatazya kuyandana kuzwa ansi aamoyo. Nokuba boobo, tweelede kusolekesya kumwiiya Kristo. Mucibalo eeci, tulabandika kujatikizya luyando mbolutugwasya kubamba luumuno, kutasalulula alimwi akusamausya. Ciindi nomwiiya makani aaya, amulibuzye kuti: ‘Ncinzi ncondikonzya kwiiya kubakwesu abacizyi ibazumanana kutondezya luyando nokuba kuti kuli buyumuyumu?’

4. Kweelana alugwalo lwa Matayo 5:23, 24, nkaambo nzi ncotweelede kubamba luumuno amukwesu uujisi kaambo andiswe?

⁴ Jesu wakatuyiisya mbociyandika kapati kubamba luumuno amukwesu uujisi kaambo andiswe. (Amubale Matayo 5:23, 24.)  Wakakankaizya kuti tweelede kuzumanana kumvwana abantu ikuti katuyanda kumukkomanisya Leza. Jehova ulakkomana ciindi notusolekesya kubamba luumuno abakwesu. Takonzyi kubutambula bukombi bwesu ikuti naa twazumanana kuba amfwundilili alimwi akukaka nokuba kusoleka kubamba luumuno.—1Joh. 4:20.

5. Ino ncinzi cakapa kuti cimukatazye mukwesu Mark kubamba luumuno?

⁵ Cilakonzya kutukatazya kubamba luumuno. Nkaambo nzi? Amubone cakacitikila mukwesu Mark. * Cakamucisa kapati ciindi mukwesu umwi naakamutongooka akwaambila bamwi mumbungano makani mabi kujatikizya nguwe. Ino mukwesu Mark wakacita buti? Wakaamba kuti: “Ndakaalilwa kulijata alimwi ndakanyema.” Mpoonya mukwesu Mark wakaliyeeya kujatikizya ncaakacita alimwi wakasoleka kulilekelela kumukwesu ooyo akubamba luumuno anguwe. Pele mukwesu ooyo wakakaka kubamba luumuno. Mpoonya mukwesu Mark wakalibuzya kuti, ‘Ino nkaambo nzi ncondeelede kuliminya kuti naa walo katayandi kubamba luumuno?’ Nokuba boobo, mulangizi wabbazu wakamukulwaizya mukwesu Mark kutaleka kuyandaula luumuno. Ino mukwesu ooyu wakacita buti?

6. (a) Mbuti mukwesu Mark mbwaakazumanana kusoleka kubamba luumuno? (b) Ino mukwesu Mark wakalubelesya buti lugwalo lwa Bakolose 3:13, 14?

⁶ Ciindi mukwesu Mark naakalilingula, wakabona kuti tanaakali kulicesya alimwi wakajisi muuya wakulibona kululama. Wakabona kuti wakeelede kucinca bube bwakwe. (Kol. 3:8, 9, 12) Cakulicesya, wakamuunkila alimwi mukwesu ooyo akulilekelela kujatikizya ncaakacita. Kuyungizya waawo, mukwesu Mark wakamulembela magwalo mukwesu ooyo, kwaamba mbwaakauside kapati alimwi akumulomba ikuti naa inga batalika kumvwana alimwi. Mane buya mukwesu Mark wakapa mukwesu ooyo zipego zisyoonto-syoonto nzyaakabona kuti inga wazikkomanina. Cuusisya ncakuti, mukwesu  ooyo wakazumanana kuba amfwundiilili. Nokuba boobo, mukwesu Mark wakazumanana kumvwida mulawo wa Jesu wakuyanda munyina alimwi akulekelela. (Amubale Bakolose 3:13, 14.) Nokuba kuti bamwi balakukaka kusolekesya kwesu kwakuti tubambe luumuno, luyando lwa Banakristo bakasimpe luyootugwasya kuzumanana kulekelela alimwi akupaila kuti tube aluumuno ambabo alimwi.—Mt. 18:21, 22; Gal. 6:9.

7. (a) Ino ncinzi Jesu ncaakatulailila kucita? (b) Mbukkale nzi bukatazya mbwaakajisi mucizyi umwi?

⁷ Jesu wakatulailila kuzumanana kucitila bamwi zintu zibotu mbubonya mbotuyanda kuti abalo kabatucitila. Wakayungizya kuti, tatweelede kuyanda buyo baabo batuyanda. (Lk. 6:31-33) Nokuba kuti tacivwuli kucitika-citika, mbuti kuti umwi mumbungano kamutantamuka alimwi akutayanda kumwaanzya? Eeci ncecakamucitikila mucizyi Lara. Wakaamba kuti: “Mucizyi umwi tanaakali kundaanzya, alimwi kunyina nondakazyi ncaakali kucitila boobo. Ndakali kutyompwa kapati alimwi tiindakali kukkomana kuunka kumiswaangano.” Kumatalikilo, mucizyi Lara wakayeeya kuti: ‘Kunyina ncondaamulubizyila. Amana buya abamwi mumbungano balaamba kuti mucizyi uulya ulaapenzi.’

8. Ino ncinzi ncaakacita mucizyi Lara kutegwa abambe luumuno, alimwi ino twiiya nzi kulinguwe?

⁸ Mucizyi Lara wakabweza ntaamu kutegwa abambe luumuno. Wakapaila kuli Jehova alimwi wakasala kuti abandike amucizyi ooyo. Bakalibandika penzi, bakakumbatana akubamba luumuno. Zyoonse zyakalibonya mbuli kuti zyeenda kabotu. Mucizyi Lara wakati: “Mukuya kwaciindi, mucizyi ooyo wakatalika alimwi kucita mbubwenya mbwaakali kucita kusaanguna. Ndakatyompwa kapati.” Kumatalikilo, mucizyi Lara wakalimvwa kuti inga wakkomana lilikke buyo kuti mucizyi ooyo wacinca bukkale bwakwe. Mpoonya mucizyi Lara wakabona kuti nzila iyakali kukonzya kugwasya nkuzumanana kumweendelezya munzila yaluyando mucizyi ooyo alimwi ‘akumulekelela.’ (Ef. 4:32–5:2) Mucizyi Lara wakayeeya kuti luyando lwa Banakristo bakasimpe “talubikkilili. Lulajatila zintu zyoonse, lulasyoma zintu zyoonse,  lulalangila zintu zyoonse, lulaliyumya muzintu zyoonse.” (1Kor. 13:5, 7) Mucizyi Lara wakaba aluumuno lwamumizeezo alimwi. Kumbele bakatalika kumvwana kapati amucizyi ooyo. Ciindi nomubamba luumuno abakwesu alimwi abacizyi alimwi akuzumanana kubayanda, mulakonzya kuba masimpe kuti “Leza siluyando alimwi siluumuno unooli andinywe.”—2Kor. 13:11.

9. Kweelana alugwalo lwa Milimo 10:34, 35, nkaambo nzi ncotuteelede kusalulula?

⁹ Jehova tasalululi. (Amubale Milimo 10:34, 35.) Ciindi notutasalululi, tutondezya kuti tuli bana bakwe. Tulautobela mulawo wakuyanda basimukoboma alimwi tulazumanana kubamba luumuno amukwasyi wesu wakumuuya.—Rom. 12:9, 10; Jak. 2:8, 9.

10-11. Mbuti mucizyi Ruth mbwaakakuzunda kuyeeya kutali kabotu?

¹⁰ Kuzumanana kutasalulula tacili cuuba-uba kuli bamwi. Mucikozyanyo, amubone cakacitikila mucizyi Ruth. Naakacili mukubusi, tanaakali kumuyanda mukaintu umwi wakali kuzwa kucisi cimbi. Ino eeci cakamujatikizya buti? Mucizyi Ruth wakaamba kuti: “Kunyina ncondakali kuyanda kujatikizya cisi eeco mukaintu ooyo nkwaakali kuzwa. Ndakali kuyeeya kuti bantu boonse bazwa kucisi eeco bakali mbuli nguwe, kubikkilizya abakwesu alimwi abacizyi.” Ino mbuti mucizyi ooyu mbwaakalizunda penzi eeli?

¹¹ Mucizyi Ruth wakabona kuti wakeelede kubeleka canguzu kutegwa aleke kuyeeya munzila eeyi. Wakabala zyakuluula alimwi amalipooti kujatikizya cisi eeco kuzwa mu Bbuku Lyaamwaka. Wakaamba kuti: “Ndakasolekesya kutalika kuyeeya zintu zibotu kujatikizya cisi eeco. Ndakatalika kubona kuti bakwesu abacizyi balamuyanda Jehova. Ndakabona kuti abalo ncibeela cabunyina bwanyika yoonse.” Mukuya kwaciindi, mucizyi Ruth wakabona kuti wakeelede kutondezya luyando. Wakapandulula kuti: “Lyoonse ndaswaanganya bakwesu alimwi abacizyi bakucisi eeco, ndakali kusolekesya kuba acilongwe ambabo. Ndakali kubandika ambabo kutegwa ndibazyibe kabotu.” Ino ncinzi cakacitika? Mucizyi Ruth wakati: “Mukuya kwaciindi, ndakatalika kuzilanga kabotu zintu.”

12. Ino ndipenzi nzi ndyaakajisi mucizyi Sarah?

¹² Bamwi balakonzya kutalika kusalulula cakutazyiba. Mucikozyanyo, mucizyi Sarah wakali kuyeeya kuti tasalululi akaambo kakuti tanaakali kulanga mubala, lubono naa cuuno ncajisi muntu. Pele wakaamba kuti: “Ndakatalika kubona kuti mubwini ndakali kusalulula.” Munzila nzi? Mucizyi Sarah uzwa kumukwasyi nkobayiide kapati alimwi wakali kuyandisya kuyanzana buyo abantu bayiide. Cimwi ciindi wakaambila mulongwe wakwe kuti: “Ndiyanzana buyo abasyomima bayiide kapati. Tandiyanzani abaabo batayiide.” Masimpe, mucizyi ooyu wakali kuyandika kucinca mbwaakali kuyeeya. Munzila nzi?

13. Ncinzi ncotukonzya kwiiya kumucizyi Sarah kujatikizya mbwaakacinca bube bwakwe?

¹³ Mulangizi wabbazu wakamugwasya mucizyi Sarah kubulanga-langa bube bwakwe. Wakaamba kuti: “Mulangizi wabbazu wakandilumbaizya akaambo kukubeleka cakusyomeka, kupa bwiinguzi buyaka alimwi aluzyibo lwangu lwa Magwalo. Mpoonya wakapandulula kuti, mboluyaabuyungizyika luzyibo lwesu, tweelede kuba abube bwa Bunakristo mbuli kulicesya, kulibombya alimwi aluse.” Mucizyi ooyu wakazibelesya nzyaakamwaambila mulangizi wabbazu. Wakaamba kuti: “Ndakabona kuti iciyandika kapati nkuba aluse alimwi aluyando.” Aboobo wakacinca mbwaakali kubabona bakwesu abacizyi. Wakaamba kuti: “Ndakasolekesya kumvwisya bube ibubapa kuti bayandike kapati kuli Jehova.” Ino mbuti kujatikizya  ndiswe? Tatweelede kulimvwa kuti tulayandika kapati kwiinda bamwi akaambo kalwiiyo ndotujisi! Ikuti katujisi “luyando kuciinga coonse cabakwesu,” tuyookutantamuka kuba amuuya wakusalulula.—1Pet. 2:17.

14. Kweelana alugwalo lwa Bahebrayo 13:16, mbuti Jehova mbwalimvwa ciindi notusamausya bamwi?

¹⁴ Jehova ulakkomana kapati ciindi notutondezya muuya wakusamausya. (Amubale Bahebrayo 13:16.) Kusamausya ukubona kuba cibeela cabukombi bwesu, ikapati ciindi notugwasya ibabulide. (Jak. 1:27; 2:14-17) Aboobo Magwalo atukulwaizya kuba “acilengwa cakusamausya beenzu.” (Rom. 12:13) Ciindi notusamausya bantu, tutondezya kuti tulababikkila maano, tulabayanda alimwi tuyanda kuba balongwe babo. Jehova ulakkomana ciindi notwaabana cakulya abamwi, cakunywa naa notujana ciindi cakuyanzana ambabo. (1Pet. 4:8-10) Nokuba boobo, kulakonzya kuba zintu izikonzya kupa kuti citukatazye kusamausya bamwi.

15-16. (a) Nkaambo nzi bamwi ncobawaya-waya kutondezya muuya wakusamausya? (b) Mbuti ba Edit mbobakakuzunda kuwaya-waya kusamausya bamwi?

¹⁵ Tulakonzya kuwaya-waya kusamausya bamwi akaambo kambotwakakomena. Amubone cikozyanyo camukamufwu wazina lya Edit. Katanaba Kamboni, tanaakali kuvwula kusamausya bantu. Wakali kulimvwa kuti kuli bakali kweelela buya kusamausya bamwi ikutali nguwe.

¹⁶ Ciindi naakaba Kamboni, mukamufwu ooyu wakacinca mbwaakali kuyeeya. Wakabweza ntaamu izyakali kukonzya kumugwasya kuba amuuya wakusamausya. Wakaamba kuti: “Ciindi Ŋanda yesu ya Bwami mpya noyakali kuyakwa, mwaalu umwi wakandaambila kujatikizya banabukwetene ibakali kuboola kuzoogwasyilizya mayake, mpoonya wakandilomba naa ndakali kukonzya kwaaba busena bwakuti banabukwetene aaba kaboona kwansondo zyobilo. Ndakayeeya Jehova mbwaakamulongezya mukamufwu waku Zarefati.” (1Bam. 17:12-16) Ba Edit bakazumina kubatambula banabukwetene. Sena bakalongezyegwa? Bakapandulula  kuti: “Tiibakakkala buyo nsondo zyobilo andime, pele bakakkala myezi yobilo. Aciindi eeci, twakaba balongwe.” Ba Edit alimwi bakalongezyegwa kuba abalongwe mumbungano. Ba Edit lino mbaapainiya alimwi balakkomana kuunka kuŋanda yabo abaabo mbobabeleka limwi mumulimo wamumuunda kutegwa bakalitontozye amoyo. Bakaamba kuti: “Kupa kulandikkomanisya kapati! Alimwi masimpe ngakuti ndajana zilongezyo zinji akaambo kakucita boobo.”—Heb. 13:1, 2.

17. Ino mukwesu Luke alimwi amukaintu wakwe bakabona nzi?

¹⁷ Ambweni tulatondezya kale muuya wakusamausya, pele sena tulakonzya kuyaambele? Mucikozyanyo, mukwesu Luke abakaintu bakwe balatondezya muuya wakusamausya. Bakali kutamba buyo bazyali babo, bacibbululu, balongwe babo alimwi amulangizi wabbazu amukaintu wakwe. Aboobo mukwesu Luke wakaamba kuti: “Twakabona kuti twakali kutamba buyo bantu aabo mbotwakali kumvwana limwi.” Mbuti mukwesu Luke abakaintu bakwe mbobakayaambele mukusamausya bamwi?

18. Mbuti mukwesu Luke abakaintu bakwe mbobakayaambele kutondezya muuya wakusamausya?

¹⁸ Mukwesu Luke abakaintu bakwe bakacinca mbobakali kuzilanga zintu kwiinda mukubikkila maano kumajwi aa Jesu aakuti: “Ikuti kamuyanda buyo baabo ibamuyanda, ino mbulumbu nzi mbomujana?” (Mt. 5:45-47) Bakabona kuti bakeelede kwiiya Jehova, imwaabi kubantu boonse. Aboobo bakabikka bubambe bwakutamba bakwesu abacizyi mbobatakaningatamba. Mukwesu Luke wakaamba kuti: “Toonse lino tulazikkomanina kapati ziindi zili boobu zyakuba antoomwe. Eeci citupa kuyumya zilongwe zyesu alimwi acilongwe cesu a Jehova.”

19. Mbuti mbotukonzya kutondezya kuti tuli basikwiiya ba Jesu, alimwi ncinzi ncomukanzide kucita?

¹⁹ Twabona kuyandana kapati mbokukonzya kutugwasya kubamba luumuno, kutasalulula alimwi akusamausya. Tweelede kutantamuka kuyeeya kuli koonse ikutali kabotu alimwi akubayanda kapati bakwesu abacizyi kuzwa ansi aamoyo. Ikuti twacita oobo, tuyookkomana alimwi tuyootondezya ncobeni kuti tuli basikwiiya ba Jesu.—Joh. 13:17, 35.