1. ¿Ambe juramukuaspi Jesusi imeri disipuluechani? (Exe je dibujuni enga uénakuarhu jaka).

IMA chúri ante de uarhini, Jesusi arhiaspti imeri chúxapatichani: “Ma mandamientu jimbanhi íntskuakaksïni, eskajtsï uékperaaka máteru ka máteruni jingoni. Ka eska jíksïni na uékaka chánksïni”. Tátsekua uandaspti: “Ka ini jimboksï míteati iámindu kʼuiripuecha eskajtsï jindeska juchiti jorhenguarhiticha engajtsï uékperaaka máteru ka máteruni jingoni” (Juanu 13:34, 35).

2. ¿Andisï jukaparhakue eskachi uékperaaka máteru ka máteruni jingoni?

² Jesusi uandaspti eska kʼuiripu mítepiringa néskiksï imeri chúxapaticha, engaksï uékperakua xarhatapiringa ísï eska Jesusi na úpka. I ambe niáraspti ísï úkuarhini primeru siglurhu ka ístu ísï úkuarhixati iásï. Jimbosï xáni jukaparhakueti eskachi uékperaaka máteru ka máteruni jingoni, nájkiruka ménisï úkua jukaaka ísï úni.

3. ¿Ambechi exea ini jorhenguarhikua jimbo?

³ Jimbokachi no perfektueska, ménisïchi úkua jukanchasïnga mintsita jingoni uékperani. Peru nájkiruka ísïka, jatsiskachi para jánguarhintani májkueni úni eska Kristu. Ini jorhenguarhikua jimbochi exeaka nénajtsïni jarhuatasïni uékperakua parachi sési pájperani, májkueni exeani iáminduechani ka parachi sési kámpini. Engachi jorhenguarhini jauaka, ju je kurhamarhikuarhini: “¿Ambe uá jorhenguarhini ima erachicheri engaksï seguirini jaka uékperakua xarhatani nájkiruka ménisï úkua jukajka?”.

4. Eska na uandajka Mateu 5:23, 24, ¿andichisï jatsi para puátsperantani erachi o pirenchi ma jingoni enga jatsika ambe ma juchantsïni jingoni?

⁴ Jesusijtsïni jorhendasti eska kánikua jukaparakueska puátsperantani erachi ma jingoni enga jatsika ambe ma juchantsïni jingoni (arhinta je Mateu 5:23, 24). Uandaspti eska, parachi úni Tata Diosïni jaiapanherantani, jatsiskachi para sési pájperani máteruecha jingoni. Jeoba sési pʼikuarherasïndi exeni eskachi kánikua jánguarhintasïnga parachi sési pájperani erachicha jingoni.  No jiókuarhiati ambe engachi újka para imani marhuakuni engachi jatanhetspijka o jamberichi no uékani sési péntani ambe ma erachi o pirenchi ma jingoni (1 Juanu 4:20).

5. ¿Andisï erachi Marcos úkua jukanchapi ménderu sési pájperani máteru erachi jingoni?

⁵ Jamberichi úkua jukanchajka sési péntani ambe ma nemani jingoni. ¿Andi? Ju je exeni ambe enga nitamakuarhipka erachi ma enga Marcos arhinhajka. * Ima kánikua no sési pʼikuarheraspti enga erachi ma arhinchapka ka no sési ambe aianguani máru kúnguarhikuarhu anapuechani imeri ambe. ¿Ambe úspi Marcos? Ima uandantasïndi: “Kánikua ikiaspka ka no úspka pʼíngukuarhini”. Peru tátsekua Marcos no sési pʼikuarheraspti imani ambe jimbo enga úpka ka jánguarhintaspti paraka erachi puákuntapiringa ka ménderuksï sési pájperani. Peru ima erachi no uékaspti puákuntani. Uénakuarhu, Marcos eratsespti: “¿Andisïni ji jatsi para jánguarhintani sési pájperani erachi jingoni ka jini ima no uékani?”. Jimajkani sirkuitueri orhejtsïkuti arhispti Marcosini eska seguiripiringa jánguarhintani ísï úni. ¿Ambe úspi Marcos?

6. a) ¿Néna jánguarhintaspi Marcos ménderu sési pájperani erachi ma jingoni? b) ¿Néna úspi Marcos ambe enga Efesu 4:2, 32 arhijka?

⁶ Marcos exespti eska ménisï no xáni kaxumbitispka ka eska sánderu kʼéri exekuarhisïrenga eska máteruecha. Exespti eska jatsispka para mójtakurhini (Kol. 3:8, 9, 12). Ménderu niraspti erachi jingoni uandontskuarheni ka kaxumbikua jingoni arhispti eska puákuntapiringa. Ístu, kartechani máru karakuaspti para arhini eska kánikua no sési pʼikuarheraspka imani ambe jimbo enga úkuarhipka ka eskaksï mirikurhipiringa iámindu ambe ka ménderuksï uéntani sési pájperani. Ístu, intsïkuarhispti máru ambe enga Marcos eratsepka eska ima tsitipiringa. Peru ima erachi útasï ikiaxapti. Joperu Marcos seguirixapti ísï úni eska Jesusi na juramupka, xénchani erachini ka puákuntani (arhinta je Efesu 4:2, 32). Nájkirukachi jánguarhintani jauaka sési pájperani máteruecha jingoni peruksï ima no uékani, ambakiti uékperakua engajtsïni Jesusi jorhendaka, uáti eskachi puákuantauaka ka eskachi  kómarhiaka Tata Diosïni parachi sési péntani uandanhiatani (Mat. 18:21, 22; Gal. 6:9).

7. a) ¿Ambejtsïni juramucheski Jesusi eskachi uáka? b) ¿Ambe nitamakuarhispi pirenchi ma?

⁷ Jesusijtsïni juramuchesti eskachi ísï kaapiringa máteruechani eskachi jucha na uéjka eskajtsïni kámaaka. Ístu uandaspti eskachi no jatsiska para imechantku xénchaani engajtsïni xénchajka (Luk. 6:31-33). ¿Ambechi úpirini enga kúnguarhikuarhu anapu ma nójtsïni uékapiringa uandajpani ni kurhachini? Nájkiruka i ambe kasi no méni úkuarhijka, i ambe nitamakuarhispti pirenchi ma enga Laura arhinhajka. Ima uandasïndi: “Pirenchirini ma no uandajpasïrendi ka ji no mítespka andisï ísï jámeni. Chésïrenga ka úkua jukanchasïrenga tánguarhikuecharhu nirani”. Uénakuarhu, Laura eratsesïrendi : “No juchiti kulpesti. Ístuksï máteruecha exesïndi eska ima pirenchi meru ísï jámasïnga”.

8. ¿Ambe úspi Laura para nóteru uandanhiani jarhania? b) ¿Ambechi jorhenguarhisïni ambe enga Laura nitamakuarhipka?

⁸ Laura mámaru ambe úspti para sési pájperantani pirenchi jingoni. Kómarhispti Jeobani ka eratsespti uandontskuarheni pirenchi jingoni. Uandontskuarhesptiksï imani uandanhiateri ambe, tátsekuaksï kamajchakperaspti ka sésiksï péntaspti iámindu ambe. Ísï xarharasïrendi enajki iámu ambe sési japia. Peru Laura uandasïndi: “Sánisï tátsekua, pirenchirini ménderu uénaspti no sési kámani. Kánikua no sési pʼikuarheraspka”. Uénakuarhu, Laura ísï exesïrendi eska jiántku úpiringa sési pʼikuarherani enga pirenchi nóteru ísï jámapiringuia. Peru tátsekua kuenta íntskukuarhespti eska sánderu ambakiti ambe enga ima úpiringa úni, jindespka seguirini uékperakua jingoni kámani ka no kuatantani puákuntani (Efes. 4:32–5:2). Ístu, Laura miántaspti eska ima enga uékpijka no ikiani pakarasïnga ka eska uékperakua ‘iámindu ambe tekaantasïnga, iámindu ambakiti ambe jakajkusïnga, méntkisï ambakiti ambejku erokasïnga, ka iámindu ambe jimbo uinhapikuarhisïndi para úni tekaantani’ (1 Kor. 13:5, 7). I ambe jarhuataspti para nóteru uandanhiani jarhani ini ambe jimbo. Ísï tátsekua, ima pirenchi uénaspti sánderu sési kámani Laurani. Engachi jánguarhintaska para sési pájperani erachicha jingoni ka seguirinchi uékperakua xarhatakuani, uákachi seguru jarhani eska Tata “Diosï enga pínandikua íntspijka ka  uékperakua”, juchantsïni jingoni jauaka (2 Kor. 13:11).

9. Eska na uandajka Ukuecha 10:34, 35, ¿andichisï jatsi para iáminduechani májkueni kaani?

⁹ Jeoba iáminduechani májkueni kaasïndi (arhinta je Ukuecha 10:34, 35). Engachi májkueni újka eska ima, xarhatasïngachi eskachi imeri uájpeska. Ka ístuchi kumplirini jarhasïnga juramukuani enga arhijka eskachi jatsiska para uékaani máteruechani eskachi jucha na uékakuarhijka ka ístuchi jarhuajpesïnga paraka méntkisï pínandikua jauaka Jeobaeri iretarhu (Rom. 12:9, 10; Sant. 2:8, 9).

10, 11. ¿Ambe úspi pirenchi ma para mójtakuni ambe enga pʼikuarherenga ma paisirhu anapuecha jimbo?

¹⁰ Jamberiksï máru úkua jukanchajti májkueni kaani iáminduechani. Ju je exeni ambe enga nitamakuarhipka pirenchi ma enga Ruth arhinhajka. Enga ima sapichku japka, no sési ambe nitamakuarhispti nemani jingoni enga máteru paisi anapuepka. ¿Néna no sési úkuspi inde ambe? Ima uandasïndi: “No ma ambe uékasïrenga míteni ima paisiri ambe. Jakajkusïrenga eskaksï iámindu ima paisiri anapuecha májkuenispka, asta erachicha”. ¿Ambe jarhuataspti Ruthini para nóteru ísï eratsenia?

¹¹ Ruth exespti eska jatsispka para jánguarhintani nóteru ísï eratsenia. Arhiantaaspti máru eksperiensiechani ka ambe enga xáni úkuarhika imani paisi jimbo librurhu Anuario. Ruth uandasïndi: “Jánguarhintaspka parani no no sési eratseni jima anapu kʼuiripuecheri ambe. Uénaspka exeni eskaksï jima anapu erachicha tsípikua jingoni marhuakusïrenga Jeobani. Kuenta íntskukuarhespka eskaksï imajtu juchari erachicheska”. Pirenchi sánhani arhispti kuenta íntskukuarhini eska útasï jatsispka para máteru ambe úni. Uandantasïndi: “Méntkisï engani mítenga erachini o pirenchini ma enga imani paisi anapuepiringa, kánikua jánguarhintasïrenga parani sési uandontskuarhekuni. Ísï niáraspka sánderuni sési míteani”. ¿Ambe úkuarhispi enga i ambe úpka? Ruth uandantasïndi: “Tiempu jingoni, nóteruni ísï pʼikuarherasïrenguia”.

12. ¿Ambe no sési úxapi pirenchi Sara?

¹² Jamberiksï máru no míteparini, nóksï iáminduechani májkueni kaasïndi. Por ejemplu, pirenchi ma enga Sara arhinhajka eratsesïrendi eska iáminduechani májkueni kaasïrenga jimboka no ménderueni exeasïrenga kʼuiripuechani engaksï máteru nani anapuepiringa, jatsikuarhekua ambe jimbo o náki uéjki ánchikuarhita jimbo engaksï újka Jeobaeri kúnguarhikuarhu. Peru ima jiókuarhisïndi ari ambe: “Exespka eskani no iáminduechani májkueni kaasïrenga”. ¿Andi? Ima familiarhu ma anapuespti nani engaksï iáminduecha unibersidadirhu níka, ísï jimbo tsitisïrendi imecha jingontku kúnguarhini engaksï ístu unibersidadirhu jámaka. Ma jurhiani arhispti amiguni ma: “Ima erachicha jingontkusïni kúnguarhijka engaksï unibersidadirhu jámaka ka no tsitisïnga kúnguarhini imecha jingoni engaksï no nika”. Xarharasïndi eska Sara jatsispka para mójtakuni ambe enga eratsenga. ¿Néna úspi para mójtakuni na enga eratsenga?

13. ¿Ambechi jorhenguarhisïni ambe enga úpka Sara para mójtakuni imani ambe enga no sési úni japka?

¹³ Sirkuitueri orhejtsïkuti ma jarhuataspti Sarani paraka exepiringa ambe enga no sési úni japka. Ima uandantasïndi: “Arhisptirini eskani kánikua sési marhuakuxapka Jeobani, eskani sési mókuntasïrenga tánguarhikuecharhu ka imani ambe jimbo engani Bibliaeri ambe mítepka. Tátsekuarini arhispti eska, ísï eskachi na jorhenguarhepani jarhajka uánikua ambe Bibliaeri, ístuchi jatsiska para sánderu kaxumbitini, no kʼéramakuarhini ka pʼamojpitini”. Sara úspti ambe enga sirkuitueri orhejtsïkuti arhipka. Uandasïndi: “Exeska eska ambe enga sánderu jukaparhakueka jindeska eskachi sési kámpiaka ka uékperakua xarhatani”. Jimajkani, uénaspti ménderueni exeani erachichani. Uandantasïndi:  “Jánguarhintasïrenga imani ambe exeni enga jimbo Jeoba xáni jukaparharaajka”. ¿Ka juchaia? Nóchi méni uékasïnga sánderu kʼéri pʼikuarherani imani jorhenguarhikua jimbo engachi intsïnhaka. Engachi jánguarhintaska mintsita jingoni xénchaani iámindu erachichani, uákachi iáminduechani májkueni kaani (1 Ped. 2:17).

14. Eska na arhijka Ebreu 13:16, ¿néna pʼikuarherasïni Jeoba engachi sési kámpijka?

¹⁴ Jeoba kánikua jukaparharasïndi engachi sési kámpijka (arhinta je Ebreu 13:16). Jeoba uandasïndi eska engachi sési kámpijka, kʼéri ambechi arhisïnga ka sánderia engachi jarhuataajka imechani engaksï uétarhinchani jarhajka (Sant. 1:27; 2:14-17). Ísï jimbo, Bibliajtsïni arhisïndi eskachi méntkisï sési kámpiaka (Rom. 12:13). Engachi sési kaajka máteruechani, xarhatakuasïngachi eskachi mintsita jingoni xénchaasïnga ka eskachi uékasïnga imecheri amigueni. Jeoba tsitisïndi eskachi jucha máteruechani íntsïmbiauaka sáni tʼirekua o itsï, o eskachi arhutaaka tiempu para imecha jingoni jarhani (1 Ped. 4:8-10). Peru, ménisï jarhasïndi máru ambe engajtsïni ójkutajka parachi sési kaani máteruechani.

15, 16. a) ¿Andiksïsï máru úkua jukanchajki sési kámpini? b) ¿Ambe jarhuataspi Editini paraka sési kámpepiringa?

¹⁵ Jamberichi uandajka eskachi jucha no uáka sési kámpini. Ísï uandasïrendi tsïndi ma enga Edit arhinhajka. Ante de Testigu úkuarhini, no káni tsitisïrendi máteruecha jingoni kúnguarhini. Uandasïrendi eska ima no xáni jatsikuarhispka para úni sési kámpini ísï eska máteruecha.

¹⁶ Enga na Testigu úkuarhipka, Edit uénaspti ménderueni eratseni ka jánguarhintaspti sánderu sési kámpini. Ima miásïndi: “Enga Kʼumanchikua Reinueri únhani japka, orhejtsïkutirini ma kurhamarhispti sini temungurhiri ma enga jupiringa jarhuajpeni, úpirini juchinio pakarani tsimani semana. Jiájkani eratsentaspka Sarepta anapu tsïndiri ambe ka na enga Jeoba kóndintapka” (1 Rey. 17:12-16). Ísï jimbo Edit uandaspti eska jo. ¿Náki kóntperatechani intsïnhaaspi? Edit uandantasïndi: “Nóksï tsimani semanajkusï pakarapti jíndeni jingoni, sino tsimani kutsï,  imani tiempu jimbo niáraspkachi kánikua sési pájperani”. Edit ístu ambakiti amiguechani jatsiasti kúnguarhikuarhu. Iásï prekursorestia ka kánikua tsitisïndi imecho pʼímarhiani erachichani engaksï imani jingoni uérajka aianhpini ka intsïmbiani tʼirekua ambe. Uandasïndi: “Intsïmpini, kánikuarini sési pʼikuastasïndi. Ka indeni ambe jimbo uánikua kóntperatechani itsïnhaasïnga” (Ebr. 13:1, 2).

17. ¿Ambeksï exespi Lucas ka imeri témba eskaksï úxapka?

¹⁷ Jamberichi sési kámpini jakaia, ¿peruchi úpirini sánderu sési kámpini? Por ejemplu, Lucas ka imeri témba kánikuaksï sési kámpisïndi. Pʼindesptiksï pʼímarhiani imecho táti jembechani, imecheri parientichani, imechani engaksï jingoni sési pájperenga ka sirkuitueri orhejtsïkutini ka témbani. Peru, Lucas uandasïndi: “Exespkachi eskachi solu imechani pʼimarhiasïrenga engachi jingoni sési pájperajka”. ¿Ambeksï úspi para ístu sési kaani máteruechani?

18. ¿Ambeksï úspi Lucas ka témba paraksï sánderu sési kámpini?

¹⁸ Lucas ka témba kurhangusptiksï sési jimbo ambe arhikuekasïni sési kámpini jiáni engaksï eratsentapka ambe enga Jesusi uandapka: “Engajtsï cha solu imechani uéaska engaksïni chánksïntu uékajka, ¿ambejtsï andaa?” (Mat. 5:45-47). Exesptiksï eskaksï jatsispka para májkueni úni eska Jeoba enga iáminduechani sési kaajka. Ísï jimbo, eratsesptiksï pʼímarhiani imani erachichani engaksï no méni pʼímarhiapka. Lucas uandasïndi: “Iásï, iámiduechachi sési pʼikuarherasïnga engachi ísï újka, jimbokajtsïni uinhaperantasïnga ka jarhuatasïndijtsïni sánderu sési marhuakuni Jeobani”.

19. ¿Nénachi xarhatasïni eskachi sési jimbo Jesusiri chúxapatiska ka ambechi eratsetixaki úni?

¹⁹ Ini jorhenguarhikua jimbo, exeskachia eska mintsita jingoni uékperani, úsïnga eskachi iáminduecha sési pájperaaka, iáminduechani májkueni exeani ka sési kámpini. Ju je jánguarhintani no eratseni o pʼikuarherani ambe ma enga no sési jaka erachicheri ambe ka mintsita jingoni xénchaani. Engachi ísï úska, tsípikua jingonchi irekaaka ka xarhataakachi eskachi sési jimbo Jesusiri chúxapatiska (Juanu 13:17, 35).