1. Ano nga espisipiko nga sugo an iginhatag ni Jesus ha iya mga disipulo? (Kitaa an retrato ha kobre.)

HAN gab-i antes mamatay hi Jesus, naghatag hiya hin espisipiko nga sugo ha iya mga disipulo. Ginsidngan niya hira: “Sugad la han paghigugma ko ha iyo, higugmaa liwat niyo an usa kag usa.” Katapos nagsiring pa hiya: “Pinaagi hini an ngatanan mahibabaro nga mga disipulo ko kamo​—kon nahigugma kamo ha usa kag usa.”​—Juan 13:34, 35.

2. Kay ano nga importante nga magpakita kita hin gugma ha usa kag usa?

² Hi Jesus nagsiring nga klaro nga makikilala kon hin-o an iya tinuod nga mga disipulo kon iginpapakita nira an klase han gugma nga iya iginpakita. Ito nga iya ginsiring tinuod ha siyahan nga siglo, ngan tinuod liwat ito yana. Salit importante gud nga higugmaon naton an usa kag usa bisan ha mga sitwasyon nga makuri ito!

3. Ano an aton hihisgotan hini nga artikulo?

³ Diri kita mga perpekto, salit nagigin makuri ha aton nga higugmaon gud an usa kag usa. Bisan pa hito, kinahanglan naton subaron an Kristo. Hini nga artikulo, hihisgotan naton kon paonan-o an gugma nabulig ha aton nga makigmurayaw, diri magpaurog, ngan magin maabiabihon. Samtang gin-aadman ini nga materyal, pakianhi an imo kalugaringon: ‘Ano an akon mahibabaroan ha kabugtoan nga padayon nga nagpapakita hin gugma ha usa kag usa bisan pa han mga pagsari?’

4. Sumala ha Mateo 5:23, 24, kay ano nga angay kita makigmurayaw ha usa nga bugto nga may reklamo kontra ha aton?

⁴ Gintutdoan kita ni Jesus han pagkaimportante han pakigmurayaw ha usa nga bugto nga may reklamo kontra ha aton. (Basaha an Mateo 5:23, 24.) Ginpabug-atan niya nga importante  nga tipigan naton an maopay nga relasyon ha iba kon karuyag naton mapalipay an Dios. Nalilipay hi Jehova kon ginhihimo naton an aton pinakamaopay basi makigmurayaw ha aton kabugtoan. Diri niya kakarawaton an aton pagsingba kon padayon kita nga nasisina ha usa ngan nadiri ngani bisan ha pakigmurayaw.​—1 Juan 4:20.

5. Ano an nagpakuri ha usa nga bugto ha pakigmurayaw?

⁵ Bangin nakukurian kita nga makigmurayaw. Kay ano? Tagda an nahitabo kan Mark. * Nasakitan hiya han nagin kritiko ha iya an usa nga bugto ngan ginpakaraot hiya ha ira mga kakongregasyon. Ano an reaksyon ni Mark? “Nakayakan ako hin diri maopay ngan nasina ako,” siring niya. Pero katapos hito, nagbasol hi Mark han iya ginbuhat ngan nangalimbasog ha pangaro hin pasaylo ha bugto ngan makigmurayaw ha iya. Pero nadiri an bugto nga makigmurayaw kan Mark. Ha siyahan, naghunahuna hi Mark, ‘Kay ano nga mangangalimbasog pa ako nga makigmurayaw nga nadiri man hiya?’ Pero gin-aghat hi Mark han ira paramangno han sirkito nga padayon nga makigmurayaw. Ano an ginbuhat ni Mark?

6. (a) Paonan-o nangalimbasog hi Mark nga makigmurayaw? (b) Paonan-o gin-aplikar ni Mark an Colosas 3:13, 14?

⁶ Ginhunahuna ni Mark an iya disposisyon ngan nakita niya nga diri hiya sugad kamapainubsanon ngan usahay naghuhunahuna hiya nga mas matadong hiya kay ha iba. Nasabtan niya nga kinahanglan niya magbag-o. (Col. 3:8, 9, 12) Mapainubsanon nga dinaop hiya utro ha bugto ngan nangaro hin pasaylo. Naghimo liwat hi Mark hin mga surat para ha bugto, nga nasiring nga nasusubo gud hiya han iya ginbuhat ngan karuyag niya magin magsangkay hira utro. Naghatag pa ngani hi Mark hin gudti nga mga regalo nga ginhuhunahuna niya nga maruruyagan han bugto. Makasurubo, padayon nga nasina la gihap ha iya an bugto. Bisan pa hito, padayon nga ginsunod ni Mark an sugo ni Jesus nga higugmaon an iya bugto ngan magin mapinasayloon.  (Basaha an Colosas 3:13, 14.) Bisan kon diri ginkakarawat han iba an aton mga pangalimbasog nga makigmurayaw, an tinuod nga Kristiano nga gugma mabulig ha aton nga padayon nga pasayloon hira ngan mag-ampo nga magkaada maopay nga resulta.​—Mat. 18:21, 22; Gal. 6:9.

7. (a) Ano an gin-aghat ni Jesus nga buhaton naton? (b) Ano nga makuri nga sitwasyon an naeksperyensyahan han usa nga sister?

⁷ Gin-aghat kita ni Jesus nga padayon nga trataron an iba pariho han karuyag naton nga pagtratar ha aton. Nagsiring pa hiya nga diri la adton mga nahigugma ha aton an angay naton higugmaon. (Luc. 6:31-33) Bisan kon diri ini pirme nahitatabo, ano man kon may usa ha kongregasyon nga nalikay ha imo ngan diri man la namamansin ha imo? Ito an naeksperyensyahan ni Lara. Hiya nagsiring: “Usa nga sister an diri namamansin ha akon ngan diri ako maaram kon kay ano. Naistres gud ako ngan diri na ako nalilipay ha pagtambong ha mga katirok.” Han una, nangatadongan hi Lara: ‘Waray man ako sala. Ngan inaabat liwat han iba ha kongregasyon nga iba an batasan hini nga sister.’

8. Ano an ginhimo ni Lara basi makigmurayaw, ngan ano an aton mahibabaroan ha iya eksperyensya?

⁸ Naghimo hi Lara hin mga paagi basi makigmurayaw. Nag-ampo hiya kan Jehova ngan nagdesisyon nga makig-istorya ha sister. Gin-istoryahan nira an problema, naghangkopay, ngan nakigmurayaw ha usa kag usa. Baga hin okey na an tanan. Hi Lara nagsiring: “Pero waray pag-iha, gintratar na liwat ako han sister pariho han iya pagtratar hadto ha akon. Nasubo gud ako.” Ha siyahan, inabat ni Lara nga magigin malipayon la hiya kon magbabag-o an sister. Pero ha urhi, nahunahuna ni Lara nga an pinakamaopay nga iya mahihimo amo an padayon nga pagtratar ha sister ha mahigugmaon nga paagi ngan ‘hura nga magpasaylo’ ha iya. (Efe. 4:32–5:2) Nahinumdoman ni Lara nga an tinuod nga Kristiano nga gugma “diri . . . nag-iihap han karat-an. Nag-aantos ito ha ngatanan nga butang, natuod ha ngatanan nga butang, naglalaom ha ngatanan nga butang, nagpapailob ha ngatanan nga butang.” (1 Cor. 13:5, 7) Nagin murayaw utro an hunahuna ni Lara. Inabot an panahon, nagin makisangkayon na an sister ha  iya. Kon nangangalimbasog ka nga makigmurayaw ha kabugtoan ngan padayon nga ginhihigugma hira, makakasiguro ka nga ‘an Dios han gugma ngan han kamurayawan maupod ha imo.’​—2 Cor. 13:11.

9. Sumala ha Buhat 10:34, 35, kay ano nga kinahanglan nga waray kita ginpapaurog?

⁹ Hi Jehova waray pinaurog. (Basaha an Buhat 10:34, 35.) Kon waray kita ginpapaurog, ginpapamatud-an naton nga mga anak kita niya. Ginsusunod naton an sugo nga higugmaon an aton igkasi-tawo sugad ha aton kalugaringon, ngan gintitipigan naton an kamurayawan ha aton espirituwal nga pamilya.​—Roma 12:9, 10; San. 2:8, 9.

10-11. Paonan-o nalamposan han usa nga sister an iya negatibo nga pag-abat?

¹⁰ Bangin diri masayon para ha iba an pagpabilin nga waray ginpapaurog. Pananglitan, tagda an nahitabo ha sister nga hi Ruth. Han tin-edyer pa hiya, may maraot hiya nga eksperyensya ha usa nga tawo nga taga-iba nga nasud. Ano an nagin epekto hito ha iya? Hi Ruth nagsiring: “Nasina gud ako ha ngatanan nga may kalabotan hito nga nasud. Kahuna ko parapriho an tanan nga tawo hito nga nasud, pati an kabugtoan.” Paonan-o nalamposan ni Ruth an iya negatibo nga pag-abat?

¹¹ Nasabtan ni Ruth nga kinahanglan niya atohan an iya negatibo nga panhunahuna. Nagbasa hiya hin mga eksperyensya ngan mga report ha Yearbook mahitungod hito nga nasud. Hiya nagsiring: “Nangalimbasog ako nga maghunahuna hin positibo mahitungod han mga tawo hito nga nasud. Napansin ko nga an kabugtoan didto madasigon para kan Jehova. Nagin klaro ha akon nga hira liwat bahin han aton bug-os-kalibotan nga pagminagburugto.” Ha urhi, nakapanhunahuna hi Ruth nga labaw pa an kinahanglan niya buhaton. Hiya nagsiring: “Kon may nakikilala ako nga kabugtoan tikang hito nga nasud, nangangalimbasog gud ako nga magin makisangkayon ha ira. Nakikiistorya ako ha ira ngan mas nakikilala ko hira.” Ano an resulta? Hi Ruth nagsiring: “Pag-abot han panahon, nawara an akon negatibo nga pag-abat.”

12. Ano an nagin problema han usa nga sister nga hi Sarah?

¹² An pipira bangin may ginpapaurog ngan bangin diri nira ito nasasantop. Pananglitan, hi Sarah naghunahuna nga waray hiya ginpapaurog kay diri hiya naghuhukom ha mga tawo sumala ha ira lahi, pinansyal nga kahimtang, o responsabilidad ha organisasyon. Pero gin-amin niya: “Nakita ko nga may ginpapaurog ngay-an ako.” Ha ano nga paagi? Hi Sarah nagtikang ha edukado gud nga pamilya ngan mas karuyag niya makig-upod ha mga edukado liwat. Makausa ginsidngan pa ngani niya an usa nga sangkay: “Nakikiupod ako ha mga igkasi-tumuroo nga mga edukado. Ginlilikayan ko adton mga diri edukado.” Matin-aw, kinahanglan bag-uhon ni Sarah an iya panhunahuna. Paonan-o?

13. Ano an aton mahibabaroan ha ginbuhat ni Sarah basi mabag-o an iya panhunahuna?

¹³ Ginbuligan hi Sarah han usa nga paramangno han sirkito nga usisahon an iya panhunahuna. Hiya nagsiring: “Ginkumendasyonan niya ako ha akon matinumanon nga pag-alagad, mag-opay nga komento, ngan kahibaro ha Kasuratan. Katapos ginsaysay niya nga samtang nagdudugang an aton kahibaro, kinahanglan liwat naton kultibaron an Kristiano nga mga kalidad sugad han pagkamapainubsanon ngan kalooy.” Gin-aplikar ni Sarah an ginsiring han paramangno han sirkito. Hiya nagsiring: “Nakapanhunahuna ako nga importante gud nga magin buotan kita ngan mahigugmaon.” Sugad nga resulta, ginbag-o niya an iya panhunahuna mahitungod ha kabugtoan. Hiya nagsaysay: “Nangalimbasog ako nga masabtan kon ano nga mga kalidad an nakahimo ha ira nga magin presyoso kan  Jehova.” Kumusta man kita? Diri gud naton karuyag maghunahuna nga mas labaw kita ha iba tungod han aton edukasyon! Kon aton gud ‘hinigugma an ngatanan nga kabugtoan,’ lilikayan naton an pagpaurog.​—1 Ped. 2:17.

14. Sumala ha Hebreo 13:16, ano an inaabat ni Jehova kon maabiabihon kita?

¹⁴ Nalilipay gud hi Jehova kon maabiabihon kita. (Basaha an Hebreo 13:16.) Para ha iya, bahin ito han aton pagsingba, labi na kon nabulig kita ha mga nanginginahanglan. (San. 1:27; 2:14-17) Salit gin-aaghat kita han Kasuratan nga “magin maabiabihon pirme.” (Roma 12:13) Kon maabiabihon kita, iginpapakita naton ha iba nga importante hira, hinigugma naton hira, ngan karuyag naton magin sangkay hira. Nalilipay hi Jehova kon gintatagan naton an iba hin makakaon o maiinom, o naggagahin kita hin panahon nga makaupod hira. (1 Ped. 4:8-10) Pero, bangin may mga butang nga mahimo magpakuri ha aton nga magin maabiabihon.

15-16. (a) Kay ano nga bangin mag-alang an iba ha pagin maabiabihon? (b) Ano an nakabulig kan Edit nga magin maabiabihon?

¹⁵ Bangin kita mag-alang ha pagin maabiabihon tungod han aton kahimtang. Tagda an ehemplo han balo nga hi Edit. Antes hiya magin Saksi, mas karuyag niya nga waray hiya mga bisita. Inabat ni Edit nga mas kaya han iba nga mag-asikaso hin mga bisita.

¹⁶ Han nagin Saksi na hi Edit, ginbag-o niya an iya panhunahuna. Naghimo hiya hin mga pitad basi magin maabiabihon. Hiya nagsiring: “Han gintutukod an amon bag-o nga Kingdom Hall, usa nga tigurang an nagsumat ha akon nga may mag-asawa nga maabot basi bumulig ha proyekto, ngan ginpakianhan ako niya kon puydi ko ba hira paukyon hin duha ka semana. Nahinumdoman ko kon paonan-o ginbendisyonan ni Jehova an balo ha Zarepat.” (1 Hadi 17:12-16) Inuyon hi Edit nga paukyon an mag-asawa. Ginbendisyonan ba hiya? Hiya nagsiring: “An duha ka semana nagin duha ka bulan. Hito nga panahon, nagin duok kami nga magsarangkay.” Ginbendisyonan  liwat hi Edit hin duok nga mga sangkay ha kongregasyon. Payunir na hiya yana ngan nalilipay hiya nga imbitaron ha iya balay an mga nakakaupod niya ha ministeryo basi mag-isnak. Hiya nagsiring: “Nakakapalipay ha akon an paghatag! Ngan ha pagkamatuod, nakakakarawat ako hin damu nga bendisyon.”​—Heb. 13:1, 2.

17. Ano an napansin ni Luke ngan han iya asawa?

¹⁷ Bangin maabiabihon na kita, pero mahimo ba kita magin mas maabiabihon pa? Pananglitan, maabiabihon hi Luke ngan an iya asawa. Nabatasan nira nga imbitaron ha ira balay an ira mga kag-anak, paryente, duok nga kasangkayan, ngan an paramangno han sirkito ngan an iya asawa. Pero hi Luke nagsiring: “Napansin namon nga adton mga duok la ha amon nga amon gin-iimbitar.” Paonan-o nagin mas maabiabihon hi Luke ngan an iya asawa?

18. Paonan-o nagin mas maabiabihon hi Luke ngan an iya asawa?

¹⁸ Ginbag-o ni Luke ngan han iya asawa an ira panhunahuna han ginpamalandong nira an ginsiring ni Jesus: “Kon an iyo la ginhihigugma an mga nahigugma ha iyo, ano an balos ha iyo?” (Mat. 5:45-47) Nasabtan nira nga kinahanglan nira subaron hi Jehova nga mahinatagon ha ngatanan. Salit nagdesisyon hira nga imbitaron an kabugtoan nga waray pa nira maimbitar hadto. Hi Luke nagsiring: “Nalilipay gud kami ngatanan hini nga mga panahon nga magkaurupod kami. Nadadasig ngan napaparig-on kami ngatanan.”

19. Paonan-o naton mapapamatud-an nga mga disipulo kita ni Jesus, ngan ano an imo determinasyon?

¹⁹ Ginhisgotan naton kon paonan-o an pagin mahigugmaon gud ha usa kag usa makakabulig ha aton nga makigmurayaw, diri magpaurog, ngan magin maabiabihon. Kinahanglan naton wad-on an bisan ano nga negatibo nga pag-abat ngan higugmaon gud an aton kabugtoan tikang ha kasingkasing. Kon bubuhaton naton ito, magigin malipayon kita ngan mapapamatud-an naton nga mga disipulo gud kita ni Jesus.​—Juan 13:17, 35.