1. Ino beko mazava namezany Jesosy pianatranany? (Zahava sary amy fon̈ony gazety ty.)

ALIN̈Y talohany nifatesany Jesosy, ty beko araiky mazava namezany pianatranany: “Anaro mila mifankatia, karaha nitiavako anaro koa.” Karaha ty koa ho izy: “Baka amy zen̈y ahaizanolo fa anaro pianatranaka ankitin̈y, izikoa anaro mifankatia.”—Jaona 13:34, 35.

2. Nan̈ino ma atsika mila mifen̈y fo hifankatia mare amy fô jiaby?

² Jesosy nivolan̈a fa izikoa atsika man̈aboaka fitiavan̈a karaha nataony in̈y, ho mora aminolo hahay azovy ten̈a pianatranany. Mbala marin̈y fo raha nivolan̈iny zen̈y, rango tamy taonjato voanalohany firaka izioty. Dikanizen̈y, mila mifen̈y fo atsika hifankatia mare amy fô jiaby, ndray maro raha mety hanakan̈a atsika han̈ano zen̈y.

3. Ino raha hidinihintsika ato?

³ Atsika tsy lavorary, ke mety ho sarotro amintsika hifankatia mare zen̈y fo. Atsika tsy maintsy mifen̈y mangala tahaka Kristy. Hidinihintsika ato, amy karakory fitiavan̈a io han̈ampy atsika ho tia fihavanan̈a, tsy han̈avakavaka olo, ndreky ho tia mandray vahiny. Hikoran̈intsika ato raha nataony rahalahy ndreky ranabavy nifen̈y fo nan̈aboaka fitiavan̈a, ndray tsy mora raha zen̈y. Aleva onon̈o tsara baka io, ino mety ianaranao baka amindro.

4. Nan̈ino atsika mila mihavan̈a aminolo meloko amintsika, koa zahan̈a Matio 5:23, 24?

⁴ Nampianariny Jesosy fa atsika mila mihavan̈a aminolo meloko  amintsika. (Vakia Matio 5:23, 24.) Namafisiny fa mila tsara fihavanan̈a aminolo fo atsika, izikoa tihahazo rady amy Zan̈ahary. Ho ravoravo Jehovah izikoa atsika man̈ano zay raha vitantsika hihavanan̈a amy rahalahy ndreky ranabavintsika. Fa tsy hankasitrahiny foeky fanompoan̈a ataontsika, izikoa atsika manohy mitana heloko ampô na tsy miezaka foeky ho tsara fihavanan̈a amindro.​—1 Jaona 4:20.

5. Nan̈ino tsy nora tamy Mark nihavan̈a tamy rahalahy araiky?

⁵ Mety ho sarotro man̈ano raha hihavanan̈a zen̈y! Diniha baka raha navoa i Mark * ty. Neloko mare izy fotony nisy rahalahy araiky nitsiko izy tamy piaramanompo. Ho izy: “Tsy navoatanako helokonaka ke namiamiako tan̈y izy.” Nanen̈iny mare Mark tafara tatỳ. Niala tsin̈y tamy rahalahy in̈y izy sady nifen̈y hihavan̈a taminany, fa rahalahy io tsy nan̈eky. Dinikiny Mark tamy voanalohany: ‘Nan̈ino ma zaho fo tokony hiezaka kanefa izy tsy tihihavan̈a aminaka?’ Nisy piandraikitry faritry amy zay nandrisiky izy hiezaka fo. Akory nataony Mark?

6. a) Karakory nataony Mark nan̈ano raha hampisy fihavanan̈a fo? b) Akory nan̈arehany Mark raha koran̈iny Kolosianina 3:13, 14?

⁶ Mark koa fa nandiniky, tontohitry izy fa tsy nanetry ten̈a. Izy nieritreritry izy tsy diso foeky. Hitany fa nila nan̈ova fomba fisain̈ananany izy. (Kol. 3:8, 9, 12) Nanetry ten̈a izy ke nandeha niala tsin̈y tamy rahalahy in̈y tan̈y. Nanoratra taratasy tamy rahalahy io koa izy. Nanenin̈y mare izy, ho izy tao, sady mbala tihimpody ho kamaradiny rahalahy io ndraiky. Nitady raha mety ho tiany rahalahy io koa izy nataony kadônany. Mbala neloko fo ny araiky. Ndray zen̈y, Mark tsy rivan̈a foeky! Narehany bekony Jesosy in̈y, ke nifen̈y fo izy ho tia rahalahiny io ndreky han̈ambela hadisovan̈anany. (Vakia Kolosianina 3:13, 14.) Ino hevitry izikoa atsika mifen̈y hihavan̈a  aminolo araiky kanefa olo io tsy man̈eky? Izikoa atsika tia piaramanompo karaha ataony Jesosy tia iro, han̈ambela hadisovan̈andro fo atsika. Hivavaka fo koa atsika baka ho tsara fihavanan̈a amindro.—Mat. 18:21, 22; Gal. 6:9.

7. a) Ino raha tokony hataontsika ho Jesosy? b) Ino raha sarotro niain̈any Lara?

⁷ Jesosy nivolan̈a fa zay raha tiantsika hataonolo amintsika, tokony hataontsika amindro koa. Nivolan̈a koa izy fa tsy mety izikoa olo mankatia atsika fo tiavintsika. (Lioka 6:31-33) Ohatra iziô, misy piaramanompo araiky milefalefa anao sady tsy man̈ano mbalatsara anao foeky. Raha zen̈y ndraiky mahalan̈a, fa izy fo mety ho hisy. Akory hataonao? Zen̈y tsarabe raha navoa i Lara. Ho izy: “Tsy haiko foeky antony, fa nisy rahavavy araiky zay nandika be fo izikoa fa nandalo tankilanaka fa man̈ano mbalatsara olo. Tsy nijireny foeky zaho. Niasaloha mare zaho, ke kamo aby zaho nandeha nivory.” Lara nieritreritry: ‘Ino ma raha tsy nety nataoko? Sady izio kaiky tsy zaho fo nahita izy hafahafa, fa mboàny olo hafa amy fiangonan̈a koa.’

8. Ino raha nataony Lara baka hisiany fihavanan̈a? Ino raha ianarantsika baka amy zen̈y?

⁸ Nifen̈y fo i Lara nan̈ano raha hisiany fihavanan̈a. Nivavaka tamy Jehovah izy ke tapakevitry izy fa hikoran̈a tamy ranabavy io. Nikoran̈a momba problemo io iro roe mirahavavy, baka io nifandamin̈y ke nifankahazo tsara. Karaha raha nilamin̈y problemondro! Ho Lara: “Nimpody niavaon̈any rahavavy in̈y ndraiky zaho, tafara tatỳ. Rivan̈a eky zaho e!” Tamy voanalohany, Lara nieritreritry fa halahelo fo izy izikoa tsy miova rahavaviny io. Tontohitry izy avio, fa kaiky tsisy raha tsaratsarany mifen̈y fo han̈aboaka fitiavan̈a ndreky “tsy mitana heloko ampô.” (Efes. 4:32–5:2) Azony Lara onon̈o fa olo manan̈a ten̈a fitiavan̈a zen̈y “mandefitry raha jiaby, mino raha jiaby, man̈anten̈a raha jiaby”, sady  “miaritry raha jiaby.” (1 Kor. 13:5, 7) Nanjary tsy niasaloha eky izy. Koa fa nandeha fotoan̈a, ranabavy niavon̈o taminany in̈y nanjary nahainazava trôko taminany. Ke izikoa anao mba an̈isany mifen̈y mare hisiany fihavanan̈a amy piaramanompo sady tia iro fo, matokisa fa Jehovah hitahy ezakanao, fotony izy ‘Zan̈ahariny fitiavan̈a ndreky fihavanan̈a.’—2 Kor. 13:11.

9. Nan̈ino atsika tsy tokony han̈avakavaka olo, koa zahan̈a Asan’ny Apostoly 10:34, 35?

⁹ Jehovah tsy man̈avakavaka olo. (Vakia Asan’ny Apostoly 10:34, 35.) Zanany ankitin̈y atsika izikoa tsy man̈avakavaka olo koa. Jesosy man̈iraka atsika to tia namantsika karaha ataontsika tia ain̈intsika. Man̈araka bekonany zen̈y atsika izikoa mifen̈y fo mihavan̈a aminolo amy fiangonan̈a.—Rom. 12:9, 10; Jak. 2:8, 9.

10-11. Akory nahavy Ruth tsy han̈avakavaka olo eky?

¹⁰ Tsy mora aminolo sasany tsy man̈avakavaka olo zen̈y. Karaha zen̈y iziô i Ruth, ranabavy araiky zay. Nisy olo tsy firenena araiky taminany nan̈ano raha tsy manjary tamy lafamìnany. Ino vokany? Ho Ruth: “Koa fa raha mifototro firenena io, efa halako edy. Tamy dinikinaka, koa fa olo baka amy tany io efa karaha zen̈y fo, firaka amy piaramanompo.” Ino raha nan̈ampy izy hiala tamy toetsain̈y ratsy zen̈y?

¹¹ Tontohitry Ruth fa nila nan̈ova toetsain̈inany izy. Namaky tantaranolo ndreky raha tsara momba firenena io tamy Diary izy. Ho izy: “Nifen̈y fo zaho nieritreritry raha tsara momba olo baka amy tany io. Hitako fa ten̈a mazoto manompo Jehovah piaramanompo an̈y. Nanjary nazava taminaka fa iro io mba an̈isany fianakaviambeny pirahalahy erantany.” Izikoa fa nandeha fotoan̈a, hitany Ruth fa nisy raha hafa koa tokony hataony. “Isaka zaho fanojy piaramanompo baka amy firenena io, ho izy, nifen̈y mare zaho nikamarady tamindro. Nikoran̈a matetiky tamindro zaho, ke nahaihaiko fo toetry tsarandro.” Ino amy zay vokany? Ho Ruth: “Nanjary tsy nan̈avakavaka iro eky zaho.”

12. Ino problemony Sarah?

¹² Misy olo tsy tontohitry fa kaiky izy io efa man̈avakavaka olo. Karaha zen̈y Sarah. Tan̈atiny jerinany izy tsy nan̈avakavaka olo, fotony izy efa tsy nitsaratsara olo nohony tany faviany na raha anan̈any na andraikitrinany an̈ivony fandaminan̈a. Fa ho izy: “Zaho in̈y kaiky nan̈avakavaka olo fo!” Nan̈ano akory? Lafamìnany baka olo nahitahita fianaran̈a aby, ke olo karaha zen̈y fo tiany pitahan̈a. Karaha ty ho izy tamy kamaradiny zay: “Zaho kony piaramanompo nahitahita fianaran̈a fo tiako atao naman̈a e!” Ten̈a nila nan̈ova toetsain̈any Sarah. Ino raha nan̈ampy izy?

13. Akory nataony Sarah nan̈ova toetsain̈inany, baka io ino raha ianarantsika baka amy zen̈y?

¹³ Nisy piandraikitry faritry zay nan̈ampy Sarah handiniky ain̈inany. Ho Sarah: “Nidera zaho izy fotony zaho zen̈y mazoto manompo, man̈amia valinteny tsara, sady mahay Baiboly. Izy baka tio nivolan̈a fa arakaraka ny ahaizantsika raha maro momba Jehovah, tokony hahavy atsika hanetry ten̈a, hahinakinaka olo, ndreky hangala onon̈o fa tsy raha jiaby zay ho vitantsika aby.” Narehany Sarah torohevitry zen̈y. Volan̈iny: “Hitako fa tokony hifen̈y fo atsika ho tsara fan̈ahy ndreky be fitiavan̈a, fotony zen̈y raha ten̈a maventy.” Izioty, niova fahitany Sarah piaramanompo aminany. Ho izy: “Ataoko an̈aty jery fo fa matoa piaramanompo aby io valera amy Jehovah, dikanizen̈y misy toetry tsara hitany amindro io.” Mety nahitahita fianaran̈a atsika, kanefa  zen̈y tsy tokony hahavy atsika han̈ambony ten̈a! Tsy han̈avakavaka olo foeky, izikoa tiantsika amy fô jiaby “iro rahalahy jiaby amy finoan̈a.”—1 Pet. 2:17.

14. Izikoa Hebreo 13:16 zahan̈a, man̈ano akory Jehovah atsika koa tia mandray vahiny?

¹⁴ Ravoravo Jehovah izikoa atsika tia mandray vahiny. (Vakia Hebreo 13:16.) Amy Jehovah, fahaizan̈a mandray vahiny io an̈isany fanompoan̈a, intsaka eky izikoa olo sahiran̈a olo ainvitentsika. (Jak. 1:27; 2:14-17) Zen̈y mahavy Soratra Masin̈y man̈iraka atsika ‘hifen̈y ho tia mandray vahiny.’ (Rom. 12:13) Izikoa atsika man̈ano zen̈y, ho hita fa atsika ten̈a mahinakinaka olo, tia olo, sady tiho kamaradinolo io. Ravoravo Jehovah izikoa atsika tia mandrasa raha anan̈antsika han̈ampian̈a olo sahiran̈a, karaha ataony hanin̈y, na raha higiahin̈y, na fotoan̈antsika. (1 Pet. 4:8-10) Tsy voatery ho mora tia mandray vahiny zen̈y. Nan̈ino?

15-16. a) Ino mahavy olo sasany kamo handray vahiny? b) Ino raha nan̈ampy Edit hazoto handray vahiny?

¹⁵ Mety tsy hazoto handray vahiny atsika nohony raha mandalo amy fiain̈anantsika amy zioty, na raha niain̈antsika taloha, na efa atsika foeky tsy zatra. Karaha zen̈y zioty Edit. Izio ranabavy efa maty vady. Taminizy mbala tsy Vavolombelon̈o Jehovah, izy kamo mandray vahiny. Tan̈atiny dinikinany, olo hafa fo mahavita mandray vahiny zen̈y fa tsy izy.

¹⁶ Nan̈ova izy koa fa nanjary Vavolombelon̈o Jehovah. Nifen̈y izy handray vahiny. Karaha ty nivolan̈iny Edit: “Tamy zahay nan̈orin̈y Tran̈o Fivorian̈a taminay teto, nisy antipan̈ahy nivolan̈a taminaka fa hisy olo fivadiany ho avy han̈ampy zahay tamy fan̈oren̈ana io, ke tsao zaho afaka mangala iro antran̈onaka, an̈atiny herin̈iandra aroe iô.” Tsaroany Edit fomba nitahiany Jehovah man̈angy maty vady ta Zarefata in̈y, ke izy nan̈eky. (1 Mpanj. 17:12-16) Nahazo hatsaran̈a tamy Jehovah ma izy? “Tsy aroe herin̈iandra  fo iro nidoko taminaka tao”, ho izy, “fa fanjava aroe. Nanjary kamarady mare zahay!” Tsy zen̈y fo, nanjary nahazo naman̈a maro tamy fiangonan̈a koa Edit. Izy iziô pisava lalan̈a. Ravoravo izy mikaiky piaramanompo antran̈onany, isaka iro baka manompo. An̈y iro miaraka mihinahina. Ho Edit: “Ravoravo zaho man̈amia raha! Ny marin̈y aminany, zaho ny ten̈a mahazo, fotony maro hatsaran̈a azoko.”—Heb. 13:1, 2.

17. Ino raha nampatontohitry Luke ndreky vadiny?

¹⁷ Mbala misy raha mety hankatsarain̈a fo ma atsika ndray efa tia mandray vahiny? Ten̈a tia mandray vahiny Luke ndreky vadiny. Matetiky iro niainvite raimandrenindro, lafamìndro, kamaradindro, baka io piandraikitry faritry ndreky vadiny. Kanefa ho Luke: “Olo fankazatra zahay fo niainvitenay, ela jiaby in̈y.” Iro roe fivadiany efa tia mandray vahiny, kanefa hitandro fa mbala misy raha mety nankatsaraindro. Akory nataondro?

18. Efa tia mandray vahiny Luke ndreky vadiny, fa ino raha mbala nila nifen̈andro?

¹⁸ Nan̈ova Luke ndreky vadiny izikoa fa nangala onon̈o volan̈any Jesosy ty: ‘Izikoa olo efa tia anaro fo tiavinaro, ino hatsaran̈a azonaro baka amy zen̈y?’ (Mat. 5:45-47) Nazava tamindro fa iro mila mangala tahaka Jehovah. Jehovah baka tsy matity, ke tapakevitry iro fa hiainvite piaramanompo mbala tsiary niainvitendro foeky. Ho Luke: “Kila olo nahazo fankahirezan̈a, baka io zahay nahainifankatia fo sady nahainarikitry Jehovah.”

19. Akory ahitan̈a fa pianatrany Kristy ankitin̈y atsika? Tapakevitry han̈ino anao?

¹⁹ Hitantsika tato fa atsika koa tia olo amy fô jiaby, atsika han̈ano raha hisiany fihavanan̈a fo, tsy han̈avakavaka baka io ho tia mandray vahiny. Mila mifen̈y atsika han̈adoso toetsain̈y ratsy anan̈antsika, ke ho tia iro rahalahintsika aby io amy fô jiaby. Ho sambatra atsika koa man̈ano zen̈y, ary ho hitanolo fo fa pianatrany Kristy ankitin̈y atsika.—Jaona 13:17, 35.