1-2. Hano pasowal ci Yis to Yohani 4:35, 36 a sowal hani?

MITAˈELIF ci Yis to kakahaday a omah i, malohlohay ko panay i omah. (Yohani 4:3-6) Maedeng sepatho a folad ngaˈ ngaˈay panayen, kawra sanay ci Yis: ‘Caˈengawen minengneng ko omah, maecakayto, ngaˈayayto a panayen.’ (ˈOsien ko Yohani 4:35, 36.) Fahkaan ko nisawawaan. O maanan ko tatodong no sowal ni Yis hani?

² O mitoroˈan ni Yis cowa ko panay ao tamdaw. Haratengen ˈayaw no somowal ci Yis toniya sowal mifekaday ko maanan a demak. Itiya cowa ka picawmaˈ ko Yutaya tamdaw to Samariya a tamdaw, kawra mitosilan ni Yis ko cecay Samariya a fafahiyan, micadaay cingra. Mihaenay, tiya pasowal ci Yis to ngaˈayayto panayen ko omah i, ˈalomanay a Samariya tamdaw mamiˈaraw ci Yisan. Samanen tahatengil cangra to sowal noya fafahiyan, sapitengilaw to sapasifanaˈ ni Yis. (Yohani 4:9, 39-42) Pakayni toniya maˈoningay, sowal no mikakingkiway to Fangcalay Cudad: “Makalimay cangra mitengil to sowal ni Yis . . . malecaday o ngaˈayayto a panayen cangra.”

3. O pinengneng iso to mitosilan a tamdaw malecaday o ngaˈayayto a panayen a panay i, wa ira ko maanan a sadama to mitosilay a tayal hani?

³ O pinengneng iso to mitosilan a tamdaw malecaday o ngaˈayayto a panayen a panay han? Ano mahaenay i, wa taˈangay ko sadama to mitosilay a tayal. Saka 1, ano citolasay ko toki a mipanay, wa metmeten iso ko toki a mitosil. Saka 2, ano micada ko tamdaw to ngaˈayay lihaf wa lipahak kiso, samanen sowal no Fangcalay Cudad, itini pipanayan lipahakay a maacang ko tamdaw. (Isaya 9:3) Saka 3, miharateng  kiso o mamalo Krisciyang ko kahacecay a tamdaw alatek, mansa misalof to sowal mitosil, milengo to kaciharatengan nangra a demak.

4. Sasamaan kita minanam ci Pawloan hani?

⁴ Cato pakasoˈlin ko Samariya tamdaw ci Yisan sanay ko harateng no nisawawaan alatek, kawra cowa pihaen ko harateng ni Yis. Mihaenay, palecaden ita ci Yisan, o mamalo Krisciyang ko kahacecay tamdaw han ko harateng. Itini toniya pakayraan, ngaˈayay ko demak no tarokos ci Pawlo. Oniya lalakaw wa milengo, ngaˈay kita itini tolo a pakayraan minanam cingraanan: (1) Mafanaˈ to o maanan ko pakasoˈlinan no tao, (2) kilimen ko kaciharatengan no tao a demak, (3) pakasoˈlin to mamalo krisciyang cangra alatek.

5. Mitosil ci Pawlo i sefi i, hano cipinangay to harateng no mitengilay a tamdaw hani?

⁵ Marariday ci Pawlo itini sefi no Yutaya a mitosil. Tinakoen, itini cingra i Tisalonika i, padadotocay i tolo Paselaˈan Romiˈad itini sefi, tano Fangcalay Cudad a padama to Yutaya tamdaw. (Dmak 17:1,  2) O Yutaya tamdaw ci Pawlo, cipinangay to harateng no Yutaya tamdaw, mananamayho to sefi. (Dmak 26:4, 5) Mansa mitosil cingra to Yutaya tamdaw iraay ko pakasoˈlinay falocoˈ.—Filipi 3:4, 5.

6. Itiniay i kaˈalomanan ato i sefiay a tamdaw no Atin o maanan ko kasasiromaan?

⁶ Samanen tahacadaay to sapalak, mikitini i Tisalonika milaliway ci Pawlo tayra i Piriya, ikor tayraay i Atin. Itini i Atin i, ‘itiniay cingra i sefi malacafay to Yutaya tamdaw ato roma midokoay to Kawas a tamdaw malalengo.’ (Dmak 17:17) Kawra itini cingra i kaˈalomanan a mitosil i, cowato kalecad ko mitengilay a tamdaw, ˈalomanay ko ˈalafang a tamdaw, o citanengay tamdaw. O ‘faelohay a kimad’ sanay ko piharateng nangra to misowalan ni Pawlo, sanayho ko sowal: ‘O misowalan iso, o kafahkaan a demak.’—Dmak 17:18-20.

7. Pakayni Dmak 17:22, 23, samaanay ci Pawlo a misalof to pakayraan ningra a mitosil?

⁷ ˈOsien ko Dmak 17:22, 23. Ano mitosil ci Pawlo to ˈalafang a tamdaw i, cowa kalecad to pitosil to Yutaya tamdaw. Miharatengay cingra alatek: “O Atin tamdaw o maanan ko pakasoˈlinan hani?” Misimsimay cingra to kaˈorip ato nanaman no itiraay tamdaw, mikilim to kalecadan no pihakelongan nangra ato Fangcalay Cudad. O sowal no micekiway to Fangcalay  Cudad sanay: “O Yutaya a Krisciyang ci pawlo, mafanaˈay cingra o midokoan no Kirisiya tamdaw, cowa ko midokoan no Yutaya ato Krisciyang a Kawas. Kawra padamaan ningra ko Atinay a tamdaw mihapinang, ora mitenakan ningra a Kawas cowa ko kafahalan nangra.” Makahiay ci Pawlo misalof to pakayraan a mitosil. Pasowalan ningra ko Atin a tamdaw, o milasilan ningra a lihaf mikitiraay toya ‘cowa ko kafanaˈan a midokoan nangra a Kawas.’ Soˈlin cowa ka nanam ko ˈalafang tamdaw to Fangcalay Cudad, cowa pisaˈosi ci Pawlo to cowa ko mamalo Krisciyang cangra, o ngaˈayay panayen cangra sanay ko pinengneg, mitoor to saali nangra a misalof.

8. (1) Samanay kiso mihapinang to o maanan ko pihakelongan no cilomaˈay? (2) Ano pasowal ko tao to pihakelongan no niyah, wa samaan kiso pacaˈof?

⁸ Palecaden ita ci Pawloan misongilaˈ a mihapinang to o maanan ko pihakelongan no cilomaˈay. Tinakoen ngaˈayay haratengen ita: Oniya lomaˈ ato paliding iraay ko mikiriwiˈay a dafong han? O ngangan, caˈedong, o sowal no tao paihkalay to o maanan ko pihakelongan ningra han? Latekay, pasowalay ko tao to pihakelongan no niyah. Cecay ci Folotora a mikiriwiˈay misakafahay malitemoh ko mahaenay a pakayraan saan ko sowal: “Cowa pacieci kako papicada tisowanan to pihakelongan ako, sapilengoaw aca tisowanan to cecay salicay.”

9. Ano iraay ko pihakelongan no tao, wa ira ko maanan kalecadan namo a demak hani?

⁹ O maanan ko hasowal iso to iraay ko pihakelongan a tamdaw hani? Kilimen ko kalecadan a demak. Tinakoen, pakasoˈlinay cingra to iraay ko cecay soˈlinay Kawas, anca pakasoˈlin to mamilidong ci Yis to tamdamdaw. Alatek pakasoˈlinay cingra, ano adihayay ko tatiihay tamdaw ato demak nohatini, mangataayto ko salikoray romiˈad. Mihaen, ngaˈayay tooren iso ko kalecadan a demak, tano kaolahan no tao a pakayraan malalengo cingraanan.

10. Wa misongilaˈ kita cipinang to maanan hani? Misamaanay?

¹⁰ Haratengen, o roma tamdaw cowa pakasoˈlin to kimad no pihakelongan no niyah alatek. Mihaenay, soˈlin pasowal ko tamdaw to iraay ko pihakelongan, misongilaˈ a cipinang to o maanan ko pakasoˈlinan ningra. Cecay itiniay Australia a mikiriwiˈay misakafahay ci Taywi, sanay: “Pacamoran no tamdaw ko taneng no tamdaw ato pihakelongan.” Itiniay Alpania ci Tonaeta sanay: “Sowal no roma tamdaw o mihakelongay to kiyokay, kawra cowa pakasoˈlin to iraay ko Kawas.” Itiniay Aktin a misakafahay sanay,  pakasoˈlinay ko roma tamdaw to toloay cecayay ko tireng, kawra cowa pakasoˈlin cangra to malecaday a Kawas ko Wama, wawa, ato fangcalay saocor. Sanay cingra: “Mafanaˈ tonini, madoloayto makilim ko kalecadan a demak to cilomaˈay.” Mihaenay, cipinang to o maanan ko pakasoˈlinan no tao, o mamalecad ci Pawloan, ano masamaanay tamdaw i malo o masamaanay a tamdaw.—1 Korinto 9:19-23.

11. Pakayni Dmak 14:14-17, tano kaolahan no tao a pakayraan ci Pawlo a mitosil, samaanay ko pidemak ningra?

¹¹ ˈOsien ko Dmak 14:14-17. Mahapinang ni Pawlo ko kaciharatengan no tao a demak i, misalofay to hasowal ningra. Tinakoen, awaay ko kafanaˈan no Losete a tamdaw to Fangcalay Cudad, hato oyaan kafanaˈan nangra a demak ko misowalan ni Pawlo, tinakoen o pipanayan ato kalipahakan a demak i nokaˈorip. O sowal ato tinakoan ni Pawlo sahtoay o kafanaˈan no tao.

12. Sasamaan kiso mihapinang to o maanan ko kaciharatengan no cilomaˈay, dotoc salofen ko sakayat a sowal mitosil hani?

¹² O mamihapinang kita, o maanan ko kaciharatengan no cilomaˈay, dotoc salofen ko sakayat a sowal mitosil. Ano tayni kiso i fawahan no cilomaˈay anca maˈaraw ko cecay tamdaw i, samaan mafanaˈ to o maanan ko kaciharatengan ningra hani? Songilaˈen a mihapinang. Mitistisay cingra to pinaloma, miasipay to cudad, misiwliay to paliding, anca o roma a demak. Itiya wa ngaˈay lengoen kora midemakan ningra. (Yohani 4:7) Latekay, o caˈedong wa padama kitaanan cipinang cingraanan, tinakoen o kitakit, o tayal, anca kaolahan a mimaliay. Cecay salikaka ci Kosetao, sanay cingra: “Maˈaraw ako ko rikoˈ no cecay 19 ko mihecaan a kapah, iraay ko sasing no cecay haiyo. Milicayan ako cingra toniya rikoˈ, pasowalay cingra to hano maolah cingra toniya haiyo. Ikor, misatapangay cingra minanam to Fangcalay Cudad, o salikakato ita cingra nohatini.”

13. Sasamaan kiso padama to tao mihapinang, minanam to Fangcalay Cudad taˈangayay ko sapadama cingraanan hani?

 ¹³ Mitahidang kiso to tao minanam to Fangcalay Cudad i, padamaen cingra mihapinang to taˈangayay ko sapadama cingraanan. (Yohani 4:13-15) Cecay fafahiyan salikaka ci Papi, kinacecayay mitosil cingra i, mitahidangay ko cecay fafahiyan pakamaroˈ cingraanan. Mikitini cacafiˈan mahapinangay ni Papi, o singsi koniya fafahiyan, sanay pasowal, o pinanam to Fangcalay Cudad ato saˈopo niyam o ngaˈayay a pipasifanaˈ. Misatapangay cingra minanam to Fangcalay Cudad, saka 2 romiˈad mirienangayto saˈopo, ikor mirienangay to kasapala taykay, ikor no cecay miheca micadaay to paputisem. Ngaˈayay kiso miharateng: “O kaciharatengan no milisoˈan o maanan hani? Wa ngaˈay pahapinangen ako cingra, minanam to Fangcalay Cudad taˈangayay ko sapadama cingraanan han?”

14. Sasamaan patatodong to cowa kalecad a pacekiwan ko pinanam to Fangcalay Cudad?

¹⁴ Ano misatapang kiso pasifanaˈ to Fangcalay Cudad i, salalangien ko lalengawan ato kaciharatengan no pacekiwan a misaday to lalakaw. Ano misaday kiso i, haratengen o maanan a sinael ko aasipen iso, o maanan a ika ko papasadaken, o maanan a sapatinako ko saka demaken. Ngaˈayay haratengen iso: “O maanan a demakan ko mamitemer to falocoˈ no pacekiwan hani? (Taneng 16:23) Itini Alpania cecay misakafahay ci Folora, pasowalay ko pacekiwan: “Pasangaray kako pakasoˈlin to mamiliyaw maˈorip.” Cowa paciecien ni Folora ko pacekiwan a pakasoˈlin, sanay cingra: “Harateng ako wa isalakatho a cipinang cingra, o mikiˈokay tonini a Kawas o masamaanay a Kawas.” Mikitiya misatapang, misaliyaliyawan ni Folora milengo to olah, taneng ato ˈicel ni Yihofa. Ikor micadaayto cingra miliyaw maˈorip a kimad, nohatini o Misawacayay Tamdaw ni Yihofa cingra.

15. Pakayni Dmak 17:16-18, cowa ka rihaday ci Pawlo to maanan a demak no Atin a tamdaw hani? Kawra hano kamayan a tosilen ni Pawlo cangra hani?

¹⁵ ˈOsien ko Dmak 17:16-18. Soˈlin mitaˈongay to samiay ko Atin a tamdaw, masemer to taneng no tamdaw, malafoayho ko kaˈorip, malikafay ci Pawloan, kawra kamayan tosilen ni Pawlo cangra. Ci Pawlo na ‘pakaditay to Kawas, mipalakay, misamsamay to tamdaw’ ko niyah. (1  Timoti 1:13) Kawra, awaayto ko kapo cowa kahaen ko pinengneng ni Yis cingraanan, mansa pakasoˈlin ci Pawlo o mamafalic ko roma a Atin tamdaw. Ikorto soˈlinay malo Krisciyang ko roma Atin tamdaw.—Dmak 9:13-15; 17:34.

16-17. Masakenaay tamdaw hano mamalo Krisciyangay alatek? Tinakoen.

¹⁶ Itini saka 1 hahekalan, masakenaay tamdaw malo Krisciyangay. Patikami ci Pawlo to Korintoay a Krisciyang i, somowalay to na midemakay cangra to mararaway a demak, malafoay ko kaˈorip, kawra ‘maharekayto a mikorac’ cangra. (1 Korinto 6:9-11) Ano itiraay kiso toya lintad a maˈorip, wa pakasoˈlin kiso to ngangaˈay mafalic koya tamdaw han?

¹⁷ Anini ˈalomanay tamdaw makahiay a mafalic, malo Krisciyang. Itiniay Australia mahapinangay no cecay mikiriwiˈay misakafahay, o masakenaay tamdaw mamicada to kimad no Fangcalay Cudad alatek. Kinacecayay, itini cingra i pacakayay to lomaˈ a kosi maˈaraway ko cecay kaemangay fafahiyan, mafulatikay ko tireng  noniya fafahiyan, falongafong sanay ko rikoˈ. Sanay koniya salikaka: “Satapang aca cisasaay ko harateng ako, kawra kamayan a pasowal cingraanan, telocto maolahay cingra to Fangcalay Cudad, o mafolatikay ko tireng masowalay no ˈOlic.” Ikor, misatapangay cingra minanam to Fangcalay Cudad ato mirienang to saˈopo. *

18. Hano cowa ka ngaˈay kita misaˈosi to mamanaˈay ko tao to soˈlinay kimad hani?

¹⁸ Sowal ni Yis ngaˈayayto panayen ko omah, o mamihakelong ko ˈalomanay tamdaw cingraanan sanay han? Cowa. Pairasolay ko Fangcalay Cudad cowa ka ˈaloman ko mihakelongay ci Yisan sanay. (Yohani 12:37, 38) Pafeselay ko pinengneng ni Yis to falocoˈ no tamdaw, mafanaˈay cingra cowa kakahi ko ˈalomanay micada to sowal ningra. (Matay 9:4) Fanekfekayho cinga mitosil to tamdaw, padotocayho ciharateng to pakasoˈlinay tamdaw. Ano cowa pafesel ko pinengneng ita to falocoˈ no tamdaw, cowa ko ngangaˈay misaˈosi to mamanaˈay ko tao to soˈlinay kimad, oha papakasoˈlin kita o kahacecay tamdaw o mamalo Krisciyang alatek. Ci Make itiniay i Pocinafaso malo misakafahay, sanay cingra: “O mamacakat a tamdaw konini saan kako, ˈarawhan paselaˈay a minanam, kawra oya cowa ka tawlik a tamdaw ngaˈayay ko kacakat. Mihaenay, oha mamicada kita to sakayat no fangcalay saocor ni Yihofa, padama kitaanan mikilim to soˈlinay makalim to kimad a tamdaw.”

19. Sasamaan ko pinengneng ita to tao hani?

¹⁹ Ano nengnengen ko papotal, cowa ko ngaˈayay panayen ko ˈalomanay tamdaw, kawra haratengen ko sowal ni Yis, maecakayto ko omah, ngaˈayayto panayen sanay. Pinengneng ni Yihofa mamalo Krisciyang ko kahacecay tamdaw, malo ‘odoˈ’ i pinengneng Ningra. (Hakay 2:7) Ano malecad kita ci Yihofaan aci Yisan a minengneng to tao, mamisongilaˈ a cipinang to lalengawan ato kaciharatengan nangra a demak, o mamalo salikaka noikor han ko pinengneng cangraanan.