1, 2. Иса Мәсиһ Јәһја 4:35, 36 ајәләриндәки сөзләри дејәркән нә нәзәрдә тутурду?

ИСА МӘСИҺ тарлаларын арасы илә јол ҝедирди. Чох ҝүман ки, һәмин вахт тахыл тәзәҹә бој атмаға башламышды (Јәһ. 4:3—6). Мәһсул тәхминән дөрд ај сонра бичинә һазыр олаҹагды. Одур ки, Иса Мәсиһин дедији нөвбәти сөзләр инсанлара гәрибә ҝәлә биләрди: «Башынызы галдырын вә тарлалара бахын, мәһсул јетишиб, бичинә һазырдыр». (Јәһја 4:35, 36 ајәләрини охујун.) О, нәји нәзәрдә тутурду?

² Ајдындыр ки, Иса Мәсиһ мәҹази бичиндән, инсанлары топламагдан данышырды. Бир аз өнҹә баш верәнләрә диггәт јетирин. Јәһудиләрлә сәмәријјәлиләр арасында һеч бир мүнасибәт олмадығы һалда, Иса сәмәријјәли гадына тәблиғ етмишди вә гадын ону динләмишди! Белә ки, Иса Мәсиһ мәһсулун бичинә һазыр олдуғундан данышан вахт һәмин гадындан Иса һагда ешидән хејли сәмәријјәли ону динләмәјә ҝәлирди (Јәһ. 4:9, 39—42). Мүгәддәс Китабы шәрһ едән бир китабда дејилир: «Инсанларын ҹанфәшанлығы онларын бичинә һазыр тахыла бәнзәдијини ҝөстәрирди».

3. Инсанлара Иса Мәсиһин јанашдығы кими јанашмаг тәблиғ фәалијјәтинизи неҹә јахшылашдыраҹаг?

³ Бәс сизин мүждә чатдырдығыныз инсанлар барәдә нә демәк олар? Сиз онлара «бичинә һазыр олан тахыл» кими јанашырсыныз? Беләдирсә, бу өзүнү үч шејдә ҝөстәрәҹәк. Биринҹиси, сиз тәблиғ ишинин нә гәдәр тәҹили олдуғуну нәзәрә алараг даһа сәјлә хидмәт едәҹәксиниз. Чүнки бичин дөврү мәһдуддур, вахт итирмәк олмаз. Икинҹиси, инсанларын хош хәбәрә һај вердијини ҝөрдүкҹә даһа хошбәхт олаҹагсыныз. Мүгәддәс Китабда дејилир: «Бичин вахты севинән адамлартәк... севиндиләр» (Әшј. 9:3). Үчүнҹүсү, тәблиғ етдијиниз һәр инсана Мәсиһин ҝәләҹәк шаҝирди  кими бахаҹагсыныз. Буна ҝөрә дә онлара мараглы ҝәләҹәк мөвзуда тәгдимат һазырлајаҹагсыныз.

4. Бу мәгаләдә һәвари Булус һагда нә өјрәнәҹәјик?

⁴ Бәлкә дә, Иса Мәсиһин давамчылары дүшүнүрдү ки, сәмәријјәлиләр һеч вахт онун шаҝирди ола билмәз. Амма Иса белә дүшүнмүрдү. Әксинә, онлара ҝәләҹәк шаҝирди кими јанашырды. Биз дә саһәмиздәки инсанлара Мәсиһин ҝәләҹәк шаҝирди кими јанашмалыјыг. Һәвари Булус бу саһәдә бизә ҝөзәл нүмунә гојуб. Ондан нә өјрәнә биләрик? Бу мәгаләдә арашдыраҹағыг ки, Булус 1) тәблиғ етдији инсанларын нәјә инандығыны неҹә мүәјјән едирди, 2) онларын мараг даирәсини неҹә өјрәнирди вә 3) нәјин сајәсиндә онлара Мәсиһин ҝәләҹәк шаҝирди кими јанашырды.

5. Нәјә ҝөрә һәвари Булуса синагога ҝәләнләрлә данышмаг раһат иди?

⁵ Һәвари Булус јәһуди синагогунда тез-тез тәблиғ едирди. Мәсәлән, Салоникидәки синагогда «үч шәнбә далбадал [јәһудиләрлә] Мүгәддәс Јазылара әсасланараг сөһбәт» апармышды (Һәв. 17:1, 2). Ҝөрүнүр, синагогда данышмаг Булуса раһат иди. О, јәһуди иди (Һәв. 26:4, 5). Јәһудиләрин нәјә инандығыны билдијинә ҝөрә онлара раһатлыгла тәблиғ едирди (Филип. 3:4, 5).

6. Афинанын базар мејданындакы инсанлар Булусун синагогда тәблиғ етдији инсанлардан нә илә фәргләнирди?

⁶ Һәвари Булус ону тәгиб едәнләрин әлиндән Салоникијә, даһа сонра исә Веријаја гачмалы олмушду. Орадан да Афинаја ҝәлмишди. О, бурада да «синагогда јәһудиләрлә вә Аллаһа ибадәт едән диҝәр адамларла... сөһбәт етмәјә» башламышды (Һәв. 17:17). Амма базар мејданында тәблиғ етдији инсанлар синагога ҝәләнләрдән фәргләнирди. Онларын арасында философлар вә диҝәр гејри-јәһудиләр дә вар иди. Бу инсанлар Булусун дедикләринә «јени тәлим» кими јанашырды. Она белә дејирдиләр: «Сөзләрин бизә гәрибә ҝәлир» (Һәв. 17:18—20).

7. Һәвариләрин ишләри 17:22, 23 ајәләринә әсасән, Булус тәблиғ үсулуну неҹә дәјишмишди?

⁷ Һәвариләрин ишләри 17:22, 23 ајәләрини охујун. Һәвари Булус Афинадакы гејри-јәһудиләрә синагогдакы јәһудиләрә тәблиғ етдији кими тәблиғ етмирди. Ҝөрүнүр, о, Афинадакы инсанларын нәјә инандығы һагда дүшүнүрдү. Булус әтрафы диггәтлә мүшаһидә едир, әһалинин дини ајинләринә фикир верирди. Даһа сонра онларын ибадәтләри илә Мүгәддәс Јазыларда үст-үстә дүшән мәгамлар тапырды. Бир Мүгәддәс Китаб шәрһчиси дејир:  «Јәһуди мәсиһи олараг о баша дүшүрдү ки, бүтпәрәст јунанлар јәһудиләрин вә мәсиһиләрин ибадәт етдији тәк Аллаһа ибадәт етмир. Бунунла белә, һаггында данышдығы Аллаһын әслиндә афиналылар үчүн јад олмадығыны ҝөстәрмәјә чалышырды». Беләҹә, Булус тәблиғ үсулуну онлара ујғунлашдырырды. О, афиналылара демишди ки, елә онларын сәҹдә гылдыглары «Намәлум Аллаһ» һагда данышыр. Башга халгдан оланлар Мүгәддәс Јазыларла таныш олмасалар да, Булус онларын мәсиһи олмајаҹағы гәнаәтинә ҝәлмәмишди. Әксинә, онлара «бичинә һазыр олан тахыл» кими јанашырды вә тәгдиматыны онлара ујғунлашдырырды.

8. а) Әразиниздәки инсанларын нәјә инандығыны неҹә мүәјјән едә биләрсиниз? б) Өз дини олдуғуну дејән шәхсә нә демәк олар?

⁸ Һәвари Булус кими мүшаһидәчи олун. Әразиниздәки инсанларын нәјә инандығыны билмәјинизә көмәк едәҹәк шејләрә фикир верин. Евә баханда ев сакини һагда нә демәк олар? Сакинин адындан, хариҹи ҝөркәминдән вә ја ишләтдији сөзләрдән онун дини мәнсубијјәтини мүәјјән етмәк олар? Бәлкә дә, өзү шәхсән дејиб ки, өз дини вар. Бир хүсуси өнҹүл бу ҹүр мәгамларда белә дејир: «Мәгсәдим сизә өз диними гәбул етдирмәк дејил, садәҹә сизинлә бир мөвзу барәдә данышмаг истәјирәм...»

9. Диндар инсанла һансы ортаг мөвзуда данышмаг олар?

⁹ Диндар инсанла һансы мөвзуда данышмаг олар? Ортаг мөвзу тапмаға чалышын. Ола билсин, о, тәк Аллаһа ибадәт едир, Иса Мәсиһин пејғәмбәр олдуғуну гәбул едир вә ја тезликлә пислијә сон гојулаҹағы бир вахтда јашадығымыза инаныр. Ортаг инанҹларыныз әсасында Мүгәддәс Китаб мүждәсини бөлүшүн. Онда, чох еһтимал ки, гаршы тәрәф сизи марагла динләјәҹәк.

10. Нә етмәјә чалышмалыјыг вә нә үчүн?

¹⁰ Нәзәрә алын ки, инсанлар динләринин өјрәтдији һәр шеји гәбул етмәјә биләр. Буна ҝөрә дә тәблиғ етдијиниз инсанын һансы динә мәнсуб олдуғуну өјрәнәндән сонра онун шәхсән нәјә инаныб-инанмадығыны өјрәнмәјә чалышын. Австралијада хүсуси өнҹүл кими хидмәт едән Дејвид адлы гардаш дејир: «Инди чохлары фәлсәфә илә дини инанҹлары бирләшдирир». Албанијада јашајан Доналта баҹы дејир: «Тәблиғдә растлашдығымыз бәзи инсанлар һансыса динә мәнсуб олдугларыны десәләр дә, сонра билдирирләр ки, әслиндә Аллаһа инанмырлар». Арҝентинада хүсуси тәјинатлы мүждәчи кими хидмәт едән бир гардаш гејд едир ки, бәзиләри Үч үгнума инандыгларыны десәләр дә, әслиндә, Атанын, Оғулун вә мүгәддәс руһун бир Аллаһ олдуғуна инанмырлар. О дејир: «Буну нәзәрә аланда тәблиғ етдијим инсанла ортаг мөвзу тапмаг даһа асан олур». Одур ки, инсанларын әслиндә нәјә  инандыгларыны өјрәнмәјә чалышын. Онда һәвари Булус кими, сиз дә «һәр ҹүр адам үчүн һәр шеј» олаҹагсыныз (1 Кор. 9:19—23).

11. Һәвариләрин ишләри 14:14—17 ајәләринә әсасән, һәвари Булус Листрадакы инсанларда хош хәбәрә неҹә мараг ојатмышды?

¹¹ Һәвариләрин ишләри 14:14—17 ајәләрини охујун. Һәвари Булус инсанларын нәјә инандығыны өјрәнир вә тәгдиматыны онлара ујғунлашдырырды. Мәсәлән, Листрадакы инсанларын Мүгәддәс Јазылар һагда демәк олар ки, һеч бир билији јох иди. Буна ҝөрә дә Булус онлара ајдын олаҹаг дәлилләр ҝәтирирди. Онларла бол мәһсул, һәјатдан зөвг алмаг баҹарығы һагда данышырды. О, динләјиҹиләринин асанлыгла баша дүшәҹәји сөз вә нүмунәләрдән истифадә едирди.

12. Инсанын мараг даирәсини өјрәнмәк вә тәгдиматынызы она ујғунлашдырмаг үчүн нә едә биләрсиниз?

¹² Әразиниздәки инсанлара нәјин мараглы олаҹағыны билмәк үчүн бәсирәтли олун вә тәгдиматынызы онлара ујғунлашдырын. Инсана, јахуд евинә јахынлашаркән онун мараг даирәсини неҹә мүәјјән едә биләрсиниз? Гејд олундуғу кими, мүшаһидәчи олун. Ола билсин, инсан бағ-бағчаја гуллуг едир, китаб охујур, машыныны тәмир едир вә ја башга бир иш ҝөрүр. Мүнасибдирсә, елә инсанын мәшғулијјәти әсасында сөһбәтә башламаг олар (Јәһ. 4:7). Һәтта инсанын ҝејиминдән дә онун миллијјәти, пешәси, һәтта севдији идман командасы һагда нәсә өјрәнмәк олар. Густаво дејир: «Мән көјнәјиндә мәшһур мүғәннинин шәкли олан 19 јашлы бир оғланла сөһбәтә башладым. Ондан көјнәјиндәки шәкил барәдә сорушдум, о да һәмин мүғәннини нә үчүн бәјәндијини сөјләди. Бу сөһбәт Мүгәддәс Китаб дәрсинә апарыб чыхарды вә инди һәмин оғлан бизим гардашымыздыр».

13. Мүгәддәс Китаб дәрсини неҹә тәклиф едә биләрсиниз ки, инсанда мараг ојансын?

¹³ Мүгәддәс Китаб дәрсини елә тәклиф един ки, инсанда мараг ојансын; өјрәндикләринин онун һәјатыны неҹә јахшылашдыраҹағыны ҝөстәрин (Јәһ. 4:13—15). Мисал үчүн, һәгигәтә мараг ҝөстәрән бир гадын баҹыны евинә дәвәт  етди. Баҹы евә дахил оланда дивардакы сертификаты ҝөрүб анлады ки, гадын педагоҝика үзрә профессордур. О, гадына билдирди ки, биз дә Мүгәддәс Китабын тәлим програмы вә ибадәт ҝөрүшләримиз васитәсилә инсанлары маарифләндиририк. Гадын Мүгәддәс Китабы өјрәнмәјә разылыг верди, сәһәриси ҝүн ибадәт ҝөрүшүнә ҝетди, даһа сонра исә рајон топлантысына гатылды. Бир ил сонра вәфтиз олунду. Одур ки, нөвбәти суаллар үзәриндә дүшүнүн: «Тәкрар сөһбәт етдијим инсанлар үчүн нә мараглыдыр? Инсанларда Мүгәддәс Китаб дәрсләринә мараг ојада биләрәм?»

14. Мүгәддәс Китаб дәрсини һәр шаҝирдә неҹә ујғунлашдыра биләрсиниз?

¹⁴ Мүгәддәс Китаб дәрсинә башладыгдан сонра исә һәр дәрсә һазырлашын. Шаҝирдин аиләси, тәһсили, јашадыглары вә мараг даирәси һагда дүшүнүн. Һазырлашаркән Мүгәддәс Китаб һәгигәтләрини изаһ етмәк үчүн охујаҹағыныз ајәләри, ҝөстәрәҹәјиниз видеолары вә чәкәҹәјиниз нүмунәләри әввәлҹәдән фикирләшин. «Шаҝирдә нә мараглы ҝәлә биләр вә үрәјинә нә тәсир едә биләр?» — суалы үзәриндә дүшүнүн (Мәс. 16:23). Албанијада Флора адлы өнҹүл баҹынын дәрс кечдији бир гадын гәти шәкилдә демишди ки, «мән дирилмә тәлимини гәбул едә билмәрәм». Флора гадына бу тәлими гәбул етдирмәјә чалышмады. О дејир: «Мән дүшүндүм ки, әввәлҹә о, дирилмәни вәд едән Аллаһы танымалыдыр». О вахтдан башлајараг Флора һәр дәрсдә Јеһованын мәһәббәтини, һикмәтини вә гүдрәтини вурғулајырды. Бир мүддәт сонра һәмин гадын дирилмәјә асанлыгла иман ҝәтирди. Һал-һазырда о, Јеһованын фәал хидмәтчисидир.

15. Һәвариләрин ишләри 17:16—18 ајәләринә әсасән, афиналыларын һансы давранышы Булусу әсәбиләшдирмишди, бәс нәјә ҝөрә онлардан әлини үзмәди?

¹⁵ Һәвариләрин ишләри 17:16—18 ајәләрини охујун. Һәвари Булус Афина шәһәринин бүтләрлә, әхлагсызлыгла вә бүтпәрәстликдән доған фәлсәфә илә долу олдуғуну ҝөрсә дә, афиналылардан әлини үзмәди. Һәтта онлар Булусу тәһгир етсәләр дә, о, тәблиғ етмәјә давам едирди. Булус өзү дә, онун тәбиринҹә десәк, әввәлләр күфр данышан, Аллаһын халгыны тәгиб едән вә чох азғын адам иди, амма сонрадан мәсиһи олмушду (1 Тим. 1:13). Неҹә ки Иса Мәсиһ һәвари Булуса ҝәләҹәк шаҝирди кими јанашмышды, еләҹә дә Булус афиналыларын ҝәләҹәкдә Мәсиһин шаҝирди ола биләҹәјинә инанырды. Вә о јанылмады (Һәв. 9:13—15; 17:34).

16, 17. Һәр ҹүр инсанын Мәсиһин шаҝирди ола биләҹәјини нә ҝөстәрир? Нүмунә чәкин.

¹⁶ Биринҹи әсрдә ҹүрбәҹүр мәншәләрдән олан инсанлар Мәсиһин шаҝирди олду. Һәвари Булус јунан шәһәри Коринфдә јашајан мәсиһиләрә мәктубунда гејд етмишди ки, јығынҹагдакыларын бәзиләри бир заманлар ҹинајәткар олуб вә ја сон дәрәҹә позғун һәјат тәрзи сүрүб. Сонра сөзүнә әлавә едиб демишди: «Сизләрдән дә бәзиләри белә иди. Анҹаг сиз... јујулуб тәмизләндиниз» (1 Кор. 6:9—11). Бәс сиз онлара дәјишиб Мәсиһин шаҝирди олаҹаг шәхсләр кими јанашардыныз?

¹⁷ Бу ҝүн бир чохлары Мәсиһин шаҝирди олмаг үчүн лазыми дәјишикликләр етмәјә һазырдыр. Мисал үчүн, Австралијада јашајан Јукина адлы бир хүсуси өнҹүл һәр ҹүр инсанын Мүгәддәс Китабдакы хәбәрә һај верә биләҹәјини анлајыб. Бир дәфә о, дашынмаз әмлак офисиндә оланда бәдәниндә чохлу дөјмәси олан, һәдсиз бош палтар ҝејинмиш бир гадына фикир верир. Јукина дејир: «Бир анлыг чәкиндим, амма сонра онунла данышмаға башладым. Сән демә, Мүгәддәс Китаб онун үчүн о гәдәр дәјәрлидир ки, һәтта дөјмәләринин бәзиләри Зәбур китабындан олан ајәләрдир!» Бу гадын Мүгәддәс Китабы өјрәнмәјә  вә ибадәт ҝөрүшләринә ҝәлмәјә башлады *.

18. Нәјә ҝөрә инсанлар һагда габагҹадан нәтиҹә чыхармамалыјыг?

¹⁸ Иса Мәсиһ тарлаларын бичинә һазыр олдуғуну дејәндә әксәр инсанларын онун давамчысы олаҹағыны ҝөзләјирди? Хејр. Мүгәддәс Китабда габагҹадан дејилмишди ки, аз сајда инсан она иман ҝәтирәҹәк (Јәһ. 12:37, 38). Һәмчинин Иса Мәсиһ үрәкләри охумағы баҹарырды, буна ҝөрә дә чохларынын онун дедикләрини гәбул етмәјәҹәјини билирди (Мәт. 9:4). Буна бахмајараг, Иса диггәтини она иман ҝәтирәҹәк аз сајда инсана ҹәмләмишди вә һәр кәсә ҹидд-ҹәһдлә тәблиғ едирди. Иса белә давранырдыса, ҝөрүн үрәкләри охумаг игтидарында олмајан бизләр тәблиғ етдијимиз әрази вә ја ајры-ајры инсанлар барәдә габагҹадан нәтиҹә чыхармамаг үчүн нә гәдәр еһтијатлы олмалыјыг. Инсанлара Мәсиһин ҝәләҹәк шаҝирди кими јанашмалыјыг. Буркина-Фасода хүсуси тәјинатлы мүждәчи кими хидмәт едән Марк бунунла бағлы дејир: «Инкишаф едәҹәјини дүшүндүјүм инсанлар чох вахт дәрсләри дајандырыр. Әксини дүшүндүјүм инсанлар исә даһа чох инкишаф едир. Беләҹә, ҝөрдүм ки, ән јахшысы Јеһованын руһунун рәһбәрлијинә етибар етмәкдир».

19. Әразимиздәки инсанлара неҹә јанашмалыјыг?

¹⁹ Илк бахышдан елә ҝөрүнә биләр ки, әразимиздә «бичинә һазыр» чох аз инсан тапмаг олар. Амма Иса Мәсиһин шаҝирдләринә дедији сөзләри унутмајын. Мәһсул јетишиб, бичинә һазырдыр. Инсанлар дәјишә биләр вә Мәсиһин шаҝирди ола биләр. Јеһова онлара бу ҹүр јанашыр, онлары «ләл-ҹәваһир» кими ҝөрүр (Һәг. 2:7). Әҝәр биз дә инсанлара Јеһова Аллаһ вә Иса Мәсиһ кими јанашсаг, онларын аиләси, тәһсили, һәјатда јашадыглары вә мараг даирәси һагда өјрәнәҹәјик. Онда онлара јад инсанлар кими јох, ҝәләҹәк баҹы-гардашымыз кими бахаҹағыг.