1-2. Aha do lapatan ni hata ni Jesus na disurat di Johannes 4:35, 36?

TIKKI di pardalanan Jesus, dilewati ibana do akka hauma, jala gok do eme na baru tubu disi. (Joh. 4:3-6) Hira-hira opat bulan nai ma asa boi panenon eme i. Alai sukkun-sukkun do ra roha ni akka halak tikki didok Jesus, “Tatap hamu ma hauma i. Ida hamu ma, nunga masak jala nunga boi panenon.” (Jaha Johannes 4:35, 36.) Aha do lapatan ni hata ni Jesus i?

² Na dihatahon Jesus dison, dang na taringot eme i, alai taringot akka halak na lao dipapungu Jesus asa gabe siseanna. Parrohahon ma aha na masa andorang so dihatahon Jesus taringot i. Baru pe ibana marbarita tu sahalak borua Samaria, nang pe di tikki i dang hea olo halak Jahudi mangattoi halak Samaria. Pittor olo do borua i manangihon Jesus! Jala tikki makkatai dope Jesus taringot hauma na “nunga masak jala nunga boi panenon” i, ro do akka halak Samaria mandapotton Jesus. Nungnga dibege nasida taringot Jesus sian borua i, jadi naeng marsiajar do nasida tu ibana. (Joh. 4:9, 39-42) Sada referensi ni Bibel mandok, “Pittor ro do halak i lao mandapotton Jesus asa manangihon ibana. On patuduhon, songon eme i do nasida, na naung masak jala nunga boi panenon.”

3. Molo ditiru hamu cara marpikkir ni Jesus, gabe boha ma hamu tikki marbarita?

³ Boha do pakkilalaanmuna mangida akka halak na dijuppangi hamu tikki marbarita? Diida hamu do nasida songon eme naung masak na boi panenon? Molo songon i, pasti on do na dihilala hamu: Na parjolo, gabe lam ringgas ma hamu marbarita. Ala diboto hamu terbatas do tikkina lao panen, gabe dang olo be hamu marlemba-lemba. Na paduahon, gabe las ma rohamuna tikki adong halak na olo manangihon barita na uli. Didok di  Bibel, “Marlas ni roha nasida . . . songon las ni roha di gotilon.” (Jes. 9:2) Jala na patoluhon, diida hamu ma ganup halak gabe calon sisean ni Jesus. Jadi, disesuaihon hamu do caramuna marbarita asa menarik di nasida.

4. Aha do na lao taparsiajari sian apostel Paulus di parsiajaran on?

⁴ Piga-piga halak na mangihutton Jesus marpikkir, dang boi halak Samaria gabe sisean ni Jesus. Alai Jesus dang marpikkir songon i. Dianggap Jesus do nasida gabe calon siseanna. Jadi hita pe, ikkon taida do akka halak na di luatta gabe calon sisean ni Jesus. Tatiru ma si Paulus. Aha do na boi taparsiajari sian ibana? Di parsiajaran on, taulas ma songon dia si Paulus (1) mamparsiajari aha do na dihaporseai akka halak na dijuppangi ibana tikki marbarita, (2) mangattusi aha do na menarik di nasida, jala (3) mangida nasida gabe calon sisean ni Jesus.

5. Boasa boi diattusi si Paulus cara marpikkir ni halak na adong di sinagoga?

⁵ Jotjot do si Paulus marbarita di sinagoga ni halak Jahudi. Misalna, tikki di sinagoga Tessalonik, “Saleleng tolu minggu, ganup ari Sabbat, dipangke si Paulus ma Surat na Badia laho mangkata-hatai tu [halak Jahudi].” (Ul. 17:1, 2) Sian keluarga Jahudi do si Paulus, jadi lomo do ra rohana marbarita di sinagoga. (Ul. 26:4, 5) Boi do diattusi ibana cara marpikkir ni halak Jahudi. Jadi malo do ibana paposhon roha ni nasida tikki marbarita.​—Plp. 3:4, 5.

6. Aha do imbar ni akka halak na adong di onan di Atena tu akka halak na dijuppangi si Paulus di sinagoga?

⁶ Tikki diusir akka halak si Paulus sian Tessalonik dohot sian Berea, lao ma ibana tu Atena. Disi, “martukar pingkiran ma ibana di sinagoga rap dohot halak Jahudi songon i nang halak na sian bangso na asing na manomba Debata.” (Ul. 17:17) Alai tikki marbarita ibana di onan, asing do akka halak na dijuppangi ibana disi. Godangan nasida akka guru do, dohot akka halak na so Jahudi. Jadi barita na dipasahat si Paulus i, ‘ajaran na baru’ do i di nasida. Jadi didok nasida ma tu ibana, “Ndang hea dope hubege hami taringot i”.​—Ul. 17:18-20.

7. Songon na disurat di Ulaon ni Apostel 17:22, 23, songon dia do si Paulus menyesuaihon carana marbarita na uli?

⁷ Jaha Ulaon ni Apostel 17:22, 23. Dang sarupa cara ni si Paulus marbarita tu halak Atena songon cara ni ibana marbarita tu akka halak Jahudi na di sinagoga. Ra, dirimangi ibana do, ‘Aha do na dihaporseai halak Atena on?’ Manat ma diparrohahon ibana humaliangna, jala diparrohahon do boha agama  ni akka halak disi. Dung i, dilului si Paulus ma ajaran sian Bibel na mirip tu ajaran na dihaporseai nasida. Sahalak komentator ni Bibel mandok, “Ala halak Kristen na sian Jahudi do si Paulus, diboto ibana do molo halak Junani dang manomba Debata na ‘sittong’ songon na disomba halak Jahudi dohot halak Kristen. Alai marsitutu do si Paulus patuduhon molo sasittongna Debata na disomba ibana i tong do boi ditanda halak Atena.” Jadi disesuaihon si Paulus do carana marbarita. Dipaboa ibana do tu halak Atena, molo barita na dipasahatna i ro sian “Debata na So Tinanda”, na naeng disomba nasida saleleng on. Nang pe dang diboto nasida surat na badia, alai dang gabe didok si Paulus na so boi nasida gabe halak Kristen. Diida ibana do nasida songon eme na boi panenon. Jadi disesuaihon ibana do carana marbarita na uli tu nasida.

8. (a) Boha carana asa taboto aha na dihaporseai halak na tajuppangi? (b) Molo adong na mandok nungnga maragama nasida, boha ma alusta?

⁸ Songon si Paulus, manat ma parrohahon aha na adong di humaliangta tikki marbarita. Ida ma akka tanda na adong, asa diboto hamu aha do na dihaporseai akka halak na dijuppangi hamu. Parrohahon ma, akka hiasan aha do na adong dibahen di jabuna? Jala sian goarna, pakkeanna, dohot carana makkatai pe boi do taboto aha do agama ni nasida. Ra, adong do na pittor paboahon molo nasida nungnga maragama. Tikki adong na mandok songon i tu sahalak perintis istimewa, didok ibana do, “Tujuannami ro tuson, dang na lao mamaksahon hamu asa mangihutton aha na dihaporseai hami. Holan naeng makkatai taringot on do hami . . . ”

9. Aha do topik na boi diulas hamu tikki pajuppang tu akka halak na taat maragama?

⁹ Aha do na boi diulas hamu dohot halak na taat maragama? Lului ma aha do na sarupa sian Bibel tu ajaran na dihaporseai nasida. Ra, porsea do ibana holan sada do Debata na sittong. Porsea do ibana molo Jesus i sipalua saluhut jolma. Manang porsea do ibana tokkin nai lao diripashon nama akka parjahat. Sian akka ajaran i, boi ma dipasahat hamu barita sian Bibel asa menarik i di nasida.

10. Aha do muse na ikkon taulahon, jala boasa?

¹⁰ Nang pe nungnga diboto hamu aha agamana, porlu do muse diboto hamu aha do sasittongna na dihaporseai ibana. Alana, dang sude halak na maragama porsea tu sude na diajarhon agama ni nasida. Sahalak perintis sian Australia na margoar si David mandok, “Godang do halak saonari mangakku maragama, alai tong do porsea tu poda na diajarhon jolma.” Si Donalta sian Albania pe  mandok, “Piga-piga halak mangakku maragama, alai ujungna diakkui nasida ma, sasittongna dang porsea nasida tu Debata.” Sahalak misionaris sian Argentina mangida molo piga-piga halak porsea tu ajaran Debata Sitolusada, alai sasittongna dang pos roha ni nasida molo, Ama, Anak dohot tondi parbadia i sada. Didok ibana, “Molo taboto sude taringot i, gabe ummura ma hita mangalului topik na pas tu nasida.” Jadi lului ma aha do na sasittongna dihaporseai halak. Songon si Paulus, boi ma hamu ‘mambahen sian nasa gogo lao mangurupi sude halak’.​—1 Kor. 9:19-23.

11. Songon na disurat di Ulaon ni Apostel 14:14-17, boha do cara ni si Paulus pasahatton barita na uli tu akka halak na di Listra?

¹¹ Jaha Ulaon ni Apostel 14:14-17. Diparrohahon si Paulus do aha na menarik di akka halak. Dung i, disesuaihon ibana ma carana marbarita hombar tusi. Misalna, di Listra otik do parbinotoan ni halak taringot Hata ni Debata. Jadi, dipillit si Paulus ma topik na boi diattusi nasida. Dihatai ibana ma taringot musim panen. Dohot boha carana asa boi marlas ni roha. Dipakke ibana do hata dohot tudosan na mura diattusi nasida.

12. Songon dia do caratta mamboto aha na menarik di sasahalak jala menyesuaihon caratta marbarita tu nasida?

¹² Marsitutu ma hamu mamparrohahon aha na menarik di akka halak. Jala, sesuaihon hamu ma caramuna marbarita hombar tusi. Holan taida pe halakna manang jabuna boi do taattusi aha na menarik di sasahalak. Boha carana? Sahali nai, parrohahon ma aha na di humaliangmuna. Ra, pajuppang do hita dohot halak na markobun, na manjaha bukku, na paturehon karetana, manang na asing. Molo cocok tikkina, boi do dibahen hamu i gabe topik lao makkatai tu nasida. (Joh. 4:7) Jala, sian pakkean ni halak pe boi do taboto sian dia do asalna, aha do karejona, manang tim olahraga dia do na lomo rohana. Donganta na margoar si Gustavo marcarita, “Makkata-hatai ma au tu sahalak doli-doli na marumur 19 taon. Di bajuna adong gambar ni sahalak parende na  terkenal. Husukkun ma tu ibana taringot parende i. Jala dipaboa ibana do boasa lomo rohana tu parende i. Sian pakkataion i, gabe olo ma ibana marsiajar Bibel, jala saonari nungnga gabe Sitindangi be ibana.”

13. Songon dia do asa menarik caratta tikki menawarhon parsiajaran Bibel?

¹³ Tikki menawarhon parsiajaran Bibel tu sasahalak, pakke ma cara na menarik di ibana. Paboa ma aha do labana marsiajar Bibel tu ibana. (Joh. 4:13-15) Misalna, adong pengalaman ni sahalak donganta na margoar si Poppy. Hea do ibana ditogihon sahalak borua masuk tu jabuna. Di dinding ni jabuna i, dibereng si Poppy adong sertifikat na patuduhon molo borua i sahalak profesor di bidang pendidikan. Jadi dipaboa si Poppy ma, Sitindangi ni Jahowa pe las do rohana mangajari akka halak marhite parsiajaran Bibel dohot parpunguan. Gabe olo ma borua i marsiajar Bibel. Marsogotna i, ro ma ibana tu parpunguan. Jala ro do muse ibana tu kebaktian wilayah. Dung sataon, tardidi ma ibana. Jadi pikkirhon ma, ‘Aha do na menarik tu halak na naeng hukunjungi on? Boha ma carana asa olo ibana marsiajar Bibel?’

14. Songon dia do hita menyesuaihon caratta manguluhon parsiajaran Bibel tu ganup halak?

¹⁴ Tikki naeng manguluhon parsiajaran Bibel hamu, denggan ma hamu persiapan. Pikkirhon ma aha do latar belakang ni nasida, jala aha do na menarik tu ganup parsiajar Bibelmuna i. Tikki persiapan, pillit ma ayat dia do na lao jahaonmu, video aha do na lao diputar hamu, jala tudosan aha do na naeng pakkeonmu lao mangajarhon hasittongan sian Bibel. Pikkirhon ma, ‘Hira-hira aha do na menarik di parsiajar Bibelhu, asa boi hona parsiajaran on tu rohana?’ (Poda 16:23) Di Albania, adong sahalak borua na hea marsiajar tu sahalak perintis na margoar si Flora. Hea do didok borua i, “Dang boi dope tarjalo au ajaran taringot haheheon i.” Alai dang olo si Flora pittor mamaksa ibana asa porsea tu ajaran i. Didok ibana, “Huhilala asa porsea ibana tu ajaran taringot haheheon, porlu do ditanda ibana parjolo ise do Debata na mangalehon janji i.” Jadi, molo marsiajar Bibel nasida, jotjot do dipaboa si Flora taringot holong ni Jahowa, bisukna dohot huasona. Ujungna, gabe porsea ma borua i tu haheheon. Jala saonari, nungnga gabe sahalak Sitindangi na ringgas ibana.

15. Songon na didok di Ulaon ni Apostel 17:16-18, aha do tantangan na diadopi si Paulus tikki marbarita tu halak Junani, alai boasa dang menyerah ibana marbarita tu halak Atena?

¹⁵ Jaha Ulaon ni Apostel 17:16-18. Dang menyerah si Paulus marbarita tu halak Atena, nang pe godang nasida na manomba gana-ganaan, mangulahon na rorang, mangihutton ajaran na sala, jala godang do nasida na mangarehei si Paulus. Si Paulus sandiri pe hea do ‘mangaleai Debata jala mangalelei naposona’. (1 Tim. 1:13) Alai ujungna, gabe halak Kristen do ibana. Pos do roha ni Jesus boi do si Paulus gabe halak Kristen. Jadi si Paulus pe songon i do mangida halak Atena on. Jala tutu do memang adong piga-piga sian nasida na gabe halak Kristen.​—Ul. 9:13-15; 17:34.

16-17. Aha do bukti na patuduhon manang songon dia pe halakna boi do ibana gabe sisean ni Jesus? Paboa ma contohna.

¹⁶ Di abad na parjolo, godang do halak sian marragam bangso na gabe sisean ni Jesus. Tikki dibahen si Paulus surat tu akka halak Kristen na di Korint, didok ibana adong do piga-piga sian nasida najolo na mangulahon na jahat manang mangulahon seks na so patut. Dung i didok ibana ma, ‘Adong do deba sian hamu na songon i pangalahona najolo. Alai, nungnga dipaias be hamu’. (1 Kor. 6:9-11) Molo di tikki i hamu mangolu, pos do rohamu boi nasida muba jala gabe sisean ni Jesus?

 ¹⁷ Saonari on, godang do halak na olo mambahen hamubaon asa boi gabe sisean ni Jesus. Misalna, di Australia adong sahalak perintis istimewa na margoar si Yukina. Hea ma ibana ro tu kantor bisnis properti. Disi, diida ibana ma adong sahalak borua na poso na martato. Didok ibana, “Di mulana, dang pos rohakku boi makkatai tu ibana, alai hucoba ma makkatai. Hape lomo do roha ni borua i tu isi ni Bibel, jala adong do tatona na marisi ayat sian bukku Psalmen.” Ujungna, olo do ibana marsiajar Bibel jala ro tu parpunguan. Gabe diboto si Yukina ma, manang songon dia pe halakna, boi do ibana muba dung manangihon barita na uli. *

18. Boasa dang boi hita pittor manguhumi halak?

¹⁸ Ala na pos do roha ni Jesus pasti godang halak na mangihutton ibana, umbahen didok ibana nungnga boi panenon akka eme i? Daong. Nungnga disurirangkon hian di Bibel dang godang halak na olo porsea tu ibana. (Joh. 12:37, 38) Jala diboto Jesus do aha na di bagasan roha ni sasahalak. (Mat. 9:4) Alai nang pe songon i, toktong do ibana rade mangurupi akka halak na olo porsea tu ibana. Jala, marbarita do ibana tu sude halak. Tarlumobi ma hita, dang taboto aha na di bagasan roha ni sasahalak, jadi unang ma pittor tadok dang olo halak na di luatta manangihon barita na uli. Alai taida ma nasida gabe calon sisean ni Jesus. Sahalak Misionaris na sian Burkina Faso na margoar si Marc mandok, “Jotjotan do huida halak na ringgas di mulana gabe dang olo be marsiajar Bibel. Hape halak na so semangat berengon gabe lam ringgas marsiajar. Sian on gabe huparsiajari ma, toktong ma taasahon tondi parbadia ni Jahowa, asa i na manogu-nogu hita.”

19. Ikkon songon dia do hita mangida akka halak na di luatta?

¹⁹ Di mulana, olo do ra tahilala otik do halak di luatta na dos songon eme na boi panenon. Alai, ingot ma aha na didok Jesus tu akka siseanna. Nungnga masak be eme i jala boi panenon. Jadi boi do akka halak mambahen hamubaon jala gabe sisean ni Kristus. “Hasudungan ni roha” ni Jahowa do akka halak sisongon i. (Hag. 2:7) Molo tatiru cara ni Jahowa dohot Jesus mangida nasida, gabe lomo ma rohatta naeng mamboto aha latar belakang ni nasida jala aha do na menarik di nasida. Taida ma nasida gabe calon dongan sahaporseaonta, dang songon mangida halak na so tinanda.