1-2. ?From wanem Jisas i talem ol tok blong Jon 4:35, 36?

TAEM Jisas i stap wokbaot i go long Galili, hem i pastru long ol garen we ating oli planem sid ya bale long hem. (Jon 4:3-6) Long fo manis, kakae ya bambae i rere. Be Jisas i talem wan samting we maet i narakaen long tingting blong ol man, i se: “Yufala i traem lukluk ol garen, ol kakae oli rere finis blong go tekemaot.” (Ridim Jon 4:35, 36.) ?Hem i minim wanem?

² Jisas i stap talem wan pijatok, blong soemaot se ol man oli olsem kakae we i rere finis long garen. Tingbaot samting we i jes hapen. Nating se ol man Jiu oli no toktok long ol man Sameria, be Jisas i prij long wan woman Sameria. !Woman ya i lesin mo i go tokbaot Jisas long ol narafala! Taswe, long sem taem we Jisas i stap tokbaot ‘ol kakae we oli rere finis,’ plante man Sameria oli stap kam blong harem tijing blong hem. (Jon 4:9, 39-42) Wan buk blong eksplenem Baebol i tokbaot samting ya, i se: “Ol man ya oli wantem tumas blong kam luk Jisas. . . . Hemia i soemaot se oli olsem kakae we i rere finis blong tekemaot long garen.”

3. Sipos yu gat sem tingting olsem Jisas, ?hemia bambae i givhan long yu olsem wanem long wok blong prij?

³ ?Olsem wanem long ol man we yu yu talemaot gud nius long olgeta? ?Yu tingbaot olgeta olsem kakae we i rere blong tekemaot long garen? Sipos i olsem, i gat tri samting we bambae yu mekem. Faswan: Bambae yu prij wetem tingting ya se taem i sot. I gat smoltaem nomo blong tekemaot kakae long garen. !Yu no mas westem taem! Seken samting: Bambae yu  glad taem man i lesin long gud nius. Baebol i talem se: “Ol man oli hapi long taem we oli stap tekemaot ol kakae long garen.” (Aes. 9:3) Namba tri samting: Bambae yu tingbaot evri man we yu prij long olgeta, se oli save kam disaepol blong Kraes. Taswe, bambae yu jenisim toktok blong yu, blong mekem i laenap wetem samting we oli intres long hem.

4. Long stadi ya, ?bambae yumi lanem wanem trifala samting long eksampol blong aposol Pol?

⁴ Maet sam man blong Jisas oli ting se ol man Sameria oli no save kam disaepol, be Jisas i no gat tingting olsem. Hem i tingbaot se olgeta tu oli save kam disaepol. Yumi mas gat sem tingting long ol man long teritori blong yumi. Long stadi ya, bambae yumi tokbaot tri samting we yumi lanem long nambawan eksampol blong aposol Pol: (1) Hem i traem kasem save long bilif blong ol man we hem i prij long olgeta, (2) hem i luksave samting we oli intres long hem, mo (3) hem i tingbaot se ol man ya oli save kam ol disaepol blong Jisas.

5. ?From wanem Pol i kasem save long tingting blong ol man long sinagog?

⁵ Plante taem Pol i prij long sinagog blong ol man Jiu. Hem i prij long sinagog long Tesalonaeka blong “tri Sabat dei, hem i stap toktok plante long ol man [Jiu], i askem kwestin long olgeta blong mekem oli tingting gud long ol tok blong Baebol.” (Wok 17:1, 2) Ating i no had blong Pol i prij insaed long sinagog, from we hem tu i wan man Jiu. (Wok 26:4, 5) Hem i kasem save long tingting blong olgeta, taswe hem i no fraet blong prij long sinagog.—Fil. 3:4, 5.

6. ?Olsem wanem ol man long ples blong maket long Atens oli defren long ol man long sinagog?

⁶ Taem ol man oli agensem Pol long Tesalonaeka mo Berea, hem i go long Atens. Bakegen, “hem i go long sinagog, i stap toktok plante mo i askem plante kwestin long ol man Jiu mo ol narafala man we oli stap mekem wosip long God, blong mekem oli tingting.” (Wok 17:17) Be taem Pol i prij long ples blong maket, hem i mitim ol man we oli gat defren tingting. Samfala oli gat fulap waes blong wol, mo sam we oli no man Jiu, oli ting se Pol i stap talemaot wan “niufala tijing.” Oli talem se: “Sam long ol tok ya we yu yu stap talem, mifala i harem se oli defren olgeta.”—Wok 17:18-20.

7. Folem Ol Wok 17:22, 23, ?olsem wanem Pol i jenisim toktok blong hem?

⁷ Ridim Ol Wok 17:22, 23. Ol tok we Pol i talem long olgeta we oli no man Jiu long  Atens, i no sem mak long ol tok we hem i talem long ol man Jiu long sinagog. Ating Pol i tingbaot se: ‘?Wanem bilif blong ol man Atens ya?’ Hem i lukluk gud ol samting we oli stap raonabaot long hem, mo i makem ol kastom we ol man oli folem long skul blong olgeta. Nao taem hem i prij long olgeta, hem i tokbaot fastaem sam bilif blong olgeta we oli laenap wetem Baebol. Wan buk we i eksplenem Baebol i talem se: “Pol i wan man Jiu mo i wan Kristin, taswe hem i save se ol man Gris oli no wosipim God blong ol man Jiu mo ol Kristin. Be hem i traem blong soemaot long ol man Atens se, oli save smol long God ya we hem i stap talemaot. Taswe Pol i jenisim toktok blong hem. Hem i talem long olgeta se, tok we hem i talemaot i kamaot long wan God we oli stap traem blong wosipim, be “oli no save hem.” Olgeta we oli no man Jiu oli no save gud Baebol, be Pol i no ting se neva bambae oli kam Kristin. Hem i tingbaot olgeta olsem ol kakae we i rere blong tekemaot long garen, mo hem i jenisim toktok blong hem blong talemaot gud nius long olgeta.

8. (1) ?Olsem wanem blong luksave bilif blong ol man? (2) Sipos man i talem se hem i gat skul finis, ?yu save talem wanem?

⁸ Olsem Pol, yu mas lukluk gud ol samting raonabaot long yu. Traem luksave samting we ol man oli bilif long hem. ?Yu luk sam samting long yad blong olgeta we i soemaot bilif blong olgeta? Maet nem blong olgeta, klos, hea, o toktok blong olgeta, oli soemaot se oli blong wanem skul. Wan sista we i spesel paenia, i traem luksave ol samting ya, nao hem i talem se: “Mi no kam blong fosem yu blong bilif olsem mi, be mi kam blong tokbaot . . . ”

9. ?Yu save tokbaot wanem wetem wan man we i gat skul finis?

⁹ ?Yu save tokbaot wanem wetem wan man we i gat skul finis? Traem faenem wan samting we yutufala i agri long hem. Maet hem i bilif se i gat wan God nomo, Jisas i sevem yumi, o yumi stap laef long las dei. Yu save yusum ol samting ya blong serem tok blong Baebol wetem hem. Sipos yu mekem olsem, maet hem i glad blong lesin.

10. ?Yu mas traem blong mekem wanem? ?From wanem?

¹⁰ Yu mas tingbaot se plante man oli no bilif long evri samting we skul blong olgeta i tijim. Taswe, nating se yu save wanem skul we man i go long hem, i gud yu traem faenemaot prapa bilif blong hem. Deved, we i wan spesel paenia long Ostrelia, i talem se: “Naoia plante man oli miksimap samting we oli lanem long skul blong olgeta wetem waes blong wol.” Donalta blong Albania, i talem se: “Samfala oli  talem se oli gat skul finis, be biaen yumi faenemaot se oli no bilif long God.” Wan brata we i misinari long Ajentina, i talem se samfala we oli se oli bilif long Triniti, oli no bilif se Papa, Pikinini, mo tabu spirit oli wan. Hem i se: “Taem yumi save samting ya, i isi moa blong agri wetem olgeta long wan samting.” Taswe, yu mas traem faenemaot bilif blong ol man wanwan. Olsem nao, bambae yu folem fasin blong Pol, we i ‘mekem evri samting we hem i naf blong mekem blong givhan long enikaen man.’—1 Kor. 9:19-23.

11. Folem Ol Wok 14:14-17, ?wanem ol tok we Pol i yusum blong pulum tingting blong ol man Listra?

¹¹ Ridim Ol Wok 14:14-17. Pol i luksave samting we ol man oli intres long hem, nao i jenisim toktok blong hem. Taem hem i toktok long wan bigfala hip blong man long Listra we oli no save gud Baebol, hem i yusum ol tok we i pulum tingting blong olgeta. Hem i tokbaot kakae long garen, mo samting we i save mekem olgeta oli harem gud. Hem i yusum ol tok mo pijatok we ol man ya oli kasem save gud.

12. ?Olsem wanem blong luksave samting we man i intres long hem mo jenisim toktok blong yu?

¹² Traem luksave samting we ol man long teritori blong yu oli intres long hem, mo jenisim toktok blong yu. ?Olsem wanem blong luksave samting we man i intres long hem? Bakegen, yu mas lukluk evri samting raonabaot long yu. Ating man ya i stap wok long yad, i ridim wan buk, i fiksimap trak, o i mekem wan narafala wok. I gud yu traem tokbaot samting ya blong statem wan storian. (Jon 4:7) Klos blong man tu i save soemaot plante samting, olsem kantri o wok blong hem, o tim blong spot we hem i laekem. Gustavo i talem se: “Mi statem wan storian wetem wan yangfala we i gat 19 yia, mo long sot blong hem i gat pija blong wan man blong singsing. Mi tokbaot samting ya, mo hem i talem from wanem hem i laekem man ya. Biaen, hem i agri blong stadi Baebol, mo naoia hem i wan brata.”

13. ?Olsem wanem blong pulum ol man blong oli wantem stadi Baebol?

 ¹³ Taem yu askem long wan man sipos hem i wantem stadi Baebol, traem pulum hem blong i luksave olsem wanem stadi bambae i givhan long hem. (Jon 4:13-15) Traem tingbaot samting we wan sista i mekem taem wan woman i singaot hem i kam insaed. Hem i luk wan setifiket i hang long wol blong haos, we woman ya i kasem taem hem i stadi long saed blong edukesen. Sista i talem se yumi tu yumi intres long edukesen, taswe yumi stadi Baebol wetem ol man mo mekem ol miting. Woman ya i glad blong stadi, mo long nekis dei hem i go long miting, mo smoltaem biaen hem i go long wan dei asembli. Wan yia biaen, hem i baptaes. I gud yu askem se: ‘?Ol visit blong mi oli intres long wanem? ?Mi mi save tokbaot Baebol stadi long fasin we i pulum olgeta blong oli wantem stadi?’

14. ?Yu save mekem wanem blong givhan long ol stadi wanwan?

¹⁴ Yu mas rere gud from ol Baebol stadi. Blong mekem olsem, yu tingbaot laef blong olgeta wanwan, ples we oli gruap long hem, mo samting we oli intres long hem. Taem yu rerem stadi, yu jusum ol vas, ol video, mo ol pijatok we yu save yusum blong eksplenem ol tijing blong Baebol. Yu traem askem se: ‘?Mi save mekem wanem blong kasem hat blong man ya?’ (Prov. 16:23) Long Albania, Flora we i wan paenia, i stadi wetem wan woman we i talem stret se: “Mi no bilif se yumi save laef bakegen.” Flora i no fosem hem. Hem i talem se: “Mi tingbaot se fastaem hem i mas save God ya we i promes blong mekem man i laef bakegen.” Stat long taem ya, long evri stadi, Flora i makem gud lav, waes, mo paoa blong Jehova. Sloslo, stadi blong hem i bilif long laef bakegen. Naoia hem i wan Witnes blong Jehova we i wok wetem strong tingting.

15. Folem Ol Wok 17:16-18, ?wanem fasin blong ol man Atens bifo? ?From wanem Pol i gohed blong prij long olgeta?

¹⁵ Ridim Ol Wok 17:16-18. Taon ya Atens i fulap long ol aedol, ol doti fasin blong seks, mo waes blong ol hiten man, be Pol i no lego ol man ya. Nating se oli tok nogud long hem, be hem i gohed nomo blong prij long olgeta. Bifo, Pol tu i ‘stap tok nogud long God, i ronem mo kilim ol man blong hem, mo i no gat respek nating long ol narafala.’ Be biaen, hem i kam wan Kristin. (1 Tim. 1:13) Jisas i tingbaot se Pol i save jenis, mo long sem fasin, Pol i tingbaot se sam man Atens tu oli save jenis. Mo hemia nao samting we i hapen.—Wok 9:13-15; 17:34.

16-17. ?Olsem wanem yumi save se ol defdefren kaen man oli save kam disaepol blong Kraes? Talem wan stori.

¹⁶ Long taem blong ol fas Kristin, ol defdefren kaen man oli kam disaepol blong Jisas. Taem Pol i raetem leta long ol Kristin long taon ya Korin long Gris, hem i tokbaot ol rabis fasin we sam long olgeta oli bin mekem, mo hem i talem se: “Bifo sam long yufala oli olsem nao. Be God i wasem yufala, i mekem yufala i klin finis.” (1 Kor. 6:9-11) Sipos yu, ?bambae yu ting se ol man ya oli save jenis mo kam disaepol?

¹⁷ Tede, plante man oli stap mekem ol bigfala jenis long laef blong olgeta blong kam disaepol blong Jisas. Long Ostrelia, wan spesel paenia we nem blong hem Yukina, i luksave se ol defdefren kaen man oli save lesin long gud nius. Wan dei, hem i go long wan ofis mo i mitim wan yangfala woman we i gat tatu olbaot long bodi blong hem, mo i werem klos we i olbaot. Yukina i talem se: “Fastaem mi fraet smol, be taem mi toktok wetem hem mi faenemaot se hem i intres bigwan long Baebol. !Sam long ol tatu we hem i gat, oli vas blong  Ol Sam!” Woman ya i agri blong stadi mo i kam long ol miting. *

18. ?From wanem yumi no mas jajem ol man?

¹⁸ ?Olsem wanem? ?Taem Jisas i talem se ol kakae oli rere blong tekemaot long garen, hem i gat tingting se bighaf blong ol man bambae oli kam disaepol blong hem? Nogat. Baebol i talemaot finis se smol man nomo bambae oli bilif long hem. (Jon 12:37, 38) Mo Jisas i naf blong save wanem i stap long hat blong man. (Mat. 9:4) Nating se i olsem, hem i prij long olgeta man, from we hem i wantem faenem samfala we bambae oli bilif long hem. !Taswe, from we yumi no naf blong save wanem i stap long hat blong man, yumi no mas jajem ol man long teritori blong yumi! Be yumi mas tingbaot se oli save kam disaepol. Mak, we i wan misinari long Bukina Faso, i talem se: “Ol man we mi mi ting se bambae oli gohed gud, plante taem oli lego, be ol man we mi ting se bambae oli lego, oli gohed gud. Taswe mi lanem se i moagud blong letem Jehova i lidim mi.”

19. ?Yumi mas gat wanem tingting long ol man long teritori blong yumi?

¹⁹ Fastaem, maet yu ting se i no gat plante man long teritori blong yu we oli save kam disaepol. Be yu mas tingbaot samting we Jisas i talem long ol disaepol blong hem se, ol kakae oli rere finis blong tekemaot long garen. Ol man oli save jenisim fasin blong olgeta mo kam ol disaepol blong Kraes. Jehova i tingbaot ol man ya olsem “ol gudgudfala samting.” (Hag. 2:7) Sipos yumi gat tingting blong Jehova mo Jisas, bambae yumi traem kasem save long laef blong ol man, ples we oli gruap long hem, mo samting we oli intres long hem. Bambae yumi no tingbaot olgeta olsem ol strenja, be olsem ol man we oli save kam ol brata mo sista blong yumi.