1-2. Aha do ra maksud hata ni Jesus na isurat bani Johannes 4:35, 36?

SANGGAH Jesus pakon susianni i pardalanan, ibottasi sidea ma sada juma na laho sabion hira-hira ompat bulan nari. (Joh. 4:3-6) Hape mintor ihatahon Jesus ma sonon, “Mangkawah ma hanima, tonggor hanima ma juma in, domma gorsing, boi ma sabion.” (Basa Johannes 4:35, 36.) Aha do maksudni na ihatahon Jesus ai?

² Hapeni pasal halak na laho ipatumpu na laho gabe susianni do na ihatahon Jesus ai, sedo pasal omei na laho sabion. Mase sonai ihatahon Jesus? Hassi pe halak Jahudi lang marsaor pakon halak Samaria, tapi totap do Jesus marbarita bani sada naboru hun Samaria. Janah ra do naboru ai manangihon Jesus. Sasintongni sanggah Jesus patugahkon pasal juma na “domma gorsing” janah “boi ma sabion”, bahat halak Samaria na dob manangar pasal Jesus humbani naboru ai, sihol manjumpahi Jesus laho manangar ajaranni. (Joh. 4:9, 39-42) Sada referensi Alkitab patugahkon, “Halani mintor roh sidea manjumpahi Jesus, taridah ma anggo sidea usih songon omei na laho sabion.”

3. Anggo itiru ham Jesus, mase ai mambahen ham gabe parbarita na lambin dear?

³ Sonaha pangahapmu mangidah halak i iananmu marbarita? Ai iahap ham do sidea usih songon suan-suanon na laho sabion? Anggo sonai, dong tolu na laho bahenonmu. Na parlobei, lambin ringgas ma ham marbarita. Halani dong do batasni panorang pariama ai, tontu lang ra ham soya-soya panorangmu. Na paduahon, malas do uhurmu mangidah halak na ra manangar barita na madear. Bibel mangkatahon, ‘Marmalas ni uhur do halak sanggah pariama.’ (Jes. 9:2) Anjaha na patoluhon, anggo ibayangkon ham ganup do halak boi iurupi gabe susian, tontu marusaha ma ham sonaha ase baritamu ai iharosuhkon ganup halak.

4. Bani artikel on aha do na iparlajari hita humbani si Paulus?

 ⁴ Piga-piga susian ni Jesus marpingkir anggo halak Samaria ai, lang boi gabe susian ni Jesus. Tapi anggo Jesus lang sonai. Hita pe maningon songon Jesus do pingkiranta. Dong siusihan na jenges na ibere apostel Paulus hubanta. Bani artikel on iulas hita ma holi sanggah marbarita sonaha ia mambotoh (1) aha na ihaporsayai halak, (2) aha na iharosuhkon halak, janah (3) mambayangkon boi do holi sidea gabe susian ni Jesus.

5. Mase boi ibotoh si Paulus aha na ihaporsayai halak Jahudi?

⁵ Somal do si Paulus marbarita i sinagoga. Umpamani i Tessalonika, “marsahap ma ia bani [halak Jahudi] tolu ari Sabat tuntun humbani surat in”. (Lah. 17:1, 2) Paima gabe halak Kristen, ugama ni halak Jahudi do na iihutkon ia. Ra, halani ai gabe marosuh ma ia marbarita i sinagoga. (Lah. 26:4, 5) Halani ibotoh ia aha na ihaporsayai halak Jahudi ai, gabe urah ma ia marbarita bani sidea.​—Pil. 3:4, 5.

6. Sanggah si Paulus marbarita i Aten, aha ma bedani halak na i sinagoga pakon halak na i tiga?

⁶ Dobkonsi si Paulus iparburu janah iusir hun Tessalonika ampa Beroa, das ma ia i Aten. Laho ma homa ia hu sinagoga janah martukar pingkiran ma ia pakon “halak Jahudi ampa sihabiari Naibata”. (Lah. 17:17) Tapi sanggah laho si Paulus hu tiga, ibotoh ia ma bahat do halak na lang halak Jahudi ijai. Dong parpilsapat janah dong homa halak hun marbagei bangsa. Iahap sidea ma na ihatahon si Paulus ai ajaran atap “podah na baru”. Jadi nini sidea ma, “Songon na legan do podah na binobanmin bennami.”​—Lah. 17:18-20.

7. Domu bani Lahoan 17:22, 23, naha ma bahenon ni si Paulus ase ra halak manangar barita na madear?

⁷ Basa Lahoan 17:22, 23. Sanggah i Aten, legan do cara ni si Paulus marbarita bani halak Jahudi pakon halak hun bangsa na legan. Ra do nini uhurni, ‘Aha do nani na ihaporsayai halak Aten on?’ Jadi ipardiateihon ia ma hasomalan ni sidea ampa haporsayaonni. Dob ai, marusaha ma ia pasosokkon baritani. Sahalak pakar Alkitab mangkatahon, “Mintor ibotoh si Paulus ma naibata na isombah sidea sedo Naibata na ‘sintong’, na isombah halak Jahudi ampa halak Kristen. Hassi pe sonai marusaha do ia patugahkon Naibata na itanda sidea do na laho baritahononni.” Jadi marusaha ma si Paulus ase ra sidea manangar baritani. Ihatahon ia ma bani halak Aten ai anggo barita na iboan ia ai roh humbani “Naibata na So Tinanda”, na sadokah on sihol isombah sidea. Hassi  pe sidea ai lang mambotoh Hata ni Naibata, lang iahap si Paulus sidea lang boi gabe halak Kristen. Tapi songon suan-suanon na laho sabion do sidea ididah si Paulus. Halani ai marusaha ma ia ase ra sidea manangar barita na madear.

8. (a) Sanggah marbarita, sonaha ase ibotoh hita aha na ihaporsayai halak? (b) Sanggah dong na mangkatahon anggo ia domma marugama aha ma balos ni nasiam?

⁸ Songon si Paulus, sanggah ham marbarita pardiateihon ma tanda-tanda na boi mangurupi ham mambotoh aha do na ihaporsayai halak. Umpamani, pardiateihon ma hiasan atap pe ugas-ugas na dong i rumahni. Leganni ai, humbani goran atap parpakeianni boi do ra ibotoh ham ugamani. Atap ra do homa dong halak na mintor patugahkon anggo ia domma marugama. Anggo dong na mangkatahon sisonai, somal do sahalak parintis istimewa na margoran si Flutura mambalosi sonon, “Hanami roh amboru sedo laho mangubah ugama ni nasiam, tapi hanami sihol mangulas pasal on . . . ”

9. Aha ma na sosok iulas ham pakon halak na ringgas marugama?

⁹ Aha ma na sosok iulas ham pakon halak na ringgas marugama? Pindahi ma atap adong do na ihaporsayai ia na domu bani Bibel. Ra, Naibata na sintong do na isombah ia, janah iakui ia do Jesus in sipaluah jolma. Atap porsaya do ia lang piga dokah nari iripaskon ma ganupan parjahat. Dob ai gunahon ma topik ai laho padaskon barita ni Bibel. Anggo sonai ibahen ham, ra do gabe rosuh ia manangar baritamu.

10. Aha ma na maningon bahenonta, janah mase?

¹⁰ Dong do homa halak na lang porsaya bani ganup na iajarhon ugamani. Jadi hassi pe domma mambotoh aha ugamani, marusaha ma mambotoh aha do sasintongni na ihaporsayai ia. Si David sahalak parintis istimewa hun Australia mangkatahon, “Ipadomu halak do ugamani pakon ajaran pilsapat.” Sahalak hasomanta naboru hun Albania mangkatahon, “Dong do piga-piga na mangaku anggo sidea domma marugama, tapi dob ai mangkatahon anggo sidea lang porsaya dong do Naibata ai.” Sahalak misionaris i Argentina mangkatahon, “Dong do homa na mangaku porsaya bani naibata si tolu sada, tapi sasintongni lang iarusi sidea ajaranni ai.” Nini use, “Anggo domma hubotoh aha na ihaporsayai sidea lambin urah ma ahu pasosokkon baritangku.” Halani ai marusaha ma mangindahi aha do na ihaporsayai halak. Dob ai, boi ma ‘iparomban nasiam dirimu bani haganup’.​—1 Kor. 9:19-23.

11. Domu bani Lahoan 14:14-17, sonaha si Paulus pasosokkon baritani bani halak i Listra?

¹¹ Basa Lahoan 14:14-17. Marusaha do si  Paulus mambotoh aha na iharosuhkon halak ase boi ipasosok ia baritani. Contohni sanggah i Listra bahat do halak na ijai lang sai mangarusi Hata ni Naibata. Dong do homa na lang mambotoh age otik. Halani ai, na ibotoh sidea ma na iulas si Paulus. Umpamani pasal pariama atap pe na mambahen malas uhur. Igunahon ia do contoh-contoh na urah iarusi sidea.

12. Ase boi pasosokkon baritamu, sonaha ham boi mambotoh aha na iharosuhkon halak?

¹² Nasiam pe marusaha ma mambotoh aha na iharosuhkon halak i iananmu marbarita, janah pasosok ma baritamu. Sonaha ham boi mambotoh aha na iharosuhkon halak na laho ijumpahi ham? Pardiateihon ma aha na ihorjahon sidea. Atap na mangurus taman do ia, mambasa buku, padearhon motorni atap na leganni. Anggo sosok pungkah ma parsahapan domu bani na ihorjahon ia. (Joh. 4:7) Gari humbani pakeanni pe boi do ibotoh hita asalni, horjani, atap tim olahraga na iharosuhkon sidea. Sahalak saninanta na margoran si Gustavo mangkatahon, “Dong sada garama na marumur 19 tahun mamakei kaos na margambar artis na tarsar. Husungkun ma bani pasal artis ai. Jadi ipatugah ia ma bangku mase marosuh ia hu bani. Dob marbuali ai hanami gabe ra ma ia marlajar Bibel janah sonari domma gabe saninanta ia.”

13. Aha ma na boi ibahen ham ase rosuh halak marlajar Bibel?

¹³ Sanggah ham mangarahkon halak marlajar Bibel, patorang ma aha do gunani ai bani ase ra ia marlajar. (Joh. 4:13-15) Umpamani, sanggah hasomanta si Poppy marbarita, dong sada naboru na manuruh ia masuk hu rumahni. Ipardiateihon ia ma dong ijasah na gantung i rumahni. Gabe ibotoh si Poppy ma, anggo naboru ai sahalak dosen hun sikolah pendidikan. Jadi ihatahon si Poppy ma anggo Saksi-Saksi Jahowa rosuh mangajari halak marhitei parlajaran Bibel ampa partumpuan. Gabe ra ma naboru ai marlajar Bibel, janah patarni roh hu partumpuan. Roh do homa ia hu kebaktian. Dobkonsi satahun ididi ma ia. Jadi  pingkirhon ma, ‘Aha do na iharosuhkon kunjunganku? Sanggah ahu mangarahkon halak marlajar Bibel, sonaha do hubahen ase halak marosuh marlajar?’

14. Sanggah mambahen persiapan, aha do na porlu ipingkirhon ham ase parlajaran ai boi hona bani uhur?

¹⁴ Anggo dong parlajar Bibelmu, bahen ma persiapan paima marlajar nasiam. Pingkirhon ma pasal kaluargani, sikolahni, ampa na iharosuhkon ia. Sanggah persiapan tontuhon ma ayat na laho ibasa, video na laho iputar, ampa limbaga na laho igunahon laho patorangkon ajaran ni Bibel. Rimangi ma, ‘Na ija do na iharosuhkon ia ase boi hona bai uhurni.’ (Pod. 16:23) Dong sada parintis na i Albania margoran si Flora, mangurupi sada naboru marlajar Bibel. Sanggah na marlajar ai ihatahon naboru ai ma bani, “Huahap lang tongon dong parpuhoon ai.” Sanggah ai lang mintor ipaksa si Flora naboru ai ase porsaya. Nini si Flora ma “Maningon itanda ia do lobei Naibata na manjanjihon parpuhoon ai.” Jadi, tiap marlajar sidea iurupi si Flora ma naboru ai ase mangarusi anggo Jahowa ai parholong, pentar, janah parkuasa. Ujungni, porsaya ma naboru ai bani parpuhoon janah sonari domma gabe sahalak Saksi ia.

15. Domu bani Lahoan 17:16-18, sonaha do parlahou ni halak i Aten, tapi mase si Paulus totap marbarita bani sidea?

¹⁵ Basa Lahoan 17:16-18. Hassi pe i Aten bahat halak na manombah gana-gana, mangkorjahon parriah-riahon, janah bahat do homa parpilsapat, lang mintor iahap si Paulus anggo sidea lang boi gabe susian ni Jesus. Janah hassi pe bahat halak na manrisai ia, totap do ia marbarita bani sidea. Si Paulus sandiri sahalak ‘sipanrisai, siparburu ampa siunsagahkon gogohni hinan’ do ia paima gabe halak Kristen. (1 Tim. 1:13) Tapi porsaya do Jesus boi do ia mubah janah gabe susianni. Sonai ma homa na ibahen si Paulus bani halak Aten ai. Ujungni dong do na mubah janah gabe susian ni Jesus.​—Lah. 9:13-15; 17:34.

16-17. Patugah ma contoh na patuduhkon marmasam-masam do halak na gabe susian ni Jesus.

¹⁶ Bani abad na parlobei marmasam-masam do halak na gabe susian ni Jesus. Sanggah si Paulus manulis surat hubani halak Kristen na i kota Korint i Junani, ipatugah ia ma na i kuria ai hinan dong do na sambor parlahouni. Nini ma, “Sisonai do nasiam deba lobei. Tapi domma nasiam iburihi.” (1 Kor. 6:9-11) Porini ham manggoluh bani panorang ai, porsaya do homa ham anggo halak sisonai boi mambahen hamubahon janah mangirikkon Jesus?

¹⁷ Sonari pe bahat do halak na mambahen hamubahon ase boi gabe susian ni Jesus. Umpamani, pardiateihon ma pangalaman ni sahalak perintis istimewa i Australia na margoran si Yukina. Bani sada ari sanggah i tiga, dong sahalak naboru na martato. Nini si Yukina ma, “Mungkahni bumbang do ahu mamparsahapkonsi. Tapi ujungni marusaha ma ahu marbarita hu bani. Hape marosuh tumang do ia manangar barita pasal Bibel. Dob hupardiateihon tatoni ai dong piga-piga na ibuat hun buku Psalmen.” Ujungni gabe ra ma naboru ai marlajar Bibel janah martumpu. * Hunjai gabe ibotoh si Yukina ma, boi do halak mambahen hamubahon dob manangar barita ni Bibel.

18. Mase hita lang boi manguhumi halak?

¹⁸ Sanggah ihatahon Jesus domma gorsing juma in janah boi ma sabion, ai mangarap do ia ganupan halak gabe susianni? Lang sonai.  Marhitei panjahaion, domma ibotoh Jesus bahatan do halak na lang porsaya hu bani. (Joh. 12:37, 38) Leganni ai, ibotoh Jesus do homa uhur ni jolma. (Mat. 9:4) Hassi pe sonai, totap do ipingkirhon ia sonaha mangurupi halak na porsaya hu bani, hassi pe otik sidea. Anggo hita, lang ibotoh hita uhur ni halak, tontu lang ra hita manguhumi halak bani iananta marbarita. Tapi pos do uhurta boi do holi sidea gabe susian ni Jesus. Si Marc sahalak misionaris i Burkina Faso mangkatahon, “Gati do huahap maju do holi na sahalak on, hape mintor soh do ia marlajar. Tapi dong do halak na huahap lang mungkin maju, hape ia do na maju. Hunjon hubotoh ma, maningon marpangunsandeian bani tonduy na pansing do hita sanggah mangurupi halak marlajar Bibel.”

19. Sonaha ma namin pangahapta bani halak i iananta sanggah marbarita?

¹⁹ Mungkahni ra do pangahapmu lang bahat halak na usih songon suan-suanon na laho sabion. Tapi dingat ma na ihatahon Jesus bani susianni. Domma gorsing juma in janah boi ma sabion. Sai adong do halak na mambahen hamubahon ase boi gabe susian ni Jesus. “Maharga” do sidea ai i lobei ni Jahowa. (Hag. 2:7) Jadi, anggo iusihi hita Jahowa pakon Jesus, tontu marusaha do hita laho mambotoh aha na ihaporsayai halak ampa na iharosuhkonni. Janah iahap hita ma boi do holi sidea gabe sanina botounta.